ຂ່າວຫຼ້າສຸດ

ນະຄອນຫຼວງ ກຽມຄວາມພ້ອມໃຫ້ແກ່ການຜະລິດລະດູຝົນ

223 29 ມິ.ນ. 2018 ຂ່າວໜ້າ​ໜຶ່ງ
ນະຄອນຫຼວງ ກຽມຄວາມພ້ອມໃຫ້ແກ່ການຜະລິດລະດູຝົນ

ໃນ​ປີ 2018 ເຫັນ​ວ່າ​ສະ­ພາບ​ດິນ​ຟ້າ​ອາ­ກາດ​ໄດ້​ມີ​ການ​ປ່ຽນ­ແປງ​ຝົນ­ຕົກ​ແຕ່​ຫົວ­ປີ ແລະ ທ້າຍ​ປີ​ຝົນ​ອາດ​ຈະ​ບໍ່​ຕົກ​ກໍ່​ເປັນ​ໄປ​ໄດ້ ຖ້າ​ເປັນ​ຄື​ແນວ​ນັ້ນ​ຈະ​ມີ​ຄວາມ​ສ່ຽງ​ຕໍ່​ການ​ຈະ​ເກີດ​ໄພ​ແຫ້ງ­ແລ້ງ​ຕາມ​ມາ ອັນ​ຈະ​ເກີດ​ຜົນ​ກະ­ທົບ​ຕໍ່​ເນື້ອ­ທີ່​ທຳ​ການ​ຜະ­ລິດ ໂດຍ​ສະ­ເພາະ ກໍ່​ແມ່ນ​ເນື້ອ­ທີ່​ການ​ຜະ­ລິດ​ເຂົ້າ­ນາ​ປີ ຖ້າ​ຫາກ​ເກີດ​ຂຶ້ນ​ແນ່­ນອນ​ຜົນ​ຜະ­ລິດ​ຈະ​ບໍ່​ໄດ້​ຮັບ ໝາກ​ຮັບ​ຜົນ​ເທົ່າ​ທີ່​ຄວນ ຕໍ່​ບັນ­ຫາ​ດັ່ງ­ກ່າວ​ນີ້ ນະ­ຄອນ­ຫຼວງ​ວຽງ​ຈັນ ໂດຍ​ສະ­ເພາະ ພະ​ແນກ​ກະ­ສິ­ກຳ ແລະ ປ່າ­ໄມ້​ນະ­ຄອນ­ຫຼວງ​ວຽງ​ຈັນ​ໄດ້​ມີ​ການ​ກະ­ກຽມ​ຄວາມ​ພ້ອມ​ແຕ່​ຫົວ­ທີ​ໃນ​ການ​ຕ້ານ​ແລ້ງ.

