ຂ່າວຫຼ້າສຸດ

ເຈົ້າໜ້າທີ່ຕຳຫຼວດ ແກ້ໄຂກຸ່ມຄ້າຂາຍຢາເສບຕິດ

172 03 ກ.ກ. 2018 ຂ່າວໜ້າ​ໜຶ່ງ

ພະ​ແນກ​ຕຳ­ຫຼວດ​ສະ­ກັດ​ກັ້ນ ແລະ ຕ້ານ​ຢາ​ເສບ​ຕິດ ນະ­ຄອນ­ຫຼວງ​ວຽງ​ຈັນ ໃຫ້​ຮູ້​ວ່າ: ໃນ​ວັນ​ທີ 8 ພຶດ­ສະ­ພາ 2018 ເຈົ້າ​ໜ້າ­ທີ່​ຕຳ­ຫຼວດ​ແກ້​ໄຂ​ກຸ່ມ​ຄ້າ­ຂາຍ​ຢາ​ເສບ​ຕິດ​ໄດ້ 6 ຄົນ ໃນ​ນີ້ ໃນ​ເບື້ອງ​ຕົ້ນ​ແມ່ນ​ຈັບ​ໄດ້ 2 ຄົນ  ຢູ່​ເຂດ​ບ້ານ​ສົງ​ເປືອຍ ເມືອງ​ນາ​ຊາຍ​ທອງ ຊື່​ທ້າວ ພູ​ເງິນ ຫຼື ໂບ້ ອາ­ຍຸ 33 ປີ ຢູ່​ບ້ານ​ສອງ​ຂົວ​ກາງ​ແສນ ເມືອງ​ນາ​ຊາຍ​ທອງ ແລະ ທ້າວ ວິ​ໄຊ ຫຼື ແອ­ນ້ອຍ ອາ­ຍຸ 24 ປີ ຢູ່​ບ້ານ​ດອນ​ກອຍ ເມືອງ​ສີ​ສັດ­ຕະ​ນາກ ພ້ອມ​ຂອງ​ກາງ​ຢາ​ບ້າ 2.000 ເມັດ ໄປ​ສອບ​ສວນ ໃນ​ເບື້ອງ​ຕົ້ນ​ກໍ່​ສາ­ມາດ​ຕິດ­ຕາມ​ຈັບ​ຜູ້​ຮ່ວມ​ຂະ​ບວນ​ການ​ນຳ​ກັນ ຊື່​ທ້າວ ໄຊ ອາ­ຍຸ 35 ປີ ຢູ່​ບ້ານ​ໂພນ​ທອງ​ເໜືອ ເມືອງ​ຫີນ​ເຫີບ ແຂວງ​ວຽງ​ຈັນ ທີ່​ເຊົ່າ​ຫ້ອງ​ຢູ່​ເຂດ​ບ້ານ​ທົ່ງ​ປົ່ງ ເມືອງ​ສີ​ໂຄດ​ຕະ­ບອງ ພ້ອມ​ຢາ​ບ້າ 202 ເມັດ ແລະ ຢາ​ໄອ 2,4 ກຼາມ.

