ລະດູປາວາງໄຂ່ນັ້ນສຳຄັນຢ່າງໃດ ?

415 06 ກ.ກ. 2018 ນານາສາລະ

   ກ້າວ​ເຂົ້າ​ສູ່​ເດືອນ 6-7 ຊຶ່ງ​ຢ່ວງ​ເຂົ້າ​ຕົ້ນ​ລະ­ດູ­ຝົນ ເປັນ​ໄລ­ຍະ​ຝູງ​ປາ​ປະ­ເພດ​ປາ​ທີ່​ອາ­ໄສ​ນ້ຳ​ຫ້ວຍ ຮ່ອງ ຄອງ ບຶງ ນ້ຳ​ເຊ ນ້ຳ­ຂອງ ແລະ ສັດ​ນ້ຳ​ປະ­ເພດ​ຕ່າງໆ​ຫາ​ບ່ອນ​ວາງ​ໄຂ່ ພວກ​ປາ​ຊະ­ນິດ​ນ້ອຍ ປາ​ຫ້ວຍ ປາ​ນາ ກໍ່​ພາ­ກັນ​ອອກ​ຈາກ​ນ້ຳ​ໃຫຍ່ ລອຍ​ບືນ​ຂຶ້ນ​ຫາ​ບ່ອນ​ວາງ​ໄຂ່​ຕາມ​ຫ້ວຍ ຮ່ອງ ຄອງ ບຶງ ທັງ­ຫຼາຍ ສ່ວນ​ປະ­ເພດ​ຢູ່​ສາຍ​ນ້ຳ​ໃຫຍ່​ກໍ່​ມີ​ການ​ຊອກ​ຫາ​ບ່ອນ​ວາງ​ໄຂ່​ເຊັ່ນ​ກັນ ເພື່ອ​ຂະ­ຫຍາຍ​ເຊື້ອ​ແຖວ​ແນວ​ພັນ​ຂອງ​ມັນ​ໃຫ້​ອອກ​ແມ່​ແຜ່​ລູກ​ຕໍ່​ໄປ ແຕ່​ໃນ​ລະ­ດູ​ດັ່ງ­ກ່າວ​ການ​ຫາ​ປາ​ດ້ວຍ​ວິ­ທີ​ການ​ພື້ນ­ເມືອງ ແລະ ວິ­ທີ​ການ​ຕ່າງໆ​ເພື່ອ​ໃຫ້​ໄດ້​ຫຼາຍ​ຍັງ​ເປັນ​ເລື່ອງ​ອັນ­ຕະ­ລາຍ​ຕໍ່​ການ​ດັບ​ສູນ­ພັນ ເພາະ​ຄົນ​ເຮົາ​ຍັງ​ຂາດ​ປາ​ບໍ່​ໄດ້ ໂດຍ​ສະ­ເພາະ ຍັງ​ມີ​ການ​ມັກ​ບໍ­ລິ­ໂພກ​ສົ້ມ​ໄຂ່​ປາ ມັກ​ກິນ​ໝົກ​ໄຂ່​ປາ ແລະ ອື່ນໆ ຊຶ່ງ​ເຮັດ​ໃຫ້​ພົນ­ລະ­ເມືອງ​ປາ​ຫຼຸດ​ໜ້ອຍ​ຖອຍ​ລົງ ແລະ ລາ­ຄາ​ປາ ໂດຍ​ສະ­ເພາະ ປາ​ນ້ຳ­ຂອງ​ຫຼາຍ​ຊະ­ນິດ​ລາ­ຄາ​ສູງ​ຂຶ້ນ​ກວ່າ​ຊີ້ນ ມີ​ສ່ວນ​ສຳ­ຄັນ​ເຮັດ​ໃຫ້​ຄວາມ​ໝັ້ນ­ຄົງ​ທາງ​ອາ­ຫານ​ມີ​ອັນ​ແຕະ ຕ້ອງ.

