ຂ່າວຫຼ້າສຸດ

ມວນຊົນພັນກວ່າຄົນ ຮ່ວມຍ່າງເພື່ອສຸຂະພາບ ສະຫຼອງວັນໂອແລມປິກສາກົນ

152 27 ມິ.ນ. 2018 ວົງຈອນກີລາ
ມວນຊົນພັນກວ່າຄົນ ຮ່ວມຍ່າງເພື່ອສຸຂະພາບ ສະຫຼອງວັນໂອແລມປິກສາກົນ

   ພິ­ທີ​ເປີດ​ຂະ​ບວນ​ການ​ຍ່າງ​ເພື່ອ​ສຸ­ຂະ­ພາບ ເພື່ອ​ສ້າງ​ຂະ​ບວນ​ການ​ສະ­ເຫຼີມ­ສະ­ຫຼອງ​ວັນ​ໂອ​ແລມ​ປິກ​ສາ­ກົນ ຄົບ­ຮອບ 124 ປີ ໄດ້​ມີ​ຂຶ້ນ​ວັນ​ທີ 23 ມິ­ຖຸ­ນາ 2018 ຜ່ານ​ມາ ທີ່​ແຂວງ​ບໍ​ລິ​ຄຳ​ໄຊ ມີ​ທ່ານ ກອງ​ແກ້ວ ໄຊ​ສົງ­ຄາມ ເຈົ້າ­ແຂວງ​ບໍ​ລິ​ຄຳ​ໄຊ ແລະ ທ່ານ ບົວ​ລານ ສິ­ລິ​ປັນ­ຍາ ຮອງ​ລັດ­ຖະ­ມົນ­ຕີ ກະ­ຊວງ​ສຶກ​ສາ​ທິ​ການ ແລະ ກີ­ລາ ທັງ​ເປັນ​ຮອງ​ປະ­ທານ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ (ຄອລ) ມີ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ ສສ ຫວຽດ­ນາມ ບັນ­ດາ​ຫົວ­ໜ້າ-ຮອງ​ຫົວ­ໜ້າ​ກົມ ກະ­ຊວງ ສສກ ແລະ ພະ­ແນກ­ການ​ຕ່າງໆ​ອ້ອມ​ຂ້າງ​ແຂວງ ບັນ­ດາ​ພະ­ນັກ­ງານ ທະ­ຫານ-ຕຳ­ຫຼວດ ຄູ-ອາ­ຈານ ນັກ​ສຶກ​ສາ-ນັກ­ຮຽນ ແລະ ພໍ່-ແມ່​ປະ­ຊາຊົນ​ຊາວ​ແຂວງ​ບໍ​ລິ​ຄຳ​ໄຊ ແລະ ພີ່­ນ້ອງ​ຊາວ​ຫວຽດ­ນາມ ຈຳ­ນວນ 1.200 ກວ່າ​ຄົນ ເຂົ້າ​ຮ່ວມ.

   ໂອ­ກາດ​ນີ້ ທ່ານ ສົມ​ພູ ພົງ­ສາ ຜູ້​ຊ່ວຍ​ລັດ­ຖະ­ມົນ­ຕີ ສສກ ທັງ​ເປັນ​ຮອງ​ປະ­ທານ ແລະ ເລ­ຂາ­ທິ­ການ ຄອລ ກ່າວ​ວ່າ: ທຸກໆ​ປີ ເມື່ອ​ເຖິງ​ວັນ​ທີ 23 ມິ­ຖຸ­ນາ ບັນ­ດາ​ສະ­ມາ­ຊິກ​ຄະ­ນະ​ກຳ­ມະ­ການ​ໂອ​ແລມ​ປິກ​ແຕ່​ລະ​ຊາດ ໄດ້​ຈັດ​ຕັ້ງ​ສະ­ເຫຼີມ­ສະ­ຫຼອງ​ວັນ​ດັ່ງ­ກ່າວ ເຊິ່ງ​ເອີ້ນ​ວ່າ ວັນ​ໂອ​ແລມ​ປິກ ຫຼື Olampic day ດ້ວຍ​ກິດ­ຈະ­ກຳ​ກິ­ລາ​ຕ່າງໆ​ຕາມ​ຮູບ​ແບບ ແລະ ຕາມ​ຄວາມ​ເໝາະ​ສົມ​ຂອງ​ແຕ່​ລະ​ປະ­ເທດ ແລະ ຄອລ ກໍ່​ໄດ້​ຮ່ວມ​ມື​ກັບ ແຂວງ​ບໍ​ລິ​ຄຳ​ໄຊ ແລະ ບໍ­ລິ­ສັດ ເບຍ​ລາວ ຈຳ­ກັດ ຈັດ​ໃຫ້​ມີ​ຍ່າງ​ເພື່ອ​ສຸ­ຂະ­ພາບ ແລ່ນ ເຕັ້ນ​ແອ​ໂຣ​ບິກ ແລະ ກີ­ລາ​ດຶງ­ເຊືອກ

   ຫຼັງ​ຈາກ​ນັ້ນ ທ່ານ​ຮອງ​ລັດ­ຖະ­ມົນ­ຕີ ກະ­ຊວງ ສສກ ກໍ່​ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ຄະ­ນະ​ຮັບ​ຜິດ​ຂອງ ຄອລ ແລະ ແຂວງ​ບໍ​ລິ​ຄຳ​ໄຊ ໄດ້​ພ້ອມ​ກັນ​ກະ­ກຽມ​ຢ່າງ​ຕັ້ງ­ໜ້າ​ຈົນ​ສາ­ມາດ​ເຮັດ​ໃຫ້­ການ​ກະ­ກຽມ​ເປີດ​ງານ ສະ­ຫຼອງ​ວັນ​ສຳ­ຄັນ​ດັ່ງ­ກ່າວ ໄດ້​ຮັບ​ໝາກ​ຜົນ­ສຳ­ເລັດ​ຢ່າງ​ຈົບ­ງາມ ຂໍ​ສະ­ແດງ​ຄວາມ​ຂອບ­ໃຈ​ມາ​ຍັງ​ຄະ­ນະ​ກຳ­ມະ­ການ​ຕັດ­ສິນ ນັກ­ວິ­ຊາ­ການ ແລະ ຜູ້​ໃຫ້­ການ​ສະ​ນັບ​ສະ​ໜູນ​ງານ​ຄັ້ງ​ນີ້ ໂດຍ​ສະ­ເພາະ​ແມ່ນ​ຜະ­ລິດ​ຕະ​ພັນ ນ້ຳ​ຫົວ​ເສືອ​ຂອງ​ບໍ­ລິ­ສັດ ເບຍ​ລາວ ຈຳ­ກັດ ແລະ ບໍ­ລິ­ສັດ ເອັຟ​ບີ​ທີ.

ຂ່າວທີ່ກ່ຽວຂ້ອງ