ຝຣັ່ງ ຟອມເດັ່ນ ຊະນະ ອາກຊັງຕິນ ເຂົ້າຮອບ 8 ທີມບານໂລກ

179 01 ກ.ກ. 2018 ວົງຈອນກີລາ
ຝຣັ່ງ ຟອມເດັ່ນ ຊະນະ ອາກຊັງຕິນ ເຂົ້າຮອບ 8 ທີມບານໂລກ

ການແຂ່ງຂັນເຕະບານໂລກ 2018 ຮອບ 16 ທີມສຸດທ້າຍ ທີ່ສະໜາມຄາຊານ ອາຣີນາ ປະເທດຣັດເຊຍ ເມື່ອວັນເສົາທີ່ຜ່ານມາ ທີມຊາດຝຣັ່ງ ລົງສະໜາມພົບກັບ ອາກຊັງຕິນ ເຄິ່ງເວລາທໍາອິດ ຝຣັ່ງອອກຕົວດີຂຶ້ນ ນຳກ່ອນ 1-0 ຈາກຈຸດໂທດຂອງ ອອງຕວນ ກຣີຊມັນ ນາທີທີ່ 13 ແຕ່ວ່າ ອາກຊັງຕິນ ບໍ່ຍອມພ່າຍແພ້ ຕາມຕີສະເໝີເປັນ 1-1 ໄດ້ຈາກການຍິງໄກຂອງ ອັງເຄວ ດິ ມາເຣຍ ນາທີທີ່ 41.

ເຄິ່ງຫຼັງ ອາກຊັງຕິນພິກແຊງຂຶ້ນນຳ 2-1 ຈາກ ກາບລຽວ ເມຄາໂດ ນາທີທີ່ 48 ແຕ່ຝຣັ່ງຍັງແຂງແກ່ນ ຕາມຕີສະເໝີ ເປັນ 2-2 ໄດ້ຈາກ ເບງຊາແມງ ປາວາ ນາທີທີ່ 57 ຈາກນັ້ນ ຝຣັ່ງເດີນເຄື່ອງເຕັມສູບ ແລະ ຍິງເພີ່ມໄດ້ອີກ 2 ປະຕູຈາກ ຄິລິຢັນ ເອັມບັບເປ ນາທີທີ່ 64 ກັບ 68 ຂຶ້ນນຳຫ່າງ 4-2 ໄລຍະທົດເຈັບນາທີທີ່ 90+2 ເຊຄິໂອ ອະເກວໂຣ ເອົາຫົວຕໍາບານເຂົ້າປະຕູໃຫ້ ອາກຊັງຕິນ ໄລ່ຂຶ້ນມາເປັນ 3-4 ແຕ່ກໍເຮັດໄດ້ພຽງແຕ່ເທົ່ານັ້ນ ຈົບເກມ ຝຣັ່ງ ຊະນະ ອາກຊັງຕິນໄປຢ່າງສຸດມັນ 4-3 ລອຍລຳເຂົ້າສູ່ຮອບກ່ອນຮອງຊະນະເລີດໄດ້ເປັນທີມທໍາອິດ.

ຂ່າວທີ່ກ່ຽວຂ້ອງ