ການ​ພັດທະນາ​ສື່​ສັງຄົມ Online ໃນ​ຍຸກ​ຂອງ​ການ​ນຳ​ໃຊ້​ລະບົບ Digital

207 28 ມິ.ນ. 2018 ຫົວຂໍ້ຂ່າວອື່ນໆ
ການ​ພັດທະນາ​ສື່​ສັງຄົມ Online ໃນ​ຍຸກ​ຂອງ​ການ​ນຳ​ໃຊ້​ລະບົບ Digital

    ເປັນ​ເລື່ອງ​ປົກກະຕິ​ທີ່​ໃນຍຸກ Digital ສື່​ມວນ​ຊົນ​ແມ່ນ​ໄດ້ອາ​ໄສ​ຊ່ອງ​ທາງ​ນີ້ ເພື່ອ​ສ້າງ​ປະສິດທິ​ຜົນ​ໃຫ້​ກັບ​ການ​ນຳ​ສະເໜີ​ຂໍ້ມູນ​ຂ່າວສານ​ໃຫ້​ໄດ້​ຢ່າງທົ່ວ​ເຖິງ ແລະ ມີ​ປະ​ສິດທິ​ຜົນ ດັ່ງນັ້ນ​ສື່​ມວນ​ຊົນ​ຫຼາຍ​ປະເທດແມ່ນ​ໄດ້​ສຸມ​ໃສ່​ທ່າແຮງ​ຂອງ​ຕົນ ເພື່ອພັດທະນາ​ວຽກ​ງານ​ສື່​ໃຫ້​ສອດຄ່ອງ​ກັບ​ການ​ພັດທະນາ​ດັ່ງກ່າວ ເຊັ່ນ​ດຽວ​ກັບ​ສື່​ມວນ​ຊົນ​ໃນ ສປ ຈີນ ທີ່​ໄດ້​ອີງໃສ່​ສະພາບ​ແວດ​ລ້ອມ​ຂອງ​ການ​ພັດທະນາ ໃນ​ການ​ຜະລິດ​ສື່​ອອນ​ລາຍ​ໄດ້​ຢ່າງ​ມີ​ປະ​ສິດທິ​ຜົນ.

     ອີງ​ຕາມ​ບົດ​ສະເໜີ​ຂອງທ່ານ ຈາງ ຣູ​ກູ (Zhuang Ruogu) ບັນນາທິການ​ຂ່າວ ໜັງສືພິມ​ລາຍ​ວັນ​ຢູນ​ນານ ໃນ​ການ​ສຳ​ມະ​ນາ​ພະນັກງານ​ສື່ສານ​ມວນ​ຊົນ-ນັກ​ໜັງສືພິມ​ປະເທດ​ແມ່ນ​ນ້ຳ​ລ້ານ​ຊ້າງ-ແມ່ນ້ຳ​ຂອງ ຄັ້ງ​ທີ 1 ທີ່​ຈັດ​ຂຶ້ນ​ຢູ່​ນິ​ຄອນ​ຄູນ​ໝິງ ແຂວງ​ຢູນ​ນານ ສປ ຈີນ ໃນກາງ​ ເດືອນ​ມິຖຸນາ 2018 ເຊິ່ງ​ມີ​ບາງ​ຕອນ​ໄດ້​ລະບຸ​ວ່າ: ໃນ​ປີ 2017 ປະຊາກອນ​ຈີນ​ປະມານ 772 ລ້ານ​ຄົນ ໄດ້​ນຳ​ໃຊ້​ລະບົບອິນ​ເຕີ​ເນັດ ໃນ​ນັ້ນ 7,53 ລ້ານຄົນ ໃຊ້​ຜ່ານ​ໂທລະສັບ​ມື​ຖື ແລະ 65,5% ຂອງ​ຜູ້​ໃຊ້ອິນເຕີເນັດແມ່ນ​ໃຊ້​ການ​ຊຳລະ​ຄ່າ ໃຊ້​ຈ່າຍ​ຕ່າງໆ​ຜ່ານ Application Alipay ໂດຍ​ບໍ່​ຈຳເປັນ​ຕ້ອງ​ພົກ​ພາ​ເງິນສົດ ສ້າງ​ຄວາມ​ສະດວກ​ສະບາຍ​ໃນ​ການ​ດຳລົງ​ຊີວິດ​ປະຈຳ​ວັນ.

