ຂ່າວຫຼ້າສຸດ

5 ຊາດອາຊີ ສູນພັນໃນເຕະບານໂລກ 2018

150 05 ກ.ກ. 2018 ວົງຈອນກີລາ
5 ຊາດອາຊີ ສູນພັນໃນເຕະບານໂລກ 2018

     ຈົບລົງແລ້ວສຳລັບປະເທດຈາກຂົງເຂດອາຊີທັງ 5 ຊາດ ທີ່ບໍ່ສາມາດຜ່ານຜ່າກຳແພງໃນລະດັບເອີຣົບ ແລະ ອາເມຣິກາໃຕ້ໄດ້ໄຫວ ຈົບເຕະບານໂລກໄປແລ້ວຄົບທັງ 5 ທີມ ໂດຍມີຍີ່ປຸ່ນທີ່ໄປໄດ້ໄກທີ່ສຸດຄືຮອບ 16 ທີມສຸດທ້າຍ.

      ເຮັດໃຫ້ນັບຈາກປີ 2002 ທີ່ ສ ເກົາຫຼີໄດ້ທີ 4 ຍັງບໍ່ເຄີຍມີຈາກຂົງເຂດອາຊີເຂົ້າໄປເຖິງຮອບ 8 ທີມສຸດທ້າຍໄດ້ຈັກເທື່ອ ບໍ່ໄດ້ພຽງແຕ່ດາດໄປດາດມາເທົ່ານັ້ນ.

      ທັ້ງໆທີ່ ແຕ່ລະຊາດພັດທະນາຂຶ້ນຫຼາຍ ແລະ ມີຕົວນັກເຕະໃນລະດັບເອີຣົບຫຼາຍຄົນ ແຕ່ເປັນຫຍັງບໍ່ສາມາດໄປໄດ້ໄກຈັກເທື່ອ ບັນຫາຄືອັນໃດກັນແທ້ ເຮົາຈະລອງໄປເຈາະທີ່ບັນຫາເທື່ອລະຂໍ້.

      1. ບໍ່ເຢືອກເຢັນພໍ

      ຕົວຢ່າງທີ່ດີທີ່ສຸດຄືທີມຊາດຍີ່ປຸ່ນ ທີ່ຍິງຂຶ້ນນຳແບນຊິກ 2-0 ໃນປະຫວັດສາດທີມທີ່ນຳ 2-0 ໃນຮອບຕັດເຊືອກແລ້ວພິກຕົກຮອບໃນ 90 ນາທີ ຕ້ອງຢ້ອນກັບໄປເມື່ອ 48 ປີທີ່ຜ່ານມາ ແຕ່ຍີ່ປຸ່ນກໍມາພາດຕົກຮອບໄປຢ່າງເຫຼືອເຊື່ອ.

      ຕອນນຳ 2-0 ຍີ່ປຸ່ນຄອງເກມໄດ້ທຸກຢ່າງ ແຕ່ໄປເປີດໂອກາດໃຫ້ແບນຊິກຍິງກັບມາ 2-1 ແບບບໍ່ໜ້າເຊື່ອ ກ່ອນສຸດທ້າຍຕີສະເໝີ 2-2 ແລະ ໃນໄລຍະທົດແທນເວລາບາດເຈັບນາທີທີ 4 ແທນທີ່ພວກເຂົາຈະລໍຖ້າເວລາເພື່ອໃຫ້ການໂດ່ງບານເປັນການຫຼິ້ນສຸດທ້າຍ ແຕ່ກັບຮີບຣ້ອນເດາະບານເຂົ້າມາ ຈົນເຂົ້າມາຫາ ທີໄບ ກູກຕົວ ກ່ອນຈະຖືກລູກສວນກັບ ແລະ ພ່າຍແພ້ໄປເລີຍ ຖ້າຍີ່ປຸ່ນດຸດັນກວ່ານີ້ ນິ່ງກວ່ານີ້ ແບນຊິກຕົກຮອບໄປແລ້ວ.

