ຂ່າວຫຼ້າສຸດ

ສະມາຄົມສິລະປິນແຄນລາວ ກະຕຸກຊຸກຍູ້ເຮັດໃຫ້ສຽງແຄນ ເປັນມໍລະດົກນາມມະທຳຂອງມວນມະນຸດ

155 02 ກ.ກ. 2018 ຂ່າວໜ້າ​ໜຶ່ງ
ສະມາຄົມສິລະປິນແຄນລາວ ກະຕຸກຊຸກຍູ້ເຮັດໃຫ້ສຽງແຄນ ເປັນມໍລະດົກນາມມະທຳຂອງມວນມະນຸດ

ແຄນ​ແມ່ນ​ສຽງ​ດົນ­ຕີ​ປະ­ຈຳ​ຊາດ​ລາວ​ທີ່​ເປັນ​ເອ­ກະ­ລັກ​ສະ­ເພາະ ເຊິ່ງ​ໄດ້​ຕິດ​ພັນ​ກັບ​ວິ­ຖີ​ການ​ດຳ­ລົງ​ຊີ­ວິດ​ຂອງ​ຄົນ​ລາວ​ແຕ່​ເໜືອ​ຮອດ​ໃຕ້ ສະ­ແດງ​ໃນ​ການ​ຈັດ​ງານ​ເທ​ສະ­ການ ຫຼື ບຸນ​ປະ­ເພ­ນີ​ຕ່າງໆ​ຂອງ​ແຕ່​ລະ​ຊົນ­ເຜົ່າ​ໃນ​ຂອບ​ເຂດ​ທົ່ວ​ປະ­ເທດ​ຈະ​ໃຊ້​ສຽງ​ແຄນ​ເປັນ​ດົນ­ຕີ​ປະ­ກອບ­ສ່ວນ​ເຂົ້າ​ໃນ​ສຽງ​ຂັບ ສຽງ​ລຳ ແລະ ອື່ນໆ ອັນ​ເຮັດ​ໃຫ້​ພາບ​ບັນ­ຍາ­ກາດ​ພາຍ​ໃນ​ງານ​ມີ​ຄວາມ​ເບີກ­ບານ​ມ່ວນ­ຊື່ນ ປັດ­ຈຸ­ບັນ​ສຽງ​ແຄນ​ລາວ​ໄດ້​ຖືກ​ຮັບ­ຮອງ​ເປັນ​ມໍ­ລະ­ດົກ​ດ້ານ​ວັດ­ທະ­ນະ­ທຳ ນາມ​ມະ​ທຳ​ຂອງ​ມວນ​ມະ­ນຸດ ຈາກ​ອົງ­ການ​ອຸຍ​ແນ​ັສ​ໂກ ໃນ​ວັນ​ທີ 7 ທັນ­ວາ 2017.

