ຂ່າວຫຼ້າສຸດ

ສື່ມວນຊົນແມ່ນ້ຳຂອງ-ແມ່ນ້ຳລ້ານຊ້າງ ຊຸກຍູ້ການພັດທະນາເສດຖະກິດ-ສັງຄົມ ໃນພາກພື້ນ

216 03 ກ.ກ. 2018 ຂ່າວໜ້າ​ໜຶ່ງ
ສື່ມວນຊົນແມ່ນ້ຳຂອງ-ແມ່ນ້ຳລ້ານຊ້າງ ຊຸກຍູ້ການພັດທະນາເສດຖະກິດ-ສັງຄົມ ໃນພາກພື້ນ

ກອງ​ປະ­ຊຸມ​ສຸດ​ຍອດ​ສື່​ມວນ​ຊົນ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ປີ 2018 ໄຂ​ຂຶ້ນ​ຢ່າງ​ເປັນ​ທາງ​ການ​ວັນ​ທີ 2 ກໍ­ລະ­ກົດ 2018 ທີ່​ໂຮງ­ແຮມ​ດອນ​ຈັນ​ພາ​ເລດ ນະ­ຄອນ­ຫຼວງ​ວຽງ​ຈັນ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ກິ​ແກ້ວ ໄຂ​ຄຳ​ພິ­ທູນ ຫົວ­ໜ້າ​ຄະ­ນະ​ໂຄ­ສະ­ນາ​ອົບ­ຮົມ​ສູນ​ກາງ​ພັກ​ປະ­ຊາ­ຊົນ ປະ­ຕິ­ວັດ​ລາວ ທ່ານ ຫວງ ຄຸນ​ໝິງ ຫົວ­ໜ້າ​ຄະ­ນະ​ໂຄ­ສະ­ນາ​ອົບ­ຮົມ​ສູນ​ກາງ​ພັກ​ກອມ​ມູ​ນິດ​ອິນ­ດູ­ຈີນ ທ່ານ ບໍ່​ແສງ​ຄຳ ວົງ​ດາ­ລາ ລັດ­ຖະ­ມົນ­ຕີ​ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ພ້ອມ​ດ້ວຍ​ບັນ­ດາ​ຮອງ​ລັດ­ຖະ­ມົນ­ຕີ ແຂກ​ທີ່​ຖືກ​ເຊີນ​ທັງ​ລາວ ແລະ ຈີນ ຫົວ­ໜ້າ​ອົງ­ການ​ສື່​ມວນ​ຊົນ​ຫຼັກ ແລະ ຄະ­ນະ​ຜູ້​ແທນ​ສື່​ມວນ​ຊົນ​ຈາກ 6 ປະ­ເທດ​ສະ­ມາ­ຊິກ​ຂອງ​ການ​ຮ່ວມ​ມື​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ຄື: ລາ­ຊະ​ອາ­ນາ­ຈັກ​ກຳ­ປູ­ເຈຍ ສປ ຈີນ ສປປ ລາວ ສສ ມຽນ​ມາ ລາ­ຊະ​ອາ­ນາ­ຈັກ​ໄທ ແລະ ສສ ຫວຽດ­ນາມ ເຂົ້າ​ຮ່ວມ.

