ຂ່າວຫຼ້າສຸດ

ເບີ່ງບ້ານເຂົາເອົາບົດຮຽນ 27/06/2018

117 27 ມິ.ນ. 2018 ຫົວຂໍ້ຂ່າວອື່ນໆ

ພົບ​ກັນ​ວັນ​ນີ້ ມີ​ຂ່າວ​ກ່ຽວ​ກັບ​ການ​ຈັບ​ກຸມ​ຜູ້​ປອມ​ແປງ​ເອກະສານ​ຢູ່​ພູ​ຖານ ເລື່ອງ​ການ​ແກ້​ໄຂ​ຄະດີ​ຄາຕະກຳ​ແມ່ຍິງ​ທີ່ ບຣາ​ຊິນ ແລະ ຄຳ​ປະກາດ​ຍົກເລີກ​ໂຄງການ​ຂະໜາດ​ໃຫຍ່​ຢູ່​ມາ​ເລ​ເຊຍ.

ທີ່​ພູ​ຖານ: (Bhutan) ຂ່າວ​ຕ່າງປະເທດ​ຫວ່າງ​ບໍ່​ດົນ​ມາ​ນີ້ ໄດ້​ໃຫ້​ຮູ້​ວ່າ ເຈົ້າ​ໜ້າທີ່​ຕຳຫຼວດ​ພູ​ຖານ ໄດ້​ຈັບ​ກຸມ​ຊາຍ​ອາຍຸ 45 ປີ ຄົນ​ໜຶ່ງ ໃນ​ຄະດີ​ປອມ​ແປງ​ເອກະສານ​ວີ​ຊາ ເຂົ້າ​ສະຫະລັດ​ອາ​ເມ​ຣິ​ກາ ການ​ຈັບ​ກຸມ​ຄັ້ງ​ວັນ​ທີ 4 ເດືອນ​ມິຖຸນາ​ປີ​ນີ້ ເປັນ​ຊະ​ນວນ​ມາ​ຈາກ​ຄຳ​ຮ້ອງທຸກ​ຂອງ​ຜູ້​ຖືກເສຍ​ຫາຍ ຂ່າວ​ບອກ​ວ່າ: ຊາຍ​ຜູ້​ກໍ່​ເຫດ​ໄດ້​ປອມ​ແປງ​ເອກະສານ​ຂໍ​ວີ​ຊາ​ເຂົ້າ​ສະຫະລັດ​ສຳລັບ 5 ຄົນ ລວມ​ທັງ​ຜູ້ກ່ຽວ​ເອງ ເຈົ້າ​ໜ້າທີ່​ໄດ້​ສະ​ສົມ​ຫຼັກ​ຖານ​ກ່ຽວ​ກັບ​ຄະດີ​ນີ້ ແຕ່​ວັນ​ທີ 25 ເດືອນ​ພຶດສະພາ​ປີ​ນີ້ ພາຍຫຼັງ​ມີ​ຄຳ​ຮ້ອງ​ຮຽນ​ຈາກ​ຄະນະ​ກຳມະການ​ແຫ່ງ​ຊາດ ເພື່ອ​ແມ່ຍິງ ແລະ ເດັກນ້ອຍ (NCWC) ຊາຍ​ຜູ້​ກໍ່​ຄະດີ ເຮັດ​ວຽກ​ເປັນ​ພະນັກງານ​ສັນຍາ​ຈ້າງ​ ໃນ​ຖານະ​ຜູ້​ຈັດການ​ໂຄງການ​ຂອງ NCWC ນັບ​ແຕ່​ເດືອນ​ກໍລະກົດ​ເປັນຕົ້ນ​ມາ.