       ເຊັ່ນດຽວກັບ ອິຣ່ານ ໃນເກມສຸດທ້າຍກັບປອກຕຸຍການ ພວກເຂົາມີໂອກາດຫຼຸດໄປຍິງໃນສ້ຽວວິນາທີສຸດທ້າຍ ຊຶ່ງມີມຸມມີຊ່ອງ ແຕ່ສຸດທ້າຍຍິງອອກ ຖ້າຍິງໄດ້ນິ່ງກວ່ານີ້ ອິຣ່ານກໍຈະເຂົ້າຮອບເລີຍເຊັ່ນກັນ.

      2) ພາດແບບບໍ່ຄວນພາດ

      ສ ເກົາຫຼີ ເປັນທີມທີ່ຫຼິ້ນໄດ້ວູບວາບທັງລາຍການ ຈະພົບກັບທີມໃດ ພວກເຂົາກໍສູ້ໄດ້ໝົດ ແຕ່ບັນຫາຄື ສ ເກົາຫຼີ ເຮັດເສຍຈຸດໂທດທັງສອງເກມ ເກມລະ 1 ລູກ ໃນຈັງຫວະທີ່ບໍ່ຄວນຈະເສຍເລີຍ ລອງຄິດກັບກັນ ຖ້າ ສ ເກົາຫຼີ ບໍ່ເສຍຈຸດໂທດສອງເກມນັ້ນ ພວກເຂົາຈະມີຄະແນນພໍທີ່ຈະເຂົ້າຮຣອບຕັດເຊືອກ.

      ກາຍເປັນວ່າເກມຊະນະເຢຍລະມັນ ບໍ່ໄດ້ປະໂຫຍດເລີຍ ເພາະ ສ ເກົາຫຼີມາເສຍຄະແນນໃນເກມທີ່ບໍ່ຄວນເສຍໄປແລ້ວ.

      3)  ຮ່າງກາຍໃຊ້ບໍ່ໄດ້ຜົນ

      ເວລາພົບກັບຊາດໃນອາຊີ ຊາອຸດິອາຣະເບຍ ຈະໃຊ້ຂໍ້ໄດ້ປຽບທາງຮ່າງກາຍເຂົ້າໂຈມຕີ ໃຊ້ຕົວໃຫຍ່ກວ່າ ເອົາຊະນະຄູ່ແຂ່ງ ໃຊ້ຄວາມໄວທີ່ເໜືອກວ່າ ເພື່ອບົດບີ້ຄູ່ແຂ່ງ ແຕ່ພໍຊາອຸດິອາຣະເບຍ ມາພົບກັບເຈົ້າພາບຣັດເຊຍ ທີ່ບໍ່ມີອັນໃດເປັນຮອງເລີຍ ພວກເຂົາເຖິງກັບມຶນ ແລະ ເມົາໝັດ.

      ຊາອຸດິອາຣະເບຍ ພະຍາຍາມຕໍາ ພະຍາຍາມກະແທກ ແຕ່ຣັດເຊຍບໍ່ສະເທືອນ ຂະນະທີ່ຄວາມໄວທີ່ເຄີຍລາກບານໜີຄູ່ແຂ່ງກໍບໍ່ໄດ້ຜົນອີກແລ້ວ ເພາະຄູ່ແຂ່ງທຸກທີມ ທັງຣັດເຊຍ ແລະ ອຸຣຸກວາຍ "ໄວກວ່າ".

      ເຊັ່ນດຽວກັບອົດສະຕຣາລີ ທີ່ມີຮ່າງກາຍເໜືອກວ່າຄູ່ແຂ່ງໃນອາຊີມາຕະຫຼອດ ພໍຫຼິ້ນນບານໂລກ ຮ່າງກາຍທີ່ໃຫຍ່ໂຕນັ້ນໃຊ້ການບໍ່ໄດ້ ອົດສະຕຣາລີ ບໍ່ໄດ້ປະຕູຈາກລູກຫຼິ້ນແບບເປີດກວ້າງເລີຍແມ່ນແຕ່ລູກດຽວ.

