ສຖິຕິໃໝ່?

131 01 ກ.ກ. 2018 ວົງຈອນກີລາ
ສຖິຕິໃໝ່?

          ເຕະບານໂລກຄັ້ງນີ້ ມີສະຖິຕິໃໝ່ເກີດຂຶ້ນຫຼວງຫຼາຍ ດ້ວຍປັດໄຈຫຼາຍຢ່າງປະກອບກັນ ໂດຍສະເພາະຢ່າງຍິ່ງແມ່ນຈໍານວນລູກໂທດທີ່ພຸ່ງທະລຸຫຼັກ 20 ໄປແລ້ວ ເພາະການນຳ VARມາປະກອບການຕັດສິນໃຈ.

 ທີ່ໜ້າສົນໃຈຄື ບຣາຊິນ ລົງສະໜາມມາ 3 ນັດໃນຮອບທໍາອິດ ຍັງບໍ່ເຄີຍໄດ້ເຕະລູກໂທດກັບເຂົາ ແຕ່ເຖິງຢ່າງນັ້ນ ກອງເຊຍບານທົ່ວໂລກກໍພ້ອມໃຈກັນບອກວ່າ ເນມາ ດາວດັງຂອງທີມແຊັມໂລກ 5 ສະໄໝ ໜ້າຈະທໍາລາຍສະຖິຕິບາງຢ່າງຂອງບານໂລກໄປຮຽບຮ້ອຍ.

ແຕ່ໃດໆມາ ເນມາ ມັກຖືກວິຈານຈາກຄູ່ແຂ່ງ ແລະ ກອງເຊຍບານວ່າມີນິໄສມັກພຸ່ງລົ້ມ ເອະອະກໍລ້ົມ ເອະອະກໍກິ້ງ ແລະໃນເກມກັບ ແຊັກບີ ເມື່ອຄືນວັນພຸດທີ່ຜ່ານມາ ເຂົາກໍຍົກລະດັບຄວາມເປັນຕົວລະຄອນຂຶ້ນໄປອີກຂັ້ນ ດ້ວຍການກິ້ງເຖິງ 5-6 ຮອບ !.

ງານນີ້ເລິຍຖືກຊາວເນັກຕັດຕໍ່ພາບມາຕະຫຼົກກັນເປັນທີ່ສະໜຸກສະໜານ ພ້ອມລົງຄວາມເຫັນເໝືອນໆກັນວ່າ ໜ້າຈະເປັນຈໍານວນຮອບການກິ້ງທີ່ນັກເຕະຄົນໜຶ່ງເຮັດໄດ້ໃນບານໂລກ.

ໄດ້ເປັນເຈ້ົາຂອງສະຖິຕິແບບນີ້ ບໍ່ຮູ້ຈະດີໃຈຫຼືເສຍໃຈ ກັນດີນໍ...

 ເຮັດຕາມເປ້ົາ

ນັກເຕະ ເຢຍລະມັນ ເດີນທາງເຖິງປະທດໂດຍສະຫວັດດິພາບແບບເສົ້າໆ ຕ່າງກັບ 4 ປີທີ່ຜ່ານມາໂດຢສິ້ນເຊີງ ບໍ່ວ່າຈະເບິ່ງໄປໃດກໍມີແຕ່ຄວາມໜ້າຜິດຫວັງ ທ່າມກາງອະນາຄົດທີ່ບໍ່ແນ່ນອນຂອງ ໂຢອາຄິມ ເລິຟ ຜູ້ຈັດການທີມຊາດເຢຍລະມັນວ່າຈະຢູ່ຫຼືຈະໄປ.

ວັນເດີນທາງອອກຈາກໂຮງແຮມໃນເມືອງຄາຊານ ປະເທດຣັດເຊຍ ມີຄົນຕາດີໄປເຫັນສະໂລແກນທີ່ຕິດຢູ່ທີ່ລົດບັດຂອງນັກເຕະເຢຍລະມັນ ທີ່ມີຂໍ້ຄວາມວ່າ “ມາຂຽນປະຫວັດສາດໃໝ່ດ້ວຍກັນເຖີດ”.

ຄວາມຈິງແລ້ວ ນັກເຕະເຢຍລະມັນກໍບໍ່ໄດ້ເຮັດຜິດອັນໃດຈາກສະໂລແກນ ແຕ່ປະຫວັດສາດມັນດັນພິກຈາກເປັນທີມທໍາອິດທີ່ປ້ອງກັນແຊັມໂລກໃນຮອບ 56 ປີ ກາຍເປັນຕົກຮອບທີໜຶ່ງຄັ້ງທໍາອິດໃນຮອບ 80 ປີກໍເທ່ົານັ້ນ.

ຂ່າວທີ່ກ່ຽວຂ້ອງ