ລາຍ​ຮັບ​ຈາກ​ການ​ສົ່ງ​ອອກ​ອາວຸດ​ຂອງ​ຝຣັ່ງ ຫຼຸດ​ລົງ 50% ໃນ​ປີ 2017

252 05 ກ.ກ. 2018 ຂ່າວໜ້າ​ໜຶ່ງ
ລາຍ​ຮັບ​ຈາກ​ການ​ສົ່ງ​ອອກ​ອາວຸດ​ຂອງ​ຝຣັ່ງ ຫຼຸດ​ລົງ 50% ໃນ​ປີ 2017

    ບົດ​ລາຍ​ງານ​ປະຈຳ​ປີ ຂອງ​ກະຊວງ​ປ້ອງ​ກັນ​ປະເທດ​ຝຣັ່ງ ທີ່​ນຳ​ອອກ​ມາ​ເປີດເຜີຍ ເມື່ອ​ວັນ​ທີ 3 ກໍລະກົດ​ນີ້ ໃຫ້​ຮູ້​ວ່າ ລາຍ​ຮັບ​ຈາກ​ການ​ສົ່ງ​ອອກ​ອາວຸດ​ຂອງ​ຝຣັ່ງ ໄດ້​ຫຼຸດ​ລົງ 50% ໃນ​ປີ 2017 ໂດຍ​ລົງ​ໄປ​ຍັງ​ເຫຼືອ​ທີ່ 6,9 ຕື້​ເອີ​ໂຣ ຫຼັງ​ຈາກ​ທີ່​ບັນລຸ​ສະຖິຕິ​ສອງ​ປີ​ກ່ອນ​ໜ້າ​ນັ້ນ.

    ທ່ານ ຟລໍ​ເຣນ ພາ​ລີ ລັດຖະມົນຕີ​ປ້ອງ​ກັນ​ປະເທດ​ຝຣັ່ງ ເວົ້າ​ວ່າ ສາເຫດ​ຕົ້ນຕໍ​ທີ່​ນຳໄປ​ສູ່ ລາຍ​ຮັບ​ຫຼຸດ​ລົງ​ດັ່ງກ່າວ ແມ່ນ​ເປັນ​ຍ້ອນ “ຄວາມ​ຊຸດໂຊມ​ທາງ​ດ້ານ​ເສດຖະກິດ ໄດ້​ເປັນ​ຜົນ​ກະທົບ ຕໍ່​ເກືອບ​ທຸກໆ​ປະເທດ​ຜູ້​ຜະລິດ​ນ້ຳມັນ” ທີ່​ເປັນ​ລູກ​ຄ້າ​ລາຍ​ໃຫຍ່​ຂອງ​ຝຣັ່ງ. ໃນ​ປີ 2017 ບັນດາ​ປະເທດ ໃນ​ເຂດ​ຕາເວັນ​ອອກ​ກາງ ແລະ ອອກ​ໃກ້ ກວມ​ເອົາ​ກວ່າ 60% ຂອງ​ຕະຫຼາດ​ສົ່ງ​ອອກ ອາວຸດ​ຂອງ​ຝຣັ່ງ. ອີກ​ເຫດຜົນ​ໜຶ່ງ ກໍ​ແມ່ນ​ເປັນ​ຍ້ອນ​ບັນດາ​ປະເທດ​ຄູ່​ຮ່ວມ​ດັ້ງເດີມ ມີ​ຄວາມ​ຄອງ​ຄອຍ ເຖິງ​ຜົນ​ການ​ເລືອກ​ຕັ້ງ​ປະທານາທິບໍດີ​ຝຣັ່ງ.

    ມູນ​ຄ່າ​ການຈຳໜ່າຍ​ອາວຸດ​ຂອງ​ຝຣັ່ງ ບັນລຸ 17 ຕື້​ເອີ​ໂຣ ໃນ​ປີ 2015 ຊຶ່ງ​ໄດ້​ຍ້ອນ ສັນຍາ​ສົ່ງ​ອອກ​ເຮືອບິນ​ສູ້​ຮົບ Rafale ໃຫ້​ແກ່​ກາ​ຕາ ແລະ ເອ​ຢິບ ໃນ​ຂະນະ​ທີ່​ບັນລຸ 14 ຕື້ ເອີ​ໂຣ ໃນ​ປີ 2016 ຫຼັງ​ຈາກ​ທີ່​ໄດ້​ເຊັນ​ສັນຍາ​ຂາຍ​ເຮືອບິນ​ສູ້​ຮົບ 36 ລຳ​ກັບ​ອິນ​ເດຍ.

 

ຂ່າວທີ່ກ່ຽວຂ້ອງ