ຂ່າວຫຼ້າສຸດ

ເປີດຫ້ອງວາງສະແດງມູນເຊື້ອ ຄຊປປລ

212 06 ກ.ກ. 2018 ຂ່າວໜ້າ​ໜຶ່ງ
ເປີດຫ້ອງວາງສະແດງມູນເຊື້ອ ຄຊປປລ

    ພິ­ທີ​ເປີດ​ການ​ນຳ​ທ່ຽວ​ຫ້ອງ​ວາງ­ສະ­ແດງ​ມູນ­ເຊື້ອ ຄະ­ນະ​ຊາວ​ໜຸ່ມ​ປະ­ຊາ­ຊົນ ປະ­ຕິ­ວັດ​ລາວ (ຄຊປປລ) ຈັດ​ໃນ​ວັນ​ທີ 5 ກໍ­ລະ­ກົດ 2018 ທີ່​ສູນ​ກາງ​ຊາວ​ໜຸ່ມ​ປະ­ຊາ­ຊົນ ປະ­ຕິ­ວັດ​ລາວ ເປັນ​ກິດ­ຈະ­ກຳ​ໜຶ່ງ​ທີ່​ສູນ​ກາງ​ຊາວ​ໜຸ່ມ​ປະ­ຊາ­ຊົນ​ປະ­ຕິ­ວັດ​ລາວ ໄດ້​ກຳ­ນົດ​ເຂົ້າ​ໃນ​ແຜນ­ການ ເພື່ອ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ ຄຊປປລ ຄົບ­ຮອບ 63 ປີ (14 ເມ­ສາ 1955–14 ເມ­ສາ 2018).

    ຈຸດ­ປະ­ສົງ ແມ່ນ​ແນ­ໃສ່​ເປັນ​ບ່ອນ​ຮຽນ​ຮູ້ ແລະ ສຶກ​ສາ​ຄົ້ນ­ຄວ້າ​ປະ­ຫວັດ­ສາດ ຂອງ​ຊາວ​ໜຸ່ມ​ລາວ​ບັນ­ດາ­ເຜົ່າ ເຮັດ​ໃຫ້​ຊາວ​ໜຸ່ມ-ເຍົາ­ວະ​ຊົນ ແລະ ອະ­ນຸ­ຊົນ ໄດ້​ຮັບ​ຮູ້​ເຂົ້າ­ໃຈ ເຖິງ​ປະ­ຫວັດ​ມູນ­ເຊື້ອ ການ­ເຄື່ອນ­ໄຫວ​ຕໍ່­ສູ້​ຢ່າງ​ພິ­ລາດ​ອາດ​ຫານ​ຂອງ​ຊາວ​ໜຸ່ມ​ລາວ​ບັນ­ດາ­ເຜົ່າ​ໃນ​ເມື່ອ​ກ່ອນ ທີ່​ໄດ້​ເຮັດ​ບົດ­ບາດ​ປະ­ຈັນ­ບານ​ຕິດ​ພັນ​ກັບ​ການ​ເຕີບ​ໃຫຍ່​ຂະ­ຫຍາຍ­ຕົວ​ຂອງ​ພັກ ໂດຍ​ສະ­ເພາະ ແມ່ນ​ການ​ປະ­ກອບ­ສ່ວນ​ເສຍ­ສະ­ຫຼະ​ເລືອດ​ເນື້ອ​ປົດ​ປ່ອຍ­ປະ​ເທດ​ຊາດ ອອກ​ຈາກ​ແອກ​ປົກ­ຄອງ​ຂອງ​ຕ່າງ​ຊາດ​ໃນ​ແຕ່​ລະ​ຍຸກ​ສະ­ໄໝ  ຈົນ​ສາ­ມາດ​ຍາດ​ໄດ້​ຄວາມ​ເປັນ​ເອ­ກະ­ລາດ​ແຫ່ງ​ຊາດ  ແລະ ຜືນ​ແຜ່ນ­ດິນ​ອັນ​ຄົບ​ຖ້ວນ ສະ­ຖາ­ປະ­ນາ​ເປັນ​ສາ­ທາ­ລະ­ນະ​ລັດ ປະ­ຊາ­ທິ­ປະ­ໄຕ ປະ­ຊາ­ຊົນ​ລາວ ແລະ ສືບ­ຕໍ່​ປະ­ກອບ­ສ່ວນ​ໃນ​ການ​ປົກ​ປັກ​ຮັກ­ສາ ແລະ ສ້າງ­ສາ​ປະ­ເທດ​ຊາດ ມາ​ຈົນ​ເຖິງ​ປັດ­ຈຸ­ບັນ.

    ເປັນ​ກຽດ​ເຂົ້າ​ຮ່ວມ​ພິ­ທີ​ເປີດ​ຫ້ອງ​ວາງ­ສະ­ແດງ​ມູນ­ເຊື້ອ ຄຊປປລ ມີ ທ່ານ ໄຊ​ສົມ​ພອນ ພົມ­ວິ­ຫານ  ປະ­ທານ​ສູນ​ກາງ​ແນວ​ລາວ​ສ້າງ​ຊາດ ຜູ້​ຊີ້​ນຳ​ວຽກ​ງານ​ອົງ​ການ­ຈັດ­ຕັ້ງ​ມະ­ຫາ­ຊົນ​ຂັ້ນ​ສູນ​ກາງ ທ່ານ ອາ​ລຸນ​ໄຊ ສູນ​ນະ­ລາດ  ເລ­ຂາ​ຄະ­ນະ​ບໍ­ລິ­ຫານ​ງານ​ສູນ​ກາງ ຊາວ​ໜຸ່ມ​ປະ­ຊາ­ຊົນ ປະ­ຕິ­ວັດ​ລາວ ພ້ອມ​ດ້ວຍ​ຮອງ​ເລ­ຂາ ຄຊປປລ ຕາງ­ໜ້າ​ຈາກ​ອົງ​ການ­ຈັດ­ຕັ້ງ​ມະ­ຫາ­ຊົນ ແຂກ​ຖືນ​ເຊີນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