ຂ່າວຫຼ້າສຸດ

ຝ່າຍ​ຄ້ານ​ໃນ​ຊີ​ຣີ ເລີ່ມ​ເຈລະຈາ​ຮອບ​ໃໝ່​ກັບ​ຣັດ​ເຊຍ

250 05 ກ.ກ. 2018 ຂ່າວໜ້າ​ໜຶ່ງ
ຝ່າຍ​ຄ້ານ​ໃນ​ຊີ​ຣີ ເລີ່ມ​ເຈລະຈາ​ຮອບ​ໃໝ່​ກັບ​ຣັດ​ເຊຍ

    ທ່ານ ອີ​ບຣາ​ຮິມ ອາ​​ລ ຈາ​ບາ​ວີ ໂຄສົກ​ຂອງ​ຝ່າຍ​ຄ້ານ​ຢູ່​ໃນ​ຊີ​ຣີ ແຈ້ງ​ໃຫ້​ຮູ້ເມື່ອ​ວັນ​ທີ 3 ກໍລະກົດ​ນີ້​ວ່າ ຝ່າຍ​ຕົນ​ໄດ້​ເລີ່ມ​ການ​ເຈລະຈາ​ຮອບ​ໃໝ່​ກັບ​ເຈົ້າ​ໜ້າທີ່​ຣັດ​ເຊຍ ກ່ຽວ​ກັບ​ຂໍ້​ຕົກລົງ​ສັນຕິ​ພາບ ​ຢູ່​ໃນ​ເຂດ​ພາກ​ໃຕ້​ຊີ​ຣີ ຊຶ່ງ​ຕາມ​ນັ້ນແລ້ວ ຝ່າຍ​ລຸກ​ຮື​ຂຶ້ນ​ໃນ​ຊີ​ຣີ ຈະ​ມອບ​ອາວຸດ ແລະ​ ອະນຸຍາດ​ໃຫ້​ທະຫານ​ຣັດ​ເຊຍ ບຸກ​ຄືບ​ເຂົ້າ​ໄປ​ໃນ​ຕົວ​ເມືອງ​ຕ່າງໆ​ທີ່​ເຂົາເຈົ້າ (ຝ່າຍ​ລຸກ​ຮື​ຂຶ້ນ) ຄວບ​ຄຸມ​ຢູ່.

    ໂຄສົກ​ກ່າວ​ວ່າ ກອງ​ກຳລັງ​ຝ່າຍ​ຄ້ານ ໄດ້​ນຳ​ເອົາ “ຄຳ​ຕອບ​ໃຫ້​ແກ່​ບັນຊີ​ລາຍການ​ຄວາມ ຕ້ອງການ​ຂອງ​ຣັດ​ເຊຍ” ໄປ​ຍັງ​ໂຕະ​ເຈລະຈາ ເພື່ອ​ການ​ສ້າງ​ຂໍ້​ຕົກລົງ​ງົດ​ເສິກ​ສະບັບ​ໜຶ່ງ ໃນ​ນັ້ນ ມີ​ລວມ​ທັງ​ການ​ສະເໜີ​ໃຫ້​ຝ່າຍ​ຄ້ານ​ມອບ​ອາວຸດ ແລະ​ຮັບປະກັນ​ອະນາຄົດ​ໃຫ້​ແກ່​ບັນດາ​ສະມາຊິກ ຝ່າຍ​ຄ້ານ.

    ເມື່ອ​ວັນ​ທີ 30 ມິຖຸນາ​ທີ່​ຜ່ານ​ມາ ຝ່າຍ​ຄ້ານ​ໄດ້​ຄັດຄ້ານ​ຕໍ່​ການ​ສະເໜີ​ຂອງ​ຣັດ​ເຊຍ ເມື່ອ​ໄດ້​ຮັບ​ການ​ສະເໜີ​ດັ່ງກ່າວ ຢູ່​ໃນ​ກອງ​ປະຊຸມ​ກັບ​ຜູ້​ແທນ​ຣັດ​ເຊຍ ທີ່​ເມືອງ​ແຫ່ງ​ໜຶ່ງ​ທາງ​ພາກ​ໃຕ້ ຊີ​ຣີ. ເຖິງ​ຢ່າງໃດ​ກໍ​ຕາມ ແຫຼ່ງ​ຂ່າວ​ທາງ​ການ​ທູດ​ໃຫ້​ຮູ້​ວ່າ ຊອກ​ດາ​ນີ​ໄດ້​ປອບ​ໃຈ​ຝ່າຍ​ຄ້ານ​ໃນ​ຊີ​ຣີ ໃຫ້​ກັບ​ຄືນ​ສູ່​ໂຕະ​ເຈລະຈາ.

    ຣັດ​ເຊຍ​ພວມ​ໃຊ້​ຄວາມ​ພະຍາຍາມ ໃນ​ການ​ຊ່ວຍ​​ເຫຼືອ​ລັດຖະບານ​ຊີ​ຣີ ທີ່ຢູ່​ພາຍ​ໃຕ້​ການ ນຳພາ​ຂອງ​ປະທານາທິບໍດີ ບາ​ຊາ ອາ​​ລ-​ອັສ​ຊັດ ເພື່ອ​ຍາດ​ເອົາ​ຫຼາຍ​ເຂດ​ທີ່ຢູ່​ໃນ​ການ​ຄວບ​ຄຸມ ຂອງ​ຝ່າຍ​ຄ້ານ​ກັບ​ຄືນ​ມາ ດ້ວຍ​ວິທີ​ດຳເນີນ​ການ​ເຈລະຈາ​ກັບ​ກອງ​ກຳລັງ​ຝ່າຍ​ຄ້ານ.

    ກ່ອນ​ໜ້າ​ນັ້ນ ກອງທັບ​ຊີ​ຣີ ໄດ້​ຍາດ​ເອົາ​ສິດ​ຄວບ​ຄຸມ​ກວ່າ 58% ຂອງ​ແຂວງ ດາ​ຣາ (ພາກ​ໃຕ້​ຊີ​ຣີ) ຫຼັງ​ຈາກ​ທີ່​ຣັດ​ເຊຍ​ບັນລຸ​ຄວາມ​ຄືບ​ໜ້າ ໃນ​ການ​ເຈລະຈາ​ກັບ​ບັນດາ​ກຸ່ມ​ປະກອບ​ອາວຸດ ຝ່າຍ​ຄ້ານ​ໃນ​ຊີ​ຣີ ຢູ່​ໃນ​ພື້ນ​ທີ່​ດັ່ງກ່າວ ຊຶ່ງ​ຕາມ​ນັ້ນແລ້ວ​ກໍ​ແມ່ນ​ຝ່າຍ​ຄ້ານ​ຢູ່​ທີ່​ນັ້ນ ຈະ​ມອບ​ອາວຸດ ຂະໜາດ​ໜັກ ແລະ​ ຂະໜາດ​ກາງ​ທັງ​ໝົດ ພ້ອມ​ທັງ​ກະກຽມ​ໃຫ້​ທາງ​ການ​ຊີ​ຣີ ກັບເຂົ້າ​ໄປ​ຄວບ​ຄຸມ ໃນ​ພື້ນ​ທີ່​ດັ່ງກ່າວ.

 

ຂ່າວທີ່ກ່ຽວຂ້ອງ