ຄະນະຜູ້ແທນລາວ ສຳເລັດການເຂົ້າຮ່ວມກອງປະຊຸມໄອໂອເອັມ ຢູ່ເຊີແນວ

186 04 ກ.ກ. 2018 ຂ່າວໜ້າ​ໜຶ່ງ

ໃນ​ວັນ​ທີ 29 ມິ­ຖຸ­ນາ 2018 ຜ່ານ​ມາ ຄະ­ນະ​ຜູ້​ແທນ ສປປ ລາວ ນຳ­ພາ​ໂດຍ​ທ່ານ​ນາງ ຄຳ​ເພົາ ເອີນ​ທະ​ວັນ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ໄດ້​ເຂົ້າ​ຮ່ວມ​ກອງ​ປະ­ຊຸມ​ສະ­ໄໝ​ວິ­ສາ­ມັນ ຄັ້ງ​ທີ 2 ປະ­ຈຳ​ປີ 2018 ຂອງ​ສະ­ພາ​ບໍ­ລິ­ຫານ​ອົງ­ການ​ສາ­ກົນ ເພື່ອ​ການ​ເຄື່ອນ​ຍ້າຍ​ຖິ່ນ​ຖານ​ໄອ​ໂອ​ເອັມ (IOM) ເຊິ່ງ​ໄດ້​ຈັດ​ຂຶ້ນ​ທີ່​ນະ­ຄອນ​ເຊີ​ແນວ ປະ­ເທດ​ສະ​ວິດ ພາຍ​ໃຕ້​ການ​ເປັນ​ປະ­ທານ​ຂອງ​ທູດ​ປະ­ເທດ​ຊິ​ເລ ປະ­ຈຳ​ເຊີ​ແນວ ມີ​ປະ­ເທດ​ສະ­ມາ­ຊິກ​ໄອ​ໂອ​ເອັມ ທັງ​ໝົດ​ເຂົ້າ​ຮ່ວມ.

ກອງ​ປະ­ຊຸມ​ສະ­ໄໝ​ວິ­ສາ­ມັນ​ຄັ້ງ​ນີ້ ໄດ້​ປຶກ­ສາ​ຫາ­ລື​ຫຼາຍ​ບັນ­ຫາ​ສຳ­ຄັນ​ທີ່​ຕິດ​ພັນ​ກັບ​ວຽກ​ງານ​ບໍ​ລິ ຫານ​ອົງ­ການ​ໄອ​ໂອ​ເອັມ ໃນ​ໄລ­ຍະ​ຜ່ານ​ມາ ການ​ປະ­ກາດ​ເອົາ​ສະ­ມາ­ຊິກ​ໃໝ່ 3 ປະ­ເທດ ເຊິ່ງ​ມີ ສປປ ລາວ ປະ­ເທດ​ປາ​ລາວ ປະ­ເທດ​ເກຣ​ນາ​ດາ ປັດ­ຈຸ­ບັນ​ອົງ­ການ ໄອ​ໂອ​ເອັມ ມີ​ສະ­ມາ­ຊິກ​ທັງ​ໝົດ 172 ປະ­ເທດ ການ​ເລືອກ​ຕັ້ງ​ເອົາ​ຜູ້­ອຳ­ນວຍ­ການ​ໃຫຍ່​ຄົນ​ໃໝ່​ປ່ຽນ​ແທນ​ຜູ້​ເກົ່າ​ທີ່​ຈະ​ໝົດ​ວາ­ລະ​ໃນ​ທ້ານ​ເດືອນ​ກັນ­ຍາ 2018 ເຊິ່ງ​ໄດ້​ມີ​ຜູ້​ສະ­ໝັກ 3 ທ່ານ ຈາກ 3 ປະ­ເທດ ອາ​ເມ​ຣິ​ກາ ໂກດ​ສະ​ຕາ​ລີ​ກາ ແລະ ປະ­ເທດ​ປອກ​ຕຸຍ​ການ ຜ່ານ​ການ​ລົງ​ຄະ­ແນນ ທ່ານ Antonio Vitorion ຈາກ​ປະ­ເທດ​ປອກ​ຕຸຍ​ການ ຊະ­ນະ​ການ​ເລືອກ​ຕັ້ງ ແລະ ຈະ​ເຂົ້າ​ຮັບ​ໜ້າ­ທີ່​ເລີ່ມ​ແຕ່​ວັນ​ທີ 1 ຕຸ­ລາ 2018 ເປັນ­ຕົ້ນ​ໄປ ໂດຍ​ມີ​ກຳ­ນົດ​ເວ­ລາ​ການ​ດຳ­ລົງ​ຕຳ­ແໜ່ງ 5 ປີ.

ໃນ​ໂອ­ກາດ​ເຂົ້າ​ຮ່ວມ​ກອງ​ປະ­ຊຸມ​ຄັ້ງ​ນີ້ ທ່ານ​ນາງ ຄຳ​ເພົາ ເອີນ​ທະ​ວັນ ໄດ້​ກ່າວ​ຄຳ​ປາ​ໄສ​ຕໍ່​ກອງ​ປະ­ຊຸມ ໂດຍ​ໄດ້​ສະ­ແດງ​ຄວາມ​ຊົມ­ເຊີຍ​ອົງ­ການ ໄອ​ໂອ​ເອັມ ທີ່​ໄດ້​ປະ­ກອບ­ສ່ວນ​ໃຫ້­ການ​ຊ່ວຍ­ເຫຼືອ ແລະ ປົກ​ປ້ອງ​ຜູ້​ເຄື່ອນ​ຍ້າຍ​ຖິ່ນ​ຖານ​ໃນ​ທົ່ວ​ໂລກ ໃນ​ໄລ­ຍະ​ຜ່ານ​ມາ ສະ­ແດງ​ຄວາມ​ຂອບ­ໃຈ​ຕໍ່​ປະ­ເທດ​ສະ­ມາ­ຊິກ ກໍ່​ຄື ອົງ ການ​ໄອ​ໂອ​ເອັມ ທີ່​ໄດ້​ໃຫ້­ການ​ສະ­ໜັບ­ສະ­ໜູນ ແລະ ຮັບ­ຮອງ​ເອົາ ສປປ ລາວ ເຂົ້າ​ເປັນ​ສະ­ມາ­ຊິກ ພ້ອມ​ທັງ​ໄດ້​ໃຫ້­ການ​ຊ່ວຍ­ເຫຼືອ ສປປ ລາວ ໃນ​ໄລ­ຍະ​ຜ່ານ​ມາ.

ຂ່າວທີ່ກ່ຽວຂ້ອງ