ຂ່າວຫຼ້າສຸດ

ສື່ມວນຊົນ 6 ປະເທດ ຮ່ວມກັນໂຄສະນາສົ່ງເສີມການທ່ອງທ່ຽວ

195 04 ກ.ກ. 2018 ຂ່າວໜ້າ​ໜຶ່ງ
ສື່ມວນຊົນ 6 ປະເທດ ຮ່ວມກັນໂຄສະນາສົ່ງເສີມການທ່ອງທ່ຽວ

ກອງ​ປະ­ຊຸມ​ສຸດ​ຍອດ​ສື່​ມວນ​ຊົນ ຂອບ​ການ​ຮ່ວມ​ມື​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ 2018 ໃນ​ວັນ​ທີ 3 ກໍ­ລະ­ກົດ 2018 ຈັດ​ຂຶ້ນ​ທີ່​ນະ­ຄອນ­ຫຼວງ​ວຽງ​ຈັນ ໄດ້​ປຶກ­ສາ​ຫາ­ລື​ການ​ຍົກ​ລະ­ດັບ​ການ​ບໍ­ລິ­ໂພກ ແລະ ການ​ພັດ­ທະ­ນາ​ການ­ທ່ອງ­ທ່ຽວ ໂດຍ​ການ​ຂຶ້ນ​ບັນ­ຍາຍ​ຂອງ​ທ່ານ ທອງ​ຫຼໍ່ ດວງ​ສະ­ຫວັນ ຫົວ­ໜ້າ​ບັນ­ນາ­ທິ­ການ​ໜັງ­ສື­ພິມ​ພາ­ສາ​ຕ່າງ­ປະ­ເທດ ກະ­ຊວງ ຖວ​ທ ມີ​ທ່ານ ສະ­ຫວັນ​ຄອນ ຣາ​ຊ​ມຸນ­ຕີ ຮອງ​ລັດ­ຖະ­ມົນ­ຕີ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ)  ຜູ້­ຕາງ­ໜ້າ​ຈາກ​ສື່​ມວນ​ຊົນ 6 ປະ­ເທດ​ລຸ່ມ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ​ເຂົ້າ​ຮ່ວມ.

