ຂ່າວຫຼ້າສຸດ

ນັກສຶກສາລາວ ໄດ້ທຶນໄປສຶກສາທີ່ປະເທດຝຣັ່ງ

186 04 ກ.ກ. 2018 ຂ່າວໜ້າ​ໜຶ່ງ
ນັກສຶກສາລາວ ໄດ້ທຶນໄປສຶກສາທີ່ປະເທດຝຣັ່ງ

ພະ​ແນກ​ວັດ­ທະ­ນະ­ທຳ ແລະ ການ​ຮ່ວມ​ມື ຂອງ​ສະ­ຖານ­ທູດ​ຝຣັ່ງ​ປະ­ຈຳ​ລາວ ແລະ ບໍ­ລິ­ສັດ​ໄຟ­ຟ້າ​ນ້ຳ​ເທີນ 2 ຈັດ​ພິ­ທີ​ສະ­ຫຼອງ​ການ​ໃຫ້​ທຶນ​ສຶກ​ສາ ແລະ ການ​ເດີນ­ທາງ​ໄປ​ສຶກ​ສາ​ຢູ່​ປະ­ເທດ​ຝຣັ່ງ ຂອງ​ນັກ​ສຶກ​ສາ​ລາວ 2 ຄົນ ທີ່​ຜ່ານ​ການ​ຄັດ​ເລືອກ​ມາ​ຈາກ​ໂຮງ­ຮຽນ​ລະ­ບົບ 2 ພາ­ສາ ໃນ​ນະ­ຄອນ­ຫຼວງ​ວຽງ​ຈັນ ແລະ ນະ­ຄອນ­ຫຼວງ​ພະ​ບາງ​ຄື ນາງ ທິບ​ພາ​ພອນ ອຸ­ດົມ​ວິ­ໄລ ແລະ ນາງ ອາ​ລຸນ​ນີ ທຳ​ມະ​ວົງ​ສະ­ຫວັນ ຂຶ້ນ​ວັນ​ທີ 2 ກໍ­ລະ­ກົດ 2018 ທີ່​ສູນ​ພາ­ສາ​ຝຣັ່ງ ນະ­ຄອນ­ຫຼວງ​ວຽງ​ຈັນ ໃຫ້​ກຽດ​ມອບ​ໂດຍ​ທ່ານ ນາງ ມາ​ຣີ ເປີ​ຕູ​ໂຣ ຫົວ­ໜ້າ​ຝ່າຍ​ບໍ­ລິ­ຫານ​ບໍ­ລິ­ສັດ ໄຟ­ຟ້າ​ນ້ຳ​ເທີນ 2 ມີ​ພະ­ນັກ­ງານ​ວິ­ຊາ​ການ​ກ່ຽວ­ຂ້ອງ​ເຂົ້າ​ຮ່ວມ.

ນັກ​ສຶກ​ສາ 2 ຄົນ ຖືກ​ຄັດ​ເລືອກ​ເພື່ອ​ເປັນ​ສ່ວນ​ຮ່ວມ​ຂອງ​ໂຄງ­ການ ທຶນ​ການ​ສຶກ​ສາ​ເພື່ອ​ອະ­ນາ­ຄົດ ເຊິ່ງ​ໄດ້​ຈັດ​ຕັ້ງ​ປະ­ຕິ­ບັດ​ຮ່ວມ​ກັນ​ໂດຍ​ສະ­ຖານ­ທູດ​ຝຣັ່ງ​ປະ­ຈຳ​ລາວ ແລະ ບໍ­ລິ­ສັດ ໄຟ­ຟ້າ​ນ້ຳ​ເທີນ 2 ມາ​ແຕ່​ປີ 2015 ໃນ​ເດືອນ​ກັນ­ຍາ​ນີ້ ພວກ​ເຂົາ​ຈະ​ໄດ້​ເດີນ­ທາງ​ໄປ​ສຶກ​ສາ​ໃນ​ສາ­ຂາ​ວິ­ຊາ​ວິ­ສະ­ວະ­ກຳ​ກໍ່­ສ້າງ ແລະ ວິ­ສະ­ວະ­ກຳ​ກົນ​ຈັກ​ການ​ຜະ­ລິດ ເປັນ​ເວ­ລາ 2 ປີ ຢູ່​ທີ່​ມະ­ຫາ­ວິ­ທະ­ຍາ­ໄລ​ເຕັກ​ໂນ​ໂລ​ຊີ ໃນ​ເມືອງ​ເກີ​ຣ​ໂນບ ປະ­ເທດ​ຝຣັ່ງ.

ໂຄງ­ການ​ທຶນ​ການ​ສຶກ​ສາ​ເພື່ອ​ອະ­ນາ­ຄົດ ໄດ້​ເປີດ​ໂອ­ກາດ​ໃຫ້​ນັກ­ຮຽນ​ລາວ ທີ່​ມີ​ຄວາມ​ຮູ້​ດ້ານ​ພາ­ສາ​ຝຣັ່ງ ໄດ້​ຮັບ​ການ​ສຶກ​ສາ​ທີ່​ມີ​ຄຸ­ນະ­ພາບ​ສູງ​ທາງ​ດ້ານ​ເຕັກ­ນິກ​ວິ­ຊາ​ການ ແລະ ຫຼັງ​ຈາກ​ຈົບ​ຮຽນ ຜູ້​ທີ່​ມີ​ຄະ­ແນນ​ດີ​ທີ່​ສຸດ ກໍ່​ຈະ​ມີ​ໂອ­ກາດ​ໄດ້​ວຽກ​ກັບ​ບໍ­ລິ­ສັດ ໄຟ­ຟ້າ​ນ້ຳ​ເທີນ 2 ມີ​ນັກ​ສຶກ​ສາ​ຈາກ​ໂຄງ­ການ​ນີ້ ຈຳ­ນວນ 6 ຄົນ ທີ່​ຮຽນ​ຈົບ​ຈາກ​ປະ­ເທດ​ຝຣັ່ງ ແລະ ກຳ­ລັງ​ເຮັດ​ວຽກ​ຢູ່​ນຳ​ບໍ­ລິ­ສັດ ໄຟ­ຟ້າ​ນ້ຳ​ເທີນ 2 ໂຄງ­ການ​ທຶນ​ການ​ສຶກ​ສາ​ເພື່ອ​ອະ­ນາ­ຄົດ​ແມ່ນ  ໝາກ­ຜົນ​ການ​ຮ່ວມ​ມື​ຢ່າງ​ມີ​ປະ​ສິດ­ທິ​ຜົນ ລະ­ຫວ່າງ​ປະ­ເທດ​ຝຣັ່ງ ແລະ ສປປ ລາວ ເຊິ່ງ​ເປັນ​ການ​ປະ­ກອບ­ສ່ວນ​ເຂົ້າ​ໃນ​ການ​ສ້າງ​ຄວາມ​ເຂັ້ມ­ແຂງ ແລະ ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ.

ຂ່າວທີ່ກ່ຽວຂ້ອງ