ຄະນະພົວພັນຕ່າງປະເທດສູນກາງພັກ ຄົບຮອບ 35 ປີ

305 28 ມິ.ນ. 2018 ຂ່າວໜ້າ​ໜຶ່ງ
ຄະນະພົວພັນຕ່າງປະເທດສູນກາງພັກ ຄົບຮອບ 35 ປີ

ເນື່ອງ​ໃນ​ໂອ­ກາດ​ຄົບ­ຮອບ 35 ປີ ທີ່​ກົມ​ການ­ເມືອງ​ສູນ​ກາງ​ພັກ ປປ ລາວ ອອກ​ມະ­ຕິ​ຕົກ­ລົງ​ວ່າ​ດ້ວຍ​ການ​ແຕ່ງ­ຕັ້ງ ຄະ­ນະ​ນຳ ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ (29 ມິ­ຖຸ­ນາ 1983—29 ມິ­ຖຸ­ນາ 2018) ໃນ​ວັນ​ທີ 27 ມິ­ຖຸ­ນາ 2018 ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ຈັດ​ຕັ້ງ​ພິ­ທີ­ການ​ປາ­ຖະ­ກະ­ຖາ​ເລົ່າ​ມູນ­ເຊື້ອ ຂຶ້ນ​ທີ່​ຫ້ອງ​ປະ­ຊຸມ​ຂອງ​ຕົນ ຫຼັງ​ໃໝ່ (ຫຼັກ 6) ໃຫ້​ກຽດ​ເຂົ້າ​ຮ່ວມ​ໂດຍ​ສະ­ຫາຍ ສົມ​ສະ­ຫວາດ ເລັ່ງ​ສະ​ຫວັດ ທີ່​ປຶກ­ສາ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ອະ­ດີດ​ຮອງ​ນາ­ຍົກ­ລັດ­ຖະ­ມົນ­ຕີ ຫົວ­ໜ້າ​ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ມີ​ສະ­ຫາຍ​ນາງ ສູນ​ທອນ ໄຊ​ຍະ​ຈັກ ກຳ­ມະ­ການ​ສູນ​ກາງ​ພັກ ຫົວ­ໜ້າ​ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ພ້ອມ​ດ້ວຍ​ບັນ­ດາ​ຕາງ­ໜ້າ​ຄະ­ນະ​ສູນ​ກາງ​ພັກ ກະ­ຊວງ ອົງ​ການ­ຈັດ­ຕັ້ງ​ມະ­ຫາ­ຊົນ ອົງ­ການ​ມິດ­ຕະ­ພາບ ສັນ­ຕິ­ພາບ ແລະ ພະ­ນັກ­ງານ​ຫຼັກ​ແຫຼ່ງ.

ສະ­ຫາຍ​ນາງ ສູນ​ທອນ ໄຊ​ຍະ​ຈັກ ຂຶ້ນ​ມີ​ຄຳ​ເຫັນ​ໂດຍ​ຫຍໍ້​ກ່ຽວ​ກັບ​ຄວາມ​ເປັນ​ມາ​ຂອງ​ຄະ­ນະ​ພົວ­ພັນ​ຕ່າງ­ປະ­ເທດ ຍົກ​ໃຫ້​ເຫັນ​ບັນ­ດາ​ຜົນ­ສຳ­ເລັດ​ທີ່​ສຳ­ຄັນ​ໃນ​ການ­ເຄື່ອນ­ໄຫວ​ຂອງ​ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ພ້ອມ​ທັງ​ຊີ້​ໃຫ້​ເຫັນ​ບັນ­ດາ​ດ້ານ​ທີ່​ຈະ​ຕ້ອງ​ໄດ້​ສືບ­ຕໍ່​ປັບ­ປຸງ​ແກ້​ໄຂ​ເພື່ອ​ເຮັດ​ໃຫ້​ສຳ­ເລັດ​ໜ້າ­ທີ່​ການ­ເມືອງ​ໃນ​ໄລ­ຍະ​ໃໝ່​ຂອງ​ຕົນ.

