ລາວ-ຫວຽດນາມ ຫາລືການຮ່ວມມືວຽກງານຊາຍແດນ

400 28 ມິ.ນ. 2018 ຂ່າວໜ້າ​ໜຶ່ງ

ໂດຍ​ປະ­ຕິ­ບັດ​ຕາມ​ເນື້ອ​ໃນ​ບົດ​ບັນ­ທຶກ​ກອງ​ປະ­ຊຸມ​ສາ­ມັນ  ປະ­ຈຳ​ປີ ຄັ້ງ​ທີ 27  ຂອງ​ຄະ­ນະ​ຜູ້​ແທນ​ຊາຍ​ແດນ ລາວ-ຫວຽດ­ນາມ  ສະ­ບັບ​ວັນ​ທີ 09 ທັນ­ວາ 2017  ທີ່​ນະ­ຄອນ­ຫຼວງ​ຮ່າ​ໂນ້ຍ ສາ­ທາ­ລະ­ນະ​ລັດ  ສັງ­ຄົມ​ນິ­ຍົມ​ຫວຽດ ນາມ ໃນ​ວັນ​ທີ 24 ມິ­ຖຸ­ນາ 2018  ຄະ­ນະ​ວິ­ຊາ​ການ​ປະ­ສົມ​ຊາຍ​ແດນ ລາວ-ຫວຽດ­ນາມ  ໄດ້​ຈັດ​ກອງ​ປະ­ຊຸມ​ປຶກ­ສາ​ຫາ­ລື​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ເນື້ອ​ໃນ​ບົດ​ບັນ­ທຶກ​ກອງ​ປະ­ຊຸມ​ດັ່ງ­ກ່າວ  ຮ່ວມ​ກັນ​ຂຶ້ນ​ທີ່​ເມືອງ​ອາ​ເລື່ອຍ  ແຂວງ​ເທື່ອ​ທຽນ​ເຫວ້ ສສ ຫວຽດ­ນາມ  ເຊິ່ງ​ຝ່າຍ​ລາວ ນຳ​ໂດຍ​ທ່ານ ແສງ​ເພັດ  ຮຸ່ງ​ບຸນ​ຍວງ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ  ແຫ່ງ ສປປ ລາວ  ແລະ ຝ່າຍ ຫວຽດ­ນາມ ນຳ​ໂດຍ​ທ່ານ ເລ ຮວາຍ ຈຸງ   ຮອງ​ລັດ­ຖະ­ມົນ­ຕີ ກະ ຊວງ​ການ​ຕ່າງ­ປະ­ເທດ ແຫ່ງ ສສ ຫວຽດ­ນາມ.

