ຂ່າວຫຼ້າສຸດ

ແພດມະໂຫສົດ ສາມາດຜ່າຕັດສິ່ງແປກປອມຄາຄໍເດັກໄດ້ສຳເລັດ

242 29 ມິ.ນ. 2018 ຂ່າວໜ້າ​ໜຶ່ງ

ໃນ​ກາງ​ເດືອນ​ມິ­ຖຸ­ນາ​ຜ່ານ​ມາ ທ່ານ ຊູ​ຊາດ ວົງ​ພະ­ຈັນ ຫົວ­ໜ້າ​ພະ​ແນກ​ຜ່າ­ຕັດ​ເດັກ ໂຮງ­ໝໍ​ມະ­ໂຫ­ສົດ ພ້ອມ​ດ້ວຍ​ໜ່ວຍ​ງານ ໄດ້​ຜ່າ­ຕັດ​ເອົາ​ສິ່ງ​ແປກ​ປອມ​ຄາ​ຄໍ​ເດັກ​ອອກ​ໄດ້ 2 ກໍ­ລະ­ນີ ກໍ­ລະ­ນີ​ທີ 1 ແມ່ນ​ເດັກ​ອາ­ຍຸ 1 ປີ 2 ເດືອນ ທີ່​ກືນ​ຖ່ານ​ແປ​ທີ່​ໃສ່​ຈັກ​ຄິດ­ໄລ່​ເລກ ຂະ­ໜາດ​ເສັ້ນ​ຜ່າ​ສູນ​ກາງ​ເທົ່າ​ກັບ​ຝາ​ນ້ຳ​ດື່ມ​ບໍ­ລິ­ສຸດ​ຕຸກ​ນ້ອຍ ກໍ­ລະ­ນີ​ທີ 2 ແມ່ນ​ເດັກ​ກືນ​ກີ້​ສາຍ​ຄໍ ຫຼັງ​ຈາກ​ກືນ​ແລ້ວ​ເດັກ​ທັງ​ສອງ​ມີ​ອາ­ການ​ຜິດ​ປົກ­ກະ­ຕິ ພໍ່​ແມ່​ໄດ້​ນຳ​ມາ​ໂຮງ­ໝໍ ທັງ​ສອງ​ກໍ­ລະ­ນີ ມີ​ອາ­ການ​ຄ້າຍ­ຄື​ກັນ ເບື້ອງ​ຕົ້ນ​ເດັກ​ມີ​ອາ­ການ​ຮາກ ໄອ ເຈັບ­ຄໍ ອີກ​ບໍ່​ພໍ​ເທົ່າ­ໃດ​ນາ­ທີ ຈະ​ມີ​ອາ­ການ​ກ່ຳ​ແຫຼ້​ເຂົ້າ ເວ­ລາ​ນັ້ນ ພໍ່​ແມ່​ກໍ່​ຮູ້­ສຶກ​ວ່າ ລູກ​ຕົນ​ເອງ​ຕ້ອງ​ມີ​ອັນ​ໃດ​ອັນ​ໜຶ່ງ​ຄາ​ຄໍ ຈຶ່ງ​ໄດ້​ນຳ​ມາ​ໂຮງ­ໝໍ​ມະ­ໂຫ­ສົດ ເມື່ອ​ທ່ານ­ໝໍ​ໄດ້​ກວດ ແລະ ຖາມ​ປະ­ຫວັດ​ຄົນ​ເຈັບ​ແລ້ວ​ຈຶ່ງ​ບົ່ງ­ມະ­ຕິ​ວ່າ: ມີ​ສິ່ງ​ແປກ​ປອມ​ຄາ​ຄໍ​ເດັກ ເພື່ອ​ຄວາມ​ຊັດ​ເຈັນ ທ່ານ­ໝໍ​ໄດ້​ສົ່ງ​ໄປ​ສ່ອງ​ໄຟ­ຟ້າ (X-Ray) ຈຶ່ງ​ປາ­ກົດ​ເຫັນ​ສິ່ງ​ແປກ​ປອມ​ຄາ​ຄໍ​ເດັກ​ແທ້ ເພື່ອ​ຊ່ວຍ​ເດັກ​ໃຫ້​ປອດ​ໄພ ໜ່ວຍ​ງານ​ກໍ່​ໄດ້​ຜ່າ­ຕັດ​ດ່ວນ ແລະ ​ຜ່ານ​ພົ້ນ​ໄປ​ດ້ວຍ​ດີ​ສາ­ມາດ​ເຮັດ​ໃຫ້​ເດັກ​ມີ​ຄວາມ​ປອດ​ໄພ.