ທ່ານ ທອງ​ຫຼໍ່ ດວງ​ສະ­ຫວັນ ກ່າວ​ວ່າ: ເພື່ອ​ສົ່ງ­ເສີມ​ການ­ທ່ອງ­ທ່ຽວ ລັດ­ຖະ­ບານ​ລາວ ຖື​ເອົາ​ການ­ທ່ອງ­ທ່ຽວ​ເປັນ​ໜຶ່ງ​ໃນ​ຂະ­ແໜງ​ຍຸດ​ທະ​ສາດ​ສຳ­ຄັນ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ຊາດ ທັງ​ສະ­ເພາະ​ໜ້າ ແລະ ຍາວ​ນານ ໂດຍ​ເລັ່ງ​ໃສ່​ການ­ທ່ອງ­ທ່ຽວ​ທາງ​ດ້ານ​ວັດ­ທະ­ນະ­ທຳ ປະ­ຫວັດ­ສາດ ແລະ ທຳ​ມະ​ຊາດ ຕິດ​ພັນ​ກັບ​ການ​ພັດ­ທະ­ນາ​ບັນ­ດາ​ຂະ­ແໜງ­ການ​ຕ່າງໆ ອັນ​ເຮັດ​ໃຫ້​ການ­ທ່ອງ­ທ່ຽວ​ລາວ​ມີ​ຫຼາຍ​ສີ­ສັນ ມີ​ສ່ວນ​ຮ່ວມ​ຈາກ​ປະ­ຊາ­ຊົນ​ບັນ­ດາ­ເຜົ່າ​ໃນ​ທົ່ວ​ສັງ­ຄົມ ແລະ ກາຍ­ເປັນ​ອຸດ­ສາ­ຫະ­ກຳ​ການ­ທ່ອງ­ທ່ຽວ​ຄົບ​ວົງ​ຈອນ ທັນ​ສະ­ໄໝ ຍືນ​ຍົງ ພ້ອມ​ນັ້ນ ສປປ ລາວ ໄດ້​ຈັດ​ປີ​ທ່ອງ​ທ່ຽວ​ມາ​ແລ້ວ 2 ຄັ້ງ ຄື: ສົກ​ປີ 1999-2000 ແລະ ສົກ​ປີ 2011-2012 ນັບ​ແຕ່​ເວ­ລາ​ນັ້ນ​ມາ​ເຮັດ​ໃຫ້​ຈຳ­ນວນ​ນັກ​ທ່ອງ​ທ່ຽວ​ເຂົ້າ​ມາ​ທ່ຽວ​ລາວ​ນັບ​ມື້​ເພີ່ມ​ຂຶ້ນ​ຢ່າງ​ຕໍ່​ເນື່ອງ ມາ​ຮອດ​ປີ 2015 ຈຳ­ນວນ​ນັກ​ທ່ອງ​ທ່ຽວ​ເພີ່ມ​ຂຶ້ນ​ຫຼາຍ​ກວ່າ 4,6 ລ້ານ​ເທື່ອ​ຄົນ ລາຍ​ຮັບ​ການ­ທ່ອງ­ທ່ຽວ​ກ້າວ​ກະ­ໂດດ​ຂຶ້ນ​ຫຼາຍ​ກວ່າ 725 ລ້ານ​ໂດ​ລາ​ສະ­ຫະ­ລັດ ຈັດ​ຢູ່​ໃນ​ລຳ­ດັບ​ທີ 3 ຖັດ​ຈາກ​ລາຍ​ຮັບ​ການ​ສົ່ງ​ອອກ​ຂອງ​ລາວ ປີ 2017 ມີ​ນັກ​ທ່ອງ​ທ່ຽວ​ເຂົ້າ​ມາ​ລາວ 3.868.431 ເທື່ອ​ຄົນ ໃນ​ນີ້ ເປັນ​ນັກ​ທ່ອງ​ທ່ຽວ​ມາ​ຈາກ​ໄທ​ຫຼາຍ​ກວ່າ​ໝູ່ ຮອງ​ລົງ​ມາ​ແມ່ນ​ຫວຽດ­ນາມ ຈີນ ອາ​ເມ​ຣິ​ກາ ຍີ່­ປຸ່ນ ອັງ­ກິດ ສ ເກົາ­ຫຼີ ອົດ​ສະ​ຕຣາ​ລີ ເຢຍ​ລະ​ມັນ ແລະ ມາ​ເລ​ເຊຍ ສຳ­ລັບ​ປີ​ທ່ອງ​ທ່ຽວ​ລາວ 2018 ຕາມ​ແຜນ​ຈະ​ພະ­ຍາ­ຍາມ​ດຶງ​ດູດ​ນັກ​ທ່ອງ​ທ່ຽວ​ເຂົ້າ​ມາ​ບໍ່​ໃຫ້​ຫຼຸດ 5 ລ້ານ​ຄົນ ສ້າງ​ລາຍ​ຮັບ​ເຂົ້າ​ມາ​ໃຫ້​ໄດ້​ປະ­ມານ 900 ລ້ານ​ໂດ​ລາ ແລະ ໃນ​ປີ 2020 ຄາດ​ຄະ­ເນ​ຈະ​ມີ​ນັກ​ທ່ອງ​ທ່ຽວ​ເຖິງ 6,2 ລ້ານ​ຄົນ ຈະ​ມີ​ລາຍ​ຮັບ​ເຖິງ 993 ລ້ານ​ໂດ​ລາ.

ສຳ­ລັບ​ປີ 2016-2025 ອາ​ຊຽນ​ໄດ້​ສ້າງ​ແຜນ​ຍຸດ​ທະ​ສາດ​ການ­ທ່ອງ­ທ່ຽວ​ຕາມ​ວິ­ໄສ​ທັດ​ທີ່​ວ່າ​ປີ 2025 ອາ​ຊຽນ​ຈະ​ກາຍ­ເປັນ​ຈຸດ­ໝາຍ​ປາຍ­ທາງ​ການ­ທ່ອງ­ທ່ຽວ​ທີ່​ມີ​ຄຸ­ນະ­ພາບ ມີ​ເອ­ກະ­ລັກ​ສະ­ເພາະ ມີ​ຄວາມ​ອຸ­ດົມ­ສົມ­ບູນ ແລະ ເນັ້ນ​ໃສ່​ການ​ພັດ­ທະ­ນາ​ການ­ທ່ອງ­ທ່ຽວ​ແບບ​ມີ​ຄວາມ​ຮັບ­ຜິດ­ຊອບ ມີ​ຄວາມ​ຍືນ​ຍົງ ມີ​ສ່ວນ​ຮ່ວມ ແລະ ເທົ່າ​ທຽມ​ກັນ ເພື່ອ​ເປັນ​ການ​ປະ­ກອບ­ສ່ວນ​ອັນ​ສຳ­ຄັນ​ໃຫ້​ແກ່​ຄວາມ​ຜາ​ສຸກ​ດ້ານ​ເສດ­ຖະ­ກິດ-ສັງ­ຄົມ​ຂອງ​ປະ­ຊາ​ຄົມ​ອາ​ຊຽນ.

