ຂ່າວຫຼ້າສຸດ

ຮ່ວມກັນໂຄສະນາ ຕ້ານ ແລະ ຄວບຄຸມພະຍາດວັນນະໂຣກ

189 27 ມິ.ນ. 2018 ຂ່າວໜ້າ​ໜຶ່ງ

ກອງ​ປະຊຸມ​ສົນທະນາ​ຂໍ​ການ​ສະໜັບສະໜູນ ​ຮ່ວມ​ກັບ​ສື່​ມວນ​ຊົນ​ປຸກລະດົມ​ໂຄສະນາ ​ກ່ຽວ​ກັບ​ການ​ຄວບ​ຄຸມພະ​ຍາດວັນນະ​ໂຣກ​ໃນ ​ສປປ ລາວ ຈັດ​ຂຶ້ນ​ວັນ​ທີ 26 ມິຖຸນາ 2018 ທີ່​ພະ​ແນກ​ສາທາລະນະ​ສຸກ ນະຄອນຫຼວງ​ວຽງ​ຈັນ ເປັນ​ປະທານ​ຂອງ​ທ່ານ ​ພອນ​ປະເສີດ ອຸ​ນາ​ພົມ ຫົວໜ້າ​ພະ​ແນກ​ສາທາລະນະ​ສຸກ ນະຄອນຫຼວງ​ວຽງ​ຈັນ ມີ​ທ່ານ ພູ​ວັງ ຫວ່າງ​ວິຈິດ ຮອງ​ຫົວໜ້າ​ສູນ​ຄວບ​ຄຸມ​ວັນນະ​ໂຣກ ກະຊວງ​ສາທາລະນະ​ສຸກ ຕະຫຼອດ​ຮອດ​ສູນ​ຂ່າວສານ​ການ​ແພດ ສະຖານີ​ໂທລະພາບ ວິທະຍຸ ສື່​ສິ່ງ​ພິມ ວາລະສານ ແລະ ຫົວໜ້າ​ຫ້ອງການ​ສາທາລະນະ​ສຸກ 9 ຕົວ​ເມືອງ​ເຂົ້າ​ຮ່ວມ.

ເພື່ອ​ປຸກລະດົມ ແລະ ຂໍ​ການ​ສະໜັບສະໜູນ​ຈາກ​ສື່​ມວນ​ຊົນ​ ຕະຫຼອດ​ຮອດ​ພາກສ່ວນ​ຕ່າງໆ​ ໃນ​ການ​ກະຈາຍ​ຂ່າວ​ກ່ຽວ​ກັບ​ພະຍາດ​ວັນນະ​ໂຣກ​ໃຫ້​ແກ່​ປະຊາຊົນ ພ້ອມ​ນັ້ນ ເພື່ອ​ເຮັດ​ໃຫ້​ຄົນ​ທີ່​ມີ​ອາການ​ສົງ​ໃສ​ເປັນ​ພະຍາດ​ວັນນະ​ໂຣກ​ ໄດ້​ເຂົ້າ​ເຖິງ​ການບົ່ງມະຕິ​ໄວ ປິ່ນປົວ​ທັນ​ເວລາ ເພື່ອ​ຫຼຸດຜ່ອນ​ອັດຕາ​ການ​ຕາຍ ແລະ ການ​ກະຈາຍ​ຂອງ​ເຊື້ອ​ວັນນະ​ໂຣກ ນອກ​ນີ້ ເພື່ອ​ຢຸດຕິ​ພະຍາດ​ວັນນະ​ໂຣກ​ໃນ​ປີ 2035 ຕາມ​ທິດ​ຊີ້​ນຳ​ຂອງ​ສູນ​ຄວບ​ຄຸມ​ວັນນະ​ໂຣກ ກະຊວງ​ສາທາລະນະ​ສຸກ ກໍ່​ຄືອົງການ​ອະນາໄມ​ໂລກ (WHO).

ພະຍາດ​ວັນນະ​ໂຣກ​ຢູ່ ​ສປປ ລາວ ແມ່ນ​ມີ​ທ່າ​ອ່ຽງ​ເພີ່ມ​ຂຶ້ນ ເຊັ່ນ: ຄົນ​ເຈັບ​ວັນນະ​ໂຣກ​ທຸກ​ຮູບ​ແບບ​ມີ 4.638 ກໍລະນີ ໃນ​ປີ 2015 ມີ 4.981 ກໍລະນີ ໃນ​ປີ 2016 ມີ 5.934 ກໍລະນີ ໃນ​ປີ 2017 ເຊິ່ງ​ອົງການ​ອະນາໄມ​ໂລກ ​ໄດ້​ຄາດ​ຄະເນ​ກໍລະນີ​ວັນນະ​ໂຣກ​ໃໝ່​ປີ 2017 ແມ່ນ 168 ກໍລະນີ​ຕໍ່ 100.000 ປະຊາກອນ ອັດຕາ​ການ​ຊອກ​ຄົ້ນ​ໃຫ້​ໄດ້ 47% ນອກ​ນີ້ ວັນນະ​ໂຣກ​ດື້​ຢາ​ກໍ່​ມີ​ທ່າ​ອ່ຽງ​ເພີ່ມ​ຂຶ້ນ 24 ກໍລະນີ ໃນ​ປີ 2014 ແລະ 38 ກໍລະນີ ໃນ​ປີ 2015 ສ່ວນ​ນະຄອນຫຼວງ​ວຽງ​ຈັນ ອັດຕາ​ການ​ແຈ້ງ​ກໍລະນີ​ໃໝ່ ປີ 2017 ແມ່ນ 168 ກໍລະນີ ຕໍ່ 100.000 ປະຊາກອນ ອັດຕາ​ຊອກ​ຄົ້ນ​ໄດ້ 72% ປີ 2018 ຄາດ​ຄະເນ​ກໍລະນີ​ວັນນະ​ໂຣກ​ໃໝ່​ແມ່ນ 160 ກໍລະນີ ຕໍ່ 100.000 ປະຊາກອນ ອັດຕາ​ການ​ຊອກ​ຄົ້ນ​ໃຫ້​ໄດ້ 78%.

ຂ່າວທີ່ກ່ຽວຂ້ອງ