ຂ່າວຫຼ້າສຸດ

ຊຽງຂວາງ ພ້ອມເປັນເຈົ້າພາບງານມະຫາກຳກີລາແຫ່ງຊາດ ຄັ້ງທີ 11

244 02 ກ.ກ. 2018 ວົງຈອນກີລາ

ການ​ກະ­ກຽມ​ຄວາມ​ພ້ອມ​ງານ​ມະ­ຫາ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ຫຼື ຊຽງ​ຂວາງ​ເກມ ທີ່​ແຂວງ​ຊຽງ​ຂວາງ​ເປັນ​ເຈົ້າ­ພາບ​ຈັດ​ຂຶ້ນ​ທ້າຍ​ປີ 2018 ນອກ­ຈາກ​ເຈົ້າ­ພາບ​ແລ້ວ​ກໍ່​ມີ​ບັນ­ດາ​ແຂວງ ແລະ ກະ­ຊວງ​ອົງ­ການ​ຕ່າງໆ​ທົ່ວ​ປະ­ເທດ​ ກໍ່​ມີ​ການ​ກະ­ກຽມ​ຄວາມ​ພ້ອມ​ໃນ​ການ​ຄັດ​ເລືອກ​ນັກ­ກີ­ລາ ​ທີ່​ມີ​ຄວາມ​ພ້ອມ​ທາງ​ດ້ານ​ພາ­ລະ​ກຳ­ລັງ ແລະ ຄວາມ​ສາ­ມາດ​ເຂົ້າ​ຮ່ວມ​ເພື່ອ​ຍາດ​ເອົາ​ລຽນ​ລາ­ງວັນ​ມາ​ກົມ​ກອງ ແລະ ແຂວງ​ຂອງ​ຕົນ​ເທົ່າ​ທີ່​ຈະ​ຫຼາຍ​ໄດ້​ເພື່ອ​ສ້າງ​ຜົນ­ງານ ແລະ ຊື່​ສຽງ​ໃນ​ວົງ​ການ​ກີ­ລາ​ບ້ານ​ເຮົາ.

ທ່ານ ບຸນ​ຕົ້ນ ຈັນ­ທະ​ພອນ ເຈົ້າ­ແຂວງ​ຊຽງ​ຂວາງ​ໄດ້​ໃຫ້​ສຳ­ພາດ​ວ່າ: ສຳ­ລັບ​ຄວາມ​ພ້ອມ​ການ​ຈັດ​ບ່ອນ​ພັກ​ເຊົາ​ໃຫ້​ກັບ​ນັກ­ກີ­ລາ​ມາ​ຮອດ​ປັດ­ຈຸ­ບັນ​ມີ​ທັງ​ໝົດ 38 ຈຸດ ເຊິ່ງ​ຈະ​ມີ​ການ​ພັກ​ເຊົາ​ແບບ​ລວມ​ສູນ ທັງ​ນີ້​ກໍ່​ເພື່ອ​ສະ­ດວກ​ໃນ​ການ​ເຝິກ­ຊ້ອມ ແລະ ການ​ຮັກ­ສາ​ປອດ​ໄພ​ໃຫ້​ແກ່​ນັກ­ກີ­ລາ ກ່ຽວ​ກັບ​ເດີ່ນ​ກີ­ລາ​ໃຫຍ່​ທີ່​ຈະ​ນຳ​ໃຊ້​ໃນ​ການ​ເປີດ-ປິດ​ພິ­ທີ​ເປັນ​ທາງ​ການ​ປັດ­ຈຸ­ບັນ​ໄດ້​ສຳ­ເລັດ​ໂດຍ​ພື້ນ­ຖານ.

ການ​ກໍ່­ສ້າງ​ພື້ນ­ຖານ​ຮອງ​ຮັບ​ການ​ຈັດ​ງານ​ນີ້ ​ບໍ່​ແມ່ນ​ແຂວງ​ຈະ​ສ້າງ​ໃໝ່​ທັງ​ໝົດ ນອກ​ນັ້ນ​ຍັງ​ໄດ້​ນຳ​ໃຊ້​ເດີ່ນ​ສະ­ໂມ­ສອນ​ຂອງ​ບັນ­ດາ​ພະ­ແນກ­ການ ໂຮງ­ຮຽນ​ພາຍ​ໃນ​ແຂວງ​ທັງ​ພາກ​ລັດ ແລະ ພາກ​ເອ­ກະ​ຊົນ​ທີ່​ມີ​ແລ້ວ ​ເຂົ້າ​ມາ​ປັບ­ປຸງ​ເພື່ອ​ຈັດ​ເປັນ​ບ່ອນ​ແຂ່ງ­ຂັນ​ເຊັ່ນ: ໂບ​ລິງ ກະ­ຕໍ້ ບານ­ສົ່ງ ເປ​ຕັງ ແລະ ອື່ນໆ ທັງ​ນີ້​ກໍ່​ເພື່ອ​ຫຼຸດ​ຕົ້ນ​ທຶນ​ໃນ​ການ​ກໍ່­ສ້າງ​ພື້ນ­ຖານ​ໂຄງ​ລ່າງ​ເບົາ­ບາງ​ລົງ ຖື​ເປັນ​ການ​ປະ­ຢັດ​ງົບ­ປະ­ມານ​ຂອງ​ພັກ-ລັດ ແລະ ບໍ່​ຟຸມ​ເຟືອຍ ໂດຍ​ນຳ​ໃຊ້​ສິ່ງ​ທີ່​ມີ​ແລ້ວ​ໃຫ້​ເກີດ​ປະ­ໂຫຍດ​ສູງ​ສຸດ.

ໃນ​ການ​ແຂ່ງ­ຂັນ​ກີ­ລາ​ລອຍ­ນ້ຳ​ແມ່ນ​ຈະ​ຈັດ​ແຂ່ງ­ຂັນ​ຢູ່​ນະ­ຄອນ­ຫຼວງ​ວຽງ​ຈັນ ເພາະ​ງົບ­ປະ­ມານ​ໃນ​ການ​ກໍ່­ສ້າງ​ສູງ​ຫຼາຍ ສ່ວນ​ການ​ແຂ່ງ­ຂັນ 28 ປະ­ເພດ​ກີ­ລາ​ຈະ​ຈັດ​ຢູ່​ຊຽງ​ຂວາງ​ ຄາດ​ວ່າ​ໃນ​ວັນ​ທີ 11 ພະ­ຈິກ​ຈະ​ເປັນ​ມື້​ເປີດ​ງານ​ຢ່າງ​ເປັນ​ທາງ​ການ ແລະ ສຳ­ເລັດ​ວັນ​ທີ 21 ພະ­ຈິກ 2018 ສະ­ນັ້ນ ​ຈຶ່ງ​ຂໍ​ເຊີນ­ຊວນ​ພີ່­ນ້ອງ​ຊາວ​ລາວ​ທຸກ​ຖ້ວນ​ໜ້າ ແລະ ນັກ​ທ່ອງ​ທ່ຽວ​ຈາກ​ທຸກ​ສາ­ລະ​ທິດ​ເຂົ້າ​ຮ່ວມ​ງານ ແລະ ຊາວ​ຊຽງ​ຂວາງ ​ຍິນ​ດີ​ຕ້ອນ­ຮັບ​ທຸກ​ທ່ານ​ດ້ວຍ​ນ້ຳ​ໃສ​ໃຈ​ຈິງ.

ຂ່າວທີ່ກ່ຽວຂ້ອງ