ຂ່າວຫຼ້າສຸດ

ນາຊາຍທອງ ປູກເຂົ້າຕາມທິດຫັນເປັນທັນສະໄໝ

210 27 ມິ.ນ. 2018 ຂ່າວໜ້າ​ໜຶ່ງ
ນາຊາຍທອງ ປູກເຂົ້າຕາມທິດຫັນເປັນທັນສະໄໝ

ຂະແໜງ​ປູກຝັງ ພະ​ແນກ​ກະສິກຳ ແລະ ປ່າໄມ້ ນະຄອນຫຼວງ​ວຽງ​ຈັນ ຮ່ວມ​ກັບ​ຫ້ອງການ​ກະສິກຳ​ເມືອງ​ນາ​ຊາຍ​ທອງ ແລະ ບໍລິສັດ ​ອິນ​ຊີ​ທອງມໍ​ເຕີ ຈຳກັດ​ຜູ້​ດຽວ ເປີດ​ຂະ​ບວນ​ການ​ປູກ​ເຂົ້າ​ຕາມ​ທິດ​ຫັນ​ເປັນ​ທັນ​ສະໄໝ ແລະ ຫຼຸດຜ່ອນ​ແຮງ​ງານ​ຊາວນາ ຂຶ້ນ​ວັນ​ທີ 26 ມິຖຸນາ 2018 ນີ້ ທີ່​ບ້ານເປີກ ເມືອງ​ນາ​ຊາຍ​ທອງ ນະຄອນຫຼວງ​ວຽງ​ຈັນ ໂດຍ​ມີ​ທ່ານ ວິລະ​ສັກ ນາມ​ມຸນຕີ ເຈົ້າເມືອງ​ນາ​ຊາຍ​ທອງ ທ່ານ ເກສອນ ເທບ​ຄຳ​ເຮືອງ ຮອງ​ຫົວໜ້າ​ພະ​ແນກກະສິກຳ ແລະ ປ່າໄມ້ນະຄອນຫຼວງ ມີ​ຕາງໜ້າ​ບໍລິສັດ​ ອິນ​ຊີ​ທອງມໍ​ເຕີ ຈຳກັດ​ຜູ້​ດຽວ ຫົວໜ້າ​ຂະແໜງ​ປູກຝັງ ພະນັກງານ​ວິຊາ​ການ ຊາວ​ກະສິກອນ​ເຂົ້າ​ຮ່ວມ.

ທ່ານ ຄຳ​ໄພ ພົມມະຈັນ ຫົວໜ້າ​ຫ້ອງການ​ກະສິກຳ ແລະ ປ່າໄມ້​ເມືອງ ກ່າວ​ວ່າ: ການ​ເປີດ​ຂະ​ບວນ​ການ​ປູກ​ເຂົ້າ​ດ້ວຍ​ກົນ​ຈັກ​ຄັ້ງ​ນີ້ ແມ່ນ​ໄດ້​ນຳ​ໃຊ້​ເຄື່ອງ​ຈັກ​ດຳນາ ຢູ່​ໃນ​ເນື້ອທີ່ 5 ໄລ່ ເຊິ່ງ​ເປັນ​ຕົວ​ແບບ​ໜຶ່ງ ​ເພື່ອ​ຢາກ​ໃຫ້​ຊາວ​ກະສິກອນ​ມີ​ທາງ​ເລືອກ​ໃນ​ການ​ຫຼຸດຜ່ອນ​ແຮງ​ງານ​ຄົນ ​ໃນ​ການ​ປັກ​ດຳ​ເຂົ້າ ແລະ ຍັງ​ມີ​ຫຼາຍ​ວິທີ​ການ ໂດຍ​ສະເພາະ​ແມ່ນ​ການ​ນຳ​ໃຊ້​ເຄື່ອງ ນາຫວ່ານ ນາ​ໂຍນ ທີ່​ເປັນ​ເຕັກນິກ​ໜຶ່ງ​ທີ່​ຫຼຸດຜ່ອນ​ແຮງ​ງານ​ຂອງ​ຊາວ​ກະສິກອນ ໃນ​ການ​ຜະລິດ​ກະສິກຳ ເຖິງ​ແນວໃດ​ກໍ່​ຕາມ ເພື່ອ​ໃຫ້​ເປັນ​ຂະ​ບວນ​ການ ແລະ ສາທິດ​ໃຫ້​ຊາວ​ກະສິກອນ ພໍ່​ແມ່​ປະຊາຊົນ​ເບິ່ງ​ວິທີ​ການ​ເຮັດ ເພື່ອ​ເຮັດ​ໃຫ້​ຊາວ​ນະຄອນຫຼວງ​ວຽງ​ຈັນ ກໍ່​ຄືຊາວນາ​ຢູ່​ກຸ່ມ​ອີ່​ໄລ ໄດ້​ເຫັນ ແລະ ຮຽນ​ຮູ້​ກ່ຽວ​ກັບ​ວິທີ​ການ​ດຳນາ​ດ້ວຍ​ເຄື່ອງ​ຈັກ ໄດ້​ນຳໄປ​ຈັດ​ຕັ້ງ​ປະຕິບັດ ໃນ​ການ​ປະຢັດ​ຕົ້ນ​ທຶນ ປະຢັດ​ເວລາ ແລະ ປະຢັດ​ແຮງ​ງານ​ນຳ​ອີກ ເມື່ອ​ທຽບໃສ່​ການ​ປັກ​ດຳ ແລະ ໃຊ້​ເຄື່ອງ​ຈັກ​ດຳນາ​ນີ້​ແມ່ນ​ຈະ​ເປັນ​ແຖວ​ຈົບງາມ​ດີ​ກ່ອນ​ຄົນ​ປັກ​ດຳ ເມື່ອ​ເວລາ​ຕົ້ນ​ເຂົ້າ​ໃຫຍ່​ຂຶ້ນ​ມາ ແລະ ງ່າຍ​ຕໍ່​ການ​ໃສ່​ຝຸ່ນ ພ້ອມ​ທັງ​ສາມາດ​ຮັກສາ​ໄດ້​ສະມັດຖະພາບ​ການ​ຜະລິດ​ກໍ່​ດີ​ກວ່າ​ເອົາ​ຄົນ​ປັກ​ດຳ ສຳລັບ​ທົ່ວ​ເມືອງ​ນາ​ຊາຍ​ທອງ ມີ​ເນື້ອທີ່​ນາ​ແຜນການ​ທັງ​ໝົດ 7.994 ເຮັກຕາ ແຜນການ​ຕົກກ້າ 639 ໂຕນ ແລະ ມາ​ຮອດ​ປັດຈຸບັນ​ແມ່ນ​ຕົກກ້າ​ໄດ້ 155 ໂຕນ ໃນ​ນັ້ນ ເຮັດ​ນາຫວ່ານ 3.847 ເຮັກຕາ ນາ​ດຳ​ໄດ້ 2,60 ເຮັກຕາ ຜ່ານ​ມາ​ດຳ​ດ້ວຍ​ກົນ​ຈັກ 0,8 ເຮັກຕາ ປັດຈຸບັນ​ແມ່ນ​ສາມາດ​ປັກ​ດຳ​ໄດ້​ປະມານ 65% ຂອງເນື້ອທີ່​ທັງ​ໝົດ.

ຂ່າວທີ່ກ່ຽວຂ້ອງ