ນວ ກຽມຄັດເລືອກນັກກີລາດີເດັ່ນ ຮ່ວມ ຊຽງຂວາງ ເກມ

202 02 ກ.ກ. 2018 ວົງຈອນກີລາ

ຕາມ​ການ​ລາຍ​ງານ​ຂອງທ່ານ ກອງ​ແກ້ວ ແຫ່ງ​ດາ​ວົງ​ໄຊ ຫົວ­ໜ້າ​ຂະ­ແໜງ​ກີ­ລາ​ລະ­ດັບ​ສູງ ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ (ນວ) ແຈ້ງ​ໃຫ້​ຊາບ​ວ່າ: ປັດ­ຈຸ­ບັນ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ຮ່ວມ​ກັບບໍ­ລິ­ສັດ ແສງ​ເພັດ ເກັບ​ກູ້​ລະ­ເບີດ ຈຳ­ກັດ ໄດ້​ອອກ​ແຈ້ງ​ການ​ເຖິງ​ບັນ­ດາ​ສະ­ໂມ­ສອນເມືອງ ແລະ ບ້ານ​ອ້ອມ​ຂ້າງ 9 ຕົວ​ເມືອງ​ທົ່ວ ນວ ໃຫ້​ຮັບ​ຮູ້​ກ່ຽວ​ກັບ​ການ​ກະ­ກຽມ​ຈັດ­ການ​ແຂ່ງ­ຂັນ​ກີ­ລາ 4 ປະ­ເພດ ທີ່​ບຶງ​ທາດ­ຫຼວງ ເມືອງ​ໄຊເຊດ​ຖາ ລະ­ຫວ່າງ​ວັນ​ທີ 12-14 ກໍ­ລະ­ກົດ​ນີ້ ເຊິ່ງ​ປະ­ກອບ​ມີ ຈ້ອງ​ບິນ ຊ່ວງ​ເຮືອ 12 ສີ­ພາຍ ແລະ 22 ສີ­ພາຍ ເປ​ຕັງ ແລະ ກະ­ຕໍ້.

ທັງ​ນີ້ ກໍ່​ເພື່ອ​ເປັນ​ການ​ສົ່ງ­ເສີມ​ການ­ທ່ອງ­ທ່ຽວໃນ ນວ ໃຫ້​ພໍ່-ແມ່​ປະ­ຊາ­ຊົນ ແລະ ຊາວ​ຕ່າງ­ປະ­ເທດ​ໄດ້​ມາ​ທ່ຽວ​ຊົມ​ສະ­ຖານ­ທີ່​ທ່ອງ​ທ່ຽວ​ແຫ່ງ​ໃໝ່ ບຶງ​ທາດ­ຫຼວງ ອີກ​ດ້ານ​ໜຶ່ງ​ກໍ່​ເພື່ອ​ເປັນ​ການ​ຄັດ​ເລືອກ​ໃນ​ຕົວ​ກີ­ລາ​ບາງ​ປະ­ເພດ ເປັນ­ຕົ້ນ​ແມ່ນ ກີ­ລາ​ເຮືອ​ຊ່ວງ ເປ​ຕັງ ແລະ ກະ­ຕໍ້ ເພື່ອ​ກຽມ​ຕາງ­ໜ້າ ນວ ເຂົ້າ​ຮ່ວມ​ແຂ່ງ­ຂັນງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ຫຼື ຊຽງ​ຂວາງ ເກມ ທີ່​ແຂວງ​ຊຽງ​ຂວາງ ເປັນ​ເຈົ້າ­ພາບ ລະ­ຫວ່າງ​ວັນ​ທີ 11-21 ພະ­ຈິກ​ນີ້.

ການ​ແຂ່ງ­ຂັນ​ລາຍ­ການ​ນີ້ເປັນ​ລາຍ­ການ​ທີ່​ພິ­ເສດ ແລະ ຈະ​ເປັນ​ຂະ​ບວນ​ການ​ຢ່າງ​ຟົດ­ຟື້ນ ຄາດ​ວ່າ​ຈະ​ມີ​ຫຼາຍ​ພາກ­ສ່ວນ​ເຂົ້າ​ຮ່ວມ​ແຂ່ງ­ຂັນ ເພາະ​ທາງ​ບໍ­ລິ­ສັດ ແສງ​ເພັດ ເກັບ​ກູ້​ລະ­ເບີດ ຈຳ­ກັດ ໄດ້​ນຳ​ເອົາ​ເຮືອ​ທີ່​ທັນ​ສະ­ໄໝ​ມາ​ຈາກ ສປ ຈີນ ເກືອບ 10 ລຳ ບັນ­ຈຸ​ເຂົ້າ​ໃນ​ການ​ແຂ່ງ­ຂັນ​ໂດຍ​ສະ­ເພາະ ເພື່ອ​ເປັນ​ການ​ຫຼຸດ­ຜ່ອນ ແລະ ໃຫ້​ຄວາມ​ສະ­ດວກ​ແກ່​ນັກ​ກິ­ລາ​ເຮືອ​ຊ່ວງ ໃນ​ການ​ຂົນ­ສົ່ງ​ເຮືອ​ຂອງ​ແຕ່​ລະ​ສະ­ໂມ­ສອນ​ເຂົ້າ​ຮ່ວມ​ແຂ່ງ­ຂັນ.

ຂ່າວທີ່ກ່ຽວຂ້ອງ