    ຄຽງ​ຄູ່​ກັບ​ການ​ດຳລົງ​ຊີວິດ​ໃນ​ຍຸກ Digital ແມ່ນ​ເປັນ​ສິ່ງ​ທີ່​ທ້າ​ທາຍ ແລະ ໂອກາດ​ອັນ​ດີ​ໃນ​ການ​ພັດທະນາ​ວຽກ​ງານ​ສື່​ຜ່ານ​ລະບົບ​ອິນ​ເຕີ​ເນັດ ເຊິ່ງ​ສິ່ງ​ທ້າ​ທາຍ​ກໍ່​ຄົງ​ແມ່ນ​ການ​ໂຄສະນາ​ຕ່າງໆ ເຊິ່ງ​ຈະ​ສົ່ງ​ຜົນ​ກະທົບ​ຕໍ່​ຍອດ​ພິມ​ຂອງ​ໜັງສືພິມ ສຳລັບ​ໂອກາດ​ກໍ່​ມີ​ຫຼາຍ​ໃນ​ວຽກ​ງານ​ສື່​ມວນ​ຊົນ ນັ້ນ​ກໍ່​ຄື ສື່​ສາມາດ​ເຂົ້າ​ເຖິງ​ຂໍ້​ມູນ​ຂ່າວສານ ສາມາດ​ແລກປ່ຽນ​ຄວາມ​ຄິດ​ເຫັນ​ກັບ​ຜູ້​ບໍ​ລິ​ໂພດ​ຂໍ້​ມູນ​ຂ່າວສານ​ໄດ້​ຢ່າງ​ສະດວກ​ສະບາຍ ແລະ ສ້າງ​ຄວາມ​ສະດວກ​ສະບາຍ​ໃນ​ການ​ນຳ​ສະເໜີ​ກະທູ້​ຕ່າງໆ​ອອກ​ສູ່​ສັງຄົມ​ໄດ້​ງ່າຍ​ຂຶ້ນ​ກ່ອນ​ທີ່​ເຄີຍ​ມີ​ມາ.

    ສຳລັບ​ການ​ພັດທະນາ​ສື່ Online ໃນ ສປ ຈີນ ແມ່ນ​ມີ​ຮູບ​ແບບ​ສະເພາະ ເນື່ອງ​ຈາ​ກວ່າ ໃນ​ຈີນ​ບໍ່​ອະນຸຍາດ​ໃຫ້​ນຳ​ໃຊ້​ສື່​ສັງຄົມ Online ທີ່​ຫຼາຍ​ປະເທດ​ໃນ​ພາກ​ພື້ນ​ໃຊ້​ກັນ​ຢູ່​ທົ່ວ​ໄປ​ເຊັ່ນ: Facebook, Twitter, IG ແລະ ອື່ນໆ​ທີ່​ກ່ຽວ​ພັນ​ກັບ Google ດັ່ງນັ້ນ ສື່​ສັງຄົມ Online ທີ່​ຖືກ​ນຳ​ໃຊ້​ໃນ​ຈີນ ແລະ ເປັນ​ຍອດ​ນິຍົມ​ໃນ​ຈີນແມ່ນ WeChat ແລະ ບໍ່​ສະເພາະ​ໃນ​ຈີນ​ໂດຍ​ອີງ​ຕາມ​ສະ​ຖິຕິ​ເຫັນ​ວ່າມີ​ຜູ້​ຊົມໃຊ້​ໃນ​ທົ່ວ​ໂລກ​ເຖິງ 1 ຕື້​ຄົນ ນອກ ​ນັ້ນ​ກໍ່​ມີ​ສື່​ສັງຄົມທີ່​ຈີນ​ສ້າງຂຶ້ນ​ເອງ​ ທີ່​ລວມ​ໄປ​ເຖິງ Twitter ໃນ​ຮູບ​ແບບ​ຂອງ​ຈີນ ເຊິ່ງສື່​ ຕ່າງໆ​ທີ່​ໄດ້​ລາຍ​ງານ​ມາ​ນັ້ນ​ແມ່ນ​ໄດ້​ຮວບ​ຮວມ​ເອົາ​ຂ້ຳ​ມູນ​ຂ່າວສານ​ ທີ່​ສຳຄັນ ສາລະ​ໜ້າ​ຮູ້ ແລະ ອື່ນໆ ເພື່ອ​ໄວ້​ໃຫ້​ສັງຄົມ​ໄດ້​ບໍລິໂພກ​ຂໍ້​ມູນ​ຂ່າວສານ​ຢ່າງ​ຖືກຕ້ອງ ແລະ ສະດວກ​ສະບາຍ​ຍິ່ງ​ຂຶ້ນ.