ທ່ານ ຄຳ​ພັນ ເໝືອນ​ສິດ­ທິ​ດາ ຄະ­ນະ​ພັກ​ກະ­ຊວງ ຫົວ­ໜ້າ​ຫ້ອງ­ການ ຄະ­ນະ​ບໍ­ລິ­ຫານ​ງານ​ສູນ​ກາງ​ສະ­ຫະ­ພັນ​ກຳ­ມະ­ບານ ປະ­ທານ​ກຳ­ມະ­ບານ​ກະ­ຊວງ​ກະ­ສິ­ກຳ ແລະ ປ່າ­ໄມ້ ທັງ​ເປັນ​ປະ­ທານ​ສະ­ມາ­ຄົມ​ສິ­ລະ​ປິນ​ແຄນ​ລາວ​ໃຫ້​ສຳ­ພາດ​ວ່າ: ດ້ວຍ​ຄວາມ​ຮູ້ ຄວາມ​ສາ­ມາດ ແລະ ພອນ​ສະ­ຫວັນ​ດ້ານ​ການ​ເປົ່າ​ແຄນ​ລາວ ປີ 2003 ຕົນ​ໄດ້​ຖືກ​ຄັດ​ເລືອກ​ໃຫ້​ເຂົ້າ​ຮ່ວມ​ການ​ແຂ່ງ­ຂັນ​ເປົ່າ​ແຄນ​ໃນ​ຂອບ​ເຂດ​ທົ່ວ​ປະ­ເທດ ເນື່ອງ​ໃນ​ໂອ­ກາດ​ວັນ​ຄ້າຍ​ວັນ​ເກີດ​ປະ­ທານ ໄກ­ສອນ ພົມ­ວິ­ຫານ ຜູ້­ນຳ​ທີ່​ແສນ​ເຄົາ­ລົບ​ຮັກ ທັງ​ເປັນ​ບິ­ດາ​ແຫ່ງ​ສຽງ​ແຄນ​ລາວ ແລະ ໄດ້​ຖືກ​ຄັດ​ເລືອກ​ໃຫ້​ເປັນ​ໝໍ​ແຄນ​ອັນ​ດັບ 1 ຈາກ​ນັ້ນ ໄດ້​ຮ່ວມ​ກັບ​ໝູ່​ຄະ­ນະ​ສະ­ເໜີ​ສ້າງ­ຕັ້ງ​ສະ­ມາ­ຄົມ​ສິ­ລະ​ປິນ​ແຄນ​ລາວ​ຕໍ່​ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ແລະ ໄດ້​ຮັບ​ການ​ອະ­ນຸ­ມັດ​ໃນ​ປີ 2005 ພາຍ­ຫຼັງ​ທີ່​ສ້າງ­ຕັ້ງ​ແລ້ວ​ໄດ້​ເຕົ້າ­ໂຮມ​ເອົາ​ໝໍ​ຂັບ ໝໍ​ລຳ​ທີ່​ດີ­ເດັ່ນ​ຕ່າງໆ​ຈຳ­ນວນ 15-20 ຄົນ​ເຂົ້າ​ເປັນ​ສະ­ມາ­ຊິກ ແນ­ໃສ່​ເຮັດ​ໃຫ້​ສິ­ລະ​ປະ­ການ​ຂັບ ການ​ລຳ​ຕິດ​ພັນ​ກັນ ເປັນ​ຕົວ​ແທນ​ສິດ­ຜົນ­ປະ­ໂຫຍດ​ຂອງ​ໝໍ​ແຄນ ໃນ​ເບື້ອງ​ຕົ້ນ​ປະ­ທານ​ສະ­ມາ­ຄົມ​ສິ­ລະ​ປິນ​ແຄນ​ລາວ ແມ່ນ​ທ່ານ​ນາງ ກົງ​ເດືອນ ເນດ​ຕະ​ວົງ ອຳ­ນວຍ​ການ​ຫໍ­ສະ­ໝຸດ​ແຫ່ງ​ຊາດ ພາຍ­ຫຼັງ​ທີ່​ຮັບ​ບຳ­ນານ ໄດ້​ມອບ​ໃຫ້​ຕົນ​ເປັນ​ປະ­ທານ​ສະ­ມາ­ຄົມ​ດັ່ງ­ກ່າວ​ໃນ​ປີ 2011 ເປັນ­ຕົ້ນ​ມາ ຈາກ​ນັ້ນ ຕົນ​ໄດ້​ກະ­ຕຸກ​ຊຸກ­ຍູ້​ພາກ­ສ່ວນ​ກ່ຽວ­ຂ້ອງ​ໃຫ້​ນຳ​ສະ­ເໜີ​ຜ່ານ​ລັດ­ຖະ­ບານ​ເພື່ອ​ເອົາ​ສຽງ​ແຄນ​ລາວ​ເຂົ້າ​ເປັນ​ລິ​ຂະ​ສິດ ແຕ່​ຍ້ອນ​ຄວາມ​ສະ­ຫຼາດ​ສ່ອງ​ໃສ​ຂອງ​ພັກ-ລັດ­ຖະ­ບານ​ໄດ້​ນຳ​ສະ­ເໜີ​ຕໍ່​ອົງ­ການ​ອຸຍ​ແນ​ັສ​ໂກ ທີ່​ມີ​ຫຼາຍ​ຂັ້ນ​ຕອນ​ຫຍຸ້ງ­ຍາກ​ສັບ­ສົນ ເປັນ­ຕົ້ນ ແມ່ນ​ການ​ຕອບ​ຄຳ​ຖາມ​ເຈາະ​ຈິ້ມ​ຕ່າງໆ ໃນ​ນີ້ ໄດ້​ເນັ້ນ​ຄວາມ​ສຳ­ຄັນ​ໃນ​ການ​ປູກ​ຈິດ​ສຳ­ນຶກ​ເຖິງ​ຄວາມ​ເປັນ​ເອ­ກະ­ລັກ ແລະ ຄວາມ​ເປັນ​ຊາດ​ລາວ ລວມ​ທັງ​ຄວາມ​ເປັນ​ເຈົ້າ​ຂອງ​ວັດ­ທະ­ນະ­ທຳ ກໍ່​ຄື ສຽງ​ແຄນ​ເຊື້ອ​ຊາດ​ລາວ ທີ່​ຖ່າຍ​ທອດ​ຈາກ​ບັນ­ພະ­ບຸ­ລຸດ​ລາວ ຈາກ​ຄົນ​ຮຸ່ນ​ໜຶ່ງໆ​ສູ່​ຄົນ​ຮຸ່ນ​ໜຶ່ງໆ ກາຍ­ເປັນ​ເອ­ກະ­ລັກ​ວັດ­ທະ­ນະ­ທຳ​ຂອງ​ຊາດ ແລະ ມວນ​ມະ­ນຸດ​ທີ່​ມີ​ການ​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ມາ​ຮອດ​ວັນ​ທີ 4-9 ທັນ­ວາ 2017 ກອງ​ປະ­ຊຸມ​ຂອງ​ອົງ­ການ​ອຸຍ​ແນ​ັສ​ໂກ ຢູ່​ເກາະ​ເຈ​ຈູ ສ ເກົາ­ຫຼີ ໄດ້​ຮັບ­ຮອງ​ເອົາ​ສຽງ​ແຄນ​ເປັນ​ມໍ­ລະ­ດົກ​ນາມ​ມະ​ທຳ​ຂອງ​ຄົນ​ເຊື້ອ​ຊາດ​ລາວ ເປັນ​ມໍ­ລະ­ດົກ​ທາງ​ດ້ານ​ນາມ​ມະ​ທຳ​ຂອງ​ມວນ​ມະ­ນຸດ.

