ການກໍ່ສ້າງທາງລົດໄຟລາວ-ຈີນ ມີຄວາມຄືບໜ້າຢ່າງຕໍ່ເນື່ອງ

188 05 ກ.ກ. 2018 ຂ່າວໜ້າ​ໜຶ່ງ
ການກໍ່ສ້າງທາງລົດໄຟລາວ-ຈີນ ມີຄວາມຄືບໜ້າຢ່າງຕໍ່ເນື່ອງ

    ໃນ​ວັນ​ທີ 3 ກໍ­ລະ­ກົດ 2018 ສື່​ມວນ​ຊົນ​ຈາກ 6 ປະ­ເທດ ໃນ​ຂອບ​ການ​ຮ່ວມ​ມື​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ຄື: ກຳ­ປູ­ເຈຍ ຈີນ ລາວ ໄທ ມຽນ​ມາ ແລະ ຫວຽດ­ນາມ ຢ້ຽມ​ຊົມ​ຫ້ອງ­ການ​ໂຄງ­ການ​ກໍ່­ສ້າງ​ທາງ​ລົດ­ໄຟ​ລາວ-ຈີນ ໄລ­ຍະ​ສັນ­ຍາ​ທີ 6 ຢູ່​ບ້ານ ນາ​ຄູນ​ນ້ອຍ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ໂດຍ​ໃຫ້​ກຽດ​ຕ້ອນ­ຮັບ​ຂອງ ທ່ານ ຢວນ ກົວ​ຟູ ຫົວ­ໜ້າ​ຫ້ອງ­ການ​ກຸ່ມ ບໍ­ລິ­ສັດ​ວິ​ສາ​ຫະ​ກິດ​ທາງ​ລົດ­ໄຟ​ເລກ 2 ສປ ຈີນ.

    ສະ­ເພາະ​ໄລ­ຍະ​ສັນ­ຍາ​ທີ 6 ແຕ່​ໂພນ​ໂຮງ ຫາ ນະ­ຄອນ­ຫຼວງ​ວຽງ​ຈັນ ມີ​ໄລ­ຍະ​ທາງ 65,7 ກິ­ໂລ­ແມັດ ປັດ­ຈຸ­ບັນ ບໍ­ລິ­ສັດ​ຮັບ​ເໝົາ​ກໍ່­ສ້າງ​ພວມ​ເລັ່ງ​ຈັດ​ຕັ້ງ​ປະ­ຕິ­ບັດ​ໜ້າ​ວຽກ​ຕ່າງໆ ຢ່າງ​ຕໍ່​ເນື່ອງ ເປັນ­ຕົ້ນ ການ​ບຸກ­ເບີກ​ແລວ​ທາງ ສ້າງ​ເສົາ­ຄ້ຳ​ໂຕ T ສ້າງ​ຂົວ ແລະ ອື່ນໆ ໂຄງ­ການ​ກໍ່­ສ້າງ​ທາງ​ລົດ­ໄຟ​ລາວ-ຈີນ ມາ​ເຖິງ​ເດືອນ ພຶດ­ສະ­ພາ 2018 ມີ​ຄວາມ​ຄືບ ໜ້າ 33,7% (ລື່ນ​ຄາດ­ໝາຍ 4%).

   ໂຄງ­ການ​ກໍ່­ສ້າງ​ທາງ​ລົດ­ໄຟ​ລາວ-ຈີນ ເປັນ​ໂຄງ­ການ​ຮ່ວມ​ມື​ຂອງ​ສອງ​ລັດ­ຖະ­ບານ ລາວ ແລະ ຈີນ ໃນ​ນີ້ ລັດ​ຖະ ບານ​ລາວ ຖື​ຫຸ້ນ 30% ແລະ ລັດ­ຖະ­ບານ​ຈີນ​ຖື​ຫຸ້ນ 70% ມີ​ຈຸດ​ເລີ່ມ​ຕົ້ນ​ແຕ່​ບໍ່​ເຕັນ ແຂວງ​ຫຼວງ​ນ້ຳ​ທາ ຜ່ານ​ແຂວງ ອຸ­ດົມ​ໄຊ ແຂວງ​ຫຼວງ​ພະ​ບາງ ແຂວງ​ວຽງ​ຈັນ ຈົນ​ຮອດ​ນະ­ຄອນ­ຫຼວງ​ວຽງ​ຈັນ ລວມ​ຄວາມ​ຍາວ​ທັງ​ໝົດ 414,3 ກິ­ໂລ­ແມັດ ມີ 32 ສະ­ຖາ­ນີ ເປັນ​ທາງ​ລົດ­ໄຟ​ສາຍ​ດຽວ​ທີ່​ຂັບ​ເຄື່ອນ​ດ້ວຍ​ພະ­ລັງ­ງານ​ໄຟ­ຟ້າ​ຂົນ­ສົ່ງ​ໂດຍ­ສານ ແລະ ສິນ­ຄ້າ​ດ້ວຍ​ຄວາມ​ໄວ​ສູງ 160 ກິ­ໂລ­ແມັດ​ຕໍ່​ຊົ່ວ­ໂມງ ເຊິ່ງ​ວາງ​ສີ​ລາ​ລຶກ​ໂຄງ­ການ​ກໍ່­ສ້າງ​ຢ່າງ​ເປັນ​ທາງ​ການ ຈັດ​ຂຶ້ນ​ໃນ​ວັນ​ທີ 2 ທັນ­ວາ ປີ 2015 ຄາດ​ວ່າ­ການ​ກໍ່­ສ້າງ​ຈະ​ໃຫ້​ສຳ­ເລັດ​ໃນ​ປີ 2021 ມູນ​ຄ່າ​ການ​ລົງ­ທຶນ​ທັງ​ໝົດ​ເກືອບ 6 ຕື້​ໂດ​ລາ​ສະ­ຫະ­ລັດ.

ຂ່າວທີ່ກ່ຽວຂ້ອງ