ຂ່າວຫຼ້າສຸດ

ລາວ-ຈີນ ແລກປ່ຽນບົດຮຽນການນຳພາຂອງພັກ

359 04 ກ.ກ. 2018 ຂ່າວໜ້າ​ໜຶ່ງ
ລາວ-ຈີນ ແລກປ່ຽນບົດຮຽນການນຳພາຂອງພັກ

ວັນ​ທີ 2 ກໍ­ລະ­ກົດ 2018 ທີ່​ນະ­ຄອນ­ຫຼວງ​ວຽງ​ຈັນ ໄດ້​ເປີດ​ການ​ສຳ​ມະ​ນາ​ທິດ​ສະ​ດີ ລະ­ຫວ່າງ​ພັກ​ປະ­ຊາ­ຊົນ​ປະ­ຕິ­ວັດ​ລາວ ແລະ ພັກ​ກອມ​ມູ​ນິດ​ຈີນ ຄັ້ງ​ທີ 7 ພາຍ​ໃຕ້​ຫົວ­ຂໍ້ "ພຶດ­ຕິ​ກຳ ແລະ ບົດ­ຮຽນ​ແຫ່ງ​ການ​ດຳ­ເນີນ​ການ​ປ່ຽນ­ແປງ​ໃໝ່​ຮອບ­ດ້ານ ມີ​ຫຼັກ­ການ​ຢູ່​ລາວ ແລະ ການ​ປະ­ຕິ​ຮູບ​ເປີດ​ປະ­ຕູ​ສູ່​ໂລກ​ພາຍ​ນອກ​ຢູ່​ຈີນ" ຝ່າຍ​ລາວ​ນຳ​ໂດຍ​ທ່ານ ບຸນ​ທອງ ຈິດ​ມະ­ນີ  ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ເລ­ຂາ­ທິ­ການ​ສູນ​ກາງ​ພັກ ປະ­ທານ​ຄະ­ນະ​ກວດ­ກາ​ສູນ​ກາງ​ພັກ ຮອງ​ນາ­ຍົກ­ລັດ­ຖະ­ມົນ­ຕີ ແລະ ຝ່າຍ​ຈີນ​ນຳ​ໂດຍ​ທ່ານ ຫວງ ຄຸນ​ໝິງ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ເລ­ຂາ­ທິ­ການ​ສູນ​ກາງ​ພັກ ຫົວ­ໜ້າ​ຄະ­ນະ​ໂຄ­ສະ­ນາ​ສູນ​ກາງ​ພັກ​ກອມ​ມູ​ນິດ​ຈີນ ມີ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ທ່ານ ບຸນ​ທອງ ຈິດ​ມະ­ນີ ໄດ້​ມີ​ຄຳ​ເຫັນ​ພາຍ​ໃຕ້​ຫົວ­ຂໍ້ "ພັກ​ປະ­ຊາ­ຊົນ​ປະ­ຕິ­ວັດ​ລາວ ລິ​ເລີ່ມ ແລະ ນຳ­ພາ​ການ​ປ່ຽນ­ແປງ​ໃໝ່​ຮອບ­ດ້ານ​ທີ່​ມີ​ຫຼັກ­ການ​ຢູ່​ລາວ" ແລະ ທ່ານ ຫວງ ຄຸນ​ໝິງ ໄດ້​ມີ​ຄຳ​ເຫັນ​ພາຍ​ໃຕ້​ຫົວ­ຂໍ້ "ການ​ຊອກ​ຄົ້ນ​ດ້ານ​ພຶດ­ຕິ​ກຳ ແລະ ບົດ­ຮຽນ​ສຳ­ຄັນ​ຂອງ​ການ​ປະ­ຕິ​ຮູບ ແລະ ເປີດ​ປະ­ຕູ​ສູ່​ພາຍ​ນອກ​ຂອງ​ປະ­ເທດ​ຈີນ". ຈາກ​ນັ້ນ ຜູ້​ເຂົ້າ​ຮ່ວມ​ໄດ້​ຮັບ​ຟັງ​ບົດ​ສະ­ເໜີ​ຫົວ­ຂໍ້​ຕ່າງໆ​ຂອງ​ຄະ­ນະ​ຜູ້​ແທນ​ລາວ ແລະ ຈີນ ທີ່​ປິ່ນ​ອ້ອມ​ຫົວ­ຂໍ້​ຫຼັກ​ຂອງ​ການ​ສຳ​ມະ​ນາ​ທັງ​ໝົດ 13 ຫົວ­ຂໍ້ ໃນ​ນີ້ ຄະ­ນະ​ຜູ້​ແທນ​ລາວ​ສະ­ເໜີ 7 ຫົວ­ຂໍ້ ປະ­ກອບ​ດ້ວຍ ພັກ​ກຳ­ນົດ​ເສັ້ນ­ທາງ​ກ້າວ​ຂຶ້ນ​ສັງ­ຄົມ​ນິ­ຍົມ​ຢູ່​ປະ­ເທດ​ເຮົາ ສ້າງ​ສັງ­ຄົມ​ສາ­ມັກ­ຄີ​ປອງ​ດອງ ປະ­ຊາ­ທິ­ປະ­ໄຕ​ຍຸ­ຕິ​ທຳ ແລະ ສີ­ວິ­ໄລ​ເປີດ​ກວ້າງ​ການ​ພົວ­ພັນ​ຮ່ວມ​ມື​ກັບ​ຕ່າງ­ປະ­ເທດ ພັດ­ທະ­ນາ​ເສດ­ຖະ­ກິດ​ຕະ­ຫຼາດ​ຕາມ​ທິດ​ສັງ­ຄົມ​ນິ­ຍົມ​ຢູ່​ລາວ ເດັດ ດ່ຽວ​ປົກ​ປັກ​ຮັກ­ສາ ໝາກ­ຜົນ​ຂອງ​ການ​ປະ­ຕິ­ວັດ ແລະ ປະ­ເທດ​ຊາດ​ສ້າງ​ລັດ​ປະ­ຊາ­ທິ­ປະ­ໄຕ​ປະ­ຊາ­ຊົນ​ທີ່​ປົກ­ຄອງ​ດ້ວຍ​ກົດ­ໝາຍ ຍົກ​ສູງ​ຄວາມ​ສາ­ມາດ​ກຳ​ອຳ­ນາດ​ຂອງ​ພັກ​ປະ­ຊາ­ຊົນ ປະ­ຕິ­ວັດ​ລາວ ໃນ​ເງື່ອນ­ໄຂ​ພັກ​ດຽວ​ກຳ​ອຳ­ນາດ ແລະ ຄະ­ນະ​ຜູ້​ແທນ​ຈີນ ສະ­ເໜີ 6 ຫົວ­ຂໍ້ ປະ­ກອບ​ດ້ວຍ​ການ​ປະ­ຕິ​ຮູບ ແລະ ເປີດ​ປະ­ຕູ​ສູ່​ພາຍ​ນອກ​ແມ່ນ​ການ​ປະ­ຕິ­ວັດ​ຄັ້ງ​ທີ​ສອງ​ຂອງ​ປະ­ເທດ​ຈີນ ບົດ­ຮຽນ​ອັນ​ລ້ຳ​ຄ່າ​ຂອງ​ການ​ປະ­ຕິ​ຮູບ ແລະ ເປີດ​ປະ­ຕູ​ສູ່​ພາຍ​ນອກ​ຂອງ​ປະ­ເທດ​ຈີນ ຜົນ­ສຳ­ເລັດ​ທີ່​ເປັນ​ລັກ­ສະ­ນະ​ປະ­ຫວັດ­ສາດ ແລະ ການ​ປ່ຽນ­ແປງ​ຄັ້ງ​ປະ­ຫວັດ­ສາດ​ໃນ​ພາ­ລະ­ກິດ​ຂອງ​ພັກ ແລະ ຂອງ​ຊາດ​ນັບ​ແຕ່​ກອງ​ປະ­ຊຸມ​ໃຫຍ່​ຄັ້ງ​ທີ 18 ຂອງ​ພັກ​ກອມ​ມູ​ນິດ​ຈີນ ເປັນ­ຕົ້ນ ສັງ­ຄົມ​ນິ­ຍົມ​ທີ່​ມີ​ສີ­ສັນ​ພິ­ເສດ​ຂອງ​ຈີນ​ແມ່ນ​ຫົວ­ຂໍ້​ຫຼັກ ທັງ​ໝົດ​ຕະ­ຫຼອດ​ໄລ­ຍະ 40 ປີ ແຫ່ງ​ການ​ປະ­ຕິ​ຮູບ ແລະ ເປີດ​ປະ­ຕູ​ສູ່​ພາຍ​ນອກ ກໍ່­ສ້າງ ແລະ ບູ­ລະ­ນະ​ດ້ານ​ພຶດ­ຕິ​ກຳ​ການ​ຊອກ​ຄົ້ນ ແລະ ຄວາມ​ຮັບ​ຮູ້​ທີ່​ເປັນ​ກົດ­ເກນ​ຂອງ​ລະ­ບອບ​ເສດ­ຖະ­ກິດ​ຕະ­ຫຼາດ​ສັງ­ຄົມ​ນິ­ຍົມ ເອົາ​ການ​ເປີດ​ກວ້າງ​ມາ​ຊຸກ​ຍູ້​້​ການ​ປະ­ຕິ​ຮູບ​ຊຸກ­ຍູ້​ການ​ສ້າງ​ປະ­ຊາ​ຄົມ​ຮ່ວມ​ຊາ­ຕາ­ກຳ​ຂອງ​ມວນ​ມະ­ນຸດ  ເຊິ່ງ​ບົນ​ພື້ນ­ຖານ​ຄະ­ນະ​ຜູ້​ແທນ​ສອງ​ຝ່າຍ​ໄດ້​ຄົ້ນ­ຄວ້າ​ແລກ­ປ່ຽນ​ຄຳ​ຄິດ​ຄຳ​ເຫັນ​ຮ່ວມ​ກັນ​ຫຼາຍ​ບັນ­ຫາ​ທີ່​ສຳ­ຄັນ​ຢ່າງ​ກົງ​ໄປ​ກົງ​ມາ​ເປີດ​ອົກ​ເປີດ​ໃຈ ແລະ ພາ­ວະ​ວິ­ໄສ.

ຂ່າວທີ່ກ່ຽວຂ້ອງ