    ໃນ​ຄວາມ​ເປັນ​ຈິງ​ແລ້ວ ເຈົ້າ​ໜ້າ­ທີ່​ຊຶ່ງ​ມີ​ສ່ວນ​ກ່ຽວ­ຂ້ອງ​ກໍ່​ໄດ້​ເອົາ­ໃຈ­ໃສ່​ໂຄ­ສະ­ນາ​ປຸກ​ຈິດ​ສຳ­ນຶກ​ໃຫ້​ປະ­ຊາ­ຊົນ​ຢຸດ​ການ​ຫາ​ປາ​ໃນ​ໄລ­ຍະ​ລະ­ດູ​ປາ​ວາງ​ໄຂ່ ເພາະ​ຮວງ​ໄຂ່​ປາ​ແຕ່​ລະ​ໂຕ​ຈະ​ໃຫ້​ປາ​ບໍ່​ຕ່ຳ​ເປັນ​ແສນໆ​ໂຕ ຖ້າ​ປາ​ໃນ​ແຫຼ່ງ​ນ້ຳ​ຫາກ​ໄດ້​ຮັບ​ການ​ປົກ​ປັກ​ຮັກ­ສາ​ຢ່າງ​ມີ​ລະ­ບຽບ ເປັນ­ຕົ້ນ ການ​ຮັກ­ສາ​ວັງ​ສະ­ຫງວນ ການ​ງົດ​ການ​ຫາ​ປາ​ໃນ​ລະ­ດູ​ປາ​ວາງ​ໄຂ່ ການ​ຫາ​ປາ​ດ້ວຍ​ເຄື່ອງ­ມື​ພື້ນ­ເມືອງ...ຕໍ່​ໄປ​ເຮົາ​ກໍ່​ຈະ​ໄດ້​ອາ­ຫານ​ທີ່​ລາ­ຄາ​ບໍ່​ແພງ​ເກີນ​ໄປ​ເພີ່ມ​ຂຶ້ນ.

   ໃນ​ບາງ​ປະ­ເທດ​ໃກ້​ຄຽງ​ເຮົາ ເປັນ­ຕົ້ນ ປະ­ເທດ​ໄທ ກໍ່​ໄດ້​ມີ​ການ​ເກືອດ​ຫ້າມ​ເຮືອ​ປະ­ມົງ​ອອກ​ຫາ​ປາ​ໃນ​ລະ­ດູ​ປາ​ວາງ​ໄຂ່​ໃນ​ເຂດ​ທະ­ເລ​ອ່າວ​ໄທ​ຢ່າງ​ເປັນ​ທາງ​ການ ເປັນ​ເວ­ລາ​ສາມ​ເດືອນ ສ່ວນ​ປະ­ເທດ​ອື່ນໆ​ກໍ່​ອາດ​ຈະ​ມີ​ເຊັ່ນ​ດຽວ​ກັນ ເນື່ອງ​ຈາກ​ກະ­ແສ​ຄວາມ​ໝັ້ນ­ຄົງ​ທາງ​ອາ­ຫານ​ມາ​ແຮງ ມັນ​ຊ່ວຍ​ໃຫ້​ສຸ­ຂະ­ພາບ​ຂອງ​ຄົນ​ດີ​ຂຶ້ນ ໂດຍ​ສະ­ເພາະ​ປາ ບໍ່​ວ່າ​ຈະ​ເປັນ​ປາ​ນ້ຳ​ເຄັມ ກໍ່​ຄື ນ້ຳ​ຈືດ ເມື່ອ​ບໍ­ລິ­ໂພກ​ຈະ​ຊ່ວຍ​ໃຫ້​ສຸ­ຂະ­ພາບ​ຜູ້​ຄົນ​ໄດ້​ຮັບ​ສານ​ອາ­ຫານ​ດີ​ຂຶ້ນ ເມື່ອ​ຄາວ​ກ່ອນໆ​ຄົນ​ພື້ນ​ບ້ານ​ເຮົາ​ເຄີຍ​ປະ­ພຶດ​ຈົນ​ເປັນ​ປະ­ເພ­ນີ​ຮີດ­ຄອງ​ມາ​ແລ້ວ ດັ່ງ​ເຊັ່ນ: “ການ​ຄະ­ລຳ” ການ​ຫາ​ປາ​ໃນ​ວັນ​ສິນ ບໍ່​ຂ້າ​ສັດ​ຕັດ​ຊີ­ວິດ​ໃນ​ຍາມ​ວັນ​ສິນ 8 ຄ່ຳ-15 ຄ່ຳ ບໍ່​ໂຫ່​ເນື້ອ​ຍິງ​ສັດ​ໃນ​ຍາມ​ກາງ​ພັນ​ສາ​ເຫຼົ່າ​ນີ້​ເປັນ­ຕົ້ນ.