ກອງ​ປະ­ຊຸມ​ຄັ້ງ​ນີ້ ສອງ​ຝ່າຍ​ໄດ້​ພ້ອມ​ກັນ​ສັງ­ເກດ​ຕີ​ລາ­ຄາ​ຄືນ ຜົນ​ຂອງ​ການ­ຈັດ­ຕັ້ງ​ປະ­ຕິ­ບັດ​ສັນ­ຍາ  ວ່າ​ດ້ວຍ​ລະ ບຽບ​ການ​ຄຸ້ມ​ຄອງ​ຊາຍ​ແດນ ແລະ ດ່ານ​ຊາຍ​ແດນ​ປະ­ເທດ ລາວ-ຫວຽດ­ນາມ  ແລະ ອະ­ນຸ​ສັນ­ຍາ ວ່າ​ດ້ວຍ​ເສັ້ນ​ຊາຍ​ແດນ ແລະ ຫຼັກ​ໝາຍ​ຊາຍ​ແດນ  ປະ­ເທດ ລາວ-ຫວຽດ­ນາມ ສະ­ບັບ​ລົງ​ວັນ​ທີ 16 ມີ­ນາ  2016 ການ­ຈັດ­ຕັ້ງ​ປະ­ຕິ­ບັດ ການ​ທົດ​ລອງ​ການ​ກວດ­ກາ “ປະ­ຕູ​ດຽວ ຄັ້ງ​ດຽວ” ຢູ່​ຄູ່​ດ່ານ​ແດນ​ສະ­ຫວັນ (ແຂວງ​ສະ­ຫວັນ​ນະ​ເຂດ)-ລາວ​ບາວ (ແຂວງ​ກວາງ​ຈິ) ໃນ​ໄລ­ຍະ 3 ປີ­ຜ່ານ­ມາ  ສະ­ຫຼຸບ​ຕີ​ລາ­ຄາ​ຄືນ ຜົນ​ການ​ລົງ​ສຳ​ຫຼວດ ດ່ານ​ຊາຍ​ແດນ ລາວ-ຫວຽດ­ນາມ ໃນ 03 ໄລ­ຍະ​ທີ່​ຜ່ານ​ມາ ເພື່ອ​ກະ­ກຽມ​ໃຫ້​ແກ່​ການ​ສ້າງ​ແຜນ​ແມ່​ບົດ  ພັດ­ທະ­ນາ​ລະ­ບົບ​ດ່ານ​ຊາຍ​ແດນ  ແຕ່​ນີ້​ຮອດ​ປີ 2025 ແລະ ວິ­ໄສ​ທັດ​ຮອດ​ປີ 2035  ແລະ ການ­ຈັດ­ຕັ້ງ​ປະ­ຕິ­ບັດ​ຂໍ້​ຕົກ­ລົງ​ລັດ­ຖະ­ບານ  ແຫ່ງ ສາ­ທາ­ລະ­ນະ​ລັດ ປະ­ຊາ­ທິ­ປະ­ໄຕ ປະ­ຊາ­ຊົນ​ລາວ  ແລະ ລັດ­ຖະ­ບານ ແຫ່ງ ສາ­ທາ­ລະ­ນະ​ລັດ ສັງ­ຄົມ​ນິ­ຍົມ ຫວຽດ­ນາມ  ວ່າ​ດ້ວຍ​ການ​ແກ້​ໄຂ​ບັນ­ຫາ​ຜູ້​ຍົກ­ຍ້າຍ  ຕັ້ງ​ພູມ­ລຳ­ເນົາ​ຕາມ​ລຳ­ພັງ​ໃຈ ແລະ ສ້າງ​ຄອບ­ຄົວ​ບໍ່​ຖືກ​ລະ­ບຽບ  ຢູ່​ຕາມ​ບໍ­ລິ­ເວນ​ຊາຍ​ແດນ​ຂອງ​ສອງ​ປະ­ເທດ.

ກອງ​ປະ­ຊຸມ​ຄັ້ງ​ນີ້ ໄດ້​ດຳ­ເນີນ​ໄປ​ດ້ວຍ​ບັນ­ຍາ­ກາດ ຄວາມ​ເຂົ້າ​ອົກ​ເຂົ້າ­ໃຈ ຢ່າງ​ມີ​ໄມ­ຕີ​ຈິດ​ມິດ­ຕະ­ພາບ ບົນ​ພື້ນ­ຖານ​ຄວາມ​ສາ­ມັກ­ຄີ​ແບບ​ພິ­ເສດ ແລະ ການ​ຮ່ວມ​ມື​ຮອບ­ດ້ານ  ລະ­ຫວ່າງ ສອງ​ພັກ ສອງ​ລັດ ແລະ ປະ­ຊາ­ຊົນ​ສອງ​ຊາດ  ລາວ-ຫວຽດ­ນາມ ແລະ ເປັນ​ການ​ປະ­ກອບ­ສ່ວນ​ອັນ​ສຳ­ຄັນ​ໃນ​ການ​ພັດ­ທະ­ນາ​ບໍ­ລິ­ເວນ​ຊາຍ​ແດນ​ຂອງ​ສອງ​ປະ­ເທດ​ໃຫ້​ກາຍ­ເປັນ​ຊາຍ​ແດນ ແຫ່ງ​ສັນ­ຕິ­ພາບ  ມິດ­ຕະ­ພາບ ແລະ ການ​ຮ່ວມ​ມື​ຍາວ​ນານ.

ຂ່າວທີ່ກ່ຽວຂ້ອງ