    ນອກ​ນັ້ນ​ໃນ​ບົດ​ສະເໜີດັ່ງກ່າວ ຍັງ​ໄດ້​ແນະນຳ​ວິທີ​ການ​ເປັນ​ຜູ້​ລາຍ​ງານ​ຂ່າວ​ຜ່ານລະບົບ Online ຕ້ອງ​ມີ​ຄວາມວ່ອງໄວ ຊັດ​ເຈນ ​ໃນ​ການ​ລາຍ​ງານ​ຂ່າວ ມີ​ຫຼາຍໆ​ທາງ​ເລືອກ ແລະ ຕ້ອງ​ມີ​ທັກ​ສະ​ເພື່ອ​ກ້າວ​ໄປ​ສູ່​ການ​ເປັນ​ຜູ້​ລາຍ​ງານ​ຂ່າວ​ມື​ອາຊີບ ເຊິ່ງ​ສິ່ງ​ດີໆທີ່ຈະ​ຕາມ​ມາ​ແມ່ນ​ການ​ນຳ​ໃຊ້​ບຸຄະລາ​ກອນ​ໜ້ອຍ​ລົງ ມີ​ຫ້ອງ​ປະຈຳການ ແລະ ມີ​ຫຼາຍໆ​ເປົ້າ​ໝາຍ​ທີ່​ຈະ​ຕ້ອງ​ໄດ້​ຈັດ​ຕັ້ງ​ປະຕິບັດ ແຕ່​ສິ່ງ​ທີ່​ຕ້ອງ​ໄດ້​ເຮັດ​ນັ້ນ​ແມ່ນ​ການ​ເປັນ​ຜູ້​ລາຍ​ງານ​ຂ່າວ ພົວພັນ​ເຊື່ອມ​ໂຍງ​ກັບ​ສັງຄົມ​ຫຼາຍ​ຂຶ້ນ ການ​ຖ່າຍຮູບ-ວີ​ດີ​ໂອ ແລະ ດ້ານ​ອອກ​ແບບ​ໃຫ້​ເປັນ​ທີ່​ດຶງ​ດູດ​ຂອງ​ສັງຄົມ.

    ໃນ​ຕອນ​ທ້າຍ​ຂອງ​ບົດ​ສະເໜີ​ຍັງ​ລະບຸ​ວ່າ: ອິນ​ເຕີ​ເນັດ​ສາມາດ​ປ່ຽນ​ໂລກ​ນີ້​ໄດ້ ທຸກ​ຄົນ​ຈະ​ມັກ ຫຼື ບໍ່ ກໍ່​ຂຶ້ນ​ກັບ​ຄວາມ​ມັກ​ຮັກ​ຂອງ​ໃຜລາວ ແຕ່​ໃນ​ວຽກ​ງານ​ສື່​ມວນ​ຊົນ​ແລ້ວ​ແມ່ນ​ມີ​ການ​ປ່ຽນແປງ​ທີ່​ດີ​ຂຶ້ນ ແລະ ເພື່ອ​ເຮັດ​ໃຫ້​ວຽກ​ງານ​ສື່​ມວນ​ຊົນ​ຢູ່​ລອດ​ໃນ​ຍຸກ​ຂອງ Digital ພວກ​ເຮົາ​ເອງ​ຕ້ອງ​ໄດ້​ຮຽນ​ຮູ້​ເພີ່ມ​ເຕີມ ບໍ່​ວ່າ​ຈະ​ເປັນ​ ດ້ານ​ທັກ​ສະ​ໃນ​ການ​ເຮັດ​ວຽກ​ກ່ຽວ​ກັບ​ສື່​ດ້ານ​ນີ້ ເຕັກ​ໂນ​ໂລ​ຊີ ແລະ ອື່ນໆ ໃຫ້​ທັນ​ສະພາບ​ການ​ນີ້​ຖື​ວ່າ​ເປັນ​ໂອກາດ​ອັນ​ດີ​ທີ່​ບໍ່​ເຄີຍ​ມີ​ມາ​ກ່ອນ ດ້ວຍ​ອຸປະກອນ​ທີ່​ພວກ​ເຮົາ​ມີ ຈະ​ເຮັດ​ໃຫ້​ພະນັກງານ​ຂອງ​ພວກ​ເຮົາ ມີ​ໂອກາດ​ໃນ​ການ​ເຂົ້າ​ຮ່ວມໃນ​ການເຄື່ອນ​ໄຫວ​ວຽກ​ງານຂອງນັກ​ໜັງສືພິມ ເພື່ອ​ສ້າງ​ຜະລິດ​ຕະ​ພັນ​ໃຫ້​ສາມາດ​ດຶງ​ດູດ​ສາຍຕາ​ຂອງ​ສັງຄົມ​ຫຼາຍ​ຂຶ້ນ ຜ່ານ​ສິ່ງ​ພວກເຮົາ​ເລືອກ​ທີ່​ຈະ​ໃຊ້​ເຂົ້າ​ໃນ​ການຈັດຕັ້ງ​ປະຕິ​ບັດ​ວຽກ​ງານ.  

ຂ່າວທີ່ກ່ຽວຂ້ອງ