ຂ່າວຫຼ້າສຸດ

ເພາະກາຍລາວ ສົ່ງນັກກີລາເຂົ້າຮ່ວມແຂ່ງຂັນ ທີ່ກຳປູເຈຍ

211 27 ມິ.ນ. 2018 ວົງຈອນກີລາ
ເພາະກາຍລາວ ສົ່ງນັກກີລາເຂົ້າຮ່ວມແຂ່ງຂັນ ທີ່ກຳປູເຈຍ

ອີງ​ຕາມ​ຂໍ້​ມູນ​ຈາກ​ສະ­ຫະ­ພັນ​ກີ­ລາ​ເພາະ​ກາຍ​ແຫ່ງ​ຊາດ​ລາວ ໃຫ້​ຮູ້​ວ່າ: ສະ­ຫະ­ພັນ​ໄດ້​ສົ່ງ​ຄະ­ນະ​ນຳ ຄູ​ເຝິກ ແລະ ນັກ­ກີ­ລາ ຈຳ­ນວນ 5 ທ່ານ ໃນ​ນັ້ນ ມີ​ນັກ­ກີ­ລາ​ທີມ​ຊາດ​ລາວ ຊຸດ​ທຳ​ອິດ ຈຳ­ນວນ 2 ຄົນ ເພື່ອ​ເຂົ້າ​ຮ່ວມ​ການ​ແຂ່ງ­ຂັນ​ເພາະ​ກາຍ ຊີງ​ແຊັມ​ອາ­ຊີ​ຕາ­ເວັນ​ອອກ­ສຽງ​ໃຕ້ ຄັ້ງ​ທີ 15 ລະ­ຫວ່າງ​ວັນ​ທີ 25-30 ມິ­ຖຸ­ນາ 2018 ທີ່​ສຽມ​ລຽບ ຣາ​ຊະ​ອາ­ນາ­ຈັກ​ກຳ­ປູ­ເຈຍ.

ເປົ້າ​ໝາຍ​ໃນ​ການ​ເດີນ­ທາງ​ເຂົ້າ​ຮ່ວມ​ແຂ່ງ­ຂັນ​ຄັ້ງ​ນີ້ ກໍ່​ເພື່ອ​ເປັນ​ການ​ເສີມ​ສ້າງ ແລະ ພັດ­ທະ­ນາ​ວົງ​ການ​ກີ­ລາ​ເພາະ​ກາຍ​ລາວ ກ້າວ​ເຂົ້າ​ສູ່​ລະ­ດັບ​ອະ­ນຸ​ພາກ​ພື້ນ ທັງ​ເປັນ​ການ​ຍົກ​ສູງ​ການ​ສົ່ງ­ເສີມ​ບົດ­ບາດ​ຍິງ-ຊາຍ ເຂົ້າ​ໃນ​ວຽກ​ງານ​ຂອງ​ສະ­ຫະ­ພັນ​ກີ­ລາ​ເພາະ​ກາຍ​ແຫ່ງ​ຊາດ​ລາວ ແລະ ເປັນ​ການ​ກະ­ກຽມ​ຄວາມ​ພ້ອມ​ໃຫ້​ແກ່​ນັກ­ກີ­ລາ ເພື່ອ​ເຂົ້າ​ຮ່ວມ​ການ​ແຂ່ງ­ຂັນ​ເພາະ​ກາຍ ຊີງ​ແຊັມ​ອາ­ຊີ ຄັ້ງ​ທີ 52 ທີ່​ປະ­ເທດ​ອິນ​ເດຍ ໃນ​ເດືອນ​ຕຸ­ລາ 2018 ແລະ ຊີງ​ແຊັມ​ໂລກ ທີ່​ປະ­ເທດ​ໄທ ໃນ​ທ້າຍ​ປີ 2018 ນີ້.

ສຳ­ລັບ​ການ​ແຂ່ງ­ຂັນ​ຄັ້ງ​ນີ້ ຈະ​ແບ່ງ​ອອກ​ເປັນ 6 ຮຸ່ນ ສະ­ເພາະ​ນັກ­ກີ­ລາ​ລາວ ຈະ​ລົງ​ແຂ່ງ­ຂັນ​ຢູ່ 2 ຮຸ່ນ ຄື: ທ້າວ ຕຸ້ຍ ໄຊ​ຍະ​ລາດ ຈະ​ລົງ​ແຂ່ງ­ຂັນ​ໃນ​ຮຸ່ນ​ນ້ຳ­ໜັກ​ບໍ່​ເກີນ 65 ກິ​ໂລ ແລະ ນາງ ພອຍ​ໄພ­ລິນ ພັນ­ທະ​ລີ ຈະ​ລົງ​ແຂ່ງ­ຂັນ​ໃນ​ຮຸ່ນ​ລວງ​ສູງ​ບໍ່​ເກີນ 160 ຊັງ​ຕີ​ແມັດ ສ່ວນ​ເປົ້າ​ໝາຍ​ທີ່​ສະ­ຫະ­ພັນ​ຕັ້ງ​ເອົາ​ໄວ້ ຈະ​ພະ­ຍາ­ຍາມ​ສູ້​ຊົນ​ຍາດ​ເອົາ​ລາ­ງວັນ​ໃດ​ໜຶ່ງ ເນື່ອງ​ຈາ​ກວ່າ​ນັກ­ກີ­ລາ​ພວກ​ເຮົາ​ໄດ້​ມີ​ການ​ເກັບ​ໂຕ​ເຝິກ­ຊ້ອມ​ມາ​ໄດ້ 3 ເດືອນ ແລະ ມີ​ຄວາມ​ພ້ອມ​ທາງ​ດ້ານ​ຮ່າງ­ກາຍ ແລະ ຈິດ­ໃຈ​ເຕັມ 100%.

ຂ່າວທີ່ກ່ຽວຂ້ອງ