ຫາລືກໍ່ສ້າງໂຮງຮຽນພັດທະນາບຸຄະລາກອນ ໃນນະຄອນຫຼວງວຽງຈັນ

222 27 ມິ.ນ. 2018 ຂ່າວໜ້າ​ໜຶ່ງ
ຫາລືກໍ່ສ້າງໂຮງຮຽນພັດທະນາບຸຄະລາກອນ ໃນນະຄອນຫຼວງວຽງຈັນ

ວັນ​ທີ 26 ມິຖຸນາ 2018 ທີ່​ຫ້ອງ​ວ່າການ​ປົກຄອງ​ນະຄອນຫຼວງ​ວຽງ​ຈັນ ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງ​ຈັນ ຕ້ອນຮັບ​ການ​ເຂົ້າ​ຢ້ຽມ​ຄຳນັບ​ຂອງ​ທ່ານ ເກ​ອີ​ຈິ ໂກ​ດະ​ມະ ປະທານ​ມູນ​ນິທິ​ກອງ​ທຶນ​ສຶກ​ສາ​ສາກົນ ໂກ​ດະ​ມະ ປະເທດ​ຍີ່ປຸ່ນ ພ້ອມ​ຄະນະ ໃນ​ໂອກາດ​ທີ່​ຄະນະ​ດັ່ງກ່າວ​ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຢູ່ ​ສປປ ລາວ.

ທ່ານ ສິນ​ລະ​ວົງ ຄຸດ​ໄພທູນ ໄດ້​ຕີ​ລາຄາ​ສູງ​ຕໍ່​ການ​ເຂົ້າ​ຢ້ຽມ​ຄຳນັບ​ຂອງ​ທ່ານ ເກ​ອີ​ຈິ ໂກ​ດະ​ມະ ພ້ອມ​ດ້ວຍ​ຄະນະ ເຊິ່ງ​ເປັນ​ການ​ເສີມ​ຂະຫຍາຍ​ສາຍ​ພົວພັນ​ຄວາມ​ສາມັກຄີ​ຮັກແພງ ແລະ ໃຫ້ການ​ຊ່ວຍເຫຼືອ​ເຊິ່ງ​ກັນ ແລະ ກັນ ໂດຍ​ສະເພາະແມ່ນ​ດ້ານ​ການ​ສຶກ​ສາ​ໃຫ້​ນັບ​ມື້​ຂະຫຍາຍຕົວ​ຢ່າງ​ບໍ່​ຢຸດ​ຢັ້ງ ພ້ອມ​ນັ້ນ ຍັງ​ໄດ້​​​ຍ້ອງຍໍ​ຊົມເຊີຍ ເຫັນ​ດີ​ຕໍ່​ການ​ກໍ່ສ້າງ​ໂຮງຮຽນ​ພັດທະນາ​ບຸ​ຄະລາ​ກອນ​ຂອງ ​ສປປ ລາວ ກໍ່​ຄື ນະຄອນຫຼວງ​ວຽງ​ຈັນ ​ໃຫ້​ນັບ​ມື້​ເຂັ້ມແຂງ ແລະ ມີ​ຄຸນະພາບ.

ໂອກາດ​ດັ່ງກ່າວ ທ່ານ​ປະທານ​ມູນ​ນິທິ​ກອງ​ທຶນ​ສຶກ​ສາ​ສາກົນ ໂກ​ດະ​ມະ ປະເທດ​ຍີ່ປຸ່ນ ໄດ້​ສະແດງ​ຄວາມ​ຂອບໃຈ​ຕໍ່​ທ່ານ​ເຈົ້າ​ຄອງ​ນະຄອນຫຼວງ ​ທີ່​ໄດ້​ໃຫ້​ຄຳ​ປຶກສາ​ກ່ຽວ​ກັບ​ການ​ກໍ່ສ້າງ​ໂຮງຮຽນ​ໃນ​ນະຄອນຫຼວງ​ວຽງ​ຈັນ ເຊິ່ງ​ການ​ມາ​ຢ້ຽມຢາມ ​ສປປ ລາວ ​ຄັ້ງ​ນີ້ ແມ່ນ​ມາ​ເບິ່ງ​ຄວາມ​ເປັນ​ໄປ​ໄດ້​ຂອງ​ການ​ສ້າງ​ໂຮງຮຽນ ເພື່ອ​ສ້າງ​ບຸ​ຄະລາ​ກອນ​ໃຫ້​ມີ​ຄຸນະພາບ ການ​ອອກ​ແບບ​ກໍ່ສ້າງ​ອາຄານ​ໂຮງຮຽນ ​ໃຫ້​ມີ​ຄວາມ​ແທດເໝາະ​ກັບ​ສະພາບ​ຄວາມ​ເປັນ​ຈິງ​ຂອງ​ນະຄອນຫຼວງ​ວຽງ​ຈັນ ຖ້າ​ເປັນ​ໄປ​ໄດ້​ແມ່ນ​ຈະ​ລົງມື​ຈັດ​ຕັ້ງ​ປະຕິບັດ​ໃນ​ເດືອນກັນຍາ ປີ 2019 ນອກ​ນັ້ນຍັງ​ໄດ້​ລາຍ​ງານ​ກ່ຽວ​ກັບ​ການ​ຊ່ວຍເຫຼືອ​ດ້ານ​ການ​ສຶກ​ສາ​ ຢູ່​ບັນດາ​ແຂວງ​ຕ່າງໆ​ໃນ​ປະເທດ​ລາວ ໂດຍ​ສະເພາະແມ່ນ​ການ​ກໍ່ສ້າງ​ໂຮງຮຽນ ແລະ ສູນ​ເຝິກຊ້ອມ​ກີລາ​ປິ່ງ​ປ໋ອງ ຢູ່​ແຂວງ​ສະຫວັນ​ນະ​ເຂດ​ຕື່ມ​ອີກ.

ຂ່າວທີ່ກ່ຽວຂ້ອງ