ຂ່າວຫຼ້າສຸດ

ນະຄອນຫຼວງ ຫ້າມລົດຂົນດິນອອກເຄື່ອນໄຫວໃນລະດູຝົນ

260 27 ມິ.ນ. 2018 ຂ່າວໜ້າ​ໜຶ່ງ

ປັດຈຸບັນ​ກ້າວ​ເຂົ້າ​ສູ່​ລະດູຝົນ ສະນັ້ນ ເພື່ອ​ຮັບປະກັນ​ໃຫ້​ແກ່​ລະບົບ​ໂຄງ​ລ່າງ​ເສັ້ນທາງ ຮ່ອງ​ລະບາຍ​ນ້ຳ​ຕາມ​ເສັ້ນທາງ ແກ້​ໄຂ​ການ​ອຸດ​ຕັນ ການ​ລະບາຍ​ນ້ຳ​ຕາມ​ເສັ້ນທາງ​ຕ່າງໆ ໃນ​ຕົວ​ເມືອງ​ໄລຍະ​ລະດູຝົນ ດັ່ງນັ້ນ ພະ​ແນກ​ໂຍທາ​ທິ​ການ ແລະ ຂົນສົ່ງ ນະຄອນຫຼວງ​ວຽງ​ຈັນ ຈຶ່ງ​ໄດ້​ມີ​ແຈ້ງ​ການ​ເຖິງ​ພໍ່​ແມ່​ປະຊາຊົນ ຜູ້​ປະກອບ​ການ​ຕ່າງໆ ໃຫ້​ຢຸດ​ເຊົາ​ຊົ່ວຄາວ ການ​ຂຸດ​ດິນ ຖົມ​ດິນ ແລະ ການ​ບໍລິການ​ຂົນສົ່ງ​ດິນ​ດຳ ດິນ​ແດງ ເພື່ອ​ປັບ​ໜ້າດິນ​ໃນ​ການ​ກໍ່ສ້າງ​ຕ່າງໆ.

ວັນ​ທີ 8 ມິຖຸນາ 2018 ພະ​ແນກ​ໂຍທາ​ທິ​ການ ແລະ ຂົນສົ່ງ ນະຄອນຫຼວງ​ວຽງ​ຈັນ ໄດ້​ອອກ​ແຈ້ງ​ການ​ສະບັບ​ເລກ​ທີ 2954/​ຍທຂ ນວ ເຖິງ​ພໍ່​ແມ່​ປະຊາຊົນ ຜູ້​ປະກອບ​ການ​ຂຸດ​ດິນ ຖົມ​ດິນ ແລະ ຂົນສົ່ງ​ດິນ​ທົ່ວ​ນະຄອນຫຼວງ​ວຽງ​ຈັນ ໃຫ້​ຢຸດ​ຊົ່ວຄາວ​ການ​ຂຸດ​ດິນ ຖົມ​ດິນ ແລະ ການ​ບໍລິການ​ຂົນສົ່ງ​ດິນ​ດຳ ດິນ​ແດງ ເພື່ອ​ປັບ​ໜ້າດິນ​ເຂົ້າ​ໃນ​ການ​ກໍ່ສ້າງ​ຕ່າງໆ​ໃນ​ໄລຍະ​ລະດູຝົນ ເພື່ອ​ຮັບປະກັນ​ໃຫ້​ແກ່​ການ​ປົກ​ປັກ​ຮັກສາ​ລະບົບ​ໂຄງ​ລ່າງ​ເສັ້ນທາງ ຮ່ອງ​ລະບາຍ​ນ້ຳ​ຕາມ​ເສັ້ນທາງ ຮ່ອງ​ລະບາຍ​ນ້ຳ​ສາທາລະນະ ຄວາມ​ເປັນ​ລະບຽບ​ຮຽບ​ຮ້ອຍ​ຕາມ​ຖະໜົນ​ຫົນທາງ ແລະ ຄວາມ​ສະອາດ​ຈົບງາມ​ຂອງ​ຕົວ​ເມືອງ ເຊິ່ງ​ໃນ​ແຈ້ງ​ການ​ໄດ້​ລະບຸ​ວ່າ: ນັບ​ແຕ່​ວັນ​ທີ 15 ມິຖຸນາ ຫາ 15 ຕຸລາ 2018 ຫ້າມ​ເດັດຂາດ.

