ຂ່າວຫຼ້າສຸດ

ຜະລິດໃຊ້ພາຍໃນຄອບຄົວ ກາຍເປັນເຈົ້າຂອງໂຮງງານແກະສະຫຼັກຕໍໄມ້

179 29 ມິ.ນ. 2018 ຂ່າວໜ້າ​ໜຶ່ງ
ຜະລິດໃຊ້ພາຍໃນຄອບຄົວ ກາຍເປັນເຈົ້າຂອງໂຮງງານແກະສະຫຼັກຕໍໄມ້

ໂຮງ­ງານ ວໍ­ລະ​ຈິດ ແກະ­ສະ­ຫຼັກ​ຕໍ​ໄມ້ ເປັນ​ທຸ­ລະ​ກິດ​ຂະ­ໜາດ​ນ້ອຍ​ທີ່​ໄດ້​ນຳ​ເອົາ​ໄມ້​ເສດ​ເຫຼືອ​ມາ​ປະ­ດິດ​ເປັນ​ວັດ­ຖຸ​ສິ່ງ​ຂອງ​ໃຊ້​ໃນ​ຊີ­ວິດ​ປະ­ຈຳ​ວັນ ເຊິ່ງ​ໄດ້​ສ້າງ​ມູນ​ຄ່າ​ເພີ່ມ​ໃຫ້​ແກ່​ໄມ້ ແລະ ສ້າງ​ລາຍ​ຮັບ​ເຂົ້າ​ຄອບ­ຄົວ.

ທ້າວ ສັນ­ຕິ ແກ້ວ​ໄຊ​ຍະ​ວົງ ລູກ​ຊາຍ​ເຈົ້າ​ຂອງ​ໂຮງ­ງານ ວໍ­ລະ​ຈິດ ແກະ­ສະ­ຫຼັກ​ຕໍ​ໄມ້​ໃຫ້​ສຳ­ພາດ​ວ່າ: ດ້ວຍ​ຄວາມ​ມັກ​ຮັກ​ກ່ຽວ​ກັບ​ໄມ້ ພໍ່​ຂອງ​ຕົນ​ໄດ້​ນຳ​ເອົາ​ຕໍ​ໄມ້​ຢູ່​ຫົວ​ໄຮ່​ປາຍ​ນາ​ມາ​ແກະ​ເປັນ​ລວ­ດລາຍ ເຮັດ​ເປັນ​ໂຕະ ຕັ່ງ ໃຊ້​ພາຍ​ໃນ​ຄົວ​ເຮືອນ ໝູ່​ເພື່ອນ​ເຫັນ​ວ່າ​ງາມ​ໄດ້​ສົນ­ໃຈ​ຖາມ​ຊື້ ອັນ​ເຮັດ​ໃຫ້​ມີ​ຄວາມ​ຄິດ​ລິ​ເລີ່ມ​ຜະ­ລິດ​ເປັນ​ສິນ­ຄ້າ ພາຍ­ຫຼັງ​ທີ່​ເຮັດ​ແລ້ວ​ໄດ້​ມີ​ລູກ​ຄ້າ​ມາ​ສັ່ງ​ຊື້ ເຊິ່ງ​ໄດ້­ຜົນ​ຕອບ​ຮັບ​ດີ​ສົມ­ຄວນ ຈຶ່ງ​ໄດ້​ມີ​ການ​ພັດ­ທະ­ນາ​ຂຶ້ນ​ເລື້ອຍໆ ເລີ່ມ​ຈາກ​ໜ້ອຍ​ຫາ​ຫຼາຍ ແລະ ໄດ້​ຈ້າງ​ຄົນ​ງານ​ເຂົ້າ​ມາ​ເພີ່ມ ປັດ­ຈຸ­ບັນ​ມີ​ຈຳ­ນວນ​ນາຍ​ຊ່າງ​ທີ່​ເປັນ​ຄົນ​ລາວ​ຈຳ­ນວນ 20 ຄົນ ແນ­ໃສ່​ຜະ­ລິດ​ຕອບ​ສະ­ໜອງ​ໃຫ້​ທັນ​ກັບ​ຄວາມ​ຕ້ອງ­ການ​ຂອງ​ລູກ​ຄ້າ ຈາກ​ນັ້ນ ພັກ-ລັດ­ຖະ­ບານ​ໄດ້​ເຫັນ​ເຖິງ​ຄວາມ​ສຳ­ຄັນ ໂດຍ​ສະ­ເພາະ ແມ່ນ​ຫ້ອງ­ການ​ອຸດ​ສະ­ຫະ​ກຳ ແລະ ການ​ຄ້າ​ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ​ໃຫ້​ຕົນ​ສ້າງ­ຕັ້ງ​ເປັນ​ກຸ່ມ​ຫັດ­ຖະ­ກຳ ບ້ານ​ໄຜ່​ລ້ອມ ເມືອງ​ໄຊ​ທາ­ນີ ໃນ​ປີ 2012 ແລະ ໃນ​ປີ​ດຽວ​ກັນ​ຕົນ​ກໍ່​ໄດ້​ສ້າງ​ເປັນ​ໂຮງ­ງານ ວໍ­ລະ​ຈິດ ແກະ­ສະ­ຫຼັກ​ຕໍ​ໄມ້ ໃນ​ນີ້ ໄດ້​ແກະ­ສະ­ຫຼັກ​ເປັນ​ປະ­ເພດ ໂຕະ​ນ້ຳ​ຊາ-ແຜນ​ນ້ຳ​ຊາ ໂຕະ​ໜ້າ​ພຽງ ພາ​ທາດ​ໃສ່​ໝາກ​ໄມ້ ສະ­ຫຼັກ​ຂວັດ​ລວ­ດລາຍ​ທົ່ວ​ໄປ ແລະ ອື່ນໆ​ຕາມ​ຄວາມ​ຕ້ອງ­ການ​ຂອງ​ລູກ​ຄ້າ ເຊິ່ງ​ມີ​ລາ­ຄາ​ຂາຍ​ແຕ່ 70 ພັນ​ກີບ​ຂຶ້ນ​ໄປ​ຫາ 25 ລ້ານ​ກີບ.

ສຳ­ລັບ​ຜະ­ລິດ​ຕະ​ພັນ​ແກະ­ສະ­ຫຼັກ​ຕໍ​ໄມ້​ໂຮງ­ງານ​ດັ່ງ­ກ່າວ​ແມ່ນ​ຂາຍ​ຢູ່​ເສັ້ນ­ທາງ​ເລກ​ທີ 13 ໃຕ້ ບ້ານ​ໄຜ່​ລ້ອມ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ນອກ​ນັ້ນ ຍັງ​ໄດ້​ເຂົ້າ​ຮ່ວມ​ງານ​ວາງ­ສະ­ແດງ​ຕ່າງໆ​ທີ່​ພັກ-ລັດ­ຖະ­ບານ ກໍ່​ຄື ພາກ­ສ່ວນ​ກ່ຽວ­ຂ້ອງ​ຈັດ​ຂຶ້ນ​ໃນ​ແຕ່​ລະ​ຄັ້ງ.

ຂ່າວທີ່ກ່ຽວຂ້ອງ