ຂ່າວຫຼ້າສຸດ

ສະຫະລັດອາເມຣິກາ ສະເຫຼີມສະຫຼອງວັນປະກາດເອກະລາດ

215 05 ກ.ກ. 2018 ຂ່າວໜ້າ​ໜຶ່ງ
ສະຫະລັດອາເມຣິກາ ສະເຫຼີມສະຫຼອງວັນປະກາດເອກະລາດ

    ສະ­ຖານ­ທູດ​ສະ­ຫະ­ລັດ​ອາ​ເມ​ຣິ​ກາ ປະ­ຈຳ ສປປ ລາວ ໄດ້​ຈັດ​ງານ​ສະ­ເຫຼີມ­ສະ­ຫຼອງ​ວັນ​ປະ­ກາດ​ເອ­ກະ­ລາດ ຄົບ­ຮອບ 242 ປີ ຂຶ້ນ​ທີ່​ໂຮງ­ແຮມ​ຄຣາວ​ພລາ​ຊາ ໃນ​ວັນ​ທີ 3 ກໍ­ລະ­ກົດ 2018 ໂດຍ​ເປັນ​ກຽດ​ເຂົ້າ​ຮ່ວມ​ຂອງ ທ່ານ ນາງ ແສງ​ເດືອນ ຫຼ້າ​ຈັນ­ທະ​ບູນ ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ແລະ ທ່ານ ໂພ​ໄຊ ໄຂ​ຄຳ​ພິ­ທູນ ຫົວ­ໜ້າ​ຫ້ອງ­ການ ກະ­ຊວງ​ການ​ຕ່າງ­ປະ­ເທດ ເຊິ່ງ​ມີ​ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ພ້ອມ​ທັງ​ເຈົ້າ​ໜ້າ­ທີ່​ອາ­ວຸ­ໂສ ທູ­ຕາ­ນຸ­ທູດ ບັນ­ດາ​ນັກ­ທຸ­ລະ­ກິດ ແລະ ແຂກ​ຖືກ​ເຊີນ​ຫຼາຍ​ກວ່າ 600 ທ່ານ.      

    ທ່ານ​ນາງ ຣີ​ນາ ບິດ​ເຕີ ເອກ​ອັກ​ຄະ​ລັດ​ຖະ​ທູດ ສະ­ຫະ­ລັດ​ອາ​ເມ​ຣິ​ກາ ປະ­ຈຳ ສປປ ລາວ ໄດ້​ຍົກ​ໃຫ້​ເຫັນ​ເຖິງ​ຄວາມ​ສຳ­ຄັນ​ຂອງ​ບັນ­ດາ​ຄະ­ນະ​ເຈົ້າ​ໜ້າ­ທີ່​ຂັ້ນ​ສູງ ຈາກ​ສະ­ຫະ­ລັດ​ອາ​ເມ​ຣິ​ກາ​ທີ່​ໄດ້​ມາ​ຢ້ຽມ­ຢາມ ສປປ ລາວ ໃນ​ປີ​ທີ່​ຜ່ານ​ມາ ເຊິ່ງ​ລວມ​ທັງ ລັດ­ຖະ­ມົນ­ຕີ​ກະ­ຊວງ​ການ​ຄ້າ ແລະ ສາມ​ຄະ­ນະ​ຜູ້​ແທນ​ຂັ້ນ​ສູງ​ແຫ່ງ​ລັດ​ຖະ​ສະ­ພາ ພ້ອມ​ນີ້ ທ່ານ​ທູດ ຍັງ​ໄດ້​ເນັ້ນ​ໃຫ້​ເຫັນ​ເຖິງ​ຄວາມ​ພະ­ຍາ­ຍາມ​ຂອງ​ລັດ­ຖະ­ບານ​ສະ­ຫະ­ລັດ​ອາ​ເມ​ຣິ​ກາ ໃນ​ການ​ຊ່ວຍ­ເຫຼືອ​ໃນ​ການ​ຫຼຸດ­ຜ່ອນ​ຜົນ​ກະ­ທົບ​ຈາກ​ລະ­ເບີດ​ທີ່​ບໍ່​ທັນ​ແຕກ (UXO) ຕໍ່​ການ​ພັດ­ທະ­ນາ ໃນ ສປປ ລາວ ເຊິ່ງ​ການ​ເຮັດ​ວຽກ​ຮ່ວມ​ກັນ​ກັບ ລັດ­ຖະ­ບານ ສປປ ລາວ ພວກ​ເຮົາ​ມີ​ຄວາມ​ມຸ່ງ​ໝັ້ນ ເພື່ອ​ເກັບ​ກູ້​ລະ­ເບີດ​ບໍ່​ທັນ​ແຕກ ເຊິ່ງ​ເປັນ​ອຸ­ປະ­ສັກ​ຕໍ່​ການ​ພັດ­ທະ­ນາ​ປະ­ເທດ​ຊາດ ໃຫ້​ໝົດ​ໄປ​ກ່ອນ​ປີ 2030.

