ຂ່າວຫຼ້າສຸດ

ພູ​ຟານ​ຈິງ ຂອງ​ຈີນ ແລະ ສາຍພູ​ໄຟ ປູ​ອິ​​ສ ຂອງ​ຝຣັ່ງ ໄດ້​ຮັບ​ການ​ຍອມຮັບ​ເປັນ​ມໍລະດົກ​ໂລກ

303 05 ກ.ກ. 2018 ຂ່າວໜ້າ​ໜຶ່ງ
ພູ​ຟານ​ຈິງ ຂອງ​ຈີນ ແລະ ສາຍພູ​ໄຟ ປູ​ອິ​​ສ ຂອງ​ຝຣັ່ງ ໄດ້​ຮັບ​ການ​ຍອມຮັບ​ເປັນ​ມໍລະດົກ​ໂລກ

     ໃນ​ກອງ​ປະຊຸມ​ມໍລະດົກ​ໂລກ​ຄັ້ງ​ທີ 42 ທີ່​ຈັດ​ຂຶ້ນ​ຢູ່​ນະຄອນຫຼວງ​ມາ​ນາ​ມາ (ປະເທດ​ບາ​ເຣນ) ໃນ​ວັນ​ທີ 2 ກໍລະກົດ​ນີ້ ຄະນະ​ກຳມະການ​ມໍລະດົກ​ໂລກ​ຂອງ​ອົງການ​ສຶກ​ສາ ວິທະຍາສາດ ແລະ ວັດທະນະທຳ ຂອງ​ສະຫະ​ປະຊາ​ຊາດ (UNESCO) ໄດ້​ພິຈາລະນາ ແລະ​ຮັບຮອງ​ຈັດ​ເອົາ​ພູ​ຟານ​ຈິງ ຢູ່​ໃນ​ເມືອງ​ທົງ​ເຢີນ ແຂວງ​ກຸ້ຍ​ໂຈວ (ຈີນ) ເຂົ້າ​ໃນ​ບັນຊີ​ມໍລະດົກ​ໂລກ. ຈາກ​ນີ້ ພູ​ຟານ​ຈິ້ງ ຈຶ່ງ​ໄດ້​ກາຍເປັນ​ມໍລະດົກ​ໂລກ​ແຫ່ງ​ທີ 53 ແລະ​ເປັນ​ມໍລະດົກ​ທຳ​ມະ​ຊາດ​ຂອງ​ໂລກ​ແຫ່ງ​ທີ 13 ຂອງ​ຈີນ.

    ສະຫະພັນ​ປົກ​ປ້ອງ​ທະ​ມຳ​ຊາດ​ໂລກ ຊຶ່ງ​ເປັນ​ອົງການ​ປະ​ເມີນ​ມໍລະດົກ​ທຳ​ມະ​ຊາດ​ຂອງ​ໂລກ ຂອງ​ຄະນະ​ກຳມະການ​ມໍລະດົກ​ໂລກ ກ່າວ​ວ່າ ພູ​ຟານ​ຈິງ ສອດຄ່ອງ​ກັບ​ເງື່ອນໄຂ​ທາງ​ມາດຕະຖານ ແລະ ຄວາມ​ຄົບ​ຖ້ວນ​ຂອງ​ຊີວະ​ນາໆພັນ​ຂອງ​ມໍລະດົກ​ທຳ​ມະ​ຊາດ​ໂລກ ທັງ​ໄດ້​ສະແດງ​ໃຫ້​ເຫັນ ແລະ ຮັກສາ​ລະບົບ​ນິເວດ​ພູ​ດອຍ​ໂດດດ່ຽວ ແລະ ​ຄວາມ​ຫຼາກ​ຫຼາຍ​ຂອງ​ຊີວະ​ນາໆພັນ​ທີ່​ພົ້ນ​ເດັ່ນ​ໃນ​ບໍລິເວນ​ໃກ້​ເຂດ​ຮ້ອນ​ພາກ​ກາງ.

    ໃນ​ວັນ​ດຽວ​ກັນ UNESCO ກໍ​ໄດ້​ໃຫ້ການ​ຍອມຮັບ​ວ່າ ສາຍພູ​ໄຟ ປູ​ອິ​​ສ (Puys) ໃນ​ເຂດ ອາວ​ແວກ-ໂຣນ-ແອ​​ລ (Auvergne-Rhຶne-Alpes) ໃນ​ພາກ​ກາງ​ປະເທດ​ຝຣັ່ງ ເປັນ​ມໍລະດົກ​ທຳ​ມະ​ຊາດ​ຂອງ​ໂລກ.

    ສາຍພູ​ດັ່ງກ່າວ​ປະກອບ​ມີ 80 ຈອມ​ທີ່​ເປັນ​ພູ​ໄຟ​ທີ່ “ພວມ​ນອນ​ຫຼັບ” ມາ​ເປັນ​ເວລາ  8.000 ກວ່າ​ປີ​ແລ້ວ ແລະ ບັນດາ​ນັກວິທະຍາສາດ ກໍ​ບໍ່​ລົດ​ລະ​ເຖິງ​ຄວາມ​ເປັນ​ໄປ​ໄດ້ ວ່າ​ພວກ​ມັນ​ຈະ “ຕື່ນ​ຂຶ້ນ​ມາ”. ໃນ​ບັນດາ​ພູ​ໄຟ​ດັ່ງກ່າວ ທີ່​ມີ​ຄວາມ​ສູງ​ສຸດ​ກໍ​ແມ່ນ​ຈອມ​ພູ ໂດມ (Dome) ທີ່​ມີ​ຄວາມ​ສູງ 1.465 ແມັດ.

ນີ້​ເປັນ​ມໍລະດົກ​ທຳ​ມະ​ຊາດ​ໂລກ​ແຫ່ງ​ທຳ​ອິດ​ທີ່ UNESCO ຮັບ​ຮູ້​ຢູ່​ເທິງ​ແຜ່ນດິນ​ໃຫຍ່​ຂອງ ຝຣັ່ງ. ມໍລະດົກ​ທະ​ມະ​ຊາດ​ອື່ນໆ​ຂອງ​ຝຣັ່ງ ມີ​ຢູ່​ໃນ​ເກາະ​ກອກ​ຊີ​ກາ (Corsica) ແລະ ທີ່ Reunion ແລະ New Caledonia.

 

ຂ່າວທີ່ກ່ຽວຂ້ອງ