ທ່ານ ກິ​ແກ້ວ ໄຂ​ຄຳ​ພິ­ທູນ ໄດ້​ໃຫ້​ກຽດ​ກ່າວ​ຄຳ​ປາ​ໄສ​ຕໍ່​ກອງ​ປະ­ຊຸມ ໂດຍ​ໄດ້​ຕີ​ລາ­ຄາ​ສູງ​ຕໍ່​ຜົນ­ສຳ­ເລັດ​ຂອງ​ກອງ​ປະ­ຊຸມ​ສຸດ​ຍອດ​ສື່​ມວນ​ຊົນ​ຂອບ​ການ​ຮ່ວມ​ມື​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ທີ່​ໄດ້​ຈັດ​ຂຶ້ນ​ທີ່​ນະ­ຄອນ ຫຼວງ​ປັກ​ກິ່ງ ສປ ຈີນ ໃນ​ປີ​ທີ່​ຜ່ານ​ມາ ແລະ ໄດ້​ສະ­ໜັບ­ສະ­ໜູນ​ເວ­ທີ​ປຶກ­ສາ​ຫາ­ລື​ການ​ຮ່ວມ​ມື​ຂອງ​ບັນ­ດາ​ສື່​ມວນ​ຊົນ 6 ປະ­ເທດ​ທີ່​ໄດ້​ກຳ­ນົດ​ເປົ້າ​ໝາຍ ແລະ ຈຸດ­ປະ­ສົງ​ລະ­ດັບ​ຄາດ­ໝາຍ​ຮ່ວມ​ມື​ກັນ​ໃນ​ການ​ປະ­ກອບ ສ່ວນ​ຊຸກ­ຍູ້​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ຂອງ​ບັນ­ດາ​ປະ­ເທດ​ໃນ​ພາກ​ພື້ນ ສ້າງ​ຄວາມ​ຈະ­ເລີນ​ຮຸ່ງ­ເຮືອງ​ຮ່ວມ​ກັນ ສ້າງ​ສັນ­ຕິ­ພາບ-ມິດ­ຕະ­ພາບ ຄວາມ​ເຂົ້າ​ອົກ​ເຂົ້າ­ໃຈ​ຮ່ວມ​ກັນ​ບົນ​ພື້ນ­ຖານ​ຈິດ­ໃຈ​ຂອງ​ຂໍ້​ລິ​ເລີ່ມ ໜຶ່ງ​ແລວ​ໜຶ່ງ​ເສັ້ນ­ທາງ ແລະ ໂຄງ­ການ​ຮ່ວມ​ມື​ແມ່­ນ້ຳ​ລ້ານ​ຊ້າງ-ແມ່­ນ້ຳ​ຂອງ ທີ່​ພວມ​ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ​ຢ່າງ​ເປັນ​ຮູບ​ປະ​ທຳ​ໃນ​ປັດ­ຈຸ­ບັນ ຕາງ­ໜ້າ​ພັກ-ລັດ ກໍ່​ຄື ປະ­ຊາ­ຊົນ​ລາວ ແລະ ປະ­ຊາ­ຊົນ 6 ປະ­ເທດ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ສະ­ແດງ​ຄວາມ​ຫວັງ​ຢ່າງ​ສູງ​ທີ່​ຢາກ​ຈະ​ເຫັນ​ອົງ­ການ​ສື່​ມວນ​ຊົນ 6 ປະ­ເທດ ພວກ​ເຮົາ​ປະ­ຕິ­ບັດ​ພາ­ລະ​ບົດ­ບາດ ແລະ ໜ້າ­ທີ່​ເປັນ​ກະ­ບອກ​ສຽງ​ສຳ­ຄັນ​ໃນ​ການ​ໂຄ­ສະ­ນາ​ເຜີຍ­ແຜ່ ປະ­ຊາ­ສຳ­ພັນ ດ້ວຍ​ການ​ລາຍ​ງານ​ຂ່າວ​ຢ່າງ­ຮອບ­ດ້ານ ມີ​ລັກ­ສະ­ນະ​ຕົວ​ຈິງ ຖືກ­ຕ້ອງ ພາ­ວະ​ວິ­ໄສ ແລະ ທ່ຽງ​ທຳ ສ້າງ­ສັນ ສະ­ເໝີ­ພາບ ຊ່ວຍ­ເຫຼືອ​ເຊິ່ງ​ກັນ ແລະ ກັນ ດ້ວຍ​ຄວາມ​ຈິງ​ໃຈ​ເໝືອນ​ຄອບ­ຄົວ​ດຽວ​ກັນ.