      ກາຍເປັນອິຣ່ານ ສ ເກົາຫຼີ ແລະ ຍີ່ປຸ່ນ ທີ່ຫຼິ້ນບານດ້ວຍລະບົບ ກັບເປັນຫົນທາງທີ່ເບິ່ງແລ້ວດີກວ່າໃນການຕໍ່ສູ້ກັບທີມຈາກທະວີບອື່ນ.

      4)  ໂຊກຮ້າຍ

      ກໍລະນີນີ້ເກິດຂຶ້ນກັບອິຣ່ານ ເມື່ອພວກເຂົາຈັບສະຫຼາກມາຢູ່ກຸ່ມດຽວກັບປອກຕຸຍການ ແລະ ແອັດສະປາຍ ສອງທີມໃຫຍ່ໃນເອີຣົບ ລອງຄິດວ່າ ຖ້າຈັບເອົາອິຣ່ານໄປຢູ່ແທນທີ່ຍີ່ປຸ່ນ ຫຼືຢູ່ໃນກຸ່ມຊີ ຂອງອົດສະຕຣາລີ ພວກເຂົາກໍໜ້າຈະເຂົ້າຮອບໄດ້ ຖ້າມີຟອມການຫຼິ້ນຢ່າງນີ້.

      ບາງທີ ພຽງແຕ່ຟອມດີກໍບໍ່ພຽງພໍ ແຕ່ໂຊກດວງໃນການຈັບສະຫຼາກແບ່ງກຸ່ມກໍມີຜົນດ້ວຍ.

      5)  ໂຄ໊ຊຝີມືບໍ່ເຖິງ

      ທີມຊາດຍີ່ປຸ່ນ ເປັນຕົວຢ່າງທີ່ດີຫຼາຍ ອາກິຣະ ນິຊິໂນະ ອາດຈະເຄີຍຄຸມຫຼາຍສະໂມສອນໃນເຈລີກ ແຕ່ເຂົາກໍຫວ່າງເວັ້ນຈາກການຄຸມທີມມາ 3 ປີແລ້ວ ຄວາມດຸດັນ ຄວາມລະອຽດໃນການແກ້ເກມຍັງໜ້ອຍຢູ່.

      ເອອິຈິ ຄາວາຈິມະ ຫຼິ້ນພາດມາ 2-3 ຄັ້ງ ກໍຍັງໃຫ້ໂອກາດເປັນຕົວຈິງຕໍ່ ຂະນະທີ່ພໍເຫັນແບນຊິກແກ້ເກມໃນເຄິ່ງຫຼັງ ສົ່ງ ເຟວໄລນີ່ ກັບ ນາເຊີ ຊາດລີ່ ລົງມາ ແທນທີ່ນິຊິໂນະ ຈະແພັກເກມຮັບຈຸດໃຈກາງໃຫ້ແໜ້ນໜາຂຶ້ນ ເຂົາກັບບໍ່ປ່ຽນແຜນອັນໃດເລີຍ ຈົນສົ່ງຜົນໃຫ້ເຟວໄລນີ່ ເອົາຫົວຕໍາບານເຂົ້າປະຕູຕີສະເໝີໄດ້.

      ຖ້າທີມລະດັບຍີ່ປຸ່ນ ໄດ້ໂຄ໊ຊທີ່ມີປະສົບການໃນເວທີເອີຣົບມາແລ້ວ ຢ່າງຄາລອສ ເຄຍຣອຊ ທີ່ຄຸມອິຣ່ານ ບາງທີ ພວກເຂົາອາດໄປໄດ້ໄກກວ່ານີ້.

ຂ່າວທີ່ກ່ຽວຂ້ອງ