ຂ່າວຫຼ້າສຸດ

ກວດພົບສານພິດຕົກຄ້າງໃນຜັກ ແລະ ໝາກໄມ້ນຳເຂົ້າ

194 03 ກ.ກ. 2018 ຂ່າວໜ້າ​ໜຶ່ງ
ກວດພົບສານພິດຕົກຄ້າງໃນຜັກ ແລະ ໝາກໄມ້ນຳເຂົ້າ

ພະແນກການ​ຕ່າງໆ​ທີ່​ກ່ຽວຂ້ອງ​ຂອງ​ແຂວງ​ສະຫວັນ​ນະ​ເຂດ ໄດ້​ສົມທົບ​ກັນ​ລົງ​ເຄື່ອນ​ໄຫວ​ເກັບ​ກຳ ແລະ ກວດ​ສອບ​ສານພິດ​ຕົກ​ຄ້າງ​ໃນ​ພືດ​ຜັກ ແລະ ໝາກ​ໄມ້​ສົດ ທີ່​ຈຳໜ່າຍ​ຢູ່​ຕະຫຼາດ​ສະຫວັນ​ໄຊ ເທສະ​ບານ​ແຂວງ ໃນ​ວັນ​ທີ 26 ມິຖຸນາ 2018.

ສຳລັບ​ການ​ລົງ​ກວດກາ​ຄັ້ງ​ນີ້​ທີມ​ງານ​ໄດ້​ສຸມ​ເກັບ​ຕົວຢ່າງ​ຂອງ​ພືດ​ຜັກ ແລະ ໝາກ​ໄມ້​ສົດ​ທີ່​ມີ​ການ​ຈຳ ໜ່າຍ​ຜົນ​ຜະລິດ​ທັງ​ພາຍ​ໃນ ແລະ ນຳ​ເຂົ້າ​ຈາກ​ປະເທດ​ໄທ ຫວຽດນາມ ຈຳນວນ 10 ກວ່າ​ຕົວຢ່າງ​ແລ້ວ​ດຳເນີນ​ການ​ກວດ​ສອບ​ສານພິດ​ຕົກ​ຄ້າງ ໂດຍ​ນຳ​ໃຊ້​ຊຸດ​ກວດ GTTestKit ເຂົ້າ​ໃນ​ການ​ວິເຄາະ​ເບື້ອງ​ຕົ້ນ ເຊິ່ງ​ສາມາດ​ທົດ​ສອບ​ສານ​ເຄ​ມີ​ຈຳກັດ​ສັດຕູ​ພືດ 2 ກຸ່ມ​ໄດ້ແກ່​ກຸ່ມ​ອໍ​ກາ​ໂນ​ໂຟສ​ເຟດ ແລະ ກຸ່ມ​ຄາ​ບາ​ເມດ ທີ່​ເປັນສານ​ອອກ​ລິດ​ມີ​ຜົນ​ຕໍ່​ລະບົບ​ປະສາດ ແລະ ເປັນ​ສາເຫດ​ໜຶ່ງ​ກໍ່ໃຫ້ເກີດ​ເປັນ​ພະຍາດ​ມະ​ເຮັງ ຈາກ​ການ​ສຸ່ມ ແລະ ເກັບ​ຕົວຢ່າງ​ໃນ​ຜັກຫອມ​ລາບ ຜັກບົ່ວ ໝາກເຜັດ ໝາກ ຖົ່ວຍາວ ຜັກ​ສະຫຼັດ ໝາກ​ແອັບ ເປີ້ນ ໝາກ​ລາ​ແຊັງ ໝາກ​ມັງ ກອນ ໄດ້​ພົບ​ສານພິດ​ຕົກ​ຄ້າງ​ທີ່ ເປັນ​ອັນຕະລາຍ​ຕໍ່​ສຸຂະພາບ ເຊິ່ງ​ຖ້າ​ບໍລິໂພກ​ຫຼາຍ​ມີ​ຜົນ​ຕໍ່​ລະບົບ​ປະສາດ ແລະ ເປັນ​ສາເຫດ​ໜຶ່ງ​ກໍ່​ໃຫ້ ເກີດ​ເປັນ​ພະຍາດ​ມະ​ເຮັງ​ໃນ​ຈຳພວກ​ພືດ​ດັ່ງກ່າວ ສ່ວນ​ພືດ​ຜັກ​ທີ່​ມີ​ສານ​ຕົກ​ຄ້າງ​ທີ່​ມີ​ຄວາມ​ປອດ​ໄພ​ມີ​ໝາກ​ມັງກອນ ໝາກ​ລາ​ແຊັງ​ສີແດງ ລາ​ແຊັງ​ສີມ່ວງ ແລະ ໝາກ​ແອັບ​ເປິ້ນ.

