ເດືອນກໍລະກົດ ເປັນຕົ້ນໄປເລີ່ມປັບໃໝຄ່າທຳນຽມທາງ

271 03 ກ.ກ. 2018 ຂ່າວໜ້າ​ໜຶ່ງ
ເດືອນກໍລະກົດ ເປັນຕົ້ນໄປເລີ່ມປັບໃໝຄ່າທຳນຽມທາງ

ກະ­ຊວງ​ປ້ອງ​ກັນ​ປະ­ເທດ ເປີດ​ຂະ​ບວນ​ການ​ເສຍ​ຄ່າ​ທຳ­ນຽມ​ທາງ 2018 ລົດ​ລັດ ແລະ ລົດ​ພະ­ນັກ­ງານ ເປັນ​ແບບ­ຢ່າງ ໃນ​ວັນ​ທີ 28 ມິ­ຖຸ­ນາ 2018 ທີ່​ກະ­ຊວງ​ດັ່ງ­ກ່າວ ມີ​ທ່ານ ພົ.ວ ຄຳ​ມ່ວນ ເລືອ​ງວັນ​ຫຼ້າ ຮອງ​ຫົວ­ໜ້າ​ຫ້ອງ​ວ່າ­ການ ກະ­ຊວງ​ປ້ອງ​ກັນ​ປະ­ເທດ ທ່ານ ສຸ­ລິ­ຍາ ອາ​ລຸນ​ສະ­ຫວາດ ຮອງ​ຫົວ­ໜ້າ​ພະ​ແນກ​ສ່ວຍ​ສາ​ອາ­ກອນ ນະ­ຄອນ­ຫຼວງ​ວຽງ​ຈັນ ບັນ­ດາ​ນາຍ ແລະ ພົນ­ທະ­ຫານ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ທ່ານ ສຸ­ລິ­ຍາ ອາ​ລຸນ​ສະ­ຫວາດ ກ່າວ​ວ່າ: ນັບ​ແຕ່​ມີ​ການ​ຮ່ວມ​ກັບ​ທະ­ນາ­ຄານ​ການ​ຄ້າ​ແຫ່ງ​ປະ­ເທດ​ລາວ​ມະ­ຫາ­ຊົນ ຈັດ​ເປີດ​ຂະ​ບວນ​ການ​ເສຍ​ຄ່າ​ທາງ​ແຕ່​ວັນ​ທີ 1 ຕຸ­ລາ 2017 ເປັນ­ຕົ້ນ​ມາ ສາ­ມາດ​ເກັບ​ລາຍ​ຮັບ​ໄດ້ 58 ຕື້​ກີບ ສະ­ເພາະ​ປີ 2018 ນັບ​ແຕ່​ເດືອນ​ມັງ­ກອນ​ມາ​ເຖິງ​ປັດ­ຈຸ­ບັນ ສາ­ມາດ​ເກັບ​ລາຍ​ຮັບ​ໄດ້ 45 ຕື້​ກີບ ເຊິ່ງ​ການ​ເປີດ​ຂະ​ບວນ​ການ​ເສຍ​ຄ່າ​ທາງ​ໄດ້​ເລີ່ມ​ຄັ້ງ​ທຳ​ອິດ​ຢູ່​ພະ­ແນກ­ການ​ເງິນ ນະ­ຄອນ­ຫຼວງ​ວຽງ​ຈັນ ຕໍ່​ມາ​ຢູ່​ຫ້ອງ​ວ່າ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ແລະ ຢູ່​ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ ນະ­ຄອນ­ຫຼວງ​ວຽງ​ຈັນ ສ່ວນ​ຄັ້ງ​ທີ 4 ຈັດ​ຢູ່​ກະ­ຊວງ​ການ​ເງິນ ແລະ 4 ເມືອງ​ໃນ ຄັ້ງ​ຫຼ້າ​ສຸດ​ແມ່ນ​ຄັ້ງ​ທີ 5 ຢູ່​ກະ­ຊວງ​ປ້ອງ​ກັນ​ປະ­ເທດ ແລະ ຄັ້ງ​ຕໍ່​ໄປ​ຈະ​ຈັດ​ຢູ່​ກະ­ຊວງ​ປ້ອງ​ກັນ​ຄວາມ​ສະ­ຫງົບ.

ສ່ວນ​ອັດ­ຕາ​ຄ່າ​ເສຍ​ທຳ­ນຽມ​ທາງ​ແມ່ນ​ປະ­ຕິ­ບັດ​ຕາມ​ລັດ​ຖະ​ບັນ­ຍັດ​ຂອງ​ປະ­ທານ​ປະ­ເທດ ເລກ​ທີ 001 ຊີ​ຊີ​ລະ 1.000 ກີບ ເຊິ່ງ​ຖ້າ​ຫາກ​ທ່ານ​ໃດ​ບໍ່​ທັນ​ໄດ້​ເສຍ​ຄ່າ​ທາງ​ປີ 2017 ກໍ່​ຈະ​ຕ້ອງ​ໄດ້​ເສຍ​ກ່ອນ ພ້ອມ​ທັງ​ການ​ປັບ​ໃໝ​ຕາມ​ລະ­ບຽບ 40% ຂອງ​ມູນ​ຄ່າ​ເສຍ​ຄ່າ​ທຳ­ນຽມ​ທາງ ສ່ວນ​ປີ 2018 ເລີ່ມ​ປັບ​ໃໝ​ນັບ​ແຕ່​ວັນ​ທີ 1 ກໍ­ລະ­ກົດ 2018 ເປັນ­ຕົ້ນ​ໄປ ໂດຍ​ຄິດ­ໄລ່ 0,1% ຕໍ່​ວັນ ເຊິ່ງ​ການ​ເສຍ​ຄ່າ​ທາງ​ນັ້ນ​ສາ­ມາດ​ເສຍ​ຜ່ານ​ການ​ບໍ­ລິ­ການ​ຂອງ​ທະ­ນາ­ຄານ ແລະ ປ່ອງ​ບໍ­ລິ­ການ​ທຸກ​ສາ­ຂາ​ຂອງ​ທະ­ນາ­ຄານ​ການ​ຄ້າ​ຕ່າງ­ປະ­ເທດ​ລາວ​ມະ­ຫາ­ຊົນ.

ຂ່າວທີ່ກ່ຽວຂ້ອງ