ຂ່າວຫຼ້າສຸດ

ຊັອກໂລກ !! ແຊັມເກົ່າເຢຍລະມັນ ພ່າຍແພ້ ສ ເກົາຫຼີ ຫຼົ່ນຕົກຮອບ

336 28 ມິ.ນ. 2018 ວົງຈອນກີລາ
ຊັອກໂລກ !! ແຊັມເກົ່າເຢຍລະມັນ ພ່າຍແພ້ ສ ເກົາຫຼີ ຫຼົ່ນຕົກຮອບ

ການແຂ່ງຂັນເຕະບານໂລກ 2018 ຮອບແບ່ງກຸ່ມຮອບທໍາອິດ ນັດສຸດທ້າຍ ກຸ່ມ F ທີ່ປະເທດຣັດເຊຍ ເມື່ອວັນທີ 27 ມິຖຸນາ ມີລົງສະໜາມແຂ່ງຂັນພ້ອມກັນ 2 ຄູ່ ຖືເປັນນັດຊີ້ຊະຕາຫາທີມເຂົ້າຮອບ ໂດຍເກມຄູ່ທໍາອິດ ເຢຍລະມັນ ທີ່ມີ 3 ຄະແນນ ຈາກ 2 ນັດ ດວນຝີຕີນກັບ ສ ເກົາຫຼີິ ທີ່ພ່າຍແພ້ 2 ນັດຊ້ອນ ຕົກຮອບໄປແລ້ວ ຜົນການແຂ່ງຂັນປາກົດວ່າ ສ ເກົາຫຼີ ພິກລັອກເອົາຊະນະ ເຢຍລະມັນ ໄປໄດ້ຢ່າງສຸດເຫຼືອເຊື່ອ 2-0 ໂດຍໄດ້ປະຕູຈາກ ຄິມ ຢັງ-ວອນ ໄລຍະທົດແທນເວລາບາດເຈັບນາທີ 90+2 ແລະ ຊອນ ເຮືອງ-ມິນ ທົດເຈັບນາທີ 90+6 giafໃຫ້ທີມແຊັມເກົ່າ ເຢຍລະມັນ ມີ 3 ຄະແນນເທົ່າກັບ ສ ເກົາຫຼີ ແຕ່ລູກໄດ້ເສຍ ສ ເກົາຫຼີ ດີກວ່າ ຈຶ່ງເຮັດໃຫ້ ເຢຍລະມັນ ເປັນອັນດັບສຸດທ້າຍຂອງກຸ່ມ ກະເດັນຕົກຮອບທໍາອິດໄປຊະນິດຊັອກກອງເຊຍບານທັງໂລກ ຖືເປັນການຕົກຮອບທໍາອິດຂອງເຕະບານໂລກເປັນຄັ້ງທໍາອິດ ນັບຕັ້ງແຕ່ປີ 1938 ແລະ ເປັນແຊັມເກົ່າທີມທີ 4 ທີ່ຕົກຮອບທໍາອິດໃນບານໂລກຄັ້ງຕໍ່ມາ ຕໍ່ຈາກ ຝຣັ່ງ ທີ່ໄດ້ແຊັມໂລກ 1998 ແຕ່ຕົກຮອບທໍາອິດໃນປີ 2002, ອິຕາລີ ທີ່ໄດ້ແຊັມໂລກ 2006 ແຕ່ຕົກຮອບທໍາອິດ 2010, ແອັດສະປາຍທີ່ໄດ້ແຊັມໂລກ 2010 ແຕ່ຕົກຮອບທໍາອິດປີ 2014 ສ່ວນ ສ ເກົາຫຼີ ໄດ້ອັນດັບທີ 3 ຂອງກຸ່ມ.

          ດ້ານເກມອີກໜຶ່ງຄູ່ ເມັກຊິກ ທີ່ຊະນະມາ 2  ນັດຊ້ອນ ມີ 6 ຄະແນນ ວັດຝີຕີນກັບ ຊູແອັດ ທີ່ມີ 3 ຄະແນນ ຈາກ 2 ນັດ ຜົນການແຂ່ງຂັນປາກົດວ່າ ຊູແອັດ ຊະນະ ເມັກຊິກ ຂາດລອຍ 3-0 ໄດ້ປະຕູຈາກ ລຸດວິກ ອໍກຸສຕິນສັນ ນາທີ 50, ອັນດຣຽສ ກຣານຄວິສ ນາທີ 62 (ຈຸດໂທດ), ເອັດສັນ ອັນວາເຣຊ ເຮັດເຂົ້າປະຕູຕົວເອງ ນາທີ 74 ເຮັດໃຫ້ ຊູແອັດເກັບເພີ່ມເປັນ 6 ຄະແນນເທົ່າກັບ ເມັກຊິກ ແຕ່ລູກໄດ້ເສຍດີກວ່າ ຈຶງເຂົ້າຮອບຕັດເຊືອກຕໍ່ໄປໃນຖານະແຊັມກຸ່ມ ທາງ ເມັກຊິກ ເຂົ້າຮອບໃນຖານະອັນດັບ 2 ຂອງກຸ່ມ.

          ສະຫຼຸບຄະແນນຂອງກຸ່ມ F ຫຼັງເຕະຈົບຮອບທໍາອິດ

           1. ຊູແອັດ ມີ 6 ຄະແນນ ລູກໄດ້ເສຍບວກ 3

           2. ເມັກຊິກ 6 ຄະແນນ ລູກໄດ້ເສຍລົບ 1

           3. ສ ເກົາຫຼີ 3 ຄະແນນ ລູກໄດ້ເສຍບວກ 0

           4. ເຢຍລະມັນ 3 ຄະແນນ ລູກໄດ້ເສຍລົບ 2.

          ສຳລັບໃນຮອບ 16 ທີມສຸດທ້າຍ ຊູແອັດ ຈະໄປຢືນລໍຖ້າພົບກັບທີມອັນດັບ 2 ຂອງກຸ່ມ E ໃນວັນທີ 3 ກໍລະກົດ ຝ່າຍ ເມັກຊິກ ຈະໄປດວນຝີຕີນກັບອັນດັບ 1 ຂອງກຸ່ມ E ວັນທີ 2 ກໍລະກົດນີ້.

ຂ່າວທີ່ກ່ຽວຂ້ອງ