ທ່ານ​ນາງ ມະຍຸລີ ຫົງ​ສາ​ທິ​ລາດ ວິຊາ​ການ​ປ້ອງ​ກັນ​ພືດ​ຂະແໜງ​ປູກຝັງ​ພະ​ແນກ​ກະສິກຳ ແລະ ປ່າ ໄມ້ ແຂວງ​ສະຫວັນ​ນະ​ເຂດ ກ່າວ​ວ່າ: ຢູ່​ແຂວງ​ສະຫວັນ​ນະ​ເຂດ​ການ​ປູກ​ພືດ​ຜັກ ແລະ ໝາກ​ໄມ້​ເພື່ອ​ບໍ ລິ​ໂພກ ແລະ ເປັນ​ສິນຄ້າ ແຕ່​ວ່າ​ກໍ່​ຍັງ​ມີ​ການ​ນຳ​ເຂົ້າ​ປະເພດ​ພືດ​ຜັກ ແລະ ໝາກ​ໄມ້​ບາງ​ຊະນິດ​ຈາກ​ພາຍ​ນອກ ເນື່ອງ​ຈາ​ກວ່າ​ໃນ​ປັດຈຸບັນ​ການ​ແຂ່ງຂັນ​ທາງ​ດ້ານ​ການ​ຄ້າ ແລະ ຄວາມ​ຕ້ອງການ​ຂອງ​ຜູ້​ບໍລິໂພກ​ນັບ​ມື້​ສູງ​ຂຶ້ນ​ເຮັດ​ໃຫ້​ມີ​ການ​ແຂ່ງຂັນ​ທາງ​ດ້ານ​ລາຄາ ແລະ ມີ​ການ​ເພີ່ມ​ປະລິມານ ໂດຍ​ນຳ​ໃຊ້​ເຕັກ​ໂນ​ໂລ​ຊີ ແລະ ສານ​ເຄ​ມີ​ເຂົ້າ​ໃນ​ການ​ປູກ​ພືດ​ຜັກ ແລະ ໝາກ​ໄມ້ ສະນັ້ນ ສານ​ເຄ​ມີ​ຂ້າ​ແມງໄມ້​ໃນ​ພືດ​ຈຶ່ງ​ເປັນສານ​ໜຶ່ງ​ທີ່​ພົບ​ວ່າ​ຊາວ​ກະສິກອນ​ນຳ​ໃຊ້​ຢ່າງ​ກວ້າງຂວາງ ແລະ ມີ​ທ່າ​ອ່ຽງ​ເພີ່ມ​ຂຶ້ນ​ໃນ​ທຸກ​ປີ ອັນ​ເປັນ​ອັນຕະລາຍ ແລະ ສົ່ງ​ຜົນ​ກະທົບ​ໂດຍ​ກົງ​ຕໍ່​ສຸຂະພາບ​ຂອງ​ຜູ້​ບໍລິໂພກ ດັ່ງນັ້ນ ພະແນກການ​ພວກ​ເຮົາ​ຈຶ່ງ​ເອົາໃຈໃສ່​ໃນ​ການ​ກວດກາ​ຢ່າງ​ເຂັ້ມ​ງວດ ເພື່ອ​ເຮັດ​ໃຫ້​ປະຊາຊົນ​ໄດ້​ຮັບ​ຜົນ​ກະທົບ​ໜ້ອຍ​ລົງ.

ຂ່າວທີ່ກ່ຽວຂ້ອງ