ຂ່າວຫຼ້າສຸດ

ຄາດວ່າຮອດປີ 2045 ພົນລະເມືອງລາວຈະມີ 9,4 ລ້ານຄົນ

215 28 ມິ.ນ. 2018 ຂ່າວໜ້າ​ໜຶ່ງ

ກອງ​ປະ­ຊຸມ​ລະ­ດັບ​ຊາດ ໃນ​ໂອ­ກາດ​ວັນ​ສະ­ຖິ­ຕິ​ແຫ່ງ​ຊາດ ຫົວ­ຂໍ້ ການ​ເຜີຍ­ແຜ່​ຂໍ້​ມູນ​ສະ­ຖິ­ຕິ​ທາງ​ການ ປະ­ກາດ​ຜົນ​ການ​ສຳ​ຫຼວດ​ດັດ​ສະ​ນີ​ໝາຍ​ສັງ­ຄົມ​ລາວ​ຄັ້ງ​ທີ II ການ​ສຳ​ຫຼວດ​ແຮງ​ງານ​ຄັ້ງ​ທີ II ແລະ ການ​ຄາດ​ຄະ­ເນ​ພົນ­ລະ­ເມືອງ​ປີ 2015-2045 ຈັດ​ຂຶ້ນ​ວັນ​ທີ 27 ມິ­ຖຸ­ນາ 2018 ທີ່​ສູນ​ຮ່ວມ​ມື​ສາ­ກົນ ແລະ ເຝິກ­ອົບ­ຮົມ ເປັນ​ປະ­ທານ​ຂອງ​ທ່ານ ສະ­ໄໝ​ຈັນ ບຸບ­ຜາ ຫົວ­ໜ້າ​ສູນ​ສະ­ຖິ­ຕິ​ແຫ່ງ​ຊາດ ມີ​ຮອງ​ລັດ­ຖະ­ມົນ­ຕີ ບັນ­ດາ​ກະ­ຊວງ ອົງ​ການ­ຈັດ­ຕັ້ງ​ສາ­ກົນ ຄູ່​ຮ່ວມ​ພັດ­ທະ­ນາ ແລະ ຂະ­ແໜງ­ການ​ກ່ຽວ­ຂ້ອງ​ເຂົ້າ​ຮ່ວມ.

ທ່ານ ສະ­ໄໝ​ຈັນ ບຸບ­ຜາ ກ່າວ​ວ່າ: ການ​ສຳ​ຫຼວດ​ດັດ​ສະ​ນີ​ຄັ້ງ​ທີ II ແມ່ນ​ຄວາມ​ພະ­ຍາ­ຍາມ​ອັນ​ໃຫຍ່​ຫຼວງ​ເພື່ອ​ວັດ­ແທກ​ຄວາມ​ຄືບ​ໜ້າ​ກ່ຽວ​ກັບ​ການ​ພັດ­ທະ­ນາ​ດ້ານ​ສັງ­ຄົມ ເຊິ່ງ​ການ​ສຳ​ຫຼວດ​ດັ່ງ­ກ່າວ​ໄດ້​ມີ​ຄວາມ​ຄືບ​ໜ້າ​ຫຼາຍ​ດ້ານ ເປັນ­ຕົ້ນ ແມ່ນ​ການ​ຕາຍ​ຂອງ​ເດັກ­ນ້ອຍ ການ​ຂາດ​ອາ­ຫານ​ແບບ​ຊຳ​ເຮື້ອ ການ​ເກີດ​ລູກ​ໂດຍ​ມີ​ແພດ​ຊຳ­ນານ​ງານ​ຊ່ວຍ​ເກີດ ອັດ­ຕາ​ຄວບ​ຄຸມ​ການ​ສະ­ໜອງ​ນ້ຳ​ສະ­ອາດ ແລະ ສຸ­ຂາ­ພິ­ບານ ອັດ­ຕາ​ການ​ເຂົ້າ​ໂຮງ­ຮຽນ​ຊັ້ນ​ປະ­ຖົມ ຫຼຸດ­ຜ່ອນ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່­ຍິງ ແລະ ເດັກ­ນ້ອຍ ແລະ ອື່ນໆ.

ນອກ­ຈາກ​ນີ້ ກໍ່​ໄດ້​ຍົກ​ໃຫ້​ເຫັນ​ຜົນ​ການ​ຄາດ​ຄະ­ເນ​ພົນ­ລະ­ເມືອງ​ລາວ​ປີ 2015-2045 ອີງ​ຕາມ​ການ​ຄາດ​ຄະ­ເນ​ລະ­ດັບ​ປານ​ກາງ​ພົນ­ລະ­ເມືອງ​ລາວ​ຈະ​ເພີ່ມ​ຂຶ້ນ​ເປັນ 9,4 ລ້ານ​ຄົນ​ໃນ​ປີ 2045 ອັດ­ຕາ​ສ່ວນ​ພົນ­ລະ­ເມືອງ​ອາ­ຍຸ 0-14 ປີ​ຈະ​ຫຼຸດ​ລົງ​ຈາກ 37% ໃນ​ປີ 2015 ມາ​ເປັນ 21% ອັດ­ຕາ​ສ່ວນ​ພົນ­ລະ­ເມືອງ​ຜູ້​ສູງ​ອາ­ຍຸ 65 ປີ​ຂຶ້ນ​ໄປ ຈະ​ເພີ່ມ​ຂຶ້ນ​ຈາກ 4% ໃນ​ປີ 2015 ມາ​ເປັນ 9% ອັດ­ຕາ​ສ່ວນ​ພົນ­ລະ­ເມືອງ​ໃນ​ໄວ​ກຳ­ລັງ​ແຮງ​ງານ​ອາ­ຍຸ 15-64 ປີ ເພີ່ມ​ຂຶ້ນ​ຈາກ 62% ໃນ​ປີ 2015 ມາ​ເປັນ 70% ເຊິ່ງ​ເປັນ​ຜົນ​ສົ່ງ​ໃຫ້​ອັດ­ຕາ​ການ​ເອື່ອຍ​ອີງ​ຫຼຸດ​ລົງ​ຈາກ 61 ຄົນ​ໃນ​ປີ 2015 ມາ​ເປັນ 44 ຄົນ​ໃນ​ປີ 2045 ແລະ ຜູ້​ເຂົ້າ​ຮ່ວມ​ກອງ​ປະ­ຊຸມ​ກໍ່​ໄດ້​ປະ­ກອບ​ຄຳ​ຄິດ​ເຫັນ​ໃສ່​ບັນ­ດາ​ຮ່າງ​ຜົນ​ການ​ສຳ​ຫຼວດ​ແຕ່​ລະ​ວຽກ​ງານ​ອີກ​ດ້ວຍ.

ຂ່າວທີ່ກ່ຽວຂ້ອງ