ຂ່າວຫຼ້າສຸດ

ພັດທະນາວິສາຫະກິດຂະໜາດນ້ອຍ ແລະ ກາງ ເຕີບໃຫຍ່ເຂັ້ມແຂງ

178 28 ມິ.ນ. 2018 ຂ່າວໜ້າ​ໜຶ່ງ
ພັດທະນາວິສາຫະກິດຂະໜາດນ້ອຍ ແລະ ກາງ ເຕີບໃຫຍ່ເຂັ້ມແຂງ

ການ​ສຳ​ມະ​ນາ​ວັນ​ຈຸນ​ລະ­ວິ​ສາ​ຫະ​ກິດ ວິ​ສາ​ຫະ​ກິດ​ຂະ­ໜາດ​ນ້ອຍ ແລະ ກາງ (ຈວນ​ກ) ແລະ ເຜີຍ­ແຜ່​ຜັນ​ຂະ­ຫຍາຍ​ແຜນ​ພັດ­ທະ­ນາ​ວິ​ສາ​ຫະ​ກິດ​ຂະ­ໜາດ​ນ້ອຍ ແລະ ກາງ 2016-2020 ໄດ້​ຈັດ​ຂຶ້ນ​ວັນ​ທີ 27 ມິ­ຖຸ­ນາ 2018 ທີ່ ລາວ​ພລາ​ຊາ ນະ­ຄອນ­ຫຼວງ​ວຽງ​ຈັນ ເປັນ​ປະ­ທານ​ຂອງ​ທ່ານ​ນາງ ເຂັມ​ມະ­ນີ ພົນ​ເສ­ນາ ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ມີ​ທ່ານ Christian OLK ເອກ​ອັກ​ຄະ​ລັດ​ຖະ​ທູດ​ເຢຍ​ລະ​ມັນ ປະ­ຈຳ​ລາວ ຜູ້­ຕາງ­ໜ້າ​ຈາກ​ທະ­ນາ­ຄານ​ໂລກ ຫົວ­ໜ້າ​ກົມ ຮອງ​ກົມ ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ພະ­ນັກ­ງານ​ຈາກ​ພາກ​ລັດ ສະ​ຖາ​ບັນ​ການ​ສຶກ​ສາ ຫົວ­ໜ່ວຍ​ທຸ­ລະ​ກິດ​ຂະ­ໜາດ​ນ້ອຍ-ກາງ ແລະ ອົງ​ການ­ຈັດ­ຕັ້ງ​ສາ­ກົນ​ເຂົ້າ​ຮ່ວມ.

ເພື່ອ​ເປັນ​ການ​ສະ­ເຫຼີມ­ສະ­ຫຼອງ ຈວນ​ກ ສາ­ກົນ ສຳ­ລັບ​ປີ 2018 ເຊິ່ງ​ເນັ້ນ​ໃສ່​ຫົວ­ຂໍ້ ຊາວ​ໜຸ່ມ​ແຫ່ງ​ຍຸກ​ສະ­ໄໝ ແລະ ເພື່ອ​ເຜີຍ­ແຜ່​ຜັນ​ຂະ­ຫຍາຍ​ແຜນ​ພັດ­ທະ­ນາ​ວິ​ສາ​ຫະ​ກິດ​ຂະ­ໜາດ​ນ້ອຍ ແລະ ກາງ 2016-2020 ໃຫ້​ທຸກ​ຄົນ​ຮັບ​ຊາບ​ຢ່າງ​ທົ່ວ​ເຖິງ ພ້ອມ​ກັນ​ຈັດ​ຕັ້ງ​ປະ­ຕິ­ບັດ​ວຽກ​ງານ​ສົ່ງ­ເສີມ ຈວນ​ກ ໃຫ້​ເປັນ​ໄປ​ຕາມ​ທິດ​ທາງ​ທີ່​ພັກ ແລະ ລັດ­ຖະ­ບານ​ວາງ​ອອກ  ພ້ອມ​ນັ້ນ ບັນ­ດາ​ຜູ້​ເຂົ້າ​ຮ່ວມ​ຍັງ​ໄດ້​ຮັບ​ຟັງ​ການ​ນຳ​ສະ­ເໜີ​ແຜນ​ພັດ­ທະ­ນາ​ວິ​ສາ​ຫະ​ກິດ​ຂະ   ໜາດ​ນ້ອຍ ແລະ ກາງ 2016-2020 ບົດ­ຮຽນ​ການ​ເຜີຍ­ແຜ່​ແຜນ​ພັດ­ທະ­ນາ​ວິ​ສາ​ຫະ​ກິດ​ຂະ­ໜາດ​ນ້ອຍ ແລະ ກາງ​ຢູ່​ສາມ​ພາກ (ກາງ ເໜືອ ໃຕ້) ການ​ມີ​ສ່ວນ​ຮ່ວມ​ຂອງ​ພາກ​ເອ­ກະ​ຊົນ​ໃນ​ການ​ສົ່ງ­ເສີມ​ວິ​ສາ​ຫະ​ກິດ​ຂະ­ໜາດ​ນ້ອຍ ແລະ ກາງ ບົດ­ບາດ​ຂອງ​ພາກ​ລັດ​ກ່ຽວ­ຂ້ອງ ເຊັ່ນ: ຂະ­ແໜງ​ກະ­ສິ­ກຳ ແລະ ປ່າ­ໄມ້ ທະ­ນາ­ຄານ ການ​ເງິນ ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ສຶກ​ສາ​ທິ​ການ ແລະ ກີ­ລາ ອຸດ­ສາ­ຫະ­ກຳ ແລະ ການ​ຄ້າ ໃນ​ການ​ສົ່ງ­ເສີມ ແລະ ພັດ­ທະ­ນາ​ວິ​ສາ​ຫະ​ກິດ​ຂະ­ໜາດ​ນ້ອຍ ແລະ ກາງ ນອກ​ນັ້ນ ຍັງ​ໄດ້​ເປີດ​ໂອ­ກາດ​ໃຫ້​ພາກ​ທຸ­ລະ​ກິດ ໂດຍ​ສະ­ເພາະ ແມ່ນ​ນັກ­ທຸ­ລະ­ກິດ​ໜຸ່ມ​ທີ່​ມີ​ຜົນ­ງານ​ດີ­ເດັ່ນ​ໃນ​ການ­ເຄື່ອນ­ໄຫວ​ທຸ­ລະ​ກິດ​ຈຳ­ນວນ 7 ຫົວ­ໜ່ວຍ​ເພື່ອ​ນຳ​ສະ  ເໜີ​ຜົນ­ງານ ສົນ­ທະ­ນາ​ແລກ­ປ່ຽນ​ບົດ­ຮຽນ ແລະ ປະ­ສົບ​ການ​ດຳ­ເນີນ​ທຸ­ລະ​ກິດ.