ທ່ານ ສາຍ​ຄຳ ແພງ​ຄຳ​ມີ ຫົວ­ໜ້າ​ຂະ­ແໜງ​ຊົນ­ລະ­ປະ­ທານ ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ ໄດ້​ໃຫ້​ສຳ­ພາດ​ເມື່ອ​ບໍ່​ດົນ​ນີ້​ວ່າ: ທົ່ວ​ນະ­ຄອນ­ຫຼວງ​ວຽງ​ຈັນ​ມີ​ລະ­ບົບ​ຊົນ­ລະ­ປະ­ທານ​ທັງ​ໝົດ 86 ແຫ່ງ ໃນ​ນັ້ນ ມີ​ອ່າງ­ເກັບ­ນ້ຳ 10 ແຫ່ງ ຄື: ອ່າງ­ເກັບ­ນ້ຳ​ຊ່ວງ ນ້ຳ​ຫຸມ ຫ້ວຍ​ຊອນ ໜອງ​ຕະ​ເລີ ໜອງ​ເຊືອມ ຫ້ວຍ​ກອກ ອ່າງ­ເກັບ­ນ້ຳ​ບ້ານ​ສົມ​ສະ­ຫວັນ ຫຼັກ 27 ຫ້ວຍ​ແຕນ ຫ້ວຍ​ເຕັນ ແລະ ອ່າງ­ເກັບ­ນ້ຳ​ນາ​ຄັນ​ທຸງ ມີ​ຈັກ­ສູບ­ນ້ຳ​ດ້ວຍ​ໄຟ­ຟ້າ 70 ສະ­ຖາ­ນີ  ລວມ​ຈັກ­ສູບ­ນ້ຳ​ມີ​ທັງ​ໝົດ 181 ເຄື່ອງ  ຝາຍ​ນ້ຳ​ລົ້ນ 5 ແຫ່ງ ຄື: ຫ້ວຍ​ຊາຍ​ຂາວ ຫ້ວຍ​ຊົ້ວ ຫ້ວຍ​ຊອນ 1 ຫ້ວຍ​ຊອນ 2 ຫ້ວຍ​ຄາງ​ບານ (ບ້ານ​ຫົວ​ຂົວ ເມືອງ​ນາ​ຊາຍ​ທອງ) ແລະ ມີ​ປະ­ຕູ​ນ້ຳ​ຊົນ­ລະ­ປະ­ທານ 4 ແຫ່ງ ຄື: ຫ້ວຍ​ຍຸນ ຫ້ວຍ​ຊາຍ​ມູນ 1 ຫ້ວຍ​ຊາຍ​ມູນ 2 ແລະ ຂຸດ​ສາມ​ບາດ ໃນ​ທົ່ວ​ນະ­ຄອນ­ຫຼວງ​ມີ​ເນື້ອ­ທີ່​ທຳ​ການ​ຜະ­ລິດ​ລະ­ດູ­ຝົນ​ທັງ​ໝົດ 52.495 ເຮັກ­ຕາ ໃນ​ນັ້ນ ສະ­ໜອງ​ນ້ຳ​ເຂດ​ຊົນ­ລະ­ປະ­ທານ​ໄດ້ 17.595 ເຮັກ­ຕາ.

ວຽກ​ງານ​ສ້ອມ­ແປງ ແລະ ປ່ຽນ​ຖ່າຍ​ຈັກ­ສູບ­ນ້ຳ​ເພື່ອ​ຕ້ານ​ແລ້ງ​ມີ 27 ໂຄງ­ການ 4 ເຄື່ອງ ຄື: ເມືອງ​ຫາດ​ຊາຍ​ຟອງ​ມີ 6 ໂຄງ­ການ ມູນ​ຄ່າ 864 ລ້ານ​ກີບ ເມືອງ​ໄຊ​ທາ­ນີ ມີ 12 ໂຄງ­ການ ມູນ​ຄ່າ 3,28 ຕື້​ກີບ ເມືອງ​ໄຊ​ເຊດ​ຖາ ມີ 2 ໂຄງ­ການ ມູນ​ຄ່າ 164 ລ້ານ​ກີບ ແລະ ເມືອງ​ປາກ​ງື່ມ​ມີ 7 ໂຄງ­ການ ມູນ​ຄ່າ 617 ລ້ານ​ກີບ ລວມ​ງົບ​ປະ ມານ​ທັງ​ໝົດ 4,93 ຕື້​ກີບ.