    ພ້ອມ​ນີ້ ທ່ານ​ນາງ ຣີ​ນາ ບິດ​ເຕີ ຍັງ​ໄດ້​ເນັ້ນ​ໃຫ້​ເຫັນ​ຄວາມ​ສຳ­ຄັນ ເຖິງ​ຄວາມ​ໝາຍ​ໝັ້ນ ຂອງ​ສະ­ຫະ­ລັດ​ອາ​ເມ​ຣິ​ກາ ໃນ​ການ​ຮ່ວມ​ມື​ແບບ​ກວມ​ລວມ ທີ່​ນັບ​ມື້​ນັບ​ມີ​ຄວາມ​ເຂັ້ມ­ແຂງ ແລະ ເຕີບ​ໃຫຍ່​ຂະ­ຫຍາຍ­ຕົວ​ໃນ​ອະ­ນາ­ຄົດ ເຊິ່ງ​ພວກ​ເຮົາ​ຮູ້­ສຶກ​ພາກ­ພູມ​ໃຈ​ຫຼາຍ​ທີ່​ສຸດ​ທີ່​ມີ​ລັດ­ຖະ­ບານ ສປປ ລາວ ເປັນ​ຄູ່​ຮ່ວມ​ມື ແລະ ການ​ສະ­ໜັບ­ສະ­ໜູນ​ຈາກ​ປະ­ຊາ­ຊົນ ອາ​ເມ​ຣິ​ກາ ແລະ ປະ­ຊາ­ຊົນ​ລາວ ໃນ​ການ​ເສີມ​ຂະ­ຫຍາຍ​ເປົ້າ​ໝາຍ​ອັນ​ດຽວ​ກັນ ເພື່ອ​ເຮັດ​ໃຫ້ ສປປ ລາວ ໄດ້​ພັດ​ທະ ນາ ໃຫ້​ເປັນ​ປະ­ເທດ​ທີ່​ມີ​ຄວາມ​ຜາ​ສຸກ ເປັນ​ສະ­ມາ­ຊິກ​ອາ​ຊຽນ​ທີ່​ມີ​ຄວາມ​ເຂັ້ມ­ແຂງ ເປັນ​ສູນ​ກາງ​ທາງ​ດ້ານ​ການ​ຄ້າ​ເສລີ​ແລະ ເປີດ​ກວ້າງ ຢູ່​ໃນ​ພາກ​ພື້ນ​ອິນ​ໂດ-ປາ​ຊີ​ຟິກ.    

    ການ​ສະ­ເຫຼີມ­ສະ­ຫຼອງ​ວັນ­ຊາດ ແມ່ນ​ເພື່ອ​ລະ­ນຶກ​ເຖິງ​ການ​ປະ­ກາດ​ເອ­ກະ­ລາດ​ຢ່າງ​ເປັນ​ທາງ​ການ​ຂອງ​ສະ­ຫະ­ລັດ​ອາ​ເມ​ຣິ​ກາ ໃນ​ວັນ​ທີ 4 ກໍ­ລະ­ກົດ 1776 ປະ­ຊາ­ຊົນ​ຊາວ​ສະ­ຫະ­ລັດ​ອາ​ເມ​ຣິ​ກາ ໄດ້​ສະ­ເຫຼີມ­ສະ­ຫຼອງ​ວັນ​ປະ­ກາດ ແລະ ເສລີ­ພາບ ໂດຍ​ການ​ຍິງ​ບັ້ງ­ໄຟ­ດອກ ສູ່​ທ້ອງ­ຟ້າ​ຢ່າງ​ສວຍ​ງາມ ເດີນ​ສວນ­ສະ­ໜາມ ແລະ ຈັດ​ງານ​ລ້ຽງ​ສະ­ຫຼອງ​ຕ່າງໆ​ໃນ​ຊຸມ​ຊົມ.

ຂ່າວທີ່ກ່ຽວຂ້ອງ