ຈວນ​ກ ແມ່ນ​ມີ​ຄວາມ​ສຳ­ຄັນ​ຕໍ່​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ປະ­ກອບ­ສ່ວນ​ເຂົ້າ​ໃນ​ການ​ສ້າງ​ວຽກ​ເຮັດ​ງານ​ທຳ ສ້າງ​ລາຍ​ຮັບ ພ້ອມ​ທັງ​ຍົກ​ສູງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ເຮັດ​ໃຫ້​ເສດ­ຖະ­ກິດ​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ມາ​ຮອດ​ປັດ­ຈຸ­ບັນ​ມີ ຈວນ​ກ ຫຼາຍ​ກວ່າ 5 ລ້ານ​ຫົວ­ໜ່ວຍ ກວມ​ເອົາ​ຫຼາຍ​ກວ່າ 90% ຂອງ​ເສດ­ຖະ­ກິດ​ໂລກ ແລະ ສ້າງ​ວຽກ​ເຮັດ​ງານ​ທຳ​ໄດ້​ຫຼາຍ​ກວ່າ 70% ໃນ​ທົ່ວ​ໂລກ ອັນ​ໄດ້​ປະ­ກອບ­ສ່ວນ​ໃຫ້​ແກ່​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ ພ້ອມ​ນັ້ນ ເຫັນ​ໄດ້​ເຖິງ​ຄວາມ​ສຳ­ຄັນ​ຂອງ ຈວນ​ກ ກອງ​ປະ­ຊຸມ​ສະ­ມັດ­ຊາ​ໃຫຍ່​ຂອງ​ອົງ­ການ​ສະ­ຫະ​ປະ­ຊາ​ຊາດ ຄັ້ງ​ວັນ​ທີ 11 ເມ­ສາ 2017 ໄດ້​ອອກ​ຍັດ­ຕິ​ສະ­ບັບ​ເລກ​ທີ 71/279 ເຫັນ​ດີ​ເປັນ​ເອ­ກະ​ພາບ​ກຳ­ນົດ​ເອົາ​ວັນ​ທີ 27 ມິ­ຖຸ­ນາ​ຂອງ​ທຸກໆ​ປີ ເປັນ​ວັນ​ສາ­ກົນ​ວ່າ​ດ້ວຍ ຈວນ​ກ ຫຼື MSME Day ເພື່ອ​ເປັນ​ການ​ສັນ­ລະ­ເສີນ ຈວນ​ກ ທີ່​ໄດ້​ປະ­ກອບ­ສ່ວນ​ເຂົ້າ​ໃນ​ການ​ຂະ­ຫຍາຍ­ຕົວ​ຂອງ​ເສດ­ຖະ­ກິດ​ໂລກ ສ້າງ​ວຽກ​ເຮັດ​ງານ​ທຳ ແລະ ການ​ພັດ­ທະ­ນາ​ໃນ​ທົ່ວ​ໂລກ.

ສຳ­ລັບ ສປປ ລາວ ລັດ­ຖະ­ບານ​ໄດ້​ຖື​ເອົາ​ການ​ສົ່ງ­ເສີມ​ວິ​ສາ​ຫະ​ກິດ​ຂະ­ໜາດ​ນ້ອຍ ແລະ ກາງ ລວມ​ທັງ​ຈຸນ​ລະ­ວິ​ສາ​ຫະ​ກິດ ເປັນ​ວາ­ລະ​ແຫ່ງ​ຊາດ ໂດຍ​ເພີ່ມ​ທະ­ວີ​ການ​ຊີ້​ນຳ-ນຳ­ພາ​ສ້າງ​ແຜນ​ພັດ­ທະ­ນາ​ວິ​ສາ​ຫະ​ກິດ​ຂະ­ໜາດ​ນ້ອຍ ແລະ ກາງ ປີ 2016-2020 ເພື່ອ​ຮັບ­ປະ­ກັນ​ທຸກ​ນະ­ໂຍ­ບາຍ ມາດ​ຕະ­ການ​ພັດ­ທະ­ນາ​ວິ​ສາ​ຫະ​ກິດ​ຂະ­ໜາດ​ນ້ອຍ ແລະ ກາງ ທີ່​ໄດ້​ລະ­ບຸ​ໄວ້​ໃນ​ແຜນ​ດັ່ງ­ກ່າວ ຈະ​ຖືກ​ຈັດ​ຕັ້ງ​ປະ­ຕິ­ບັດ​ໂດຍ​ທຸກ​ພາກ­ສ່ວນ​ກ່ຽວ­ຂ້ອງ ທັງ​ຢູ່​ຂັ້ນ​ສູນ​ກາງ ແລະ ທ້ອງ­ຖິ່ນ ແນ­ໃສ່​ເຮັດ​ໃຫ້​ວິ​ສາ​ຫະ​ກິດ​ຂະ­ໜາດ​ນ້ອຍ-ກາງ​ໄດ້​ຮັບ​ການ​ພັດ­ທະ­ນາ​ເຕີບ​ໃຫຍ່​ເຂັ້ມ­ແຂງ ມີ​ຄວາມ​ສາ­ມາດ​ໃນ​ການ​ແຂ່ງ­ຂັນ​ຢູ່​ພາຍ​ໃນ​ພາກ​ພື້ນ ແລະ ສາ­ກົນ ເຊິ່ງ​ແຜນ​ພັດ­ທະ­ນາ​ດັ່ງ­ກ່າວ​ປະ­ກອບ​ມີ 7 ຂົງ­ເຂດ​ນະ­ໂຍ­ບາຍ 43 ມາດ­ຕາ ໂຄງ­ການ ແລະ ກິດ­ຈະ­ກຳ​ຈັດ​ຕັ້ງ​ປະ­ຕິ­ບັດ​ທີ່​ແທດ­ເໝາະ​ກັບ​ສະ­ພາບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ໃນ​ປັດ­ຈຸ­ບັນ ໂດຍ​ສະ­ເພາະ ເພື່ອ​ສ້າງ​ເງື່ອນ­ໄຂ​ໃຫ້​ວິ​ສາ​ຫະ​ກິດ​ຂະ­ໜາດ​ນ້ອຍ-ກາງ​ໃຫ້​ສາ­ມາດ​ເຊື່ອມ​ໂຍງ​ກັບ​ພາກ​ພື້ນ ແລະ ສາ­ກົນ​ໄດ້ ເປັນ­ຕົ້ນ ແມ່ນ​ປະ­ຊາ​ຄົມ​ເສດ­ຖະ­ກິດ​ອາ​ຊຽນ ແລະ ແຜນ​ດັ່ງ­ກ່າວ​ໄດ້​ຖືກ​ບັນ­ຈຸ​ເຂົ້າ​ໃນ​ແຜນ​ພັດ­ທະ­ນາ​ຂະ­ແໜງ​ອຸດ­ສາ­ຫະ­ກຳ ແລະ ການ​ຄ້າ 5 ປີ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ 5 ປີ ຄັ້ງ​ທີ 8 (2016-2020) ແລະ ສອດ­ຄ່ອງ​ກັບ​ແຜນ​ຍຸດ​ທະ​ສາດ​ພັດ­ທະ­ນາ​ວິ​ສາ​ຫະ​ກິດ​ຂະ­ໜາດ​ນ້ອຍ-ກາງ 2016-2020 ຂອງ​ອາ​ຊຽນ​ທີ່​ໄດ້​ຖືກ​ຮັບ­ຮອງ ແລະ ປະ­ກາດ​ໃຊ້​ແລ້ວ.

ຂ່າວທີ່ກ່ຽວຂ້ອງ