ຂ່າວຫຼ້າສຸດ

ຫຼາຍ​ປະເທດ​ໃນ​ອາຊີ ໄດ້​ຮັບ​ຄວາມ​ເສຍ​ຫາຍ​ຈາກ​ໄພ​ທຳ​ມະ​ຊາດ

210 05 ກ.ກ. 2018 ຂ່າວໜ້າ​ໜຶ່ງ
ຫຼາຍ​ປະເທດ​ໃນ​ອາຊີ ໄດ້​ຮັບ​ຄວາມ​ເສຍ​ຫາຍ​ຈາກ​ໄພ​ທຳ​ມະ​ຊາດ

   ເຈົ້າ​ໜ້າທີ່​ຈີນ ແຈ້ງ​ໃຫ້​ຮູ້ເມື່ອ​ວັນ​ທີ 3 ກໍລະກົດ​ນີ້​ວ່າ ຝົນຕົກ​ໜັກ​ແກ່ຍາວ​ມາ​ຕັ້ງແຕ່​ວັນ​ທີ 2 ກໍລະກົດ ໄດ້​ເຮັດ​ໃຫ້​ເກີດ​ດິນ​ເຈື່ອນ​ລົງ​ມາ​ຈາກ​ພູ ຢູ່​ໃນ​ເມືອງ​ແຫ່ງ​ໜຶ່ງ​ໃນ​ແຂວງ​ເສ​ສວນ ຂອງ​ຈີນ ເປັນ​ເຫດ ໃຫ້​ມີ​ຜູ້​ເສຍ​ຊີວິດ 4 ຄົນ ແລະ​ບາດເຈັບ​ອີກ 1 ຄົນ. ຝົນຕົກ​ໜັກ​ຍັງ​ເຮັດ​ໃຫ້​ເກີດ​ຜົນ​ກະທົບ​ຕໍ່​ການ​ດຳລົງ​ຊີວິດ​ຂອງ​ປະຊາຊົນ 115.900 ຄົນ ພ້ອມ​ທັງ​ທຳລາຍ​ພືດ​ຜົນ​ໃນ​ເນື້ອທີ່​ປະມານ 4.440 ເຮັກຕາ ໂດຍ​ຄາດ​ວ່າ​ເຮັດ​ໃຫ້​ແຂວງ​ເສ​ສວນ​ໄດ້​ຮັບ​ຄວາມ​ເສຍ​ຫາຍ​ເປັນ​ມູນ​ຄ່າ 159 ລ້ານ​ຢວນ (ເທົ່າ​ກັບ 23,8 ລ້ານ​ໂດ​ລາ​ສະຫະລັດ).

    ໃນ​ວັນ​ທີ 3 ກໍລະກົດ​ເຊັ່ນ​ກັນ ຝົນຕົກ​ໜັກ ເຮັດ​ໃຫ້​ເກີດ​ນ້ຳນອງ ແລະ​ນ້ຳ​ຖ້ວມ​ຂັງ ໃນ​ຫຼາຍ​ພື້ນ​ທີ່​ຂອງ​ປາ​ກິດ​ສະຖານ ແລະ​ເປັນ​ເຫດ​ໃຫ້​ມີ​ຜູ້​ເສຍ​ຊີວິດ 3 ຄົນ ຢູ່​ໃນ​ພື້ນ​ທີ່​ນະຄອນ ລາ​ຮໍ (ພາກ​ຕາເວັນ​ອອກ​ຂອງ​ປາ​ກິດ​ສະຖານ).

    ໃນ​ຂະນະ​ດຽວ​ກັນ ມີ​ຜູ້​ສະ​ແວງ​ບຸນ​ຊາວ​ອິນ​ເດຍ 1.000 ກວ່າ​ຄົນ ໄດ້​ຕິດ​ຄ້າງ​ຢູ່​ໃນ​ເຂດ ຊີ​ມີ​ກອດ ແລະ​ເຂດ ຮີ​​ລ​ຊາ ທີ່​ຕິດ​ກັບ​ຊາຍ​ແດນ ເນ​ປານ-ຈີນ ຊຶ່ງ​ເປັນ​ຍ້ອນ​ຝົນຕົກ​ໜັກ​ແກ່ຍາວ ແລະ​ອາກາດ​ບໍ່​ດີ. ສະຖານທູດ​ອິນ​ເດຍ ປະຈຳ​ເນ​ປານ ຢືນຢັນ​ວ່າ​ມີ 525 ຄົນ​ຕິດ​ຄ້າງ​ຢູ່​ໃນ ເຂດ​ຊີ​ມີ​ກອດ ແລະ​ອີກ 550 ຄົນ ຕິດ​ຄ້າງ​ຢູ່​ໃນ​ເຂດ​ຮີ​​ລ​ຊາ. ຜູ້​ສະແຫວງ​ບຸນ​ເຫຼົ່ານັ້ນ ປະສົບ​ໄພ ໃນ​ຂະນະ​ທີ່​ພວມ​ເດີນທາງ​ໄປ​ຍັງ​ສະຖານທີ່​ສັກສິດ​ທາງ​ສາສະໜາ​ແຫ່ງ​ໜຶ່ງ ຢູ່​ໃນ​ເຂດ​ປົກຄອງ​ຕົນ​ເອງ​ຕິ​ເບດ.

    ໃນ​ວັນ​ດຽວ​ກັນ ຫຼາຍ​ສິບ​ຖ້ຽວ​ບິນ ທີ່​ມີ​ກຳນົດ​ເດີນທາງ​ໄປ​ຍັງ​ເກາະ​ເຈ​ຊູ (ສ ເກົາຫຼີ) ໄດ້​ຖືກ​ໂຈະ ຫຼື​ຖືກ​ຍົກເລີກ ຍ້ອນ​ວ່າ​ທາງ​ພາກ​ໃຕ້ ສ ເກົາຫຼີ ໄດ້​ຮັບ​ຜົນ​ກະທົບ​ຢ່າງ​ແຮງ​ຈາກ​ພາຍຸ ປຣາ​ປີ​ຣູນ (Prapiroon) ທີ່​ພວມ​ພັດ​ເຂົ້າ​ມາ​ໃນ​ເຂດ​ດັ່ງກ່າວ. ເຈົ້າ​ໜ້າທີ່​ໃນ​ສະໜາມ​ບິນ​ສາກົນ ເຈ​ຊູ ໃຫ້​ຮູ້​ວ່າ ໄລ່​ມາ​ຮອດ​ເວລາ 13 ໂມງ 40 ນາທີ (ເວລາ​ໃນ​ທ້ອງຖິ່ນ) ມີ 44 ຖ້ຽວ​ບິນ​ຖືກ​ຍົກເລີກ ແລະ 22 ຖ້ຽວ​ບິນ​ຖືກ​ໂຈະ.

 

ຂ່າວທີ່ກ່ຽວຂ້ອງ