ດັ່ງ­ນັ້ນ ຝາກ​ເຖິງ​ພໍ່​ແມ່​ຜູ້​ປົກ­ຄອງ​ເດັກ ຕ້ອງ​ເອົາ­ໃຈ­ໃສ່​ໃນ​ການ​ດູ​ແລ​ລູກ​ຢ່າງ​ໃກ້­ຊິດ ຄວນ​ມ້ຽນ​ມັດ​ເຄື່ອງ​ຂອງ​ທີ່​ຊະ­ຊາຍ​ນຳ​ເຮືອນ ເຄື່ອງ​ຫຼີ້ນ ວັດ­ຖຸ​ອຸ­ປະ­ກອນ ແລະ ເຄື່ອງ­ໃຊ້​ນ້ອຍໆ ຕ້ອງ​ເອົາ​ໄວ້​ໃຫ້​ໄກ​ມື​ເດັກ​ແມ່ນ​ດີ​ທີ່​ສຸດ ໃຫ້​ດູ​ແລ​ລູກ​ໃນ​ເວ­ລາ​ຫຼິ້ນ ອັນ​ໃດ​ສົມ­ຄວນ​ໃຫ້​ຫຼິ້ນ ອັນ​ໃດ​ບໍ່​ສົມ­ຄວນ​ໃຫ້​ຫຼິ້ນ ຖ້າ​ທ່ານ​ປະ​ລູກ​ໃຫ້​ຫຼິ້ນ​ຕາມ​ລຳ­ພັງ​ໃຈ​ໂອ­ກາດ​ທີ່​ຈະ​ມີ​ສິ່ງ​ແປກ​ປອມ​ຄາ​ຄໍ​ເດັກ​ແບບ​ນີ້​ຈະ​ມີ​ຫຼາຍ ເນື່ອງ​ຈາ​ກວ່າ​ເດັກ​ມັກ​ເອົາ​ສິ່ງ​ຂອງ​ທີ່​ຕົນ​ເອງ​ຫຼິ້ນ​ນັ້ນ​ມາ​ອົມ ເດັກ​ອາດ​ກືນ​ຍ້ອນ​ຄິດ​ວ່າ​ເປັນ​ແນວ​ກິນ ອັນ​ເຮັດ​ໃຫ້​ສິ່ງ​ເຫຼົ່າ­ນັ້ນ​ຄາ​ຄໍ​ເດັກ​ໄດ້ ອາດ​ເຮັດ​ໃຫ້​ທ່ານ​ເສຍ​ໃຈ​ຕະ­ຫຼອດ​ຊີ­ວິດ.

ໃນ​ກໍ­ລະ­ນີ​ທີ່​ກືນ​ສິ່ງ​ແປກ​ປອມ ຫຼື ວັດ­ຖຸ​ຕ່າງໆ​ເຂົ້າ​ໃນ​ຄໍ ແລ້ວ​ມີ​ອາ­ການ​ໄອ ຮາກ ຫຼື ມີ​ອາ­ການ​ກ່ຳ​ແຫຼ້​ຫາຍ­ໃຈ​ບໍ່​ໄດ້ ຄວນ​ພາ​ເດັກ​ມາ​ຫາ​ແພດ​ໝໍ​ໄວ​ທີ່​ສຸດ ເພື່ອ​ຮັບ​ການ​ແກ້​ໄຂ​ທີ່​ຖືກ​ວິ­ທີ​ຈາກ​ແພດ​ໝໍ​ທີ່​ມີ​ຄວາມ​ຊຳ­ນານ ເພື່ອ​ກອບ​ກູ້​ເອົາ​ຊີ­ວິດ​ເດັກ​ໃຫ້​ທັນ​ເວ­ລາ.

ຂ່າວທີ່ກ່ຽວຂ້ອງ