ຫຼັງ​ຈາກ​ນັ້ນ ສະ­ຫາຍ ສົມ​ສະ­ຫວາດ ເລັ່ງ​ສະ​ຫວັດ ໄດ້​ໃຫ້​ກຽດ​ມີ​ຄຳ​ເຫັນ​ໂອ້​ລົມ​ມູນ­ເຊື້ອ​ອັນ​ດີ­ງາມ ບັນ­ດາ​ຜົນ­ງານ​ຂອງ​ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ໄດ້​ສະ­ແດງ​ຊົມ­ເຊີຍ​ຕໍ່​ຄວາມ​ພະ­ຍາ­ຍາມ ແລະ ຄວາມ​ບຸກ​ບືນ​ຂອງ​ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ​ໃນ​ການ​ປະ­ຕິ­ບັດ​ໜ້າ­ທີ່​ຂອງ​ຕົນ ເຊິ່ງ​ເປັນ​ການ​ປະ­ກອບ­ສ່ວນ​ສຳ­ຄັນ​ເຂົ້າ​ໃນ​ວຽກ​ງານ​ການ­ເຄື່ອນ­ໄຫວ​ຕ່າງ­ປະ­ເທດ ຂອງ​ພັກ ແລະ ລັດ ສະ­ຫາຍ​ຍັງ​ໄດ້​ໃຫ້­ການ​ຊີ້​ນຳ​ຢ່າງ​ກົງ​ໄປ​ກົງ​ມາ​ໃນ​ການ​ປະ­ຕິ­ບັດ​ໜ້າ­ທີ່​ການ­ເມືອງ​ຂອງ​ພະ­ນັກ­ງານ ເພື່ອ​ເຮັດ​ຫຼ້ອນ​ໜ້າ­ທີ່​ເປັນ​ເສ­ນາ​ທິ​ການ​ໃຫ້​ສູນ​ກາງ​ພັກ​ໃນ­ຕໍ່­ໜ້າ ໂດຍ​ສະ­ເພາະ ແມ່ນ​ພະ­ນັກ­ງານ​ໜຸ່ມ​ທີ່​ເປັນ​ຜູ້​ສືບ​ທອດ​ມູນ­ເຊື້ອ​ຂອງ​ຄະ­ນະ​ພົວ­ພັນ​ຕ່າງ­ປະ­ເທດ ຈະ​ຕ້ອງ​ໄດ້​ກຳ​ແໜ້ນ​ຍຸດ​ທະ​ສາດ ແລະ ແນວ­ທາງ​ການ​ຕ່າງ­ປະ­ເທດ​ຂອງ​ພັກ-ລັດ​ເຮົາ ແລະ ຮູ້​ໝູນ​ໃຊ້​ຢ່າງ​ມີ​ຫົວ­ຄິດ​ປະ­ດິດ​ສ້າງ ເພື່ອ​ນຳ​ເອົາ​ຜົນ​ປະ­ໂຫຍດ​ມາ​ໃຫ້​ແກ່​ປະ­ເທດ​ຊາດ​ນັບ​ມື້​ນັບ​ຫຼາຍ.

ການ​ເລົ່າ​ມູນ­ເຊື້ອ​ຄັ້ງ​ນີ້​ແມ່ນ​ເປັນ​ຄັ້ງ​ທຳ​ອິດ ເຊິ່ງ​ເປັນ​ໂອ­ກາດ​ທີ່​ດີ​ໃຫ້​ແກ່​ຜູ້​ທີ່​ມີ​ຄວາມ​ສົນ­ໃຈ​ສາ­ມາດ​ຮັບ​ຮູ້​ໄດ້​ເຖິງ​ມູນ­ເຊື້ອ​ແຫ່ງ​ການ​ເຕີບ​ໃຫຍ່​ຂະ­ຫຍາຍ­ຕົວ ຂອງ​ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ໃນ​ຖາ­ນະ​ເປັນ​ໜຶ່ງ​ໃນ​ອົງ­ການ​ທີ່​ເປັນ​ເສ­ນາ​ທິ​ການ​ໃຫ້​ແກ່​ສູນ​ກາງ​ພັກ​ໃນ​ການ­ເຄື່ອນ­ໄຫວ​ຕ່າງ­ປະ­ເທດ.

ໃນ​ການ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ ຄົບ­ຮອບ 35 ປີ​ນີ້ ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ຈັດ​ມີ​ບັນ­ດາ​ກິດ­ຈະ­ກຳ​ຕ່າງໆ ເຊັ່ນ: ຈັດ­ການ​ແຂ່ງ­ຂັນ ຖາມ-ຕອບ ກ່ຽວ​ກັບ​ມູນ­ເຊື້ອ ປະ­ຫວັດ​ຄວາມ​ເປັນ​ມາ ແລະ ບາດ­ກ້າວ​ຂະ­ຫຍາຍ­ຕົວ​ຂອງ​ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ໂດຍ​ມີ​ບັນ­ດາ​ພະ­ນັກ­ງານ​ຂັ້ນ​ຕ່າງໆ ໃນ​ຄະ­ນະ​ພົວ­ພັນ​ຕ່າງ­ປະ­ເທດ​ເຂົ້າ​ຮ່ວມ ຈັດ​ຂະ​ບວນ​ບໍ­ລິ­ຈາກ​ເລືອດ ຈັດ​ຕັ້ງ​ການ​ແຂ່ງ­ຂັນ​ກີ­ລາ​ກັບ​ບັນ­ດາ​ຂະ­ແໜງ­ການ​ອື່ນໆ​ຕື່ມ​ອີກ.

ຂ່າວທີ່ກ່ຽວຂ້ອງ