ທີ່ບຣາ​ຊິນ: ປະເທດ​ຝີ​ຕີນ​ບານເຕະ​ທີ່​ລື​ຊື່​ຂອງ​ໂລກ ໄດ້​ສ້າງ​ຂ່າວ​ໃຫຍ່​ດັງ​ໄກ​ໄປ​ທົ່ວ​ໂລກ ແຕ່​ບໍ່​ກ່ຽວ​ກັບ​ເລື່ອງ​ເຕະບານ ມັນ​ເປັນ​ເລື່ອງ​ບັນຫາ​ການ​ຄາຕະກຳ​ແມ່ຍິງ ຂ່າວ​ວຽງ​ຈັນ​ທາມ​ໃນ​ວັນ​ທີ 22 ເດືອນ​ນີ້ ໃຫ້​ຮູ້​ວ່າ: ໃນ​ປີ 2017 ຄະດີ​ທີ່​ພົວພັນ​ກັບ​ການ​ຄາຕະກຳ​ແມ່ຍິງ ຈຳນວນ 10.700 ເລື່ອງ ບໍ່​ໄດ້​ຮັບ​ການ​ແກ້​ໄຂ​ ທັ້ງໆທີ່​ຈຳນວນ​ການ​ຕັດສິນ​ຄະດີ​ໄດ້​ເພີ່ມ​ຄັ້ງ​ຂຶ້ນ​ທົບ​ເທົ່າ​ຕົວ ໃນ​ປີ 2017 ສານ ບຣາ​ຊິນ ໄດ້​ຕັດສິນ​ຄະດີ​ທີ່​ມີ​ຜົນ​ໃຊ້​ໄດ້​ຢ່າງ​ເດັດຂາດ ຈຳນວນ 4.829 ເລື່ອງ ກ່ຽວ​ກັບ​ຄະດີ​ຄາດ​ຕະ​ກຳ​ແມ່ຍິງ ທຽບ​ກັບ 1.942 ເລື່ອງ​ໃນ​ປີ 2016 ທີ່​ຕັດສິນ​ໄດ້​ຫຼາຍ​ຄະດີ​ໃນ​ປີ 2017 ນີ້ ກໍ່​ຍ້ອນ​ວ່າ ບັນດາ​ຜູ້​ພິພາກສາ​ມີ​ຄວາມ​ພະຍາຍາມສູງ ​ໃນ​ການ​ແກ້​ໄຂ​ບັນຫາ​ການ​ຄາຕະກຳ​ແມ່ຍິງ ແຕ່​ແນວໃດ​ກໍ່​ດີ ທາງ​ສະພາ​ຍຸຕິ​ທຳ​ແຫ່ງ​ຊາດ ໄດ້​ອອກ​ມາ​ເຕືອນ​ວ່າ ຕົວ​ເລກ​ຄະດີ​ຄາຕະກຳ​ເພດ​ຍິງ​ນັ້ນ ມີ​ສູງ​ກວ່າ​ນັ້ນ​ຫຼາຍ ແຕ່​ມີ​ບັນຫາ​ໃນ​ການ​ຈົດ​ທະບຽນ​ ຍ້ອນຂາດ​ກົນ​ໄກ​ການ​ປະສານ​ງານ​ທີ່​ເປັນ​ເອກະ​ພາບ ລວມ​ທັງ​ຄະດີ​ທີ່​ໄດ້​ມີ​ການ​ລາຍ​ງານ​ຕໍ່​ເຈົ້າ​ໜ້າທີ່​ຕຳຫຼວດ​ແລ້ວ ແມ່ຍິງ​ບຣາ​ຊິນທີ່​ຕົກ​ເປັນ​ເຫຍື່ອ​ຄະດີ​ຄາຕະກຳ​ຫຼາຍ​ທີ່​ສຸດ ແມ່ນ​ແມ່ຍິງ​ເຊື້ອສາຍ​ອາ​ຟຣິ​ກາ (ຜິວ​ດຳ) ໃນ​ປີ 2017 ສານ​ທ້ອງຖິ່ນ​ທົ່ວ​ປະເທດ​ບຣາ​ຊິນ ໄດ້​ພິຈາລະນາ​ຄະດີ​ຄາດ​ຕະ​ກຳ​ແມ່ຍິງ​ທີ່​ເກີດ​ຈາກ​ການ​ໃຊ້​ຄວາມ​ຮຸນ​ແຮງ​ໃນ​ຄອບຄົວ ຈຳນວນ 1.448.716 ຄັ້ງ ໂດຍ​ສະເລ່ຍ​ແລ້ວ ມີ 13,8 ຄະດີ ສຳລັບ​ຊາວ​ບຣາ​ຊິນ ໃນ​ແຕ່​ລະ 1.000 ຄົນ ຈຳນວນ​ທີ່​ໄດ້​ຮັບ​ການ​ພິຈາລະນາ​ແກ້​ໄຂ​ຕົວ​ຈິງ 540.000 ເລື່ອງ ສ່ວນ​ອີກ 908.000 ເລື່ອງ​ນັ້ນ ໄດ້​ເຍື້ອນ​ໄປ​ໃສ່​ເດືອນ​ທັນວາ ປີ 2017 ນີ້​ຄື​ສະພາບ​ຄວາມ​ຊັກ​ຊ້າ ແລະ ອຸປະສັກໃນ​ການ​ຕັດສິນ​ຄະດີ​ຄາດ​ຕະ​ກຳ​ແມ່ຍິງ​ໃນ​ບຣາ​ຊິນ.

