ຂ່າວຫຼ້າສຸດ

ບໍ່ມີ ເມສຊີ-ໂຣນັນໂດ ບານໂລກກໍບໍ່ຂາດສີສັນ

389 02 ກ.ກ. 2018 ວົງຈອນກີລາ
ບໍ່ມີ ເມສຊີ-ໂຣນັນໂດ ບານໂລກກໍບໍ່ຂາດສີສັນ

        ເປັນໄປຕາມຄາດ  ລິໂອເນວ ເມສຊີ່ ກັບ ຄຣິສເຕຍໂນ ໂຣນັນໂດ ຕົກຮອບເຕະບານໂລກ.

          ຄູ່ທໍາອິດ; ຝຣັ່ງ ຂອງເດເດ ເດສຊອງ ເນັ້ນຍຸດທະວິທີ ຮັດກຸມ ຍວົະໃຫ້ອາກຊັງຕິນບຸກເຂົ້າມາ ດ້ວຍຄຸນລັກສະນະຂອງ ເດເດ ອະດີດກອງກາງຕົວຮັບ ເມື່ອເປັນໂຄ໊ຊ ເນັ້ນຄວາມແນ່ນອນ ຫຼິ້ນປ້ອງກັນ ທັ້ງທີ່ຄຸນະພາບນັກເຕະເບິ່ງແລ້ວດີກວ່າອາກຊັງຕິນ.

          ແຕ່ພໍຮັບແລ້ວເສຍ 2-1 ຈຶ່ງບຸກ ພໍບຸກບໍ່ໄດ້ ດ້ວຍເພາະຄວາມໄວຂອງບານ ຄວາມສົດຂອງນັກເຕະຝຣັ່ງມີຫຼາຍກວ່າ ອາກຊັງຕິນ ທີ່ອ່ອນແຮງ ອາຍຸເຖິງ 30 ທັງທີມ.

          ຍັງດີທີ່ສູ້ຈົນໄດ້ປະຕູຄືນ ກ່ອນພ່າຍແພ້ 3-4.

          ຢ່າງທີ່ຮ່ວມວິເຄາະກັນຜ່ານມາວ່າ “ຄຸນະພາບ” ເຕະບານຂອງຝຣັ່ງມີຫຼາຍກວ່າ ມັນກໍເປັນໄປຕາມນັ້ນ ອາກຊັງຕິນພະຍາຍາມສູ້ ໄດ້ສູ້ແລ້ວ ພຽງແຕ່ມັນສູ້ບໍ່ໄດ້ເທົ່ານັ້ນເອງ.

          ປະເດັນທີ່ໜ້າສົນໃຈກໍຄື “ເລືອດໃໝ່” ອາກຊັງຕິນຍັງຂາດ ເຮັດໃຫ້ຍັງຕ້ອງໃຊ້ພວກ ມາສເຄຣາໂນ, ລູຄັສ ບີຢ່າ, ເປເຣຊ ແລະ ກຸ່ມນັກເຕະສາມສິບກວ່າ ມາເປັນແກນນຳຂອງທີມ.

          ກົງກັນຂ້າມກັບບຣາຊິນ ແລະ ຫຼາຍປະເທດ ທີ່ເລືອດໃໝ່ ທະຍອຍກັນຂຶ້ນມາຫຼິ້ນທີມຊາດ.

          ສ່ວນຄູ່ສອງນີ່ຕື່ນເຕັ້ນ ສະໜຸກພໍສົມຄວນ ກ່ອນສຸດທ້າຍ ອຸຣຸກວາຍມີເດັດກວ່າ ຖືວ່າເກມບໍ່ຕ່າງກັນ ພຽງແຕ່ອຸຣຸກວາຍ ມີຫຼ່ຽມບານໃນແດນສຸດທ້າຍດີກວ່າໜ້ອຍໜຶ່ງ ໃຊ້ໂອກາດບໍ່ເປືອງ ຍິງໜ້ອຍກວ່າ ແຕ່ເຂົ້າຂອບຫຼາຍກວ່າ ແຖມຫຼິ້ນຍຸດທະວິທີລໍ້ໃຫ້ປອກຕຸຍການບຸກຂຶ້ນມາ ກ່ອນດັກສວນກັບ.

          ເກມຮັບອຸຣຸກວາຍ ຈັດວ່າໜຽວໃຊ້ໄດ້ ຫາກໍເສຍປະຕູລູກທໍາອິດໃນລາຍການນີ້ ແລະ ມາຈາກລູກຕັ້ງເຕະ ບໍ່ແມ່ນແບບເປີດໜ້າສູ້ ການຕົກຮອບຂອງ ເມສຊີ ແລະ ໂຣນັນໂດ ພິສູດໃຫ້ເຫັນວ່າ ເຕະບານໂລກຄືເວທີໃຫຍ່ ຂັນໃຫຍ່ ທີ່ບໍ່ແມ່ນວ່າໃຜກໍເປັນແຊັມກັນງ່າຍໆ ຄວາມສາມາດຂອງທັງທີມ ຕ້ອງພ້ອມດ້ວຍເຊັ່ນກັນ.

           ທີ່ສໍາຄັນ ບໍ່ມີ ເມສຊີ ແລະ ໂຣນັນໂດ ເຕະບານໂລກກໍບໍ່ໜ້າເບື່ອ ແລະ ຂາດສີສັນແນ່ນອນ.

ຂ່າວທີ່ກ່ຽວຂ້ອງ