ກົດໝາຍວ່າດ້ວຍການໃຫ້ວັກຊີນກັນພະຍາດ ຈະຊ່ວຍປົກປ້ອງສຸຂະພາບຊີວິດ ແລະ ຊັບສິນຂອງປະຊາຊົນ

170 26 ມິ.ນ. 2018 ຂ່າວໜ້າ​ໜຶ່ງ
ກົດໝາຍວ່າດ້ວຍການໃຫ້ວັກຊີນກັນພະຍາດ ຈະຊ່ວຍປົກປ້ອງສຸຂະພາບຊີວິດ ແລະ ຊັບສິນຂອງປະຊາຊົນ

ກອງ​ປະຊຸມ​ສະໄໝ​ສາມັນ​ເທື່ອ​ທີ 5 ຂອງ​ສະພາ​ແຫ່ງ​ຊາດ ຊຸດ​ທີ 8 ໄດ້​ດຳເນີນ​ມາ​ຮອດ​ວັນ​ທີ 25 ມິຖຸນາ 2018 ເປັນ​ປະທານ​ຂອງ​ທ່ານ ບຸນ​ປອນ ບຸດ​ຕະ​ນະ​ວົງ ຮອງ​ປະທານ​ສະພາ​ແຫ່ງ​ຊາດ ເຊິ່ງ​ສະມາຊິກ​ສະພາ​ແຫ່ງ​ຊາດ ໄດ້​ພ້ອມ​ກັນ​ປະກອບ​ຄຳ​ເຫັນ​ໃສ່​ຮ່າງ​ກົດໝາຍ​ວ່າ​ດ້ວຍ​ການ​ໃຫ້​ວັກ​ຊີນ​ກັນ​ພະຍາດ (ສ້າງ​ໃໝ່) ເພື່ອ​ນຳໄປ​ປັບປຸງ​ແກ້​ໄຂ​ກົດໝາຍ​ດັ່ງກ່າວ​ໃຫ້​ດີ​ຂຶ້ນ​ກວ່າ​ເກົ່າ.

ກອງ​ປະຊຸມ​ໄດ້​ຮັບ​ຟັງ​ການ​ສະເໜີ​ຮ່າງ​ກົດໝາຍ​ວ່າ​ດ້ວຍ​ການ​ໃຫ້​ວັກ​ຊີນ​ກັນ​ພະຍາດ (ສ້າງ​ໃໝ່) ຈາກ​ທ່ານ ​ຮສ.​ດຣ ບຸນ​ກອງ ສີ​ຫາ​ວົງ ລັດຖະມົນຕີ​ກະຊວງ​ສາ​ທາລະນະ​ສຸກ ເຊິ່ງ​ຜ່ານ​ການຈັດຕັ້ງ​ປະຕິບັດ​ດຳລັດ​ວ່າ​ດ້ວຍ​ການ​ໃຫ້​ວັກ​ຊີນ​ກັນ​ພະຍາດ​ຜ່ານ​ມາ ເຫັນ​ວ່າ​ມີ​ບາງ​ເຫດຜົນ ແລະ ຄວາມ​ຈຳເປັນ​ໃນ​ການ​ສ້າງ​ກົດໝາຍ​ວ່າ​ດ້ວຍ​ການ​ໃຫ້​ວັກ​ຊີນ​ກັນ​ພະຍາດ ເພື່ອ​ໃຫ້​ວຽກ​ງານ​ໃຫ້​ວັກ​ຊີນ​ກັນ​ພະຍາດ ໄດ້​ຮັບ​ການ​ຄຸ້ມ​ຄອງ​ດ້ວຍ​ກົດໝາຍ ຕາມ​ແນວທາງ ແລະ ນະໂຍບາຍ​ຂອງ​ລັດ ກ່ຽວ​ກັບ​ການ​ສ້າງ​ລັດ​ໃຫ້​ເປັນ​ລັດ​ທີ່​ປົກຄອງ​ດ້ວຍ​ກົດໝາຍ ການ​ເຊື່ອມ​ໂຍງ​ກັບ​ສາກົນ ແລະ ການ​ຮ່ວມ​ມື​ລະຫວ່າງ​ບັນດາ​ປະເທດ​ໃນ​ພາກ​ພື້ນ ແລະ ໃນ​ທົ່ວ​ໂລກ ເພື່ອ​ເຮັດ​ໃຫ້ການ​ຄຸ້ມ​ຄອງ ແລະ ການ​ພັດທະນາ​ວຽກ​ງານ​ໃຫ້​ວັກ​ຊີນ​ກັນ​ພະຍາດ ມີ​ປະສິດທິພາບ ແລະ ປະ​ສິດທິ​ຜົນ ແນໃສ່​ປົກ​ປ້ອງ​ຄຸນະພາບ​ຊີວິດ ແລະ ຊັບ​ສິນ​ຂອງ​ປະຊາຊົນ​ບັນດາເຜົ່າ ໃຫ້​ພົ້ນ​ຈາກ​ຜົນ​ຮ້າຍ​ຂອງ​ພະຍາດ​ທີ່​ສາມາດ​ກັນ​ໄດ້​ດ້ວຍ​ວັກ​ຊີນ.