ທີ່ມາ​ເລ​ເຊຍ: ຂ່າວ​ໃຫຍ່​ໃນ​ມາ​ເລ​ເຊຍ ຫວ່າງ​ບໍ່​ດົນ​ມາ​ນີ້ ກໍ່​ແມ່ນ​ໄຊຊະນະ​ຂອງ​ຜູ້ນຳ​ແກ່​ພັນ​ສາ ອາຍຸ 92 ປີ ໃນ​ການ​ເລືອກ​ຕັ້ງ​ເປັນ​ນາຍົກ​ຂອງ​ປະເທດ​ນີ້ ນັ້ນກໍ່​ຄື ທ່ານ ມາ​ຮາ​ເທຍ ໂມ​ຮາ​ມັດ ຕໍ່​ຈາກ​ນັ້ນ​ມາບໍ່ພໍຄາວ ທ່ານ​ນາຍົກ​ກໍ່​ໄດ້​ປະກາດ​ກ່ຽວ​ກັບ​ຫຼາຍໆ​ການ​ປ່ຽນແປງ​ທີ່​ມີ​ລັກສະນະ​ບາດ​ລ້ຽວ​ໃໝ່ ລວມ​ທັງ​ການປະກາດ​ວ່າ ​ຈະ​ລົບ​ລ້າງ​ຫຼາຍ​ໂຄງການ​ຂະໜາດ​ໃຫຍ່​ທີ່​ເຫັນ​ວ່າ​ບໍ່​ທັນ​ມີ​ຄວາມ​ຈຳເປັນ ລວມ​ທັງ​ໂຄງການ​ສ້າງ​ທາງ​ລົດໄຟ​ຄວາມ​ໄວ​ສູງ ທ່ານ​ນາຍົກ​ບອກ​ວ່າ ການ​ຍົກເລີກ​ຈະ​ຊ່ວຍ​ຫຼຸດຜ່ອນ​ບ້ວງ​ເງິນ​ຈຳນວນ 110 ຕື້​ຣິງ​ກິດ (ເທົ່າ​ກັບ 28 ຕື້​ໂດ​ລາ​ສະຫະລັດ) ແລະ ຫຼຸດຜ່ອນ​ໜີ້​ລັດ​ລົງ​ໄດ້​ຢ່າງ​ຫຼວງຫຼາຍ​ອີກ​ດ້ວຍ.

ຂ່າວທີ່ກ່ຽວຂ້ອງ