   ຕໍ່​ໜ້າ­ການ​ຂະ­ຫຍາຍ­ຕົວ​ຂອງ​ປະ­ຊາ­ກອນ ຄວາມ​ຕ້ອງ­ການ​ທາງ​ອາ­ຫານ​ຍ່ອມ​ມີ​ການ​ເພີ່ມ​ຂຶ້ນ​ເປັນ​ເງົາ​ຕາມ​ຕົວ ແຫຼ່ງ​ອາ­ຫານ​ຈາກ​ແຫຼ່ງ​ທຳ​ມະ​ຊາດ​ອາດ​ເປັນ​ພຽງ​ສ່ວນ​ໜຶ່ງ ສ່ວນ​ໃຫຍ່​ກໍ່​ຄົງ​ມາ​ຈາກ​ລ້ຽງ​ແບບ​ວິ­ທະ­ຍາ­ສາດ ດ້ວຍ​ຫົວ­ອາ­ຫານ ເພື່ອ​ເລັ່ງ​ໃຫ້­ການ​ເຕີບ​ໃຫຍ່​ພຽງ­ພໍ​ກັບ​ຄວາມ​ຕ້ອງ ການ​ຂອງ​ຕະ­ຫຼາດ  ແຕ່​ກໍ່​ມີ​ແຫຼ່ງ​ຂ່າວ​ທີ່​ເປັນ​ໜ້າ​ຄົ້ນ­ຄວ້າ​ແລກ­ປ່ຽນ​ນຳ​ກັນ​ວ່າ: ຍັງ​ມີ​ຜູ້​ຂີ້­ລັກ​ມັກ­ໄດ້​ຈຳ­ນວນ​ໜຶ່ງ ໃຊ້​ສານ​ກະ​ຕຸ້ນ​ໃນ​ການ​ເລັ່ງ​ໃຫ້​ສັດ​ໃຫຍ່​ໄວ​ໂດຍ​ສະ­ເພາະ ປາ ຊຶ່ງ​ສິ່ງ​ດັ່ງ­ກ່າວ​ແມ່ນ​ຫຍັງ ? ພາກ­ສ່ວນ​ກ່ຽວ­ຂ້ອງ​ຄວນ​ມີ​ການ​ຕິດ­ຕາມ​ກວດ­ກາ​ວ່າ ເມື່ອ​ບໍ­ລິ­ໂພກ​ປາ​ທີ່​ມີ​ສານ​ດັ່ງ­ກ່າວ​ໄປ ແລ້ວ​ຈະ​ບໍ່​ແຕະ­ຕ້ອງ​ເຖິງ​ສຸ­ຂະ­ພາບ ຫຼື ບໍ່ ແລະ ຈະ​ມີ​ວິ­ທີ​ການ ມາດ​ຕະ­ການ​ແນວ­ໃດ ຊຶ່ງ​ຖ້າ​ເຮັດ​ແນວ​ທີ່​ບໍ່​ຖືກ­ຕ້ອງ​ມັນ​ກໍ່​ຈະ​ກະ­ທົບ​ຕໍ່​ແຫຼ່ງ​ນ້ຳ​ຊຶ່ງ​ຄົນ​ເຮົາ​ນຳ​ໃຊ້​ປະ­ຈຳ​ວັນ​ຢູ່​ກໍ່​ເປັນ​ໄດ້ ພິ­ເສດ​ຕ້ອງ​ກຳ­ຈັດ​ວັດ­ຖຸ​ອຸ­ປະ­ກອນ​ລ່າ​ສັດ​ໃຫ້ ເປັນ­ຕົ້ນ ເຄື່ອງ​ໄຟ​ຊ໋ອດ​ປາ ວັດ­ຖຸ​ລະ­ເບີດ ເປັນ­ຕົ້ນ ຊຶ່ງ​ຕາມ​ແຫຼ່ງ​ຂ່າວ​ມີ​ສາຍ​ນ້ຳ​ຫຼາຍ​ສາຍ ວັງ​ປາ​ຫຼາຍ​ບ່ອນ​ມີ​ຜົນ​ກະ­ທົບ​ຢ່າງ​ແຮງ ຖ້າ​ບໍ່​ກຳ­ຈັດ ແນ່­ນອນ​ພັນ​ສັດ­ຈະ​ຖືກ​ສູນ ພັນ.

ໂດຍ: ຊຽງ​ເອງ

ຂ່າວທີ່ກ່ຽວຂ້ອງ