ພະ​ແນກ​ໂຍທາ​ທິ​ການ ແລະ ຂົນສົ່ງ ນວ ຈະ​ໄດ້​ສົມທົບ​ກັບບ້ານ ເມືອງ ແລະ ຂະແໜງການ​ທີ່​ຂ້ອງ ໃຊ້​ມາດ​ຕະການ​ກ່າວ​ເຕືອນ ສຶກ​ສາ​ອົບຮົມ ແລະ ປັບ​ໃໝ ໃນ​ກໍລະນີ​ບຸກຄົນ​ຈະ​ໄດ້​ສະເໜີ​ໃຫ້​ປະຕິບັດ​ວິໄນ​ຕໍ່​ຜູ້​ລະເມີດ​ຕາມ​ກົດໝາຍ​ວາງ​ອອກ ໃນ​ກໍລະນີ​ຫົວໜ່ວຍ​ທຸລະ​ກິດ​ໄດ້​ສະເໜີ​ຫາ​ພາກສ່ວນ​ກ່ຽວຂ້ອງ ​ໂຈະ​ການ​ດຳເນີນ​ທຸລະ​ກິດ ແລ້ວແຕ່​ກໍລະນີໜັກ ຫຼື ເບົາ ຕາມ​ລະບຽບ​ການ ແລະ ກົດໝາຍ​ກຳນົດ.

ນອກ​ນັ້ນ ຫຼັງ​ຈາກ​ລະດູຝົນ ນັບ​ແຕ່​ວັນ​ທີ 16 ຕຸລາ 2018 ຫາ 14 ມິຖຸນາ 2019 ຖ້າ​ຫາ​ກວ່າ​ພໍ່​ແມ່​ປະຊາຊົນຊາວ​ຄ້າຂາຍ ພະນັກງານ ຫົວໜ່ວຍ​ທຸລະ​ກິດ ຜູ້​ປະກອບ​ການ​ຂຸດ​ດິນ ຖົມ​ດິນ ແລະ ຂົນສົ່ງ​ດິນ​ໃນ​ທົ່ວ​ນະຄອນຫຼວງ​ວຽງ​ຈັນ ທີ່​ມີ​ຈຸດ​ປະ​ສົ່ງ​ຕ້ອງການ​ປັບ (ການ​ຂຸດ​ດິນ ແລະ ຖົມ​ດິນ) ເພື່ອ​ພັດທະນາ ແລະ ປຸກ​ສ້າງ​ ແມ່ນ​ໃຫ້​ປະກອບ​ເອກະສານ​ສະເໜີ​ຂໍອະນຸຍາດ​ນຳ​ພາກສ່ວນ​ກ່ຽວຂ້ອງ ຕາມ​ທີ່​ໄດ້​ມີ​ການ​ແບ່ງ​ຂັ້ນ​ຄຸ້ມ​ຄອງ ລະຫວ່າງພະ​ແນກ ແລະ ບັນດາ​ເມືອງ ໂດຍ​ການ​ຖົມ​ດິນ​ທີ່​ມີ​ບໍ​ລິ​ມາດ​ບໍ່​ເກີນ 2 ພັນ​ແມັດ​ກ້ອນ ໃຫ້​ປະກອບ​ເອກະສານ​ສະເໜີ​ຂໍ້​ອະນຸຍາດ​ນຳ​ເມືອງ​ທີ່​ກ່ຽວຂ້ອງ ແລະ ຖ້າ​ຖົມ​ດິນ​ທີ່​ມີ​ບໍ​ລິ​ມາດ​ຫຼາຍ​ກວ່າ 2 ພັນ​ແມັດ​ກ້ອນ ແມ່ນ​ໃຫ້​ປະກອບ​ເອກະສານ​ຂໍອະນຸຍາດ​ນຳ​ພະ​ແນກ​ໂຍທາ​ທິ​ການ ແລະ ຂົນສົ່ງ ນະຄອນຫຼວງ​ວຽງ​ຈັນ.

ຂ່າວທີ່ກ່ຽວຂ້ອງ