ສສຊ ຮັບຮອງເອົາກົດໝາຍການບິນພົນລະເຮືອນ

150 27 ມິ.ນ. 2018 ຂ່າວໜ້າ​ໜຶ່ງ
ສສຊ ຮັບຮອງເອົາກົດໝາຍການບິນພົນລະເຮືອນ

ກົດໝາຍ​ວ່າ​ດ້ວຍ​ການບິນ​ພົນ​ລະ​ເຮືອນ​ສະບັບ​ປັດຈຸບັນ ໄດ້​ປະກາດ​ໃຊ້​ຕາມ​ມະຕິ​ຕົກລົງ​ຂອງ​ສະພາ​ແຫ່ງ​ຊາດ ແລະ ລັດ​ຖະ​ດຳລັດ​ຂອງ​ປະທານ​ປະເທດ​ໃນ​ປີ 2005 ເປັນຕົ້ນ​ມາ ນັບ​ແຕ່​ນັ້ນ​ມາ​ກົດໝາຍ​ສະບັບ​ດັ່ງກ່າວ ໄດ້​ເປັນ​ພື້ນຖານ​ທາງ​ດ້ານ​ນິຕິ​ກຳ​ໃຫ້​ແກ່​ການຈັດຕັ້ງ​ປະຕິບັດ ​ວຽກ​ງານ​ການບິນ​ພົນ​ລະ​ເຮືອນ ​ໃນ​ຂອບ​ເຂດ​ທົ່ວ​ປະເທດ ແລະ ໄດ້​ປະສົບ​ຜົນສຳເລັດ​ເປັນ​ກ້າວໆ​ມາ ໂດຍ​ສະເພາະ ວຽກ​ງານ​ການ​ຂົນສົ່ງ​ທາງ​ອາກາດ ການ​ຈະລາຈອນ​ທາງ​ອາກາດ ການ​ຄຸ້ມ​ຄອງ​ສະໜາມ​ບິນ ແລະ ວຽກ​ງານ​ອື່ນໆ.

ແຕ່​ເຖິງ​ຢ່າງໃດ​ກໍ່​ຕາມ ກົດໝາຍ​ວ່າ​ດ້ວຍ​ການບິນ​ພົນ​ລະ​ເຮືອນ​ສະບັບ​ປັດຈຸບັນ ຍັງ​ບໍ່​ທັນ​ສາມາດ​ຕອບ​ສະໜອງ​ທັນ​ກັບ​ຄວາມ​ຮຽກຮ້ອງ​ຕ້ອງການ​ຂອງ​ວຽກ​ງານ​ຄຸ້ມ​ຄອງ ແລະ ການ​ພັດທະນາ​ການບິນ​ພົນ​ລະ​ເຮືອນ ແລະ ບໍ່​ສອດຄ່ອງ​ກັບ​ສະພາບ​ການ​ຂະຫຍາຍຕົວ​ດ້ານ​ການບິນ​ພົນ​ລະ​ເຮືອນ​ໃນ​ປັດຈຸບັນ ເຊິ່ງ​ເຫັນ​ໄດ້​ຈາກ​ການ​ມາ​ກວດ​ສອບ​ຄວາມ​ປອດ​ໄພ​ຮອບດ້ານ​ຂອງ​ອົງການ​ການບິນ​ພົນ​ລະ​ເຮືອນ​ສາກົນ​ໃນ​ປີ 2010 ແລະ 2015 ເພື່ອ​ຮັບປະກັນ​ການ​ຄຸ້ມ​ຄອງ​ບໍລິຫານ​ລັດ​ດ້ວຍ​ກົດໝາຍ ​ໃນ​ຂົງເຂດ​ການບິນ​ພົນ​ລະ​ເຮືອນ​ ໃຫ້​ມີ​ປະສິດທິພາບ ແລະ ປະ​ສິດທິ​ຜົນ​ສູງ​ ຈຳເປັນ​ຕ້ອງ​ໄດ້​ປັບປຸງ​ກົດໝາຍ​ສະບັບ​ປັດ​ຈຸບັນ​ໃຫ້​ຮັດກຸມ​ກວ່າ​ເກົ່າ ໃນ​ນັ້ນ ໄດ້​ກຳນົດ​ຫຼັກການ ແລະ ມາດ​ຕະການ​ລະອຽດ​ໃສ່​ເນື້ອ​ໃນ​ຂອງ​ຮ່າງ​ກົດໝາຍ​ໃຫ້​ຈະແຈ້ງ​ກວ່າ​ເກົ່າ.

