ຂ່າວຫຼ້າສຸດ

ຮ່ວມກັນແກ້ໄຂບັນຫາ ສິ່ງກີດຂວາງການດຳເນີນທຸລະກິດ

256 06 ກ.ກ. 2018 ຂ່າວໜ້າ​ໜຶ່ງ
ຮ່ວມກັນແກ້ໄຂບັນຫາ ສິ່ງກີດຂວາງການດຳເນີນທຸລະກິດ

    ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ຮ່ວມ​ກັບ ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ຈັດ​ກອງ​ປະ­ຊຸມ​ທຸ­ລະ​ກິດ​ລາວ ຄັ້ງ​ທີ 11 ຂຶ້ນ​ວັນ​ທີ 5 ກໍ­ລະ­ກົດ 2018 ທີ່​ໂຮງ­ແຮມ​ດອນ​ຈັນ​ພາ​ເລດ ນະ­ຄອນ­ຫຼວງ​ວຽງ​ຈັນ ໂດຍ​ເປັນ​ປະ­ທານ​ຮ່ວມ​ຂອງ ທ່ານ​ນາງ ເຂັມ​ມະ­ນີ ພົນ​ເສ­ນາ ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ແລະ ທ່ານ ອຸ​ເດດ ສຸ­ວັນ­ນະ​ວົງ ປະ­ທານ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ແລະ ພະ­ນັກ­ງານ​ຂະ­ແໜງ­ການ​ກ່ຽວ­ຂ້ອງ​ພາກ​ລັດ  ນັກ­ທຸ­ລະ­ກິດ ອົງ​ການ­ຈັດ­ຕັ້ງ​ສາ­ກົນ ແລະ ຄູ່​ຮ່ວມ​ພັດ­ທະ­ນາ.

    ເພື່ອ​ເປັນ​ການ​ປຶກ­ສາ​ຫາ­ລື​ກ່ຽວ​ກັບ​ຄວາມ​ຄືບ​ໜ້າ​ໃນ​ການ​ແກ້​ໄຂ​ບັນ­ຫາ​ຂໍ້​ຫຍຸ້ງ­ຍາກ​ຕ່າງໆ​ທີ່​ພາກ​ທຸ­ລະ​ກິດ​ປະ­ສົບ ແລະ ແຜນ­ການ ຂອງ​ລັດ­ຖະ­ບານ​ໃນ​ການ​ປັບ­ປຸງ​ສະ­ພາບ​ແວດ​ລ້ອມ​ການ​ດຳ­ເນີນ​ທຸ­ລະ​ກິດ​ໃນ​ລາວ ເຊິ່ງ​ທ່ານ​ລັດ­ຖະ­ມົນ­ຕີ ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ໄດ້​ກ່າວ​ຕໍ່​ກອງ​ປະ­ຊຸມ​ວ່າ: ການ​ປັບ­ປຸງ​ກົດ­ໝາຍ ແລະ ລະ­ບຽບ​ການ​ຕ່າງໆ ແມ່ນ​ເປັນ​ສ່ວນ​ໜຶ່ງ​ທີ່​ຈຳ­ເປັນ​ຕໍ່​ການ​ຂະ­ຫຍາຍ­ຕົວ​ຂອງ​ພາກ​ທຸ­ລະ​ກິດ​ເທົ່າ​ນັ້ນ ສິ່ງ​ສຳ­ຄັນ​ຕ້ອງ​ຮັບ­ປະ­ກັນ​ວ່າ​ກົດ­ໝາຍ ແລະ ລະ­ບຽບ​ການ​ຕ່າງໆ​ນັ້ນ ແມ່ນ​ຈະ​ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ​ຢ່າງ​ມີ​ປະ​ສິດ­ທິ​ຜົນ​ໃນ​ທຸກ​ລະ­ດັບ​ການ​ຄຸ້ມ​ຄອງ​ບໍ­ລິ­ຫານ​ຂອງ​ພາກ​ລັດ ກົນ​ໄກ​ການ​ປຶກ­ສາ​ຫາ­ລື​ພາຍ​ໃຕ້​ກອງ​ປະ­ຊຸມ​ຄັ້ງ​ນີ້ ຈະ​ເປັນ​ເຄື່ອງ­ມື​ສຳ­ຄັນ​ໃນ​ການ​ກວດ­ກາ​ຕິດ­ຕາມ​ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ ແລະ ລະ­ບຽບ​ການ​ຕ່າງໆ.

