ຂ່າວຫຼ້າສຸດ

ເບີ່ງບ້ານເຂົາເອົາບົດຮຽນ 28/06/2018

117 28 ມິ.ນ. 2018 ຫົວຂໍ້ຂ່າວອື່ນໆ

ໃນ​ບົດ​ນີ້ ທ່ານ​ຜູ້​ອ່ານ​ຈະ​ໄດ້​ຮູ້​ກ່ຽວ​ກັບ​ຄຳ​ຮຽກ­ຮ້ອງ​ຂອງ​ອົງ­ການ ສປຊ ໃຫ້​ທຸກ​ປະ­ເທດ​ໃຊ້​ມາດ​ຕະ­ການ​ປາບ​ປາມ​ບັນ­ຫາ​ຄວາມ​ຮຸນ​ແຮງ​ຕໍ່​ເພດ​ຍິງ ແລະ ເດັກ​ຍິງ ຜ່ານ​ສື່​ສັງ­ຄົມ​ອອນ​ລາຍ   ເລື່ອງ​ຍີ່­ປຸ່ນ​ໂຍະ­ຍານ​ການ​ນຳ​ເຂົ້າ​ແຮງ​ງານ​ຕ່າງ ປະ­ເທດ ແລະ ເລື່ອງ​ພາ­ສີ​ນັກ​ທ່ອງ​ທ່ຽວ​ທີ່​ນິວ​ຊີ​ແລນ (ນູ​ແວນ​ເຊ​ລັງ).

ທີ່ ເຊີ​ແນວ: (ສະ​ວິດ​ເຊີ​ແລນ) ມີ​ຂ່າວ​ອອກ​ມາ​ໃນ​ວັນ​ທີ 20 ເດືອນ​ມິ­ຖຸ­ນາ​ນີ້​ວ່າ ສະ­ພາ​ຄະ­ນະ​ກຳ­ມະ­ການ​ສິດ­ທິ​ມະ­ນຸດ​ຂອງ​ສະ­ຫະ​ປະ­ຊາ​ຊາດ ໄດ້​ຮຽກ­ຮ້ອງ​ໃຫ້​ບັນ­ດາ​ປະ­ເທດ​ໃນ​ທົ່ວ​ໂລກ​ຮີບ​ຮ້ອນ​ສ້າງ​ກົດ­ໝາຍ​ເພື່ອ​ແກ້​ໄຂ​ບັນ­ຫາ​ການ​ໃຊ້​ຄວາມ​ຮຸນ​ແຮງ​ຕໍ່​ເພດ​ຍິງ ໂດຍ​ຜ່ານ​ສື່​ສັງ­ຄົມ​ອອນ​ລາຍ ທ່ານ​ນາງ ດຸ​ບຼັບ​ກາ ຊິ​ໂມ​ໂນ​ວິກ ຜູ້​ຮ່າງ​ບົດ​ລາຍ​ງານ ໄດ້​ເວົ້າ​ວ່າ: ໃນ​ປັດ­ຈຸ­ບັນ ໄດ້​ເກີດ​ມີ​ຮູບ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່­ຍິງ ແລະ ເດັກ​ຍິງ ຜ່ານ​ສື່​ສັງ­ຄົມ​ອອນ​ລາຍ​ໃນ​ເຄືອ​ຄ່າຍ​ອິນ​ເຕີ​ເນັດ ແຕ່​ຫຼາຍໆ​ປະ­ເທດ​ຍັງ​ບໍ່​ຖື​ວ່າ​ເລື່ອງ​ນີ້​ເປັນ​ຮູບ​ການ​ໃຊ້​ຄວາມ​ຮຸນ​ແຮງ ຍ້ອນ​ແນວ​ນີ້​ເອງ ຈຶ່ງ​ບໍ່​ໄດ້​ເອົາ​ມາດ​ຕະ­ການ​ທາງ​ກົດ­ໝາຍ​ເພື່ອ​ຕ້ານ​ປາ­ກົດ­ການ​ຫຍໍ້­ທໍ້​ດັ່ງ­ກ່າວ ທ່ານ​ນາງ ດຸ​ບຼັບ​ກາ ເຕືອນ​ວ່າ ການ​ນຳ​ໃຊ້​ເຕັກ​ໂນ​ໂລ​ຊີ​ຂໍ້​ມູນ​ຂ່າວ­ສານ ໂດຍ​ຂາດ​ພື້ນ­ຖານ​ມາດ​ຕະ ການ​ປົກ​ປ້ອງ​ສິດ­ທິ​ມະ­ນຸດ​ນັ້ນ ຈະ​ຍິ່ງ​ເພີ່ມ​ການ​ຈຳ­ແນກ​ທາງ​ເພດ​ຫຼາຍ​ຂຶ້ນ ຊຶ່ງ​ເປັນ​ຊະ​ນວນ​ສູ່​ການ​ໃຊ້​ຄວາມ​ຮຸນ​ແຮງ​ຕໍ່​ເພດ​ຍິງ ແລະ ເດັກ​ຍິງ ດັ່ງ­ນັ້ນ ທາງ​ພາກ​ລັດ ແລະ ເອ­ກະ​ຊົນ ຄວນ​ປະ­ຕິ­ບັດ​ງານ​ຮ່ວມ​ກັນ ເພື່ອ​ຊ່ວຍ­ເຫຼືອ​ເພດ​ຍິງ​ທີ່​ຕົກ​ເປັນ​ເຫຍື່ອ​ຄວາມ​ຮຸນ​ແຮງ​ຜ່ານ​ສື່​ສັງ­ຄົມ​ອອນ​ລາຍ ດ້ວຍ​ວິ­ທີ​ປາບ​ປາມ​ຮູບ​ການ ໃຊ້​ຄວາມ​ຮຸນ​ແຮງ​ດັ່ງ­ກ່າວ ຂ່າວ​ບອກ​ວ່າ ແມ່­ຍິງ​ທີ່​ສ່ຽງ​ຕົກ​ເປັນ​ເຫຍື່ອ​ການ​ໃຊ້​ຄວາມ​ຮຸນ​ແຮງ​ຜ່ານ​ສື່​ສັງ­ຄົມ ອອນ​ລາຍ​ນັ້ນ ໄດ້­ແກ່​ແມ່­ຍິງ​ນັກ​ເຄື່ອນ​ໄຫວ​ເພື່ອ​ສິດ­ທິ​ມະ­ນຸດ ແມ່­ຍິງ​ທີ່​ເປັນ​ນັກ​ການ­ເມືອງ-ນັກ​ໜັງ­ສື­ພິມ ຜູ້​ມີ​ຄວາມ​ຜິດ​ປົກ­ກະ­ຕິ​ທາງ​ເພດ ຜູ້​ເສຍ​ອົງ­ຄະ ແມ່­ຍິງ​ຊົນ­ເຜົ່າ​ພື້ນ­ເມືອງ ກໍ່​ຄື ແມ່­ຍິງ​ຈາກ​ກຸ່ມ​ສ່ຽງ​ອື່ນໆ.

