ຂ່າວຫຼ້າສຸດ

ປັບປຸງວຽກປະກັນສັງຄົມ ເພື່ອຄວາມສອດຄ່ອງໃນການພັດທະນາ

203 28 ມິ.ນ. 2018 ຂ່າວໜ້າ​ໜຶ່ງ
ປັບປຸງວຽກປະກັນສັງຄົມ ເພື່ອຄວາມສອດຄ່ອງໃນການພັດທະນາ

ການ​ປະ­ກອບ​ຄຳ​ຄິດ​ຄຳ​ເຫັນ​ໃສ່​ຮ່າງ​ກົດ­ໝາຍ ວ່າ​ດ້ວຍ​ປະ­ກັນ​ສັງ­ຄົມ ບັນ­ດາ ສສຊ ໄດ້​ສຸມ​ໃສ່​ພິ­ຈາ­ລະ­ນາ ປະ­ກອບ​ຄຳ​ຄິດ​ຄຳ​ເຫັນ ດ້ວຍ​ຄວາມ​ຮັບ­ຜິດ­ຊອບ​ສູງ ໃນ​ແຕ່​ລະ​ພາກ ໝວດ ແລະ ມາດ­ຕາ ໂດຍ​ສະ­ເພາະ ສະ­ເໜີ​ໃຫ້​ມີ​ການ​ປັບ​ຄືນ​ບາງ​ເນື້ອ​ໃນ ແລະ ບາງ​ມາດ­ຕາ ເປັນ­ຕົ້ນ ແມ່ນ​ທາງ​ດ້ານ​ໂຄງ​ສ້າງ ເນື້ອ​ໃນ​ຕົ້ນ­ຕໍ​ຂອງ​ກົດ­ໝາຍ ເນື້ອ​ໃນ​ຂອງ​ບັນ­ດາ​ນິ­ຕິ​ກຳ​ລຸ່ມ​ກົດ­ໝາຍ ເປົ້າ​ໝາຍ​ຮັບ​ການ​ອຸດ​ໜູນ​ປະ­ກັນ​ສັງ­ຄົມ ການ​ກຳ­ນົດ​ອັດ­ຕາ​ສ່ວນ​ຮ້ອຍ​ອຸດ​ໜູນ​ບຳ­ນານ​ຂອງ​ຜູ້​ທີ່​ສັງ­ກັດ​ລັດ ການ​ອຸດ​ໜູນ​ຜູ້​ດູ​ແລ ການ​ກຳ­ນົດ​ໃຫ້​ອົງ­ການ​ປະ­ກັນ​ສັງ­ຄົມ​ແຫ່ງ​ຊາດ ເປັນ​ຫົວ­ໜ່ວຍ​ການ​ເງິນ​ມີ​ສາ­ລະ­ບານ​ບັນ­ຊີ​ຕ່າງ­ຫາກ ປັບ­ປຸງ​ລະ­ດັບ​ການ​ອຸດ​ໝູນ​ປະ­ກັນ​ສັງ­ຄົມ​ບາງ​ປະ­ເພດ ເພື່ອ​ໃຫ້​ສອດ­ຄ່ອງ​ກັບ​ແນວ­ທາງ ນະ­ໂຍ­ບາຍ​ຂອງ​ພັກ-ລັດ­ຖະ­ບານ ໃນ​ແຕ່​ລະ​ໄລ­ຍະ ແລະ ສອດ­ຄ່ອງ​ກັບ​ມາດ­ຕະ­ຖານ​ສາ­ກົນ​ໃນ​ການ​ຄຸ້ມ​ຄອງ​ວຽກ​ງານ​ການ​ປະ­ກັນ​ສັງ­ຄົມ ເພື່ອ​ໃຫ້​ມີ​ເນື້ອ​ໃນ​ຄົບ​ຖ້ວນ ຮັດ­ກຸມ ຊັດ​ເຈນ ແລະ ແທດ­ເໝາະ​ກັບ​ສະ­ພາບ​ຕົວ​ຈິງ​ໃນ​ປັດ­ຈຸ­ບັນ.