ແຜນ​ງົບ­ປະ­ມານ ແລະ ວັດ­ຖຸ​ອຸ­ປະ­ກອນ​ຕ້ານ​ແລ້ງ-ຕ້ານ​ຖ້ວມ ມີ​ຄວາມ​ຕ້ອງ­ການ​ງົບ­ປະ­ມານ​ເພື່ອ​ວຽກ​ສ້ອມ­ແປງ​ປະ­ຕູ​ນ້ຳ​ມີ 2 ເມືອງ ມີ 4 ຈຸດ ຄື: ເມືອງ​ປາກ​ງື່ມ ປະ­ຕູ​ນ້ຳ​ຫ້ວຍ​ໃໝ່​ໝາກ​ນາວ ແລະ ປະ­ຕູ​ນ້ຳ​ຫ້ວຍ​ທ່າ​ໜອງ​ຄັນ ມູນ​ຄ່າ​ສ້ອມ­ແປງ​ທັງ​ໝົດ 21,9 ລ້ານ​ກີບ ແລະ ເມືອງ​ສີ​ໂຄດ​ຕະ­ບອງ ປະ­ຕູ​ນ້ຳ​ຫ້ວຍ​ມີ​ໄຊ ແລະ ປະ­ຕູ​ນ້ຳ​ບ້ານ​ອາ­ກາດ ລວມ​ມູນ​ຄ່າ​ສ້ອມ­ແປງ​ທັງ​ໝົດ 27,8 ລ້ານ​ກີບ.

ນອກ­ຈາກ​ພາກ​ລັດ ກໍ່​ຄື ຂະ­ແໜງ­ການ​ກ່ຽວ­ຂ້ອງ​ໄດ້​ກະ­ກຽມ​ຄວາມ​ພ້ອມ​ດ້ານ​ຕ່າງໆ​ທີ່​ກ່າວ​ມາ​ນີ້​ແລ້ວ ຊາວ​ກະ​ສິ ກອນ​ຜູ້​ທີ່​ທຳ​ການ​ຜະ­ລິດ​ກະ­ສິ­ກຳ​ກໍ່​ໃຫ້​ມີ​ການ​ກະ­ກຽມ​ຕ້ານ​ແລ້ງ​ຊ່ວຍ​ກັນ​ຕື່ມ​ອີກ ເປັນ­ຕົ້ນ ບ່ອນ​ທີ່​ມີ​ເງື່ອນ­ໄຂ​ກໍ່​ໃຫ້​ພາ­ກັນ​ຕັນ​ຫ້ວຍ­ຮ່ອງ​ຄອງ​ບຶງ​ເກັບ​ກັກ​ນ້ຳ​ໄວ້​ໃນ​ລະ­ດູ­ຝົນ ເພື່ອ​ໄປ​ຊົມ­ໃຊ້​ໃນ​ເວ­ລາ​ເກີດ​ມີ​ໄພ​ແຫ້ງ­ແລ້ງ ອັນ​ສຳ­ຄັນ​ໜຶ່ງ​ອີກ​ກໍ່​ໃຫ້​ມີ​ການ​ກະ­ກຽມ​ອຸ­ປະ­ກອນ​ຮັບ​ໃຊ້​ໃນ​ການ​ສູບ​ນ້ຳ​ຈາກ​ຫ້ວຍ­ຮ່ອງ​ຄອງ​ບຶງ ແລະ ໜອງ​ທີ່­ຢູ່​ໃກ້​ຄຽງ​ຂຶ້ນ​ໃສ່​ເນື້ອ­ທີ່​ທຳ​ການ​ຜະ­ລິດ​ຂອງ​ຕົນ ເປັນ­ຕົ້ນ ກໍ່​ແມ່ນ​ຈັກ­ສູບ­ນ້ຳ​ດ້ວຍ​ນ້ຳ­ມັນ ຈັກ​ລົດ​ໄຖ​ນາ​ເດີນ​ຕາມ ແລະ ອື່ນໆ ທັງ​ນີ້ ກໍ່​ເພື່ອ​ຮັບ­ປະ­ກັນ​ບໍ່​ໃຫ້​ເນື້ອ­ທີ່​ປັກ​ດຳ​ເຂົ້າ­ນາ​ປີ ແລະ ການ​ຜະ­ລິດ​ພືດ​ຜັກ​ລະ­ດູ­ຝົນ​ໄດ້​ຮັບ​ຄວາມ​ເສຍ​ຫາຍ​ຈາກ​ໄພ​ແຫ້ງ­ແລ້ງ.

ຂ່າວທີ່ກ່ຽວຂ້ອງ