ຕໍ່​ກັບ​ເຫດ­ການ​ດັ່ງ­ກ່າວ ໃນ​ຖາ­ນະ​ເປັນ​ປະ­ຊາ­ຊົນ​ລາວ​ຜູ້​ໜຶ່ງ​ມີ​ຄວາມ​ຮູ້­ສຶກ​ພາກ­ພູມ​ໃຈ ເຊິ່ງ​ສຽງ​ແຄນ​ໄດ້​ເຮັດ​ໃຫ້​ປະ­ເທດ​ລາວ​ເຮົາ​ມີ​ຊື່​ສຽງ ເພື່ອ​ເປັນ​ການ​ຮັກ­ສາ​ເສີມ​ຂະ­ຫຍາຍ​ມູນ­ເຊື້ອ ໃນ​ເດືອນ​ເມ­ສາ 2018 ໄດ້​ມີ​ການ​ແຫ່​ແຄນ​ຄອບ​ໄຂວ່​ບັນ­ພະ­ບຸ­ລຸດ ນັກ­ຮົບ​ປະ­ຕິ­ວັດ​ທີ່​ມີ​ຜົນ­ງານ​ດີ­ເດັ່ນ ແນ­ໃສ່​ເປັນ​ການ​ສືບ​ທອດ ປົກ​ປັກ​ຮັກ­ສາ​ໃຫ້​ຢູ່​ຄູ່​ກັບ​ຄົນ​ລາວ​ຕະ­ຫຼອດ​ໄປ ພ້ອມ​ນັ້ນ ຍັງ​ໄດ້​ຮຽກ­ຮ້ອງ​ມາ​ຍັງ​ຊາວ​ໜຸ່ມ ໄວ​ໜຸ່ມ ເຍົາ­ວະ​ຊົນ ແລະ ລູກ​ຫຼານ​ທີ່​ເກີດ​ໃໝ່​ໃຫຍ່​ລຸນ​ໃຫ້​ຕັ້ງ­ໃຈ​ຮ່ຳ­ຮຽນ​ເອົາ​ມູນ­ເຊື້ອ​ດັ່ງ­ກ່າວ ພ້ອມ​ທັງ​ປົກ​ປັກ​ຮັກ­ສາ​ໃຫ້​ມີ​ຄວາມ​ຍືນ​ຍົງ.

ຂ່າວທີ່ກ່ຽວຂ້ອງ