ທ່ານ ບຸນ​ຈັນ ສິນ​ທະ​ວົງ ລັດຖະມົນຕີ​ກະຊວງ​ໂຍທາ​ທິ​ການ ແລະ ຂົນສົ່ງ ກ່າວ​ວ່າ: ເປັນ​ເວລາ 12 ປີຜ່ານມາ​ແລ້ວ ກົດໝາຍ​ສະບັບ​ປັດຈຸບັນ ຍັງ​ບໍ່​ໄດ້​ຮັບ​ການ​ປັບປຸງ​ໃຫ້​ສອດຄ່ອງ​ກັບ​ການ​ປ່ຽນແປງ​ທີ່​ເກີດ​ຂຶ້ນ​ໃນ​ແຕ່​ລະ​ໄລຍະ ໂດຍ​ອີງໃສ່​ມາດຕະຖານ ລະບຽບ​ການ ແລະ ການ​ແນະນຳ​ຂອງ​ອົງການ​ບິນ​ພົນ​ລະ​ເຮືອນ​ສາກົນ ຈຳເປັນ​ຕ້ອງ​ໄດ້​ປັບປຸງ​ກົດໝາຍ​ສະບັບ​ປັດຈຸບັນ ແລະ ນິຕິ​ກຳ​ກົດໝາຍ​ທີ່​ກ່ຽວຂ້ອງ ເນື້ອ​ໃນ​ບາງ​ມາດຕາ​ຂອງ​ກົດໝາຍ​ສະບັບ​ປັບປຸງ​ປັດຈຸບັນ​ຍັງ​ບໍ່​ລະອຽດ ບໍ່​ຄົບ​ຖ້ວນ ແລະ ບໍ່​ກວມ​ເອົາ​ວຽກ​ງານ​ການບິນ​ທົ່ວ​ໄປ ການ​ຂົນສົ່ງ​ວັດຖຸ​ອັນຕະລາຍ ແລະ ການ​ແບ່ງ​ຂັ້ນ​ຄຸ້ມ​ຄອງ​ລະຫວ່າງ​ອົງການ​ມະຫາ​ພາກ ແລະ ອົງການ​ຄຸ້ມ​ຄອງ​ຈຸ​ລະ​ພາກ.

ການ​ປັບປຸງ​ກົດໝາຍ​ວ່າ​ດ້ວຍ​ການບິນ​ພົນ​ລະ​ເຮືອນ (ປີ 2005) ມາ​ຮອດ​ປັດຈຸບັນ​ແມ່ນ​ສຳເລັດ​ໂດຍ​ພື້ນຖານ ເຊິ່ງ​ນຳ​ໃຊ້​ຮູບ​ແບບ​ໂຄງ​ສ້າງ​ກົດໝາຍ​ຂອງ ​ສປປ ລາວ ສຳລັບ​ເນື້ອ​ໃນ​ແມ່ນ​ໄດ້​ຄົ້ນຄວ້າ​ກົດໝາຍ​ຂອງ​ປະເທດ​ອ້ອມ​ຂ້າງ ແລະ ສາກົນ​ຈຳນວນ​ໜຶ່ງ ລວມ​ທັງ​ສະພາບ​ຄວາມ​ເປັນ​ຈິງ​ຂອງ​ບ້ານ​ເຮົາ ກົດໝາຍ​ວ່າ​ດ້ວຍ​ການບິນ​ພົນ​ລະ​ເຮືອນ (ສະບັບ​ປັບປຸງ) ປະກອບ​ດ້ວຍ XVIII ພາກ 27 ໝວດ ແລະ 173 ມາດຕາ ໃນ​ນັ້ນ ປັບປຸງ 67 ມາດຕາ ສ້າງ​ໃໝ່ 95 ມາດຕາ ແລະ ຮັກສາ​ໄວ້ 11 ມາດຕາ.

ກອງ​ປະຊຸມ​ສະໄໝ​ສາມັນ​ເທື່ອ​ທີ 5 ຂອງ​ສະພາ​ແຫ່ງ​ຊາດ ຊຸດ​ທີ VIII ໃນ​ວັນ​ທີ 26 ມິຖຸນາ 2018 ໂດຍ​ເປັນ​ປະທານ​ຂອງ​ທ່ານ ບຸນ​ປອນ ບຸດ​ຕະ​ນະ​ວົງ ຮອງ​ປະທານ​ສະພາ​ແຫ່ງ​ຊາດ ບັນດາ​ສະມາຊິກ​ສະພາ​ແຫ່ງ​ຊາດ (​ສສຊ) ໄດ້​ພ້ອມ​ກັນ​ຮັບຮອງ​ເອົາ​ກົດໝາຍ​ວ່າ​ດ້ວຍ​ການບິນ​ພົນ​ລະ​ເຮືອນ (ສະບັບ​ປັບປຸງ) ດ້ວຍ​ຄະແນນ​ສຽງ​ເປັນ​ສ່ວນ​ຫຼາຍ.

ຂ່າວທີ່ກ່ຽວຂ້ອງ