ຂ່າວຫຼ້າສຸດ

ຊາວໜຸ່ມກະຊວງການຕ່າງປະເທດ ໄດ້ຮັບນາມມະຍົດ 4 ບຸກ ຮອບທີ II

253 05 ກ.ກ. 2018 ຂ່າວໜ້າ​ໜຶ່ງ

    ໃນ​ວັນ​ທີ 2 ກໍ­ລະ­ກົດ 2018 ທີ່ ກະ­ຊວງ​ການ​ຕ່າງ­ປະ­ເທດ ຄະ­ນະ​ຊາວ​ໜຸ່ມ​ປະ­ຊາ­ຊົນ ປະ­ຕິ­ວັດ​ລາວ ກະ­ຊວງ​ການ​ຕ່າງ­ປະ­ເທດ ໄດ້​ຈັດ​ພິ­ທີ​ຮັບ​ນາມ­ມະ­ຍົດ 4 ບຸກ ຮອບ​ທີ II ຂຶ້ນ ໂດຍ​ການ​ໃຫ້​ກຽດ​ເປັນ​ປະ­ທານ​ຮ່ວມ​ຂອງ ສະ­ຫາຍ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ແລະ ສະ­ຫາຍ ອາ​ລຸນ​ໄຊ ສູນ​ນະ­ລາດ ເລ­ຂາ​ຄະ­ນະ​ບໍ­ລິ­ຫານ​ງານ​ສູນ​ກາງ ຊປປ ລາວ ມີ​ຕາງ­ໜ້າ​ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ແລະ ຫຼາຍພາກສ່ວນເຂົ້າຮ່ວມ.

    ໃນ​ພິ­ທີ​ດັ່ງ­ກ່າວ ສະ­ຫາຍ ອາ­ນຸ­ພາບ ວົງ​ໜໍ່​ແກ້ວ ກຳ­ມະ­ການ​ສູນ​ກາງ ຊປປ ລາວ ເລ­ຂາ​ຄະ­ນະ​ບໍ­ລິ­ຫານ​ງານ​ຊາວ​ໜຸ່ມ ຊປປ ລາວ ກະ­ຊວງ​ການ​ຕ່າງ­ປະ­ເທດ ໄດ້​ຂຶ້ນ​ຜ່ານ​ບົດ​ສະ­ຫຼຸບ​ການ­ຈັດ­ຕັ້ງ​ປະ­ຕິ­ບັດ​ຂໍ້​ແຂ່ງ­ຂັນ 4 ບຸກ ແລະ ການ­ເຄື່ອນ­ໄຫວ​ວຽກ​ງານ​ຊາວ​ໜຸ່ມ​ຂອງ​ກະ­ຊວງ​ການ​ຕ່າງ­ປະ­ເທດ ໂດຍ​ໄດ້​ຍົກ​ໃຫ້​ເຫັນ​ເຖິງ​ຜົນ­ງານ​ທີ່​ພົ້ນ​ເດັ່ນ​ຫຼາຍ​ດ້ານ ແລະ ແຜນ​ທິດ​ທາງ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ 4 ບຸກ​ໃນ­ຕໍ່­ໜ້າ ເຊິ່ງມີ​ໜ່ວຍ​ຊາວ​ໜຸ່ມ​ທັງ​ພາຍ​ໃນ ແລະ ຕ່າງ­ປະ­ເທດ ຈຳ­ນວນ 56 ໜ່ວຍ ແລະ ມີ​ສະ­ມາ­ຊິກ​ຊາວ​ໜຸ່ມ​ທັງ​ໝົດ 7.955 ສະ­ຫາຍ (ຍິງ 3.168 ສະ­ຫາຍ) ພ້ອມ​ກັນ​ນັ້ນ ສະ­ມາ­ຊິກ​ຊາວ​ໜຸ່ມ​ກະ­ຊວງ ຍັງ​ໄດ້​ຮັບ​ການ​ຍ້ອງ­ຍໍ​ຂັ້ນ​ລັດ­ຖະ­ບານ ຈຳ­ນວນ 55 ສະ­ຫາຍ ຂັ້ນ​ກະ­ຊວງ 250 ສະ­ຫາຍ ແລະ ໄດ້​ຮັບ​ໃບ​ຍ້ອງ­ຍໍ​ການ­ເຄື່ອນ­ໄຫວ​ວຽກ​ງານ​ຊາວ​ໜຸ່ມ ຈຳ­ນວນ 400 ກວ່າ​ສະ­ຫາຍ ໃນ​ປີ­ຜ່ານ­ມາ​ອີກ​ດ້ວຍ ຜ່ານ​ການ­ຈັດ­ຕັ້ງ​ປະ­ຕິ­ບັດ​ເນື້ອ​ໃນ​ຂໍ້​ແຂ່ງ­ຂັນ 4 ບຸກ ສາ­ມາດ​ຕີ​ລາ­ຄາ​ດ້ານ​ແນວ​ຄິດ ປະ­ຕິ­ບັດ​ໄດ້ 100% ດ້ານ​ການ​ເຝິກ­ຝົນ​ຫຼໍ່​ຫຼອມ​ຕົນ​ເອງ ປະ­ຕິ­ບັດ​ໄດ້ 98% ດ້ານ​ການ­ຈັດ­ຕັ້ງ ໄດ້ 98% ແລະ ດ້ານ​ວຽກ​ງານ​ວິ­ຊາ​ສະ­ເພາະ ປະ­ຕິ­ບັດ​ໄດ້ 99%.

    ພາຍ­ຫຼັງ​ສຳ­ເລັດ​ພິ­ທີ ສອງ​ພາກ­ສ່ວນ ຍັງ​ໄດ້​ເຂົ້າ​ຮ່ວມ​ຂະ​ບວນ​ການ​ກີ­ລາ​ບານ­ເຕະ​ມິດ­ຕະ­ພາບ ລະ­ຫວ່າງ ຄະ­ນະ​ບໍ­ລິ­ຫານ​ງານ​ຊາວ​ໜຸ່ມ​ກະ­ຊວງ​ການ​ຕ່າງ­ປະ­ເທດ ຮ່ວມ​ກັບ​ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ພົບ​ກັບ ຄະ­ນະ​ບໍ­ລິ­ຫານ​ງານ​ສູນ​ກາງ​ຊາວ​ໜຸ່ມ​ປະ­ຊາ­ຊົນ ປະ­ຕິ­ວັດ​ລາວ ອີກ​ດ້ວຍ.

ຂ່າວທີ່ກ່ຽວຂ້ອງ