ຂ່າວຫຼ້າສຸດ

ຫາລືວຽກງານ ປກຊ-ປກສ ໂຄງການກໍ່ສ້າງທາງລົດໄຟ ລາວ-ຈີນ

217 26 ມິ.ນ. 2018 ຂ່າວໜ້າ​ໜຶ່ງ
ຫາລືວຽກງານ ປກຊ-ປກສ ໂຄງການກໍ່ສ້າງທາງລົດໄຟ ລາວ-ຈີນ

ວັນ​ທີ 22 ມິຖຸນາ 2018 ທ່ານ ບຸນ​ທອງ ຈິດ​ມະນີ ຮອງ​ນາຍົກລັດຖະມົນຕີ ປະທານ​ຄະນະ​ກວດກາ​ສູນ​ກາງ​ພັກ-ອົງການ​ກວດກາ​ລັດຖະບານ ແລະ ຫົວໜ້າ​ອົງການ​ຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ ເປັນ​ປະທານ​ກອງ​ປະຊຸມ​ປຶກສາ​ຫາລື​ກ່ຽວ​ກັບ​ການ​ປະສານ​ງານ​ວຽກ​ງານ ​ປກຊ-​ປກສ ຂອງ​ໂຄງການ​ທາງ​ລົດໄຟ ລາວ-ຈີນ ທີ່​ນະຄອນຫຼວງ​ພະ​ບາງ ມີ​ທ່ານ​ເຈົ້າແຂວງ ຮອງ​ເຈົ້າແຂວງ ບັນດາ​ແຂວງ​ທີ່​ທາງ​ລົດໄຟ​ຜ່ານ ຮອງ​ລັດຖະມົນຕີ ບັນດາ​ກະຊວງ​ທີ່​ກ່ຽວຂ້ອງ ບໍລິສັດ​ ລົດໄຟ ລາວ-ຈີນ ຕາງໜ້າ​ບໍລິສັດ​ຮັບ​ເໝົາ​ກໍ່ສ້າງ ແລະ ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

ກອງ​ປະຊຸມ​ໄດ້​ຮັບ​ຟັງ​ລາຍ​ງານ​ສະພາບ​ການ​ຄຸ້ມ​ຄອງ​ປ້ອງ​ກັນ​ຄວາມ​ສະຫງົບ ໂຄງການ​ກໍ່ສ້າງ​ທາງ​ລົດໄຟ ລາວ-ຈີນ ແຕ່​ລະ​ໄລຍະ ສະພາບ​ຄວາມ​ຫຍຸ້ງຍາກ ແລະ ປາກົດການ​ຫຍໍ້ທໍ້​ຕ່າງໆ​ທີ່​ເກີດ​ຂຶ້ນ​ໃນ​ໄລຍະ​ຜ່ານ​ມາ ການຊອກ​ຫາ​ວິທີ​ແກ້​ໄຂ ການ​ປ້ອງ​ກັນ​ຄວາມ​ສະຫງົບ​ໃນ​ຂອບ​ເຂດ​ບໍລິເວນ​ໂຄງການ​ກໍ່ສ້າງ​ ຈາກ​ພາກສ່ວນ​ທີ່​ກ່ຽວຂ້ອງ ຈາກ​ນັ້ນ ຜູ້​ເຂົ້າ​ຮ່ວມ​ກອງ​ປະຊຸມ​ໄດ້​ພ້ອມ​ກັນ​ປະກອບ​ຄຳ​ເຫັນ​ຕໍ່​ກັບ​ດ້ານ​ດີ-ດ້ານ​ອ່ອນ ແລະ ຂໍ້ຄົງຄ້າງກ່ຽວ​ກັບ​ການ​ປະສານ​ງານ​ວຽກ​ງານ ​ປກຊ-​ປກສ ເພື່ອ​ເປັນ​ທິດ​ທາງ​ໃນ​ການ​ແກ້​ໄຂ​ບັນຫາ ແລະ ຮ່ວມ​ມື​ກັນ​ແກ້​ໄຂ​ໃນຕໍ່ໜ້າ.

