ເມືອງສີໂຄດຕະບອງ ມີຫຼາຍແຫຼ່ງທ່ອງທ່ຽວທຳມະຊາດໃຫ້ທ່ຽວຊົມ

232 06 ກ.ກ. 2018 ຂ່າວໜ້າ​ໜຶ່ງ
ເມືອງສີໂຄດຕະບອງ ມີຫຼາຍແຫຼ່ງທ່ອງທ່ຽວທຳມະຊາດໃຫ້ທ່ຽວຊົມ

    ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ ສົມ­ທົບ​ກັບ ຫ້ອງ­ການ ຖວ​ທ ເມືອງ​ສີ​ໂຄດ​ຕະ­ບອງ  ທ່ານ ຄຳ​ປະ­ດິດ ເຂັມ​ມາ­ນິດ ຫົວ­ໜ້າ​ພະ​ແນກ ຖວ​ທ ນວ ພ້ອມ​ຄະ­ນະ​ໄດ້​ລົງ​ພົບ​ປະ ບັນ­ດາ​ຜູ້​ປະ­ກອບ​ການ​ສະ­ຖານ­ທີ່​ແຫຼ່ງ​ທ່ອງ​ທ່ຽວ​ທຳ​ມະ​ຊາດ ຢູ່​ເຂດ​ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ ໃນ​ວັນ​ທີ 4 ກໍ­ລະ­ກົດ 2018.

    ທ່ານ ຄຳ​ປະ­ດິດ ເຂັມ​ມາ­ນິດ ໄດ້​ກ່າວ​ວ່າ: ການ​ລົງ​ມາ​ຄັ້ງ​ນີ້​ເພື່ອ​ມາ​ຕິດ­ຕາມ​ກ່ຽວ​ກັບ​ການ​ຄຸ້ມ​ຄອງ ກໍ່​ຄື ການ​ພັດ­ທະ­ນາ​ແຫຼ່ງ​ທ່ອງ​ທ່ຽວ​ທຳ​ມະ​ຊາດ ຢູ່​ເຂດ​ເມືອງ​ສີ​ໂຄດ​ຕະ­ບອງ ໂດຍ​ສະ­ເພາະ ແມ່ນ​ມີ​ແຫຼ່ງ​ທ່ອງ​ທ່ຽວ​ທຳ​ທະ​ຊາດ​ຢູ່​ຈຸດ​ຕາດ​ມູນ ມີ​ແຫຼ່ງ​ທ່ອງ​ທ່ຽວ​ທັງ​ໝົດ 6 ແຫ່ງ ໃນ​ນັ້ນ ແມ່ນ​ໄດ້​ລົງ­ທຶນ​ພັດ­ທະ­ນາ​ຈຳ­ນວນ​ໜຶ່ງ​ແລ້ວ ເປັນ­ຕົ້ນ ແມ່ນ​ແຫຼ່ງ​ທ່ອງ​ທ່ຽວ​ຕາດ​ມູນ ຕາດ​ວັງ​ຫຼວງ ຕາດ​ວັງ​ນອງ ຕາດ​ປ່າ​ໄລ່ ຕາດ​ວັງ​ນ້ຳ­ເຜີ້ງ ຕາດ​ຫົວ​ເສືອ ແລະ ແຫຼ່ງ​ທ່ອງ​ທ່ຽວ​ເກີດ​ໃໝ່​ແມ່ນ​ແຫຼ່ງ​ທ່ອງ​ທ່ຽວ​ທຳ​ມະ​ຊາດ​ສຸດ​ໃຈ ເຖິງ​ແນວ­ໃດ​ກໍ່​ຕາມ​ອີງ­ໃສ່​ທິດ​ທາງ​ແຜນ­ການ​ໃນ​ການ​ຊຸກ­ຍູ້ ແລະ ສົ່ງ­ເສີມ​ການ​ພັດ­ທະ­ນາ​ແຫຼ່ງ​ທ່ອງ​ທ່ຽວ ໃນ​ແຜນ​ວຽກ​ງານ​ຈຸດ​ສຸມ​ການ​ຮັບ​ໃຊ້​ໃຫ້​ແກ່​ປີ​ທ່ອງ​ທ່ຽວ​ລາວ 2018 ຢູ່​ນະ ຄອນ​ຫຼວງ​ວຽງ​ຈັນ ໃນ​ນັ້ນ ໜຶ່ງ​ໃນ​ກິດ­ຈະ­ກຳ​ທີ່​ທາງ​ພະ​ແນກ​ໄດ້​ກຳ­ນົດ​ກໍ່​ແມ່ນ ການ​ຕິດ­ຕາມ​ບັນ­ດາ​ແຫຼ່ງ​ທ່ອງ​ທ່ຽວ​ທີ່​ມີ​ແລ້ວ ເພື່ອ​ຊຸກ­ຍູ້​ໃຫ້​ມີ​ການ​ປັບ­ປຸງ​ໃຫ້​ດີ​ຂຶ້ນ ແນ­ໃສ່​ຮັບ­ຮອງ​ໃຫ້​ແກ່​ການ​ບໍ­ລິ­ການ​ຮັບ​ໃຊ້​ນັກ​ທ່ອງ​ທ່ຽວ ແລະ ລົງ​ຊຸກ­ຍູ້ ຕໍ່​ກັບ​ບັນ­ດາ​ແຫຼ່ງ​ທ່ອງ​ທ່ຽວ ທີ່​ກຳ­ລັງ​ມີ​ການ​ບຸກ­ເບີກ ແລະ ພັດ­ທະ­ນາ​ໃໝ່ ຕາມ​ການ​ອະ­ນຸ­ມັດ​ຂອງ​ພາກ­ສ່ວນ​ທີ່​ກ່ຽວ­ຂ້ອງ ເຊິ່ງ​ມາ​ເບິ່ງ​ແຕ່​ລະ​ຈຸດ ກໍ່​ເຫັນ​ໄດ້​ວ່າ​ຈຸດ​ທີ່​ບໍ­ລິ­ການ​ທາງ​ດ້ານ​ສະ­ຖານ­ທີ່​ທ່ອງ​ທ່ຽວ​ນີ້ ເຈົ້າ​ຂອງ​ຜູ້​ປະ­ກອບ​ການ ກໍ່​ໄດ້​ມີ​ການ​ລາຍ​ງານ​ສະ­ພາບ​ໃນ​ການ​ຮັບ​ໃຊ້​ບໍ­ລິ­ການ​ທີ່​ຜ່ານ​ມາ ຈາກ​ນັ້ນ ກໍ່​ໄດ້​ເນັ້ນ​ໃຫ້​ບັນ­ດາ​ຜູ້​ປະ­ກອບ​ການ ເອົາ­ໃຈ­ໃສ່​ສະ­ຖານ­ທີ່​ແຫຼ່ງ​ທ່ອງ​ທ່ຽວ​ຕ້ອງ​ໄດ້​ປົກ​ປັກ​ຮັກ­ສາ ແລະ ຄຸ້ມ​ຄອງ​ແຫຼ່ງ​ທ່ອງ​ທ່ຽວ​ໃຫ້​ດີ ຮັກ­ສາ​ສິ່ງ­ແວ­ດລ້ອມ ການ​ບໍ­ລິ­ການ​ຄວາມ​ປອດ​ໄພ ຮັກ­ສາ​ອະ­ນາ­ໄມ​ທຳ​ຄວາມ​ສະ­ອາດ​ຕາມ​ແຄມ​ທາງ​ໃຫ້​ມີ​ຄວາມ​ສວຍ​ງາມ ການ​ຕົບ­ແຕ່ງ​ບັນ­ດາ ຮ້ານ ຕູບ​ຕ່າງໆ​ໃຫ້​ມີ​ຄວາມ​ຈົບ­ງາມ ຮັບ­ປະ­ກັນ​ຄວາມ​ປອດ​ໄພ ແລະ ການ​ນຳ​ໃຊ້​ສຽງ​ເພງ​ໃຫ້​ຢູ່​ໃນ​ຂອບ​ເຂດ​ທີ່​ກຳ­ນົດ​ໄວ້.