    ທ່ານ ອຸ​ເດດ ສຸ­ວັນ­ນະ​ວົງ ໄດ້​ມີ​ຄຳ​ເຫັນ​ຕໍ່​ກອງ​ປະ­ຊຸມ​ກ່ຽວ​ກັບ​ບົດ­ບາດ​ຄວາມ​ສຳ­ຄັນ​ຂອງ​ກອງ​ປະ­ຊຸມ​ທຸ­ລະ​ກິດ​ລາວ​ໃນ​ການ​ປັບ­ປຸງ​ສະ­ພາບ​ແວດ​ລ້ອມ​ທຸ­ລະ​ກິດ​ວ່າ: ຕັ້ງ­ແຕ່​ຜົນ­ສຳ­ເລັດ​ກອງ​ປະ­ຊຸມ​ລາວ​ຄັ້ງ​ທີ 10 ພາກ​ທຸ­ລະ​ກິດ​ສາ­ມາດ​ເຫັນ​ໄດ້​ວ່າ ຂະ​ບວນ​ການ​ປຶກ­ສາ​ຫາ­ລື ລະ­ຫວ່າງ ພາກ​ລັດ ແລະ ພາກ​ທຸ­ລະ​ກິດ​ແມ່ນ​ໄດ້​ຮັບ​ການ​ປັບ­ປຸງ​ດີ​ຂຶ້ນ​ໃນ​ທຸກ​ລະ­ດັບ ເປັນ­ຕົ້ນ ທາງ​ພາກ​ລັດ​ໄດ້​ມີ​ຄວາມ​ເອົາ­ໃຈ­ໃສ່​ໃນ​ການ​ແກ້​ໄຂ​ບັນ­ຫາ​ຂອງ​ພາກ​ທຸ­ລະ​ກິດ​ຢ່າງ​ເປັນ​ຮູບ​ປະ​ທຳ​ຫຼັງ​ກອງ​ປະ­ຊຸມ​ທຸ­ລະ​ກິດ​ລາວ ຄັ້ງ​ທີ 10 ໃນ​ເດືອນ​ມີ­ນາ 2017 ແມ່ນ​ມີ 4 ບຸ­ລິ­ມະ­ສິດ​ທີ່​ໄດ້​ຮັບ​ການ​ແກ້​ໄຂ​ເກືອບ​ສົມ­ບູນ​ແລ້ວ ແລະ ບັນ­ຫາ​ທີ່​ໄດ້​ມີ​ຄວາມ​ຄືບ​ໜ້າ­ທີ່​ດີ​ໃນ​ການ​ແກ້​ໄຂ 7 ບັນ­ຫາ ເຊິ່ງ​ກອງ​ປະ­ຊຸມ​ຄັ້ງ​ນີ້ ແມ່ນ​ມີ 3 ບັນ­ຫາ​ໃຫຍ່​ທີ່​ຍົກ​ຂຶ້ນ​ມາ​ປຶກ­ສາ​ຫາ­ລື​ກັນ​ຄື: ກຸ່ມ​ບັນ­ຫາ​ອາ­ກອນ​ປະ­ກອບ​ມີ ບັນ­ຫາ​ການ​ສົ່ງ​ຄືນ​ເງິນ​ອາ­ກອນ​ມູນ​ຄ່າ​ເພີ່ມ ແລະ ບັນ­ຫາ​ອາ­ກອນ​ຊົມ­ໃຊ້​ອິນ​ເຕີ​ເນັດ ກຸ່ມ​ບັນ­ຫາ​ການ​ອຳ­ນວຍ​ຄວາມ​ສະ­ດວກ​ດ້ານ​ການ​ຄ້າ ແລະ ການ​ຂົນ­ສົ່ງ​ໃນ​ລາວ ປະ­ກອບ​ມີ​ບັນ­ຫາ​ການ​ນຳ​ເຂົ້າ​ສິນ­ຄ້າ ແລະ ວັດ­ຖຸ​ດິບ​ທີ່​ໄດ້​ຮັບ​ການ​ຍົກ­ເວັ້ນ​ພາ­ສີ ແລະ ອາ­ກອນ​ມູນ​ຄ່າ​ເພີ່ມ ພາຍ​ໃຕ້​ກົດ­ໝາຍ​ສົ່ງ­ເສີມ​ການ​ລົງ­ທຶນ​ຕ້ອງ​ຜ່ານ​ຫຼາຍ​ຂອດ​ຂັ້ນ ແລະ ໃຊ້​ເວ­ລາ​ຫຼາຍ ການ​ນຳ​ເຂົ້າ​ສິນ­ຄ້າ​ດ່ານ​ປະ­ເພ­ນີ​ທີ່​ມີ​ລັກ­ສະ­ນະ​ການ​ຄ້າ ລາ­ຄາ​ຂົນ­ສົ່ງ​ສິນ­ຄ້າ​ພາຍ​ໃນ ແລະ ຕ່າງ­ປະ­ເທດ​ແພງ ຂັ້ນ​ຕອນ​ການ​ຂໍ­ອະ­ນຸ­ຍາດ​ຂົນ­ສົ່ງ​ສຳ­ລັບ​ການ​ຂົນ­ສົ່ງ​ສິນ­ຄ້າ​ຜ່ານ​ແດນ ແລະ ບັນ­ຫາ​ອຸ­ປະ­ສັກ​ຕໍ່​ການ​ພັດ­ທະ­ນາ​ຂະ­ແໜງ​ການ­ທ່ອງ­ທ່ຽວ  ພ້ອມ​ນັ້ນ ໜ່ວຍ​ງານ​ພາກ​ລັດ ແລະ ຕາງ­ໜ້າ​ທຸ­ລະ​ກິດ ແມ່ນ​ໄດ້​ຕົກ­ລົງ​ເຫັນ​ດີ​ຮັບ­ຮອງ​ເອົາ​ຫຼາຍ​ມາດ​ຕະ­ການ​ເພື່ອ​ເປັນ​ແນວ­ທາງ​ໃນ​ການ​ແກ້​ໄຂ​ບັນ­ຫາ​ທີ່​ຖືກ ແລະ  ພາຍ­ຫຼັງ​ກອງ​ປະ­ຊຸມ​ຄັ້ງ​ນີ້ ຄາດ​ວ່າ​ລັດ­ຖະ­ບານ​ຈະ​ອອກ​ໜັງ­ສື​ແຈ້ງ​ການ​ເປັນ​ຄຳ​ແນະ­ນຳ​ລາຍ​ລະ­ອຽດ ເພື່ອ​ຕິດ­ຕາມ​ການ​ແກ້​ໄຂ​ບັນ­ຫາ​ທີ່​ຍົກ​ຂຶ້ນ​ພາຍ​ໃຕ້​ຂະ​ບວນ​ການ​ປຶກ­ສາ​ຫາ­ລື​ຂອງ​ກອງ​ປະ­ຊຸມ​ທຸ­ລະ​ກິດ​ລາວ.

