ຂ່າວຫຼ້າສຸດ

ສານ​ໃນ​ເອ​ກົວ​ດໍ​ອອກ​ຄຳ​ສັ່ງ​ຈັບ​ກຸມ​ອະດີດ​ປະທານາທິບໍດີ ກໍ​ເຣຍ

210 05 ກ.ກ. 2018 ຂ່າວໜ້າ​ໜຶ່ງ
ສານ​ໃນ​ເອ​ກົວ​ດໍ​ອອກ​ຄຳ​ສັ່ງ​ຈັບ​ກຸມ​ອະດີດ​ປະທານາທິບໍດີ ກໍ​ເຣຍ

     ວັນ​ທີ 3 ກໍລະກົດ​ນີ້ ທ່ານ​ນາງ ດາ​ນີ​ເອ​ລາ ຄາ​ມາ​ໂຈ ຜູ້​ພິພາກສາ​ໃນ​ເອ​ກົວ​ດໍ ໄດ້​ອອກ​ຄຳ​ສັ່ງ​ຈັບ​ກຸມ​ອະດີດ​ປະທານາທິບໍດີ ຣາ​ຟາ​ແອ​​ລ ກໍ​ເຣຍ (ປັດຈຸບັນ​ດຳລົງ​ຊີວິດ​ຢູ່​ກັບ​ພັນ​ລະ​ຍາ ຢູ່​ທີ່​ປະເທດ​ແບນ​ຊິກ) ເພື່ອ​ກັກ​ຂັງ​ເປັນ​ການ​ຊົ່ວຄາວ ພ້ອມ​ກັນ​ນັ້ນ​ກໍ​ປະກາດ​ຄຳ​ສັ່ງ​ຕາມ​ລ່າ ລະດັບ​ສີແດງ ໄປ​ໃຫ້​ອົງການ​ຕຳຫຼວດ​ອາຍາ​ສາກົນ (Interpol).

    ທ່ານ ກໍ​ເຣຍ ຖືກ​ອົງການ​ໄອ​ຍະ​ການ​ເອ​ກົວ​ດໍ ກ່າວ​ຫາ​ວ່າ​ມີ​ກົນອຸບາຍ​ໃນ​ກໍລະນີ​ລັກ​ພາ​ຕົວ ໂດຍ​ມຸ່ງ​ໃສ່​ອະດີດ​ນັກ​ການເມືອງ​ຝ່າຍ​ຄ້ານ​ຜູ້​ໜຶ່ງ (ໃນ​ເວລາ​ນັ້ນ ນັກ​ການເມືອງ​ຄົນ​ນີ້​ຖືກ​ຕັດສິນ​ວ່າ ເປັນ​ຜູ້​ໃສ່​ຮ້າຍ​ປ້າຍ​ສີ​ຕໍ່​ປະທານາທິບໍດີ ກໍ​ເຣຍ ແລະ ໄດ້​ໜີ​ອອກ​ໄປ​ອາ​ໃສ​ຢູ່​ໃນ​ປະເທດ​ໂກ​ລົມ​ບີ)  ຢູ່​ໃນ​ນະຄອນຫຼວງ ໂບ​ໂກ​ຕາ ເມື່ອ​ປີ 2012 ເຖິງ​ວ່າ​ເຫດການ​ນີ້​ໄດ້​ຖືກ​ຕຳຫຼວດ​ໂກ​ລົມ​ບີ ສະກັດ​ກັ້ນ​ໃນ​ເວລາ​ນັ້ນ​ກໍ​ຕາມ. ໃນ​ເຫດການ​ດັ່ງກ່າວ ມີ​ຜູ້​ຖືກ​ຈັບ​ກຸມ 5 ຄົນ ໃນ​ນັ້ນ​ມີ 3 ຄົນ ເປັນ​ອະດີດ​ຜູ້​ປະຕິບັດ​ງານ​ປິດ​ລັບ​ຂອງ​ລັດຖະບານ​ເອ​ກົວ​ດໍ ໃນ​ສະໄໝ​ພາຍ​ໃຕ້​ການ​ນຳພາ ຂອງ​ປະທານາທິບໍດີ ກໍ​ເຣຍ.

    ເມື່ອ​ເດືອນ​ທີ່​ຜ່ານ​ມາ ນາງ ຄາ​ມາ​ໂຈ ກໍ​ໄດ້​ອອກ​ຄຳ​ສັ່ງ​ໃຫ້​ທ່ານ ກໍ​ເຣຍ ສະເໜີ​ຕົວ​ຕໍ່​ສານ​ໃນ ເອ​ກົວ​ດໍ ຕາມ​ທີ່​ໄດ້​ກຳນົດ ແລະ​ ເຖິງ​ແມ່ນ​ວ່າ​ທ່ານ ກໍ​ເຣຍ ໄດ້​ປະຕິບັດ​ພັນທະ​ນັ້ນ ຢູ່​ທີ່​ສະຖານກົງສູນ ເອ​ກົວ​ດໍ ປະຈຳ​ແບນ​ຊິກ​ກໍ​ຕາມ ແຕ່​ນາງ ຄາ​ມາ​ໂຈ ກໍ​ຍັງ​ຕັດສິນ​ວ່າ​ນີ້​ເປັນ​ການ​ກະທຳ​ທີ່​ບໍ່​ປະຕິບັດ ຕາມ​ຄຳ​ສັ່ງ ແລະ​ໄດ້​ອອກ​ຄຳ​ສັ່ງ​ໃຫ້​ກັກ​ຂັງ​ຊົ່ວຄາວ ຫຼັງ​ຈາກ​ທີ່​ປະຕິເສດ​ຕໍ່​ການ​ສະເໜີ​ໃຫ້​ພິຈາລະນາ ຄືນໃໝ່ ເຖິງ​ມາດ​ຕະການ​ປ້ອງ​ກັນ ຊຶ່ງ​ຖັນ​ແຖວ​ທະນາຍຄວາມ​ຂອງ​ທ່ານ ກໍ​ເຣຍ ນຳ​ສະເໜີ./.

 

ຂ່າວທີ່ກ່ຽວຂ້ອງ