ກອງ​ປະ­ຊຸມ​ສຸດ​ຍອດ​ສື່​ມວນ​ຊົນ ຂອບ​ການ​ຮ່ວມ​ມື​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ປີ 2018 ຈັດ​ຂຶ້ນ​ພາຍ​ໃຕ້​ການ​ເປັນ​ປະ­ທານ​ຮ່ວມ​ຂອງ​ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທຽວ ສປປ ລາວ ແລະ ໜັງ­ສື­ພິມ​ປະ­ຊາ­ຊົນ​ລາຍ​ວັນ ສປ ຈີນ ເຊິ່ງ​ຈະ​ດຳ­ເນີນ​ໄປ​ເຖິງ​ວັນ​ທີ 3 ກໍ­ລະ­ກົດ 2018 ໃນ​ໂອ­ກາດ​ດຳ­ເນີນ​ກອງ​ປະ­ຊຸມ​ຍັງ​ມີ​ການ​ແລກ­ປ່ຽນ​ສັນ­ຍາ​ຮ່ວມ​ມື​ຈຳ­ນວນ​ໜຶ່ງ ແລະ ມີ​ການ​ປະ­ກອບ​ຄຳ​ເຫັນ​ຂອງ​ຜູ້­ຕາງ­ໜ້າ​ອົງ­ການ​ສື່​ມວນ​ຊົນ​ຫຼັກ​ຈາກ 6 ປະ­ເທດ ຜູ້­ຕາງ­ໜ້າ​ເສັ້ນ­ທາງ​ລົດ­ໄຟ​ລາວ-ຈີນ ໂຄງ­ການ​ດາວ​ທຽມ​ລາວ-ອາ­ຊີ​ປາ​ຊີ​ຟິກ ບໍ­ລິ­ສັດ​ໂທລະ­ພາບ​ລາວ​ດິ​ຈີ​ຕອນ ບໍ­ລິ­ສັດ​ທ່ອງ​ທ່ຽວ​ຊາວ​ໜຸ່ມ​ຈີນ ແລະ ອື່ນໆ ພ້ອມ​ທັງ​ໄດ້​ຈັດ​ໃຫ້​ມີ​ກອງ​ປະ­ຊຸມ​ເວ­ທີ​ສົນ­ທະ­ນາ​ປຶກ­ສາ​ຫາ­ລື​ສືບ­ຕໍ່​ການ​ຮ່ວມ​ມື​ໃນ​ອະ­ນາ­ຄົດ ພາຍ​ໃຕ້​ຫົວ­ຂໍ້ “ສື່​ໃໝ່ ແລະ ສົ່ງ­ເສີມ​ການ­ທ່ອງ­ທ່ຽວ” ແລະ ເປີດ​ໂຕ​ຮ່ວມ​ຜະ­ລິດ​ລາຍ­ການ​ທຸກ​ທິດ​ທາງ ລະ­ຫວ່າງ ໂທລະ ພາບ​ລາວ-ຈີນ ນອກ​ນີ້ ຍັງ​ໄດ້​ມີ​ພິ­ທີ​ມອບ​ທຸງ​ການ​ຢ້ຽມ­ຢາມ​ລາຍ­ການ​ຂ່າວ​ຮ່ວມ​ຂອງ​ກອງ​ປະ­ຊຸມ​ສຸດ​ຍອດ​ສື່​ມວນ​ຊົນ​ຂອບ​ການ​ຮ່ວມ​ມື​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ​ຕື່ມ​ອີກ.

ໃນ​ໂອ­ກາດ​ດຽວ​ກັນ​ນີ້ ຄະ­ນະ​ຜູ້​ແທນ​ກອງ​ປະ­ຊຸມ​ພ້ອມ​ດ້ວຍ​ຕາງ­ໜ້າ​ສື່​ມວນ​ຊົນ 6 ປະ­ເທດ ຍັງ​ຈະ​ໄດ້​ໄປ​ຢ້ຽມ­ຢາມ ແລະ ເຄື່ອນ​ໄຫວ​ເຮັດ​ວຽກ​ຢູ່​ນະ­ຄອນ­ຫຼວງ​ພະ​ບາງ ແຂວງ​ຫຼວງ​ພະ​ບາງ ແລະ ແຂວງ​ຈຳ­ປາ​ສັກ ເພື່ອ​ເກັບ​ກຳ​ຂໍ້​ມູນ ໂຄງ­ການ​ຮ່ວມ​ມື​ລາວ-ຈີນ ກໍ່​ຄື ບັນ­ດາ​ສະ­ຖານ­ທີ່​ທ່ອງ​ທ່ຽວ​ຂອງ​ລາວ ອັນ​ເປັນ​ການ​ສ້າງ​ບັນ­ຍາ­ກາດ​ໃຫ້​ແກ່​ການ​ຈັດ​ກອງ​ປະ­ຊຸມ​ຄັ້ງ​ນີ້ ກໍ່​ຄື ສົ່ງ­ເສີມ​ປີ​ທ່ອງ​ທ່ຽວ​ລາວ 2018 ໃຫ້​ມີ​ຄວາມ​ຟົດ­ຟື້ນ​ຍິ່ງໆ​ຂຶ້ນ.

ຂ່າວທີ່ກ່ຽວຂ້ອງ