    ໂອ­ກາດ​ນີ້ ທ່ານ​ນາ­ຍົກ­ລັດ­ຖະ­ມົນ­ຕີ ໄດ້​ມີ​ຄຳ​ເຫັນ​ຕໍ່​ກອງ​ປະ­ຊຸມ​ກ່ຽວ​ກັບ​ຜົນ­ສຳ­ເລັດ​ທີ່​ສຳ­ຄັນ​ຂອງ​ລັດ­ຖະ­ບານ​ໃນ​ການ​ຮັກ­ສາ​ສະ­ຖຽນ​ລະ​ພາບ​ທາງ​ດ້ານ​ເສດ­ຖະ­ກິດ​ມະ­ຫາ​ພາກ ການ​ຫຼຸດ­ຜ່ອນ​ຄວາມ­ທຸກ​ຍາກ ການ​ລວມ​ກຸ່ມ​ທາງ​ດ້ານ​ເສດ­ຖະ­ກິດ ແລະ ການ​ປັບ­ປຸງ​ສະ­ພາບ​ແວດ​ລ້ອມ​ທຸ­ລະ​ກິດ ພ້ອມ​ນັ້ນ ຍັງ​ໄດ້​ເນັ້ນ​ເຖິງ​ຄວາມ​ຈຳ­ເປັນ​ໃນ​ການ​ສົ່ງ­ເສີມ​ການ​ພັດ­ທະ­ນາ​ພາກ​ທຸ­ລະ​ກິດ​ໃຫ້​ມີ​ຄວາມ​ເຂັ້ມ­ແຂງ ໂດຍ​ຜ່ານ​ຂະ​ບວນ​ການ​ປັບ­ປຸງ​ຂອບ​ກົດ­ໝາຍ ແລະ ລະ­ບຽບ​ການ​ຕ່າງໆ ທີ່​ຕິດ​ພັນ​ກັບ​ການ​ດຳ­ເນີນ​ທຸ­ລະ​ກິດ​ໃນ​ລາວ ພ້ອມ​ທັງ​ສະ­ເໜີ​ໃຫ້​ສືບ­ຕໍ່​ກົນ​ໄກ​ປຶກ­ສາ​ຫາ­ລື ລະ­ຫວ່າງ ພາກ​ລັດ-ພາກ​ທຸ­ລະ​ກິດ ປັບ­ປຸງ​ສະ­ພາ​ການ​ຄ້າ ແລະ ອຸດ​ສະ­ຫະ​ກຳ​ທ້ອງ­ຖິ່ນ​ໃຫ້​ມີ​ຄວາມ​ເຂັ້ມ­ແຂງ ສາ­ມາດ​ເປັນ​ຂົວ​ຕໍ່­ໃຫ້​ຂະ   ແໜງ​ການ​ຂອງ​ລັດ­ຖະ­ບານ​ໃນ​ການ​ຮ່ວມ​ມື​ຍົກ​ລະ­ດັບ​ການ​ພັດ­ທະ­ນາ​ການ­ເຄື່ອນ­ໄຫວ​ຂອງ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ໃຫ້​ອອກ​ສູ່​ຕ່າງ­ປະ­ເທດ​ຫຼາຍ​ຂຶ້ນ ບັນ­ດາ​ຜູ້​ປະ­ກອບ​ການ​ຕ້ອງ​ເປັນ​ເຈົ້າ​ຕົນ​ເອງ​ສ້າງ​ຄວາມ​ເຂັ້ມ­ແຂງ​ດ້ວຍ​ຕົນ​ເອງ ພະ­ຍາ­ຍາມ​ໃຫ້​ກຸ້ມ​ຕົນ​ເອງ​ໃນ​ສະ­ພາບ​ການ​ທີ່​ເສດ­ຖະ­ກິດ​ພົບ​ຂໍ້​ຫຍຸ້ງ­ຍາກ ຫັນ​ການ​ດຳ­ເນີນ​ທຸ­ລະ​ກິດ​ຈາກ​ຍາກ​ໄປ​ຫາ​ງ່າຍ ພ້ອມ​ນັ້ນ ໃຫ້​ນຳ​ໃຊ້​ສິ່ງ​ທີ່​ມີ​ຢູ່​ພາຍ​ໃນ​ຜະ­ລິດ​ເປັນ​ສິນ­ຄ້າ​ຈຳ­ໜ່າຍ ແລະ ຄວນ​ຫັນ­ປ່ຽນ​ຍຸດ​ໂທ​ບາຍ​ການ​ຜະ­ລິດ​ທຸ­ລະ​ກິດ​ໃຫ້​ມີ​ຄວາມ​ຄ່ອງ​ຕົວ ຍອມ­ຮັບ​ສະ­ພາບ​ຄວາມ​ເປັນ​ຈິງ ຫັນ​ໄປ​ຕາມ​ສະ­ພາບ​ໃຫ້​ທັນ​ກັບ​ເຫດ­ການ​ຄວາມ​ເປັນ​ຈິງ ສ້າງ​ກົນ​ໄກ​ການ​ບໍ­ລິ­ຫານ​ທີ່​ທະ­ລຸ​ໂລ່ງ ສືບ­ຕໍ່​ປະ­ຕິ­ບັດ​ນະ­ໂຍ­ບາຍ 3 ເປີດ ແລະ ລັດ­ຖະ­ບານ​ຈະ​ສືບ­ຕໍ່​ຫັນ​ເປັນ​ການ​ສົ່ງ­ເສີມ​ການ​ລົງ­ທຶນ​ປະ­ຕູ​ດຽວ​ຍົກ​ລະ­ດັບ​ໃຫ້​ມີ​ປະ­ສິດ­ທິ­ພາບ ມີ​ຄວາມ​ປອດ​ໃສ ແລະ ອື່ນໆ.

ຂ່າວທີ່ກ່ຽວຂ້ອງ