ສະ­ພາ​ແຫ່ງ​ຊາດ​ໄດ້​ຮັບ­ຮອງ ກົດ­ໝາຍ​ວ່າ​ດ້ວຍ​ປະ­ກັນ​ສັງ­ຄົມ ພາຍ­ຫຼັງ​ບັນ­ດາ​ສະ­ມາ­ຊິກ​ສະ­ພາ​ແຫ່ງ​ຊາດ ສສຊ ໄດ້​ສຳ­ເລັດ​ການ​ປະ­ກອບ​ຄຳ​ຄິດ​ຄຳ​ເຫັນ​ຢ່າງ​ກົງ​ໄປ​ກົງ​ມາ ພ້ອມ​ທັງ​ໄດ້​ລົງ​ເລິກ​ໃນ​ຫຼາຍ​ພາກ ຫຼາຍ​ໝວດ ແລະ ຫຼາຍ​ມາດ­ຕາ ຕະ­ຫຼອດ​ໜຶ່ງ​ວັນ​ເຮັດ​ໃຫ້​ຮ່າງ​ກົດ­ໝາຍ​ສະ­ບັບ​ນີ້ ມີ​ເນື້ອ​ໃນ​ຄົບ​ຖ້ວນ ສົມ­ບູນ ແລະ ຈະ­ແຈ້ງ​ຍິ່ງ​ຂຶ້ນ ເຊິ່ງ​ບັນ­ດາ ສສຊ ສາ­ມາດ​ຮັບ­ຮອງ​ເອົາ​ໃນ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 5 ຂອງ​ສະ­ພາ​ແຫ່ງ​ຊາດ​ຊຸດ​ທີ VIII ໃນ​ວັນ​ທີ 27 ມິ­ຖຸ­ນາ 2018 ດ້ວຍ​ຄະ­ແນນ​ເຫັນ​ດີ​ເປັນ​ສ່ວນ​ຫຼາຍ ພາຍ​ໃຕ້​ການ​ເປັນ​ປະ­ທານ​ຂອງ​ທ່ານ ບຸນ​ປອນ ບຸດ​ຕະ​ນະ​ວົງ ຮອງ​ປະ­ທານ​ສະ­ພາ​ແຫ່ງ​ຊາດ.

ທ່ານ  ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ໄດ້​ກ່າວ​ວ່າ: ຮ່າງ​ກົດ­ໝາຍ​ວ່າ​ດ້ວຍ​ປະ­ກັນ​ສັງ­ຄົມ ສະ­ບັບ​ປັບ­ປຸງ ປະ­ກອບ​ມີ 12 ພາກ 27 ໝວດ ແລະ 123 ມາດ­ຕາ ພາຍ­ຫຼັງ​ທີ່​ກົດ­ໝາຍ​ວ່າ​ດ້ວຍ​ປະ­ກັນ​ສັງ­ຄົມ ໄດ້​ຖືກ​ຮັບ­ຮອງ ແລະ ປະ­ກາດ​ໃຊ້​ແລ້ວ ຈະ​ເປັນ​ບ່ອນ​ອີງ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ 5 ປີ ຄັ້ງ​ທີ VIII ກໍ່​ຄື ແຜນ​ພັດ­ທະ­ນາ​ວຽກ​ງານ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ 5 ປີ ຄັ້ງ​ທີ IV ພັດ­ທະ­ນາ​ລະ­ບົບ​ປະ­ກັນ​ສັງ­ຄົມ​ແຫ່ງ​ຊາດ ໃຫ້​ມີ​ຄວາມ​ເຂັ້ມ­ແຂງ ແລະ ຄ່ອງ​ຕົວ ມີ​ກົນ​ໄກ ລະ­ບອບ ລະ­ບຽບ ການ​ຄຸ້ມ​ຄອງ​ບໍ­ລິ­ຫານ​ວຽກ​ງານ​ປະ­ກັນ​ສັງ­ຄົມ ໃຫ້​ໄດ້​ຮັບ​ການ​ປັບ­ປຸງ ມີ​ຄວາມ​ເຂັ້ມ­ແຂງ ມີ​ລັກ­ສະ­ນະ​ລວມ​ສູນ ເປັນ​ເອ­ກະ​ພາບ ມີ​ປະ­ສິດ­ທິ­ພາບ ແລະ ຮັບ­ປະ­ກັນ​ການ​ສະ­ເລ່ຍ​ຄວາມ​ສ່ຽງ ຕາມ​ຫຼັກ­ການ​ປະ­ກັນ​ສັງ­ຄົມ ດ້ວຍ​ການ​ຫັນ​ເປັນ​ທັນ​ສະ­ໄໝ ແລະ ຮັບ­ປະ­ກັນ​ຄວາມ​ວ່ອງ­ໄວ ໂປ່ງ​ໃສ ຍຸ­ຕິ​ທຳ ແລະ ຍືນ​ຍົງ.

ຂ່າວທີ່ກ່ຽວຂ້ອງ