ຜ່ານ​ການ​ສອບ​ສວນ​ຫາ​ຜູ້​ຮ່ວມ​ຂະ​ບວນ​ການ​ຂອງ​ເຈົ້າ​ໜ້າ­ທີ່ ສາ­ມາດ​ຈັບ​ໄດ້​ຕື່ມ​ອີກ 3 ຄົນ ຊື່ ທ້າວ ກຽງ­ຄຳ ອາ­ຍຸ 32 ປີ ຢູ່​ບ້ານ​ແກ້ງ​ໜໍ້ ເມືອງ​ສັງ​ທອງ ນາງ ຊະ­ມັດ​ຊະ​ຍາ ຫຼື ເອີນ ອາ­ຍຸ 23 ປີ ສັນ­ຊາດ​ໄທ ຢູ່​ແຂວງ​ໜອງ​ຄາຍ ພັກ​ເຊົາ​ຢູ່​ນຳ​ທ້າວ ກຽງ­ຄຳ ທັງ​ສອງ​ມີ​ຂອງ​ກາງ​ຢາ​ບ້າ  2.826 ເມັດ ແລະ ທ້າວ ພູ­ທອນ ສຸ­ລິນ ອາ­ຍຸ 27 ປີ ຢູ່​ບ້ານ​ນ້ຳ​ເຮີ້ ເມືອງ​ໝື່ນ ແຂວງ​ວຽງ​ຈັນ ພ້ອມ​ຂອງ​ກາງ​ຢາ​ບ້າ 7 ເມັດ ໄປ​ສອບ​ສວນ ພວກ​ກ່ຽວ​ສາ­ລະ­ພາບ​ວ່າ: ໄດ້​ຮ່ວມ​ກັນ​ເຄື່ອນ​ໄຫວ​ຊື້-ຂາຍ​ຢາ​ເສບ​ຕິດ​ມາ​ແຕ່​ຕົ້ນ​ປີ 2018 ສ່ວນ​ຫຼາຍ​ແມ່ນ​ຂາຍ​ຢູ່​ຕາມ​ສະ­ຖານ­ທີ່​ບັນ­ເທີງ ຮ້ານ​ເກມ ແລະ ຮ້ານ​ສະ­ນຸກ​ເກີ.

ເຈົ້າ​ໜ້າ­ທີ່​ຍັງ​ໃຫ້​ຮູ້​ຕື່ມ​ວ່າ: ໃນ​ວັນ​ທີ 10 ພຶດ­ສະ­ພາ 2018 ໄດ້​ກັກ​ຕົວ​ທ້າວ ເບວ ອາ­ຍຸ 22 ປີ ຢູ່​ບ້ານ​ຄົກ​ເພີງ ເມືອງ​ສັງ​ທອງ ທີ່​ກຳ­ລັງ​ເຄື່ອນ​ໄຫວ​ຄ້າ­ຂາຍ​ຢາ​ເສບ​ຕິດ​ຢູ່​ເຂດ​ເມືອງ​ສັງ​ທອງ ພ້ອມ​ຂອງ​ກາງ 269 ເມັດ ແລະ ປືນ​ສັ້ນ 1 ກະ­ບອກ ພ້ອມ​ລູກ­ປືນ ຈຳ­ນວນ 10 ລູກ ໄປ​ສອບ​ສວນ​ຂະ­ຫຍາຍ​ຜົນ​ຕໍ່​ໄປ.

ທ້າວ ເບວ ສາ­ລະ­ພາບ​ວ່າ: ເລີ່ມ​ພົວ­ພັນ​ກັບ​ຢາ​ບ້າ​ມາ​ແຕ່​ປີ 2017 ໂດຍ​ຊື້​ຢູ່​ຕາມ​ຮ້ານ​ສະ­ນຸກ​ເກີ ແລະ ຮ້ານ​ເກມ ເພື່ອ​ໄປ​ເສບ ໃນ​ເດືອນ​ມັງ­ກອນ 2018 ໝູ່​ທີ່​ຂາຍ​ຢາ​ບ້າ​ໃຫ້​ແຕ່​ລະ​ຄັ້ງ​ໄດ້​ຊັກ​ຊວນ​ໃຫ້​ຮັບ​ເອົາ​ໄປ​ຂາຍ ຈາກ​ນັ້ນ ກໍ່​ຮັບ​ເອົາ​ຄັ້ງ​ທຳ​ອິດ 10 ເມັດ ຮອດ​ວັນ​ທີ 10 ພຶດ­ສະ­ພາ 2018 ໄດ້​ເອົາ​ຢາ​ບ້າ​ໄປ​ສົ່ງ​ໃຫ້​ຜູ້​ສັ່ງ​ຊື້​ຢູ່​ເສັ້ນ­ທາງ​ເຂດ​ບ້ານ​ທ່າ​ນາ​ສ້າງ​ຫີນ ເມືອງ​ສັງ​ທອງ ແຕ່​ຖືກ​ເຈົ້າ​ໜ້າ­ທີ່​ກັກ​ຕົວ​ໄດ້​ຢູ່​ລະ­ຫວ່າງ​ທາງ​ໄປ​ດຳ­ເນີນ​ຄະ­ດີ.

ຂ່າວທີ່ກ່ຽວຂ້ອງ