ນອກຈາກ​ນີ້ ຍັງ​ເຮັດ​ໃຫ້​ການເຄື່ອນໄຫວ​ວຽກ​ງານ​ໃຫ້​ວັກ​ຊີນ​ກັນ​ພະຍາດ ໄດ້​ຮັບ​ການຈັດຕັ້ງ​ປະຕິບັດ​ຢ່າງ​ທົ່ວ​ເຖິງເປັນ​ລະບົບ​ຕໍ່​ເນື່ອງ ແລະ ຍືນ​ຍົງ​ພ້ອມ​ທັງ​ເປັນ​ບ່ອນ​ອີງ​ໃຫ້​ຂະແໜງ​ສາທາລະນະ​ສຸກ ແລະ ຂະແໜງການ​ອື່ນ​ກ່ຽວຂ້ອງ ໃນ​ການ​ປະສານ​ສົມທົບການ​ມີ​ສ່ວນ​ຮ່ວມ ແລະ ເປັນ​ເຈົ້າ​ການ​ຂອງ​ທຸກ​ພາກສ່ວນ​ໃນ​ສັງຄົມ ຮັບປະກັນ​ໃຫ້​ພົນລະເມືອງ​ລາວ​ທຸກ​ຄົນ​ຄົນ​ຕ່າງ​ດ້າວ ແລະ ຄົນ​ຕ່າງປະເທດ ທີ່​ກຳລັງ​ດຳລົງ​ຊີວິດ​ຢູ່​ໃນ ​ສປປ ລາວ ໂດຍ​ບໍ່​ຈຳແນກ​ຊົນເຜົ່າ ເພດ ໄວ ເຊື້ອ​ຊາດ ສັນຊາດ ສາສະໜາ ຖານະ​ທາງ​ດ້ານ​ເສດຖະກິດ-ສັງຄົມ ລ້ວນ​ແຕ່​ມີ​ສິດ​ໄດ້​ຮັບ​ວັກ​ຊີນ​ກັນ​ພະຍາດ ຂໍ້​ມູນ-ຂ່າວສານ ຄຳ​ແນະນຳ​ກ່ຽວ​ກັບ​ການ​ໃຫ້ ແລະ ຮັບ​ວັກ​ຊີນ​ກັນ​ພະຍາດ.

ຜ່ານ​ການ​ປະກອບ​ຄຳ​ເຫັນ​ຂອງ ​ສສຊ ໃນ​ຕອນ​ທ້າຍ​ປະທານ​ກອງ​ປະຊຸມ​ກໍ່​ໄດ້​ໃຫ້ ​ສສຊ ລົງ​ຄະແນນ​ສຽງ ເຊິ່ງ​ບັນດາ ​ສສຊ ໄດ້​ຮັບຮອງ​ເອົາ​ກົດໝາຍ​ວ່າ​ດ້ວຍ​ການ​ໃຫ້​ວັກ​ຊີນ​ກັນ​ພະຍາດ ດ້ວຍ​ສຽງ​ສ່ວນ​ຫຼາຍ.

ຂ່າວທີ່ກ່ຽວຂ້ອງ