ຂ່າວຫຼ້າສຸດ

ຂໍ້ມູນ ສຳຄັນຢ່າງໃດ ?

377 02 ກ.ກ. 2018 ນານາສາລະ

ເວລາ​ທ່ານ​ເປີດ​ໜ້າ Facebook ຂຶ້ນ​ມາ ຈະເຫັນ​ຂໍ້​ມູນ​ເລື່ອງ​ການ​ຈ່າວ​ຂາຍ​ສິນຄ້າ ຫຼື ການ​ຈ່າວບໍລິການ​ໃດ​ໜຶ່ງ ຈົນ​ຮູ້ສຶກ​ລຳ​ຄານ... ແລ້ວ​ທ່ານ​ຮູ້​ບໍ່ວ່າ ພວກ​ຈ່າວ​ຂາຍ​ສິນຄ້າ ຫຼື ຈ່າວ​ບໍລິການ​ນັ້ນ ເຂົາ​ຮູ້​ຂໍ້​ມູນ​ທ່ານ​ໄດ້​ແນວໃດ ? ນີ້​ແມ່ນ​ບັນຫາ​ທີ່​ກ່າວຫາ​ກັນ​ວ່າ Facebook ບໍ່​ປົກ​ປ້ອງ​ຂໍ້​ມູນ​ສ່ວນ​ຕົວຂອງ​ລູກ​ຄ້າ ຈົນ​ເຖິງ​ຂັ້ນ ຫົວໜ້າ​ຄະນະ​ເຈົ້າ​ໜ້າທີ່​ບໍລິ​ຫານ Facebook ອອກ​ມາ​ຖະແຫຼງ​ຍອມຮັບ ແລະ ໃນ​ວັນ​ທີ 11 ເມສາ​ຜ່ານ​ມາ (ມາກ​ ຊັດ​ເຄີເບີກ) ຕ້ອງ​ເຂົ້າ​ຊີ້​ແຈງ​ຕໍ່​ກຳມາ​ທິ​ການ​ຂອງ​ສະພາ​ຜູ້​ແທນ​ສະຫະລັດ​ອາ​ເມ​ຣິ​ກາ ວ່າ: ຕົວ​ເລກ​ຜູ້​ໃຊ້​ບໍ​ລິການ​ຂອງ​ບໍລິສັດ​ນີ້​ ຖືກ​ລ່ວງ​ຂໍ້​ມູນ​ເຖິງ 87 ລ້ານ​ຄົນ ບໍ່​ທໍ່​ນັ້ນ ໃນ​ວັນ​ທີ 22 ພຶດສະພາ ກໍ່​ເຂົ້າ​ໃຫ້ການ​ຕໍ່ລັດ​ຖະ​ສະພາ​ເອີ​ຣົບ​ອີກ.

ຂໍ້​ມູນ​ຂ້າງ​ເທິງ​ນັ້ນ ​ສະແດງ​ໃຫ້​ເຫັນ​ວ່າ ເຕັກ​ໂນ​ໂລຊີ​ກ້າວໜ້າ​ທໍ່​ໃດ ຄວາມ​ລັບ​ກໍ່​ຍິ່ງ​ຖືກ​ເປີດເຜີຍ​ຫຼາຍຂຶ້ນ ເພາະ​ສະໄໝ​ນີ້​ແມ່ນ​ຍຸກ​ເສດຖະກິດ​ດີ​ຈີ​ຕອນ ຫຼື ເອີ້ນ​ວ່າ Data Economy ໝາຍ​ເຖິງ​ຂໍ້​ມູນ​ກາຍເປັນຊັບ​ສິນ​ທີ່​ທຸກ​ຄົນ​ຕ້ອງ​ຊອກ​ຫາ ໃຜ​ມີ​ຂໍ້​ມູນ​ຫຼາຍ ກໍ່ປຽບ​ເໝືອນ​ຜູ້​ນັ້ນ​ຄອບ​ຄອງ​ບໍ່​ເງິນ ບໍ່​ຄຳ ໄວ້​ໃນ​ກຳມື.

