ຂ່າວຫຼ້າສຸດ

ເລີ່ມລົງມືກໍ່ສ້າງ ໂຄງການພັດທະນາເຂດເສດຖະກິດໃໝ່ ສີທັນດອນ

379 02 ກ.ກ. 2018 ຂ່າວໜ້າ​ໜຶ່ງ
ເລີ່ມລົງມືກໍ່ສ້າງ ໂຄງການພັດທະນາເຂດເສດຖະກິດໃໝ່ ສີທັນດອນ

ພາຍ­ຫຼັງ​ທີ່​ໄດ້​ດຳ­ເນີນ​ການ​ສຶກ​ສາ-ສຳ​ຫຼວດ​ຄວາມ​ເປັນ​ໄປ​ໄດ້​ທາງ​ດ້ານ​ເສດ­ຖະ­ກິດ-ສັງ­ຄົມ ແລະ ສິ່ງ­ແວ­ດລ້ອມ​ເປັນ​ເວ­ລາ​ເກືອບ 3 ປີ ໂຄງ­ການ​ພັດ­ທະ­ນາ​ເຂດ​ເສດ­ຖະ­ກິດ​ໃໝ່​ສີ­ທັນ­ດອນ ເມືອງ​ໂຂງ ແຂວງ​ຈຳ­ປາ​ສັກ ກໍ​ໄດ້​ຮັບ​ການ​ອະ­ນຸ­ມັດ​ຈາກ​ລັດ­ຖະ­ບານ​ລາວ​ໃຫ້​ດຳ­ເນີນ​ການ​ກໍ່­ສ້າງ​ເປັນ​ທາງ​ການ​ໂດຍ​ພິ­ທີ​ເຊັນ​ສັນ­ຍາ​ການ​ເລີ່ມ​ຕົ້ນ​ປະ­ຕິ­ບັດ​ໂຄງ­ການ ດັ່ງ­ກ່າວ ໄດ້​ຈັດ​ຂຶ້ນ​ວັນ​ທີ 30 ມິ­ຖຸ­ນາ 2018 ຢູ່​ນະ­ຄອນ­ຫຼວງ​ວຽງ​ຈັນ ເຊິ່ງ​ຕາງ­ໜ້າ​ລັດ­ຖະ­ບານ​ລາວ ລົງ​ນາມ​ໂດຍ​ທ່ານ ສຸ­ພັນ ແກ້ວ​ມີ​ໄຊ ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ຝ່າຍ​ບໍ­ລິ­ສັດ​ພັດ­ທະ­ນາ​ລົງ​ນາມ​ໂດຍ​ທ່ານ ເສິງ ກວາງ​ຟາຍ ປະ­ທານ​ບໍ­ລິ­ສັດ​ລາວ​ມະ­ຫາ​ນະ­ທີ​ສີ­ທັນ­ດອນ (ຮົງ​ກົງ) ອິນ​ເວ​ສ​ເມັນ​ຈຳ­ກັດ ແລະ ທ່ານ ລາ­ຕີ ສີ​ສຸ­ພັນ​ນະ​ວົງ ປະ­ທານ​ບໍ­ລິ­ສັດ​ແອວ​ທີ​ວີ ກໍ່­ສ້າງ​ຂົວ-ທາງ ເຄ­ຫາ​ສະ­ຖານ ແລະ ຊົນ­ລະ­ປະ­ທານ​ຈຳ­ກັດ ໂດຍ​ມີ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ທ່ານ ບຸນ​ຖອງ ດີ​ວິ​ໄຊ ເຈົ້າ­ແຂວງ​ຈຳ­ປາ​ສັກ ພ້ອມ​ດ້ວຍ​ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ໂຄງ­ການ​ພັດ­ທະ­ນາ​ເຂດ​ເສດ­ຖະ­ກິດ​ໃໝ່​ສີ­ທັນ­ດອນ ເປັນ​ການ​ຮ່ວມ​ທຶນ​ລະ­ຫວ່າງ​ນັກ​ລົງ­ທຶນ​ຈີນ ແລະ ນັກ​ລົງ­ທຶນ​ລາວ ຄື: ບໍ­ລິ­ສັດ​ລາວ​ມະ­ຫາ​ນະ­ທີ​ສີ­ທັນ­ດອນ (ຮົງ​ກົງ) ອິນ​ເວ​ສ​ເມັນ​ຈຳ­ກັດ ແລະ ບໍ­ລິ­ສັດ​ແອວ​ທີ​ວີ​ກໍ່­ສ້າງ​ຂົວ-ທາງ ເຄ­ຫາ​ສະ­ຖານ ແລະ ຊົນ­ລະ­ປະ­ທານ​ຈຳ­ກັດ ໂດຍ​ໂຄງ­ການ​ດັ່ງ­ກ່າວ​ມີ​ເນື້ອ­ທີ່ 9.846 ເຮັກ­ຕາ ອາ­ຍຸ​ສຳ​ປະ­ທານ 50 ປີ ມູນ​ຄ່າ​ການ​ລົງ­ທຶນ 9 ຕື້​ໂດ​ລາ​ສະ­ຫະ­ລັດ ຫຼື ປະ­ມານ 75.766,24 ຕື້​ກີບ ເປົ້າ​ໝາຍ​ສຳ­ຄັນ​ຂອງ​ໂຄງ­ການ​ແມ່ນ​ຈະ​ສ້າງ​ເມືອງ​ໂຂງ​ໃຫ້​ກາຍ­ເປັນ​ເມືອງ​ໃໝ່​ທີ່​ໜ້າ​ທ່ອງ​ທ່ຽວ ຈັດ​ສັນ​ອອກ​ແບບ​ການ​ພັດ­ທະ­ນາ​ໃຫ້​ເປັນ​ລະ­ບຽບ​ສວຍ​ງາມ ແລະ ເປັນ​ຕົວ​ແບບ​ຂອງ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ທີ່​ເປັນ​ມິດ​ກັບ​ສິ່ງ­ແວ­ດລ້ອມ ສ້າງ​ໃຫ້​ເປັນ​ຖານ​ຮອງ​ຮັບ​ດ້ານ​ການ ທ່ອງ​ທ່ຽວ​ທີ່​ສາ­ມາດ​ເຊື່ອມ​ໂຍງ​ກັບ​ພາກ​ພື້ນ ແລະ ສາ­ກົນ ເພື່ອ​ແນ­ໃສ່​ສ້າງ​ສັນ­ຕິ­ພາບ ດຶງ​ດູດ​ການ​ລົງ­ທຶນ ສະ­ໜອງ​ຂໍ້​ມູນ​ຂ່າວ­ສານ​ໃຫ້​ແກ່​ນັກ​ລົງ­ທຶນ ຜູ້​ປະ­ກອບ​ການ ແລະ ນັກ​ທ່ອງ​ທ່ຽວ​ຈາກ​ທົ່ວ​ໂລກ ເຮັດ​ໃຫ້​ປະ­ຊາ­ຊົນ​ມີ​ລາຍ​ຮັບ​ເພີ່ມ​ຂຶ້ນ ຕິດ​ພັນ​ກັບ​ການ​ອະ­ນຸ​ຮັກ ແລະ ສົ່ງ­ເສີມ​ຮີດ­ຄອງ​ປະ­ເພ­ນີ ວັດ­ທະ­ນະ­ທຳ​ອັນ​ດີ­ງາມ​ຂອງ​ທ້ອງ­ຖິ່ນ ແລະ ຂອງ​ຊາດ ໃນ​ນີ້​ໜ້າ​ວຽກ​ຫຼັກ​ຂອງ​ໂຄງ­ການ​ໄດ້​ແບ່ງ​ເປັນ 4 ຂະ­ແໜງ­ການ​ໃຫຍ່​ເຊັ່ນ: ຂະ­ແໜງ­ການ​ຜະ­ລິດ ລວມ​ມີ​ໂຮງ­ງານ​ຜະ­ລິດ​ອາ​ໄຫຼ່ ເອ​ເລັກ​ໂຕ​ນິກ ແລະ ໄອ​ທີ ການ​ປຸງ​ແຕ່ງ​ຜະ­ລິດ​ຕະ​ພັນ​ກະ­ສິ­ກຳ ຫັດ­ຖະ­ກຳ ແລະ ອຸດ­ສາ­ຫະ­ກຳ ແລະ ອື່ນໆ ຂະ ແໜງ​ການ​ຄ້າ ປະ­ກອບ​ດ້ວຍ​ການ​ນຳ​ເຂົ້າ-ສົ່ງ​ອອກ​ສິນ­ຄ້າ ການ​ຄ້າ​ຊາຍ​ແດນ ຮ້ານ​ຄ້າ​ປອດ​ພາ­ສີ ສູນ​ການ​ຄ້າ ຕະ­ຫຼາດ​ກາງ­ຄືນ ແລະ ອື່ນໆ ຂະ­ແໜງ​ບໍ­ລິ­ການ ລວມ​ມີ​ການ​ຂົນ­ສົ່ງ ການ​ກໍ່­ສ້າງ ໂຮງ­ແຮມ ການ­ທ່ອງ­ທ່ຽວ ສະ​ຖາ​ບັນ​ການ​ເງິນ-ທະ­ນາ­ຄານ ປະ­ກັນ​ໄພ ສະ­ຖານ​ການ​ສຶກ​ສາ ສາ­ທາ­ລະ­ນະ​ສຸກ ສະ­ຖານ​ບັນ­ເທີງ ສວນ​ສະ­ໜຸກ ສວນ​ອຸ­ທິ­ຍານ ແລະ ອື່ນໆ ແລະ ຂະ­ແໜງ​ສົ່ງ­ເສີມ-ພັດ­ທະ­ນາ​ການ​ຜະ­ລິດ​ກະ­ສິ­ກຳ​ອິນ​ຊີ ແລະ ການ​ປະ­ມົງ.