ຈາກ​ນັ້ນ ທ່ານ​ຮອງ​ນາຍົກລັດຖະມົນຕີ ໄດ້​ໃຫ້​ກຽດ​ໂອ້​ລົມ​ຕໍ່​ກອງ​ປະຊຸມ ໂດຍ​ທ່ານ​ໄດ້​ສະແດງ​ຄວາມ​ຊົມເຊີຍ​ຕໍ່​ບັນດາ​ພາກສ່ວນ​ທີ່​ກ່ຽວຂ້ອງ ​ທີ່​ໄດ້​ເອົາໃຈໃສ່​ປະຕິບັດ​ໜ້າທີ່​ວຽກ​ງານ​ຂອງ​ຕົນ​ຢ່າງ​ຕັ້ງໜ້າ ອັນ​ໄດ້​ປະກອບສ່ວນ​ເຮັດ​ໃຫ້​ໂຄງການ​ກໍ່ສ້າງ​ທາງ​ລົດໄຟ ລາວ-ຈີນ ດຳເນີນ​ໄປ​ຢ່າງ​ສະດວກ​ວ່ອງໄວ ແລະ ໄດ້​ຕາມ​ລະດັບ​ຄາດໝາຍ​ທີ່​ໄດ້​ກຳນົດ​ໄວ້ ພ້ອມ​ກັນ​ນັ້ນ ທ່ານ​ຍັງ​ໃຫ້​ທິດ​ຊີ້​ນຳ​ຕໍ່​ກັບ​ວຽກ​ງານ ​ປກຊ-​ປກສ ບໍ່​ໃຫ້​ມີ​ປາກົດການ​ຫຍໍ້ທໍ້​ທີ່​ບໍ່​ດີ​ເກີດ​ຂຶ້ນ ແລະ ພ້ອມ​ທັງ​ຮຽກຮ້ອງ​ໃຫ້​ພາກສ່ວນ​ທີ່​ກ່ຽວຂ້ອງ ກໍ່​ຄືທຸກ​ຂະແໜງການ​ຂອງ​ສູນ​ກາງ ແລະ ທ້ອງຖິ່ນ ໂດຍ​ສະເພາະ​ຄະນະ​ຄຸ້ມ​ຄອງ​ໂຄງການ​ກໍ່ສ້າງ​ທາງ​ລົດໄຟ ລາວ-ຈີນ ກະຊວງ​ປ້ອງ​ກັນ​ປະເທດ ກະຊວງ​ປ້ອງ​ກັນ​ຄວາມ​ສະຫງົບ ບັນດາ​ແຂວງ​ທີ່​ທາງ​ລົດໄຟ​ຜ່ານ ບໍລິສັດ​ຮັບ​ເໝົາ​ກໍ່ສ້າງ​ໃນ​ແຕ່​ລະ​ສັນຍາ (1-6) ໃຫ້​ພ້ອມ​ກັນ​ເອົາໃຈໃສ່​ສ້າງ​ແບບແຜນ​ໃນ​ການ​ປະສານ​ງານ​ຢ່າງ​ກົມກຽວ ປະຕິບັດ​ໜ້າທີ່​ຂອງ​ໃຜລາວ​ໃຫ້​ມີ​ປະສິດທິພາບ​ສູງ​ກວ່າ​ເກົ່າ ຮັບປະກັນ​ໃຫ້​ໂຄງການ​ກໍ່ສ້າງ​ທາງ​ລົດໄຟ ລາວ-ຈີນ ດຳເນີນ​ໄປ​ດ້ວຍ​ຄວາມ​ສະຫງົບ​ປອດ​ໄພ ແລະ ສຳເລັດ​ຕາມ​ແຜນການ​ທີ່​ວາງ​ໄວ້.

ຂ່າວທີ່ກ່ຽວຂ້ອງ