ພາຍ­ຫຼັງ​ທີ່​ຮັບ​ຟັງ​ການ​ບັນ­ຍາຍ​ຫົວ­ຂໍ້​ດັ່ງ­ກ່າວ​ແລ້ວ ບັນ­ດາ​ຕາງ­ໜ້າ​ຈາກ​ສື່​ມວນ​ຊົນ 6 ປະ­ເທດ​ຄື: ກຳ­ປູ­ເຈຍ ຈີນ ລາວ ມຽນ​ມາ ໄທ ແລະ ຫວຽດ­ນາມ ໄດ້​ແລກ­ປ່ຽນ​ຄຳ​ຄິດ​ເຫັນ​ເຊິ່ງ​ກັນ ແລະ ກັນ ເປັນ­ຕົ້ນ ແມ່ນ​ໃນ​ສະ ພາບ​ການ​ທີ່​ທົ່ວ​ໂລກ​ກຳ­ລັງ​ປະ​ເຊີນ​ກັບ​ວິ​ກິດ​ການ​ເສດ­ຖະ­ກິດ​ໃນ​ປັດ­ຈຸ­ບັນ​ທີ່​ສົ່ງ​ຜົນ​ກະ­ທົບ​ຕໍ່​ວຽກ​ງານ​ການ­ທ່ອງ­ທ່ຽວ  ສ້າງ​ການ­ທ່ອງ­ທ່ຽວ​ແບບ​ເຊື່ອມ​ໂຍງ​ກັນ ທ່ຽວ​ເທື່ອ​ດຽວ​ໄດ້​ຫຼາຍ​ເມືອງ​ໃນ​ບັນ­ດາ​ປະ­ເທດ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ແນ­ໃສ່​ຊອກ​ຫາ​ວິ­ທີ​ຊ່ວຍ​ໂຄ­ສະ­ນາ​ການ­ທ່ອງ­ທ່ຽວ​ໃຫ້​ຟົດ­ຟື້ນ ທັງ​ເປັນ​ການ​ຮ່ວມ​ມື​ກັນ​ໃຫ້​ເປັນ​ຮູບ​ປະ​ທຳ ແລະ ແຂ່ງ­ຂັນ​ກັນ​ໄປ​ພ້ອມ​ກັບ​ການ​ຮ່ວມ​ມື​ເພື່ອ​ໃຫ້​ທຸກ​ປະ­ເທດ​ໃນ​ອະ­ນຸ​ພາກ​ພື້ນ​ໄດ້​ຮັບ​ຜົນ​ປະ­ໂຫຍດ​ຮ່ວມ​ກັນ ນອກ​ນັ້ນ ຍັງ​ເປັນ​ການ​ກະ­ຕຸກ​ຊຸກ­ຍູ້​ໃຫ້​ນັກ​ທ່ອງ​ທ່ຽວ​ຈີນ​ເຂົ້າ​ມາ​ທ່ຽວ​ປະ­ເທດ​ລຸ່ມ​ແມ່­ນ້ຳ​ຂອງ​ໃຫ້​ຫຼາຍ​ຂຶ້ນ ພາຍ​ໃຕ້​ໂຄງ­ການ​ໜຶ່ງ​ແລວ​ໜຶ່ງ​ເສັ້ນ­ທາງ ແລະ ອື່ນໆ ນອກ​ນີ້​ກອງ​ປະ­ຊຸມ​ຍັງ​ໄດ້​ສົນ­ທະ­ນາ​ຄຸນ­ຄ່າ​ຫຼັກ ແລະ ການ​ຫັນ­ປ່ຽນ​ຂອງ​ສື່​ຕື່ມ​ອີກ.

ຂ່າວທີ່ກ່ຽວຂ້ອງ