ການ​ພັດ­ທະ­ນາ​ໂຄງ­ການ​ນີ້ ຈະ​ເຮັດ​ໃຫ້​ວຽກ​ງານ​ທ່ອງ​ທ່ຽວ​ໄດ້​ຮັບ​ການ​ພັດ­ທະ­ນາ​ຢ່າງ​ໄວ­ວາ ເພາະ​ໄດ້​ປັບ­ປຸງ​ສິ່ງ​ອຳ­ນວຍ​ຄວາມ​ສະ­ດວກ ແລະ ພື້ນ­ຖານ​ໂຄ່ງ​ລ່າງ​ດ້ານ​ການ­ທ່ອງ­ທ່ຽວ​ໃຫ້​ດີ​ຂຶ້ນ​ເຊິ່ງ​ຄາດ​ວ່າ​ຮອດ​ປີ 2025 ຈະ​ມີ​ນັກ​ທ່ອງ​ທ່ຽວ​ເຂົ້າ​ມາ​ທ່ຽວ​ປະ­ມານ 1,3 ລ້ານ​ຄົນ​ຕໍ່​ປີ ສາ­ມາດ​ສ້າງ​ລາຍ​ຮັບ​ໄດ້ 205 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 1.725,79 ຕື້​ກີບ ແລະ ຮອດ​ປີ 2050 ຈະ​ສາ­ມາດ​ດຶງ​ດູດ​ນັກ​ທ່ອງ​ທ່ຽວ​ໄດ້ 10 ລ້ານ​ຄົນ​ຕໍ່​ປີ ສ້າງ​ລາຍ​ຮັບ​ໄດ້​ຫຼາຍ​ກວ່າ 2,4 ຕື້​ໂດ​ລາ​ສະ­ຫະ­ລັດ ຫຼື ປະ­ມານ 20.204,38 ຕື້​ກີບ ນອກ​ນີ້​ຍັງ​ຈະ​ສ້າງ​ລາຍ​ຮັບ​ຈາກ​ພາ­ສີ​ອາ­ກອນ​ຕ່າງໆ​ປະ ມານ 107 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 900,77 ຕື້​ກີບ​ຕໍ່​ປີ ສ້າງ​ວຽກ​ເຮັດ​ງານ​ທຳ​ໃຫ້​ປະ­ຊາ­ຊົນ​ໄດ້​ປະ­ມານ 100.000 ຕຳ­ແໜ່ງ​ງານ ພ້ອມ​ດຽວ​ກັນ​ນີ້​ໂຄງ­ການ​ພັດ­ທະ­ນາ​ເຂດ​ເສດ­ຖະ­ກິດ​ໃໝ່​ສີ­ທັນ­ດອນ ຍັງ​ຈະ​ເອົາ​ໃສ່­ໃຈ​ເປັນ​ພິ­ເສດ​ດ້ານ​ການ​ປົກ​ປັກ​ຮັກ­ສາ​ຄວາມ​ອຸ­ດົມ­ສົມ­ບູນ​ທາງ​ລະ­ບົບ​ນິ­ເວດ ປັບ­ປຸງ​ຄຸ­ນະ­ພາບ​ຂອງ​ສິ່ງ­ແວ­ດລ້ອມ​ໃນ​ເຂດ​ຂອງ​ໂຄງ­ການ ຕະ­ຫຼອດ​ຮອດ​ເຂດ​ຕົວ​ເມືອງ​ໂຂງ ແລະ ຕົວ​ເມືອງ​ໃກ້​ຄຽງ ດ້ວຍ​ການ​ສ້າງ​ສູນ​ບຳ­ບັດ​ຂີ້​ເຫຍື້ອ ບຳ­ບັດ​ນ້ຳ​ເປື້ອນ ເຮັດ​ໃຫ້​ເປັນ​ເມືອງ​ສີ­ຂຽວ​ຕະ­ຫຼອດ​ການ.

ຂ່າວທີ່ກ່ຽວຂ້ອງ