ທີ່ ຍີ່­ປຸ່ນ: ອີກ​ສອງ​ປີ​ຂ້າງ​ໜ້າ ຄື​ໃນ​ປີ 2020 ຍີ່­ປຸ່ນ ຈະ​ເປັນ​ເຈົ້າ­ພາບ​ງານ​ມະ​ຫະ​ກຳ​ກີ­ລາ​ໂອ ແລັມ​ປິກ ເພື່ອ​ການ​ເປັນ​ເຈົ້າ­ພາບ​ທີ່​ດີ ຍີ່­ປຸ່ນ ໄດ້​ເລີ່ມ​ກະ­ກຽມ​ຢ່າງ​ຄຶກ­ຄັກ ແລະ ຈຶກ​ຈັກ ຮອບ­ດ້ານ ແຕ່​ກໍ່​ພົບ​ກັບ​ບັນ­ຫາ​ຂາດ­ແຄນ​ແຮງ​ງານ ເພາະ​ຄົນ ເກີດ​ມີ​ຈຳ­ນວນ​ໜ້ອຍ​ກວ່າ​ຄົນ​ອາ­ຍຸ​ຍືນ​ຜົມ​ຂາວ ດອກ​ເລົາ​ເຕັມ​ບ້ານ​ເຕັມ​ເມືອງ ການ​ກະ­ກຽມ​ບຸນ​ກີ                                            ລາ​ລະ­ດັບ​ໂລກ​ນີ້ ຮຽກ­ຮ້ອງ​ໃຫ້​ມີ​ການ​ກໍ່­ສ້າງ​ສະ ຖານ​ທີ່​ພັກ​ເຊົາ ແລະ ໃຫ້​ບໍ­ລິ­ການ​ຫຼາຍ​ຂຶ້ນ ຍ້ອນ​ແນວ​ນີ້​ເອງ ລັດ­ຖະ­ບານ​ຍີ່­ປຸ່ນ ຈະ​ຕ້ອງ​ໄດ້​ໂຍະ­ຍານ​ລະ­ບຽບ​ການ​ນຳ​ເຂົ້າ​ແຮງ​ງານ​ຕ່າງ­ປະ­ເທດ​ແຕ່ ໃດໆ​ມາ ຍີ່­ປຸ່ນ ມີ​ຄວາມ​ລະ­ມັດ­ລະ­ວັງ​ສູງ​ເລື່ອງ​ການ​ນຳ​ເຂົ້າ​ແຮງ​ງານ​ຕ່າງ­ປະ­ເທດ ຍ້ອນ​ສັງ­ຄົມ​ມີ ຄວາມ​ກັງ­ວົນ​ວ່າ ແຮງ​ງານ​ຕ່າງ­ປະ­ເທດ​ຈະ​ເປັນ​ໄພ