    ປັດ­ຈຸ­ບັນ​ແມ່ນ​ກ້າວ​ເຂົ້າ​ສູ່​ລະ­ດູ​ທ່ອງ​ທ່ຽວ​ທາງ​ທຳ​ມະ​ຊາດ ໂດຍ​ສະ­ເພາະ ແມ່ນ​ລະ­ດູ­ຝົນ ຈະ​ມີ​ນ້ຳ­ຕົກ ທີ່​ມີ​ຄົນ​ມາ​ທ່ຽວ​ຊົມ​ຫຼາຍ ຜ່ານ​ມາ​ແມ່ນ​ວັນ​ຢຸດ ເສົາ-ອາ­ທິດ ທີ່​ມີ​ຄົນ​ມາ​ທ່ຽວ​ຊົມ​ຫຼາຍ ຈຸດ​ທີ່​ສົນ­ໃຈ ແມ່ນ​ການ​ນັ່ງ​ພັກ­ຜ່ອນ​ຕາມ​ທຳ​ມະ​ຊາດ ການ​ມາ​ກິນ​ເຂົ້າ​ປ່າ ເລາະ​ທ່ຽວ​ຊົມ​ຕາມ​ທຳ​ມະ​ຊາດ ແລະ ກິດ­ຈະ­ກຳ​ຂີ່​ຊ້າງ ໂດຍ​ລວມ​ແລ້ວ ແຫຼ່ງ​ທ່ອງ​ທ່ຽວ​ຢູ່​ເຂດ​ເມືອງ​ສີ​ໂຄດ​ຕະ­ບອງ​ແມ່ນ​ແຫຼ່ງ​ທ່ອງ​ທ່ຽວ​ສຳ­ຄັນ​ໜຶ່ງ​ທີ່​ຈະ​ດຶງ​ດູດ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ​ໃຫ້​ເຂົ້າ​ມາ​ທ່ຽວ​ຊົມ.

ຂ່າວທີ່ກ່ຽວຂ້ອງ