ສະນັ້ນ ທຸກ​ມື້ນີ້ (ເວົ້າ​ໃນ​ທາງ​ການ​ຄ້າ) ຜູ້ນຳ​ຂອງບໍລິສັດ ຈຶ່ງ​ຕ້ອງການ​ມີ​ຂໍ້​ມູນ​ລູກ​ຄ້າ ຂໍ້​ມູນ​ການ​ຕະຫຼາດ​ໃນ​ກຳມື​ຫຼາຍ​ທໍ່​ໃດ​ຍິ່ງ​ດີ ເພາະ​ໃນ​ການ​ແຂ່ງຂັນ​ສຳລັບບໍລິສັດ Technology ຊັ້ນ​ນຳ​ນັ້ນ ມີ​ຂໍ້​ມູນປ້ອນ​ເຂົ້າ​ລະບົບ​ຄອມ​ພິວ​ເຕີ ຈະ​ຮູ້​ວ່າ​ລູກ​ຄ້າ​ຊັ້ນ​ຄົນໃດ ? ຕ້ອງການ​ຫຍັງ ? ລູກ​ຄ້າ​ຄື​ພະ​ເຈົ້າ ສະນັ້ນ ຕ້ອງ​ຜະລິດ​ສິນຄ້າ​ອອກ​ມາ​ໃຫ້​ຖືກ​ໃຈ​ລູກ​ຄ້າ ເມື່ອເປັນ​ແນວ​ນັ້ນ ມູນ​ຄ່າ​ທີ່ແທ້​ຈິງ​ຂອງ​ບໍລິສັດ​ຈຶ່ງ​ຢູ່​ທີ່ການ​ຄອບ​ຄອງ Data.

ການ​ຊື້​ຂາຍ Data ເປັນ​ບັນຫາ​ລະອຽດ​ອ່ອນ​ທີ່ພວມ​ປັ່ນ​ປ່ວນ​ຢູ່​ປະເທດ​ຕາເວັນຕົກ ສ່ວນ​ຢູ່​ອາຊີ ພວກ​ເຮົາ​ກໍ່​ບໍ່​ແມ່ນ​ບໍ່​ມີ... ຫວ່າງ​ບໍ່​ດົນ​ມາ​ນີ້ ຢູ່​ຫວຽດນາມ ເຈົ້າ​ໜ້າທີ່​ພວມ​ຕິດຕາມ​ເບິ່ງ​ຂະ​ບວນ​ການ​ຄ້າຂາຍ Data ວ່າ​ເຂົ້າ​ຄ່າຍ​ຜິດ​ກົດໝາຍ​ຫຍັງ​ແດ່ ?.

ຢູ່​ປະເທດ​ເຮົາ​ຄິດ​ວ່າ​ຄົງ​ມີ​ການ​ຊື້​ຂາຍ Data ເພາະ​ການ​ວິໄຈ​ຕະຫຼາດ​ມັນ​ກໍ່​ຕ້ອງ​ມີ​ຂໍ້​ມູນ​ເພື່ອຜະລິດ​ສິນຄ້າ ໃຫ້​ຖືກ​ໃຈ​ລູກ​ຄ້າ ກໍ່​ຄືກຸ່ມ​ເປົ້າໝາຍ ບໍ່​ຊັ້ນ​ກໍ່​ຄົງ​ຢູ່​ບໍ່​ໄດ້ ແນວ​ວ່າ​ບໍ່​ມີ​ກຳໄລ ? ແລ້ວ​ໃຜ​ຈະ​ຖືກ​ລັກ Data ກ່ອນ​ເພິ່ນ ຄົງ​ໜີ​ບໍ່ມົ້ມ​ຜູ້​ໃຊ້ Facebook ທັງຫຼາຍ ເພາະວ່າ​ທ່ານ​ຕ້ອງ​ລົງ​ຂໍ້​ມູນ​ລະອຽດ​ພໍ​ສົມຄວນ ຈຶ່ງ​ຈະ​ສາມາດສ້າງ Facebook ຂຶ້ນ​ມາ​ໄດ້ ສະນັ້ນ ການ​ທີ່​ເຮົາເຄີຍ​ໄດ້​ຍິນ​ວ່າ: ບໍ່​ຕ້ອງ​ມີ​ຫ້ອງການ... ບໍ່​ຕ້ອງ​ໄປຍ່າງ​ຂາຍ​ສິນຄ້າ ກໍ່​ສາມາດ​ມີ​ລາຍ​ຮັບ​ໄດ້ ຄິດວ່າ​ຄົງ​ແມ່ນ​ການ​ຂາຍ Data ນີ້​ແຫຼະ !.. ເພາະ​ໃນ​ຄວາມ​ເປັນ​ຈິງ​ຂອງ​ໂລກ​ມະນຸດ​ໃນ​ຍຸກ​ປັດຈຸບັນ​ນີ້ ໃຜ​ມີ​ຂໍ້​ມູນ ຜູ້​ນັ້ນ​ຊະນະ​ເຄິ່ງ​ທາງ​ແລ້ວ ບໍ່​ວ່າ​ຈະ​ເປັນວຽກ​ງານ​ຂອງ​ການຈັດຕັ້ງວຽກ​ຊື້-ຂາຍ ກໍ່​ຄືທຸກໜ້າ​ວຽກ​ທີ່​ມັນ​ວົນວຽນ​ຢູ່​ໃນ​ສັງຄົມ​ມະນຸດ​ຂອງ​ພວກເຮົາ.

ໂດຍ: ແນວ​ລາວ

ຂ່າວທີ່ກ່ຽວຂ້ອງ