ຕໍ່​ຄວາມ​ສະ­ຫງົບ​ສຸກ​ໃນ​ສັງ­ຄົມ ຈະ​ຍາດ​ອາ­ຊີບ​ຄົນ ຍີ່­ປຸ່ນ ແລະ ຈະ​ເຮັດ​ໃຫ້​ວັດ­ທະ­ນະ­ທຳ​ຮີດ­ຄອງ​ປະ​ເພ

ນີ​ເກົ່າ​ແກ່​ດັ່ງ​ເດີມ​ຂອງ​ຊາດ​ເສື່ອມ​ເສຍ ແຕ່​ຄວາມ​ກັງ­ວົນ​ດັ່ງ­ກ່າວ​ຜັດ​ຍ່າງ​ສວນ​ທາງ​ກັບ​ຄວາມ​ຈຳ ເປັນ​ອັນ​ຮີບ​ດ່ວນ ດັ່ງ­ນັ້ນ ລັດ­ຖະ­ບານ​ຍີ່­ປຸ່ນ ຈຶ່ງ​ໄດ້​ປະ­ກາດ​ແຜນ​ໂຍະ ຍານ ລະ­ບຽບ​ການ​ຮັບ​ແຮງ​ງານ​ຕ່າງ­ປະ­ເທດ ຊຶ່ງ​ອາດ​ຈະ​ອອກ​ມາ​ໃນ​ຮູບ​ກົດ­ໝາຍ​ພາຍ​ໃນ​ລະ­ດູ​ໃບ​ໄມ້​ຫຼົ່ນ​ປີ​ນີ້ (ໄລ­ຍະ​ໄຕ​ມາດ​ທີ 3 ຂອງ​ປີ) ຄາດ​ວ່າ​ມາດ​ຕະ­ການ​ໂຍະ­ຍານ​ຈະ​ອອກ​ມາ​ໃນ​ຮູບ​ການ​ອະ­ນຸ­ຍາດ​ໃຫ້​ແຮງ​ງານ​ຕ່າງ­ປະ­ເທດ ເຮັດ​ວຽກ​ໄດ້​ຍາວ​ເຖິງ 5 ປີ ໃນ​ຂະ­ແໜງ​ທີ່​ຂາດ­ເຂີນ​ແຮງ​ງານ ເຊັ່ນ: ຂະ­ແໜງ​ກະ­ສິ­ກຳ ກໍ່­ສ້າງ ການ​ບໍ­ລິ­ການ​ໃນ​ໂຮງ­ແຮມ ການ​ບົວ­ລະ­ບັດ​ຜູ້​ອາ­ຍຸ​ສູງ ແລະ ກິດ­ຈະ­ກຳ​ຜະ­ລິດ​ເຮືອ.

ທີ່ ນູ​ແວນ​ເຊ​ລັງ: (ນິວ​ຊີ​ແລນ) ມີ​ຂ່າວ​ວ່າ ນິວ​ຊີ​ແລນ ມີ​ແຜນ​ປະ­ກາດ​ປີ​ທ່ອງ​ທ່ຽວ ນິວ​ຊີ​ແລນ-ຈີນ ໃນ​ກາງ​ປີ 2019 ແລະ ມີ​ແຜນ​ເກັບ​ພາ­ສີ​ນັກ​ທ່ອງ​ທ່ຽວ​ໃນ​ອັດ­ຕາ​ບໍ່​ເກີນ 35 ໂດ​ລາ​ນິວ​ຊີ​ແລນ​ຕໍ່​ຄົນ ຈຳ­ນວນ​ເງິນ​ທີ່​ວ່າ​ນີ້ ລວມ​ທັງ​ພາ­ສີ ແລະ ຄ່າ​ອອກ​ວີ​ຊາ ມາດ​ຕະ­ການ​ເກັບ​ພາ­ສີ​ນີ້​ຈະ​ຍົກ­ເວັ້ນ​ສະ­ເພາະ​ພົນ­ລະ­ເມືອງ ປະ­ເທດ​ອົດ​ສະ​ຕຣາ​ລີ ທີ່​ເຂົ້າ​ໄປ​ທ່ຽວ​ນິວ​ຊີ​ແລນ ເປັນ​ຈຳ­ນວນ​ຫຼາຍ​ກວ່າ​ໝູ່ ຄາດ​ວ່າ­ການ​ເກັບ​ພາ­ສີ​ຈະ​ຊ່ວຍ​ໃຫ້​ລັດ­ຖະ­ບານ​ມີ​ລາຍ​ໄດ້​ເພີ່ມ​ຂຶ້ນ 80 ລ້ານ​ໂດ​ລາ​ນິວ​ຊີ​ແລນ ເພື່ອ​ໃຊ້​ໃນ​ການ​ພັດ­ທະ­ນາ​ໂຄງ​ສ້າງ​ພື້ນ­ຖານ ແລະ ການ​ຕ້ອນ­ຮັບ​ນັກ​ທ່ອງ​ທ່ຽວ.

ຂ່າວທີ່ກ່ຽວຂ້ອງ